Parig-ona an Imo Pagsarig kan Jehova

Usa nga plano ha pagpatay an ginhihimo. An ngatanan higtaas nga mga opisyal han nasud nagsarabot ngan nagkaurosa ha paghimo hin bag-o nga balaud. Karuyag nira nga sirotan hin kamatayon an bisan hin-o nga magbuhat hin pagsingba nga diri gintutugotan han Estado.

PAMILYAR ba ini? An kasaysayan puno hin mga ehemplo mahitungod han mga tawo nga nagpaplano hin karaotan pinaagi han balaud. An kahimtang nga ginhisgotan ha igbaw nahitabo ha Imperyo han Persia ha panahon ni propeta Daniel. An balaud, nga gin-aprobahan ni Hadi Dario, nagdeklara: “Bisan hin-o [nga] mangaro hin usa nga pangamaya ha bisan ano nga dios o tawo ha katloan ka adlaw, gawas la ngada ha imo, O hadi, hiya ilalabog ngadto ha panluuban han mga leon.”—Daniel 6:7-9.

Ano an bubuhaton ni Daniel ilarom han tarhog nga kamatayon? Magpapadayon ba hiya pagsarig ha iya Dios, nga hi Jehova, o magkukompromiso ba hiya ngan masugot ha sugo han hadi? An rekord nagsusumat ha aton: “Han pakasabot ni Daniel nga an sinurat pinirmahan na, hiya nasingadto ha iya balay (ngan an iya mga bintana inabrihan ha iya sulod tipakadto ha Jerusalem); ngan hiya linuhod ha iya mga tuhod ha nakatutulo ha usa ka adlaw, ngan nag-ampo, ngan naghatag hin pagpasalamat ha atubangan han iya Dios, sugad han iya binubuhat han hadto pa nga panahon.” (Daniel 6:10) An nahibilin nga bahin han asoy hinbabaroan gud. Iginlabog hi Daniel ngadto ha lungib han mga leon tungod han iya pagtoo, kondi hi Jehova “nagguom han mga baba han mga leon” ngan nagtalwas han iya maunungon nga sumurunod.—Hebreo 11:33; Daniel 6:16-22.

 Panahon Para ha Pag-usisa ha Kalugaringon

Yana nga panahon, an mga surugoon ni Jehova nagkikinabuhi ha madarahog nga kalibotan, naatubang hin damu nga mga tarhog ha ira pisikal ngan espirituwal nga kaopayan. Pananglitan, ha hayupnon madarahog nga kapungot ha iba an rasa ha pipira nga mga nasud, damu nga mga Saksi an ginpapatay. Ha iba nga mga lugar, an mga surugoon ni Jehova naatubang hin kakulang ha pagkaon, mga kakurian ha pinansyal, natural nga mga kalamidad, grabe nga sakit, ngan iba pa peligroso nga mga kahimtang. Dugang pa, kinahanglan hira mag-antos hin pagtimaraot, mga pag-ipit ha trabaho, ngan magkalainlain nga mga pagsulay basi magbuhat hin sayop, nga ini ngatanan mahimo makadaot han ira espirituwalidad. Oo, an daku nga Kaaway, hi Satanas, disidido ha pagbungkag han mga surugoon ni Jehova ha bisan ano nga paagi nga maglalampos.—1 Pedro 5:8.

Kon naatubang ha sugad nga mga kahimtang, ano an aton mahihimo? Bisan kon natural la nga umabat hin kahadlok kon gintatarhog an kinabuhi han usa, mahimo naton hunahunaon pirme an makaparig-on nga mga pulong ni apostol Pablo: “Kay [hi Jehova] ngahaw nagsiring: Diri ko gud ikaw [babayaan], ngan diri gud ko ikaw [pababay-an]. Basi kita makasiring hin masinarigon gud: An Ginoo amo an akon paratambulig; diri ako mahahadlok: Ano ba an mabubuhat han tawo ha akon?” (Hebreo 13:5, 6) Makakasarig kita nga pariho an inaabat ni Jehova mahitungod han iya mga surugoon yana nga panahon. Kondi, an pakahibaro han saad ni Jehova diri pariho han pagin kombinsido nga magios hiya para ha aton. Salit importante nga aton usisahon an basihan han pagsarig kan Jehova ngan aton buhaton an ngatanan nga aton mahihimo ha pagparig-on ngan pagtipig hito nga pagsarig. Kon aton bubuhaton ito, “an kamurayawan han Dios, nga labaw ha ngatanan nga hibabroan, magbabantay ha [aton] mga kasingkasing ngan ha [aton] mga hunahuna kan Kristo Jesus.” (Filipos 4:7) Salit kon umabot an mga pagsari, mahibabaro kita paghunahuna hin maopay ngan pag-atubang hito ha maaramon nga paagi.

Basihanan Para han Pagsarig kan Jehova

Damu gud an aton mga hinungdan ha pagsarig ha aton Maglalarang, hi Jehova. Siyahan hito amo an kamatuoran nga hi Jehova mahigugmaon nga Dios nga totoo gud nga nagmamangno ha iya mga surugoon. Damu an mga kahimtang nga nakarekord ha Biblia nga nagsusumat han mahigugmaon nga pagmangno ni Jehova ha iya mga surugoon. Ha pagsaysay han iya pakig-upod ha iya pinili nga katawohan, an Israel, hi Moises nagsurat: “Hin-agian niya hiya ha tuna ha kamingawan, ngan ha baya nga nag-oowang nga kamingawan; Inagbayan hiya niya, iya hiya gintimangno. Hiya nagbantay ha iya sugad han tawotawo han iya mata.” (Deuteronomio 32:10) Ha moderno nga mga panahon, hi Jehova padayon nga nag-aataman hin maopay han iya mga surugoon, sugad nga grupo ngan sugad nga mga indibiduwal. Pananglitan, han an pipira nga mga Saksi ni Jehova nakaeksperyensya hin sobra nga kakulang hin pagkaon durante han girra sibil ha Bosnia, ginsiguro ni Jehova nga makarawat nira an ginkikinahanglan gud nga mga suplay pinaagi han maisugon nga pangalimbasog han ira kabugtoan tikang ha Croatia ngan Austria, nga nameligro an ira mga kinabuhi ha pagbiyahe ngadto ha peligroso gud nga teritoryo basi magdara hin bulig nga materyal ha ira kabugtoan. a

Tungod kay hi Jehova nga Dios an Makagarahum-ha-ngatanan, sigurado nga maaakos niya panalipdan an iya mga surugoon ha bisan ano nga kahimtang. (Isaias 33:22; Pahayag 4:8) Kondi, bisan kon gintutugotan ni Jehova an iba han iya mga surugoon nga sarihan an pagkamatinumanon tubtob ha kamatayon, iya pa gihapon ginpapakusog ngan ginbubuligan hira nga matipigan an ira integridad, salit nagpapadayon hira nga marig-on, malipayon, ngan kalmado tubtob ha kataposan. Salit mahimo kita magkaada pagsarig sugad han salmista: “An Dios amo an aton arayupan ngan an aton kusog, an parabulig gud ha panahon han kakurian. Busa ayaw kita kahadlok, bisan an tuna mabantad, ngan bisan pa an mga bukid bumantad ngadto ha butnga han mga kadagatan.”—Salmo 46:1 2.

An Biblia liwat nagpapahayag nga hi Jehova amo an Dios han kamatuoran. Nangangahulogan ini nga pirme niya gintutuman an iya mga saad. Ha pagkamatuod, iginsasaysay hiya han Biblia sugad nga Dios nga “diri makakagbuwa.” (Tito 1:2) Tungod kay gin-uroutro ni Jehova an iya pagkadisidido ha pagpanalipod ngan pagtalwas ha iya mga surugoon, makakasiguro gud kita nga diri la hiya  makakahimo kondi andam liwat pagtuman han iya mga saad.—Job 42:2.

Mga Paagi ha Pagparig-on han Aton Pagsarig

Bisan kon mayada kita han ngatanan nga hinungdan ha pagsarig kan Jehova, diri naton hunahunaon nga pirme kita magkakaada hito nga pagsarig kan Jehova. Tungod ini kay an kalibotan ha kabug-osan gutiay la an pagtoo ha Dios, ngan an sugad nga paggios madagmit magpaluya han aton pagsarig kan Jehova. Salit, kinahanglan mangalimbasog gud kita ha pagparig-on ngan pagtipig hito nga pagsarig. Maaram gud hi Jehova hini, ngan naghahatag hiya han mga paagi han aton pagbuhat hito.

Siyahan ha ngatanan, iya igintatagana an iya sinurat nga Pulong, an Biblia, nga nagrirekord han damu gamhanan nga mga buhat nga iya ginhimo para ha iya mga surugoon. Hunahunaa la, mationan-o kadaku an imo pagsarig ha usa kon an imo la hinbabaroan amo an iya ngaran? Bangin gutiay gud la, kon mayada man. Kinahanglan hibaroan mo an iya mga paagi ngan an iya mga buhat basi sarigan hiya, diri ba? Samtang aton ginbabasa ngan ginpapamalandong an sugad nga mga asoy ha Biblia, naghihilarom an aton kahibaro kan Jehova ngan ha iya makatarag-ob nga mga paagi, ngan mas naaapresyar naton nga masasarigan gud hiya. Salit napaparig-on an aton pagsarig ha iya. An salmista naghatag hin maopay gud nga susbaranan han hiya kinasingkasing nga nag-ampo ha Dios: “Maghihimangraw ako han mga buhat ni Jehova; Kay hinunumduman ko an imo mga urusahon [nga buhat ha naglabay]. Mamamalandong liwat ako han bug-os mo nga buhat, ngan magdudumdom han imo mga binuhatan.”—Salmo 77:11, 12.

Dugang pa han Biblia, mayada kita hura nga surok han espirituwal nga pagkaon ha mga publikasyon han Biblia nga iginpupublikar han organisasyon ni Jehova. Ini nga mga publikasyon agsob nga mayada makapaaghat nga mga asoy mahitungod han mga surugoon han Dios ha moderno nga mga panahon, nga nagpapakita kon paonan-o hi Jehova binulig ngan nagliaw han inatubang hira ha makuri nga mga kahimtang. Pananglitan, hi Martin Poetzinger, nga ha urhi nagin membro han Nagmamando nga Lawas han mga Saksi ni Jehova, nagkasakit hin grabe samtang nagpapayunir ha mga lugar han Europa nga hirayo ha iya natawohan nga nasud. Waray hiya kuwarta, ngan waray doktor nga disidido ha pagtambal ha iya. Kondi waray hiya pabay-i ni Jehova. Ha urhi, ginpahibaro an usa nga espesyalista ha lokal nga ospital. Tungod kay natoo gud ha Biblia, waray bayad nga gin-ataman hinin maloloy-on nga tawo hi Bugto Poetzinger sugad hin iya anak. An pagbasa han sugad nga mga istorya ha kinabuhi sigurado nga magpaparig-on han aton pagsarig ha aton langitnon nga Amay.

Usa pa birilhon nga bulig nga igintatagana ni Jehova ha pagparig-on han aton pagsarig ha iya amo an aton presyoso nga pribilehiyo ha pag-ampo. Hi apostol Pablo mahigugmaon nga nagsusumat ha aton: “Diri kamo magkabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro.” (Filipos 4:6) An “ngatanan” mahimo mag-upod han aton mga pagbati, mga panginahanglan, mga kahadlok, ngan mga kabaraka. Kon mas agsob ngan mas kinasingkasing an aton mga pag-ampo, magigin mas marig-on an aton pagsarig kan Jehova.

Han nakanhi pa hi Jesu-Kristo ha tuna, usahay nakadto hiya ha mamingaw nga lugar nga nag-uusahan basi diri madisturbo ha pag-ampo. (Mateo 14:23; Markos 1:35) Antes maghimo hin importante gud nga mga desisyon, naggasto pa ngani hiya hin bug-os nga gab-i ha pag-ampo ha iya Amay. (Lukas 6:12, 13) Diri urusahon nga marig-on gud an pagsarig ni Jesus kan Jehova salit nakaantos hiya han pinakamakuri nga pagsari nga nahitabo ha usa. An iya kataposan nga mga pulong ha pasakitan nga kahoy amo an: “Amay, ha imo mga kamot akon itinutubyan an akon espiritu.” Ito nga kapahayagan han pagsarig nagpakita nga tubtob ha kataposan waray maibani an iya pagsarig ha iya  Amay, bisan kon waray maghilabot hi Jehova ha pagtalwas ha iya.—Lukas 23:46.

An usa pa nga paagi basi magin marig-on an aton pagsarig kan Jehova amo an regular nga pakig-upod hadton nasarig ha iya ha bug-os nga kasingkasing. Hi Jehova nagsugo ha iya katawohan nga magkatirok hin regular basi dugang pa nga mahibaro mahitungod ha iya ngan basi magdinasigay ha usa kag usa. (Deuteronomio 31:12; Hebreo 10:24, 25) An sugad nga pakig-upod nagparig-on han ira pagsarig kan Jehova, nakabulig ha ira nga malamposan an importante nga mga pagsari han pagtoo. Ha usa nga nasud ha Aprika diin igindiri an pagwali nga buruhaton, an mga Saksi ni Jehova waray tagi hin panalipod han mga polis, mga dokumento ha pagbiyahe, mga sertipiko ha pag-asawa, pagtambal ha ospital, ngan mga trabaho. Han nagkaada girra sibil ha usa nga lugar, 39 nga membro, upod na an kabataan, ha kahirani nga kongregasyon an nag-ukoy hin haros upat ka bulan ha ilarom han tulay ha disyerto basi malikyan an pambomba ha ira bungto. Ha sugad duro nga kakurian, an ira adlaw-adlaw nga paghisgot ha usa nga teksto han Biblia ngan an iba nga mga katirok nakahatag ha ira hin daku nga kusog. Salit naantos nira an kakurian nga marig-on an ira espirituwalidad. Ini nga eksperyensya matin-aw nga nagpapakita han bili han regular nga pagkatirok kaupod han mga katawohan ni Jehova.

An ultimo, basi maparig-on an aton pagsarig kan Jehova, kinahanglan magpadayon kita nga aktibo ha pagwali-han-Ginhadian nga buruhaton, pirme andam ha pagpaangbit han maopay nga sumat ha iba. Iginpakita ini han makapabantad nga eksperyensya han madasigon nga batan-on nga magwarali ha Canada nga grabe na hinduro an sakit nga leukemia. Bisan pa han iya grabe nga sakit, karuyag niya mag-regular payunir, o bug-os-panahon nga ministro. Durante han halipot nga panahon nga pagkalma han iya sakit, naakos niya nga magbuhat hin usa ka bulan ha ministeryo sugad nga auxiliary payunir. Katapos nagtikagrabe an iya kahimtang, ngan namatay hiya paglabay hin pipira ka bulan. Kondi, nagpabilin hiya nga marig-on ha espirituwal tubtob ha kataposan, an iya pagsarig kan Jehova waray gud magluya bisan ha usa ka dali. Nahinumdom an iya iroy: “Tubtob ha kataposan, mas gintagad niya an iba kay han iya kalugaringon. Iya gindasig hira nga mag-aram ha Biblia, ginsusumatan hira nga, ‘Magkakaurosa kita ha Paraiso.’ ”

Pagpamatuod han Aton Pagsarig kan Jehova

“Sugad nga an lawas patay kon waray espiritu, sugad man an pagtoo patay, kon waray mga buhat.” (Jakobo 2:26) An ginsiring ni Jakobo mahitungod han pagtoo ha Dios mahimo liwat isiring mahitungod han aton pagsarig ha Iya. Mationan-o man kaagsob kita sumiring nga nasarig kita ha Dios, waray ito pulos kon diri naton ipakita ito nga pagsarig pinaagi han aton mga buhat. Hi Abraham sinarig gud kan Jehova ngan pinamatud-an ito nga pagsarig pinaagi han waray-ruhaduha nga pagsunod ha iya mga sugo, bisan tubtob ha pagin andam nga ihalad an iya anak, hi Isaak. Tungod han sugad makatirigamnan nga pagsarig ngan pagsunod, hi Abraham ginkilala sugad nga sangkay ni Jehova.—Hebreo 11:8-10, 17-19; Jakobo 2:23.

Diri naton hulaton nga umabot an makuri nga pagsari ha aton antes naton ipakita an aton pagsarig kan Jehova. Hi Jesus nagsiring ha iya mga disipulo: “Adton masinugtanon ha gutiay, masinugtanon man ha damu; ngan adton diri matadong ha gigugutiayi; diri man matadong ha daku.” (Lukas 16:10) Sadang kita mahibaro ha pagsarig kan Jehova ha ngatanan naton nga mga buruhaton kada adlaw, ginsusunod hiya bisan ha mga butang nga baga hin diri importante. Kon aton nakikita an mga kapulsanan nga resulta han sugad nga pagsunod, napaparig-on an aton pagsarig ha aton langitnon nga Amay, nga nabulig ha aton nga atubangon an mas daku o mas makuri nga mga pagsari.

Samtang an kalibotan tikahirani na ha makaharadlok nga kataposan hito, an katawohan ni Jehova sigurado nga makakaeksperyensya hin dugang nga mga pagsari ngan mga peligro. (Buhat 14:22; 2 Timoteo 3:12) Pinaagi han pagkaada marig-on ngan totoo nga pagsarig kan Jehova yana, makakalaom kita ha pakatalwas ngadto ha iya saad nga bag-o nga kalibotan—pinaagi han pakatalwas nga buhi ha daku nga kagol-anan o pinaagi han pagkabanhaw. (2 Pedro 3:13) Hinaot diri naton tugotan an anoman nga kawaray pagsarig nga makadaot han aton presyoso nga relasyon kan Jehova. Niyan, an iginsiring mahitungod kan Daniel han talwason hiya tikang ha lungib han mga leon mahimo liwat isiring mahitungod ha aton: “Waray ano nga kahimtang hin kadaot nga hin-agian dida ha iya, tungod kay hiya sinarig ha iya Dios.”—Daniel 6:23.

[Footnote]

[Retrato ha pahina 9]

Makaparig-on han pagtoo an pagbasa han mga istorya mahitungod han matinumanon nga mga surugoon ni Jehova, pariho kan Martin Poetzinger