An Ginkikinahanglan Basi Masabtan an Biblia

AN Biblia naiiba nga libro. An mga nagsurat hito nag-aangkon nga giniyahan han Dios, ngan an mga sulod hito nagtatagana hin damu nga ebidensya nga totoo an pag-angkon. (2 Timoteo 3:16) Kaupod han iba nga mga butang, ipinapakita han Biblia kon ano an aton gintikangan, kay ano nga aanhi kita, ngan tikain kita. Sigurado usa nga libro ito nga takos han aton pagtagad!

Bangin ginsarihan mo na basahon an Biblia kondi nakurian nga masabtan ito. Bangin diri ka maaram kon diin bibilngon an mga baton ha imo mga pakiana. Kon amo, diri ka nag-uusahan. An imo kahimtang pariho han lalaki nga nabuhi ha siyahan nga siglo. Nagbibiyahe hiya ha usa nga karomata, tikang ha Jerusalem tipakadto ha iya natawohan nga nasud, ha Etiopia. Inin Etiopiano nga opisyal nagbabasa ha daku nga tingog tikang ha matagnaon nga libro han Biblia nga Isaias, nga iginsurat sobra pito ka gatos ka tuig na an naglabay.

Tigda nga ginkumusta hiya han usa nga lalaki nga nagdinalagan dungan han karomata. An lalaki amo hi Felipe, disipulo ni Jesus, ngan ginpakianhan niya an Etiopiano: “Nasabot ka ba hit imo ginbabasa?” Binaton an Etiopiano: “Oonan-on ko, kon waray usa nga magmando ha akon?” Katapos iya ginhangyo hi Felipe nga sumakay ha karomata. Iginsaysay ni Felipe an kahulogan han bersikulo nga ginbinasa han lalaki ngan padayon nga iginsumat ha iya an “Maopay nga Sumat ni Jesus.”—Buhat 8:30-35.

Sugad la nga binuligan ni Felipe  ito nga Etiopiano nga makasabot han Pulong han Dios ha maiha na nga naglabay, binubuligan han mga Saksi ni Jehova an mga tawo nga hisabtan an Biblia yana nga panahon. Malilipay hira nga buligan ka liwat. Kasagaran, gimaopayi an pag-aram ha Biblia ha sistematiko nga paagi, gintitikangan ha simple nga mga katutdoan han Kasuratan. (Hebreo 6:1) Samtang nag-uuswag ka, mahimo mo na makarawat an gintawag ni apostol Pablo nga “mabaskog nga karaunon”—nga amo an hiruhilarom nga mga kamatuoran. (Hebreo 5:14) Bisan kon an Biblia an imo gin-aadman, an iba nga mga publikasyon—mga garamiton ha pag-aram ha Biblia—makakabulig ha imo nga mabilngan ngan masabtan an mga bersikulo han Biblia mahitungod ha magkalainlain nga mga ulohan.

An pag-aram kasagaran nga ginhihimo ha panahon ngan lugar nga kombinyente ha imo. An iba nag-aaram pa ngani pinaagi han telepono. An pag-aram diri ginhihimo ha paagi nga pariho ha eskwelahan; pribado ito nga kahikayan nga ipapahiuyon ha imo personal nga mga kahimtang, upod na an imo gintikangan ngan edukasyon. Diri kinahanglan magbayad ka para hito nga pag-aram ha Biblia. (Mateo 10:8) Waray mga eksamin, ngan diri ka maabat hin pagin diri-komportable. Babatunon an imo mga pakiana, ngan mahibabaro ka kon paonan-o magin duok ha Dios. Kondi, kay ano nga sadang ka mag-aram ha Biblia? Tagda an pipira nga mga hinungdan kon kay ano nga an pag-aram ha Biblia makakadugang han kalipay ha imo kinabuhi.