Hiya ‘Nagpadayon Tubtob ha Kataposan’

HA USA nga pagpasalida hin video para ha bag-o nga mga membro ha headquarters han mga Saksi ni Jehova han 1993, iginpahayag ni Lyman Alexander Swingle an iya mga pagbati mahitungod ha pag-alagad kan Jehova: “Mamatay nga sul-ot an imo sapatos!” a

Ginbuhat gud han nobenta anyos nga hi Bugto Swingle an mga pulong nga igindasig niya ha iba nga buhaton. Hiya ‘nagpadayon tubtob ha kataposan.’ (Mateo 24:13) Bisan kon masakit ha pisikal, han Mierkoles, Marso 7, tinambong hiya ha katirok han Nagmamando nga Lawas han mga Saksi ni Jehova nga usa hiya nga membro. Han sunod nga Martes nagtikagrabe an iya kahimtang, ngan ha alas-4:26 h.a., Marso 14, nagsiring an iya doktor nga patay na hiya.

Gintikangan ni Lyman Swingle an iya pag-alagad ha headquarters han mga Saksi ni Jehova ha kalibotan ha Brooklyn, New York, han Abril 5, 1930. Nag-alagad hiya didto hin haros 71 ka tuig. Siyahan nga igintoka hi Bugto Swingle ha bindery han libro, sunod ha pressroom, ngan binulig liwat hiya paghimo hin tinta. Ha pagkamatuod, hi Bugto Swingle naggasto hin mga 25 ka tuig ha departamento nga naghihimo hin tinta. Nag-alagad liwat hiya hin mga 20 ka tuig sugad nga membro han grupo han mga parasurat ha headquarters. Ha ultimo 17 ka tuig han iya kinabuhi, nagtrabaho hiya ha Opisina han Tesurero.

Maisog nga parasamwak han Ginhadian han Dios hi Bugto Swingle. Ha siyahan niya nga mga tuig ha Brooklyn, hiya ngan an iya kaupod ha kuwarto, hi Arthur Worsley, naglalayag ha usa han mga lantsa han mga Saksi didto ha Hudson River. Samtang nagamit hin pampadaku han tingog, ginagasto nira an damu nga mga kataposan han semana ha pagpasamwak han mensahe han Ginhadian ngadto ha mga komunidad ha baybayon.

Natawo hi Bugto Swingle han Nobyembre 6, 1910, ha Lincoln, Nebraska, kondi waray pag-iha binalhin an pamilya ngadto ha Salt Lake City, Utah. Han 1913, nagin mga Estudyante han Biblia an iya mga ginikanan didto, sugad han pagtawag ha mga Saksi ni Jehova hadto. Ha paglabay han mga katuigan, gin-abiabi han panimalay han Swingle an damu nabisita nga mga mamumulong tikang ha headquarters han mga Saksi ha Brooklyn, ngan ini nga kalalakin-an positibo nga nakaimpluwensya kan Lyman. Han 1923, ha edad nga 12 anyos, nabawtismohan hiya sugad nga simbolo han iya dedikasyon ha Dios.

Katapos mag-alagad hin sobra 26 ka tuig ha Brooklyn sugad nga solo, nagin malipayon pa gud an kinabuhi ni Lyman han nakaasawa hiya kan Crystal Zircher han Hunyo 8, 1956. Pirme hira magkaupod, nakikigbahin ha ministeryo nga magkaupod tubtob han mamatay hi Crystal han 1998. Mga tulo ka tuig antes pa, naistrok hi Crystal salit nabaldado gud hiya. An kada adlaw nga pag-ataman ni Lyman ha iya usa nga ehemplo han debosyon nga nakapabantad ha ngatanan, labi na hadton nakakita kan Lyman nga mahigugmaon nga nagduduso han lingkoran nga de kaliding ha kahirani nga mga ligid han kalsada samtang nagtanyag hi Crystal han An Barantayan ngan Awake! ha mga lumalabay.

Hi Bugto Swingle prangka, mahigugmaon nga lalaki nga naruyagan hadton nakilala ha iya. Pariho han iya amay ngan iroy, mayada hiya basado ha Biblia nga paglaom nga mabuhi kaupod ni Jesu-Kristo ha Ginhadian ha langit, an paglaom nga nasisiguro naton nga nakab-ot na niya yana.—1 Tesalonika 4:15-18; Pahayag 14:13.

[Footnote]

[Retrato ha pahina 31]

Hi Bugto Swingle nag-alagad hin mga 25 ka tuig ha hirimoan hin tinta

[Retrato ha pahina 31]

Pirme magkaupod hi Lyman ngan hi Crystal