Mayada Ka ba Diri-mamaratyon nga Espiritu?

“AN NGATANAN nga mga Baraan nga Surat nga ginpakaaghat han Dios may kapulsanan man ha pagtututdoan, ha pagbadlong, ha pagsaway, ha panutdoan nga ha katadongan,” nagsurat hi apostol Pablo. (2 Timoteo 3:16) Oo, an Biblia amo an libro han kamatuoran nga nagtitikang ha totoo nga Dios nga hi Jehova.—Salmo 83:18.

Tungod kay hi Jehova an Maglalarang han ngatanan nga mga butang, upod na an mga tawo, maaram gud hiya han nahitatabo ha aton kon kita mamatay. (Hebreo 3:4; Pahayag 4:11) Ngan ha iya giniyahan nga Pulong, an Biblia, naghahatag hiya hin totoo ngan makapatagbaw nga mga baton ha mga pakiana mahitungod han kahimtang katapos han kamatayon.

Ano an Espiritu?

Ha Biblia, an mga pulong nga iginhubad nga “espiritu” simple nga nangangahulogan hin “gininhawa.” Kondi nangangahulogan ini hin labaw pa kay han pagginhawa. Pananglitan, an parasurat han Biblia nga hi Jakobo, nasiring: “An lawas patay kon waray espiritu.” (Jakobo 2:26) Salit, an espiritu amo an naghahatag hin kinabuhi ha lawas.

Ini nga naghahatag hin kinabuhi nga puwersa diri la an gininhawa, o hangin, nga nagios ha baga. Kay ano nga diri? Tungod kay katapos umukoy an pagginhawa, nagpapabilin an kinabuhi ha mga selyula han lawas ha halipot nga panahon—“ha pipira ka minutos,” sumala ha The World Book Encyclopedia. Tungod hini, an mga pangalimbasog ha pagpabalik han kinabuhi ha tikamatay nga tawo mahimo maglampos. Kondi kon mawara na an diri nakikita nga puwersa han kinabuhi tikang ha mga selyula han lawas, waray na pulos an bisan ano nga mga pangalimbasog ha pagpabalik han kinabuhi. Bisan ano kadamu han gininhawa, o hangin, ha kalibotan diri na makakapabalik han kinabuhi han bisan usa nga selyula. An espiritu, kon sugad, amo an diri-nakikita nga puwersa han kinabuhi—an puwersa han kinabuhi nga nagtitipig han mga selyula ngan han tawo nga buhi. Ini nga puwersa han kinabuhi nagpapadayon pinaagi han pagginhawa.—Job 34:14, 15.

Ito ba nga espiritu aktibo la ha mga tawo? Ginbubuligan kita han Biblia nga magkaada husto nga pagsabot hini nga butang. Ginkilala han maaramon nga hi Hadi Salomon nga an mga tawo ngan mga hayop “may uusa nga iginiginhawa,” ngan hiya nagpakiana: “Hin-o an mahibabaro han espiritu han tawo, kon ini mapaigbaw ba,  ngan an espiritu han mananap, kon ini magtitipaubos ba ngadto ha tuna?” (Eklesiastes 3:19-21) Salit an mga hayop sugad man an mga tawo gin-uunabi sugad nga mayada espiritu. Paonan-o nagin sugad hito?

An espiritu, o puwersa han kinabuhi, mahimo igpariho ha koryente nga naagos ngadto ha makina o usa nga garamiton. An diri-nakikita nga elektrisidad makakahimo hin magkalainlain nga buhat, depende ha klase han garamiton nga ginsusuplayan hito hin koryente. Pananglitan, an de-koryente nga lutoan mahimo magsuplay hin kapaso, an kompyuter makakahatag hin impormasyon, ngan an telebisyon makakahimo hin mga dagway ngan mga tunog. Kondi, an koryente waray gud han mga kalidad han garamiton nga ginpapagios hito. Nagpapabilin ito nga usa la nga puwersa. Ha pariho nga paagi, an puwersa han kinabuhi waray han bisan ano nga mga kalidad han mga linarang nga gintatagan hito hin kinabuhi. Waray ito personalidad ngan waray abilidad ha paghunahuna. An mga tawo ngan mga hayop ‘mayada usa la nga espiritu.’ (Eklesiastes 3:19) Salit, kon namamatay an tawo, an iya espiritu diri padayon nga naeksister ha iba nga lugar sugad nga espiritu nga linarang.

Ano, kon sugad, an kahimtang han patay? Ngan ano an nahitatabo ha espiritu kon namamatay an tawo?

“Ha Tapotapo Ikaw Hiuuli”

Han an siyahan nga lalaki, hi Adan, tinuyo nga nagtalapas han sugo han Dios, Hiya nagsiring ha iya: “Ha balhas han imo bayhon makaon ikaw hin tinapay, ngadto ha paghiuli nimo ha tuna; kay tumikang ka dinhi; kay tapotapo ka man, ngan ha tapotapo ikaw hiuuli.” (Genesis 3:19) Nakain hi Adan antes hiya larangon ni Jehova tikang ha tapotapo? Aw, waray pa hiya! Diri pa hiya naeksister. Salit han magsiring hi Jehova nga Dios nga hi Adan ‘mabalik ha tuna,’ iya iginpapasabot nga hi Adan mamamatay ngan mabalik ha mga elemento han tuna. Diri mabalhin hi Adan ngadto ha lugar han mga espiritu. Ha kamatayon hi Adan diri na liwat maeksister. An sirot ha iya amo an kamatayon—kawaray kinabuhi—diri pagbalhin ngadto ha iba nga lugar.—Roma 6:23.

Kumusta man an iba nga nagkamatay? An kahimtang han patay iginpatin-aw ha Eklesiastes 9:5, 10, diin aton mababasa: “An mga patay diri maaram han bisan ano . . . Waray buruhaton, waray plano, waray kahibaro o kinaadman, ha sulod han lubnganan.” (Moffatt) Salit, an kamatayon amo an kahimtang han diri pag-eksister. An salmista nagsurat nga kon an usa ka tawo mamatay, “an iya gininhawa nagowa, nabalik hiya ngadto ha iya tuna; Hito ngahaw nga adlaw an iya mga hunahuna nawawara.”—Salmo 146:4.

Matin-aw, an mga patay diri na naeksister. Waray hira hinbabaroan nga bisan ano. Diri hira makakakita, makakabati, o makakaistorya ha imo. Diri man liwat hira makakabulig o makakadaot ha imo. Sigurado nga diri ka sadang mahadlok ha mga patay. Kondi kay ano nga “nagowa” an espiritu ha tawo ha panahon han iya kamatayon?

An Espiritu “Mabalik Ngadto ha Dios”

An Biblia nasiring nga kon mamatay an tawo, “an espiritu mabalik ngadto ha Dios nga  naghatag hini.” (Eklesiastes 12:7) Nagpapasabot ba ini nga an espiritu literal nga nabiyahe ha kawanangan ngadto ha presensya han Dios? Diri gud! An paagi han paggamit han Biblia han pulong nga “mabalik” diri nagkikinahanglan hin aktuwal nga pagbalhin tikang ha usa nga lugar ngadto ha iba. Pananglitan, an diri matinumanon nga mga Israelita ginsumatan: “Balik ngadi ha akon, ngan ako mabalik ngada ha iyo, nasiring hi Jehova han mga kasundalohan.” (Malakias 3:7) An ‘pagbalik’ han mga Israelita ngadto kan Jehova nangahulogan hin pagbaya tikang ha sayop nga pagkinabuhi ngan pagsunod utro han matadong nga paagi han Dios. Ngan an ‘pagbalik’ ni Jehova ha Israel nangahulogan han iya positibo nga pagtagad utro ha iya katawohan. Ha duha nga kahimtang an ‘pagbalik’ nag-uunabi hin paggawi, diri literal nga pagbalhin tikang ha usa nga lugar ngadto ha iba.

Ha pariho nga paagi, ha kamatayon diri nahitatabo an aktuwal nga pagbalhin tikang ha tuna ngadto ha kalangitan kon an espiritu ‘nabalik’ ngadto ha Dios. Kon waray na an puwersa han kinabuhi ha usa nga tawo, an Dios la an may abilidad ha pagpabalik hito ha iya. Salit an espiritu “mabalik ngadto ha Dios” ha paagi nga an bisan ano nga paglaom han tidaraon nga kinabuhi para hito nga tawo bug-os nga nadepende yana ha Dios.

Tagda, pananglitan, kon ano an ginsisiring han Kasuratan mahitungod han kamatayon ni Jesu-Kristo. An parasurat han Ebanghelyo nga hi Lukas nagsaysay: “Hi Jesus sininggit ha daku nga tingog, nga nasiring: Amay, ha imo mga kamot akon itinutubyan an akon espiritu. Ngan han pagyakan hini, nabugto an iya pagginhawa.” (Lukas 23:46) Samtang nagowa tikang ha iya kalugaringon an espiritu ni Jesus, diri literal nga tikadto hiya ha langit. Waray banhawa hi Jesus tikang ha kamatayon antes han ikatulo ka adlaw, ngan paglabay pa han 40 ka adlaw nga hiya sinaka ngadto ha langit. (Buhat 1:3, 9) Kondi, ha panahon han iya kamatayon, may pagsarig nga igintubyan ni Jesus an iya espiritu ha pagbuot han iya Amay, bug-os nga nasarig ha gahum ni Jehova ha pagbanhaw ha iya.

Oo, mahimo banhawon han Dios an usa ka tawo. (Salmo 104:30) Nag-aabri ini hin maopay gud nga paglaom!

An Sigurado nga Paglaom

An Biblia nasiring: “Maabot an oras nga an ngatanan, nga aadto ha mga lubnganan, makakabati han [tingog ni Jesus ngan magowa].” (Juan 5:28, 29) Oo, hi Jesu-Kristo nagsaad nga an ngatanan nga aadto ha hinumduman ni Jehova babanhawon, o ibabalik ha kinabuhi. Kaupod ha ira amo gud adton matadong nga nagkinabuhi sugad nga mga surugoon ni Jehova. Kondi minilyon han iba pa nga mga tawo an nagkamatay nga waray magpakita kon ira susundon an matadong nga mga suruklan han Dios. Bangin diri hira maaram mahitungod han mga kinahanglanon ni Jehova o waray hira igo nga panahon ha paghimo han ginkikinahanglan nga mga pagbag-o. Ini nga klase hin mga indibiduwal aada liwat ha hinumduman han Dios ngan babanhawon, kay an Biblia nasiring: “May pagkabanhaw han mga minatay han mga magtadong ngan diri man magtadong.”—Buhat 24:15.

Yana nga panahon, an tuna puno hin kangalas ngan araway, kabangis ngan pagpaagay hin dugo, polusyon ngan sakit. Kon banhawon an mga patay ha sugad nga kalibotan, sigurado nga diri mag-iiha an bisan ano nga kalipay nga resulta hito. Kondi nagsaad an Maglalarang nga ha diri maiha iya tatapuson an presente nga sosiedad han kalibotan nga ginmamandoan ni Satanas nga Yawa. (Proberbios 2:21, 22; Daniel 2:44; 1 Juan 5:19) An matadong nga sosiedad han tawo—“[an] bag-o nga tuna”—urusahon nga matutuman na.—2 Pedro 3:13.

Hito nga panahon “an umurukoy diri masiring: Ako masakit.” (Isaias 33:24) Bisan an kasakit han kamatayon mawawara na, tungod kay “pagpapahiron [han Dios] an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud: kay an siyahan nga mga bagay nag-agi na.” (Pahayag 21:4) Makalilipay gud ini nga paglaom para hadton ‘aadto ha handumanan nga mga lubnganan’!

Kon kuhaon na ni Jehova an karaotan tikang ha tuna, diri niya bubungkagon an magtadong kaupod han magraot. (Salmo 37:10, 11; 145:20) Ha pagkamatuod, ‘an daku nga panon’ han katawohan “tikang ha tagsatagsa nga nasud ngan ha ngatanan nga mga panon, ngan mga katawohan ngan mga yinaknan” matatalwas “ha daku nga kagol-anan,” nga magbubungkag han presente  maraot nga kalibotan. (Pahayag 7:9-14) Salit, an daku nga grupo han katawohan aada ha pag-abiabi han mga patay.

Naghihingyap ka ba nga makita utro an imo mga hinigugma? Karuyag mo ba nga mabuhi ha waray kataposan ha Paraiso ha tuna? Kon amo kinahanglan magkaada ka husto nga kahibaro ha kaburut-on ngan mga katuyoan han Dios. (Juan 17:3) Kaburut-on ni Jehova nga “an ngatanan nga mga tawo maluwas, ngan nga makadangat ha pagkilala han kamatuoran.”—1 Timoteo 2:3, 4.

[Retrato ha pahina 4]

“Tapotapo ka man, ngan ha tapotapo ikaw hiuuli”

[Retrato ha pahina 5]

An espiritu mahimo igpariho ha elektrisidad

[Retrato ha pahina 7]

An pagkabanhaw magdadara hin waray kataposan nga kalipay