Mas Marig-on Kay ha Puraw nga Bulawan

AN BULAWAN labaw gud nga ginbibiling tungod han katahom ngan karig-on hito. Ginhihingyap gud ito tungod kay nagpapabilin ito nga maranggat ngan diri nalubad baga in tubtob ha kadayonan. Tungod ini kay an bulawan diri naaapektohan han tubig, oksihina, asupre, ngan haros han ngatanan nga butang. Damu han bulawan nga mga butang nga nadiskobrehan ha nalunod nga mga barko ngan ha iba nga lugar an maranggat pa gihapon katapos hin ginatos ka tuig.

Kondi, makapainteres, an Biblia nasiring nga may-ada mas marig-on ngan “labi pa ka hamili kay ha bulawan nga nawawara bisan kon ito ginproybahan ha kalayo.” (1 Pedro 1:7) An bulawan nga “ginproybahan,” o ginpapuraw, pinaagi han kalayo ngan iba nga mga proseso mahimo magin 99.9 porsyento an kapuraw. Kondi, bisan an ginpapuraw nga bulawan nawawara, o natutunaw, kon ibutang ha aqua regia (hitaas an kalidad nga tubig), an ginsalakot nga tulo ka bahin han hydrochloric acid ngan usa ka bahin han nitric acid. Salit, husto an Biblia sumala ha syensya ha pagsiring nga ‘an bulawan nawawara.’

Ha kabaliktaran, an totoo Kristiano nga pagtoo ‘nagtitipig han kalag nga buhi.’ (Hebreo 10:39) Mahimo patayon han mga tawo an usa ka tawo nga may-ada marig-on nga pagtoo, sugad han ira ginbuhat kan Jesu-Kristo. Kondi an may-ada putli nga pagtoo gintatagan hini nga saad: “Magmatinumanon ka tubtob ha kamatayon ngan tatagan ko ikaw han pudongpudong han kinabuhi.” (Pahayag 2:10) Adton nagkakamatay ha pagtoo nagpapabilin ha handumanan han Dios, ngan iya babanhawon hira. (Juan 5:28, 29) Waray bisan ano nga kadamu hin bulawan an makakahimo hito. Tungod hini, an pagtoo tinuod nga mas birilhon gud kay ha bulawan. Kondi, basi an pagtoo magkaada han sugad kahitaas nga bili, kinahanglan proybahan liwat ito, o sarihan. Ha pagkamatuod, ‘an nasarihan nga kalidad han pagtoo’ nga ginsiring ni Pedro amo an mas birilhon kay ha bulawan. Malilipay an mga Saksi ni Jehova ha pagbulig ha imo ha pag-aram ha Biblia basi mapatubo ngan matipigan mo an marig-on nga pagtoo ha matuod nga Dios, hi Jehova, ngan ha iya Anak, hi Jesu-Kristo. Ini, sumala kan Jesus, ‘nangangahulogan hin kinabuhi nga waray kataposan.’—Juan 17:3.