Ginpapaubos ni Jehova an mga Mapahitas-on
Kapitulo Singko
Ginpapaubos ni Jehova an mga Mapahitas-on
1, 2. Kay ano nga an matagnaon nga mensahe ni Isaias ha mga Judio ha iya panahon makapainteres ha aton?
TUNGOD kay nangil-ad ha kahimtang han Jerusalem ngan han Juda, hi propeta Isaias yana natawag kan Jehova nga Dios ngan nagpapahayag: “Ikaw binaya ha imo katawohan an balay ni Jakob.” (Isaias 2:6a) Ano an nakaaghat ha Dios nga isalikway an katawohan nga iya mismo ginpili sugad nga iya ‘espesyal nga panag-iya’?—Deuteronomio 14:2.
2 An pagkondenar ni Isaias ha mga Judio ha iya panahon makapainteres gud ha aton. Kay ano? Tungod kay an kahimtang han Kakristianohan yana pariho gud han katawohan ni Isaias, ngan sugad man an paghukom nga iginpapahayag ni Jehova. An pagpamati ha pasamwak ni Isaias maghahatag ha aton hin matin-aw nga pagsabot kon ano an ginkukondenar han Dios ngan mabulig ha aton nga likyan an mga buhat nga diri niya inuuyonan. Salit, may kaikag nga aton paghisgotan an matagnaon nga pulong ni Jehova nga nakarekord ha Isaias 2:6–4:1.
Ha Pagpahitaas Hira Nayukbo
3. Ano nga sala han iya katawohan an iginsusumat ni Isaias?
3 Ha pagsumat han sala han iya katawohan, hi Isaias nasiring: “Hira napuno hin mga pamatasan tikang ha sinirangan, ngan mga paropanag-an hira pariho han mga Pilisteohanon, ngan ira pinanlamano an mga kamot han mga anak han mga dumuruong.” (Isaias 2:6b) Mga 800 ka tuig una pa, ginsugo ni Jehova an iya pinili nga katawohan: “Diri niyo pagburingan an iyo kalugaringon ha bisan hain hini nga mga butang: kay ha ngatanan hini nahugawan an mga nasud nga akon ginpaiwas tikang ha iyo atubangan.” (Lebitiko 18:24) Mahitungod hadton iya ginpili sugad nga iya espesyal nga panag-iya, ginpirit ni Jehova hi Balaam nga sumiring: “Tikang ha bawbaw han mga bato natan-aw ko hiya, ngan tikang ha kabungtoran nakita ko hiya: Kitaa, ito amo an katawohan nga nangungukoy nga hira la, ngan diri hira [tatagdon] dida ha mga nasud.” (Numeros 23:9, 12) Kondi, ha panahon ni Isaias an mga pinili ni Jehova nagbuhat han mahugaw nga mga buhat han nakapalibot nga mga nasud ngan “napuno hin mga pamatasan tikang ha sinirangan.” Imbes nga tumoo kan Jehova ngan ha iya pulong, nagbubuhat hira hin ‘mga panag-an pariho han mga Pilisteohanon.’ Tungod kay diri nagpapabilin nga bulag tikang ha mga nasud, an tuna ‘napuno’ hin “mga anak han mga dumuruong”—sigurado, mga dumuruong nga nagpapakilala hin diri-diosnon nga mga buhat ha katawohan han Dios.
4. Imbes nga maaghat hira nga magpasalamat kan Jehova, paonan-o naapektohan an mga Judio han mga bahandi ngan kusog han militar?
4 Tungod kay nakikita an presente nga kauswagan ha ekonomiya ngan kusog han militar han Juda ilarom ni Hadi Usiya, hi Isaias nasiring: “An ira tuna puno hin salapi ngan hin bulawan, waray man bisan ano nga kataposan han ira mga bahandi; an ira tuna puno liwat hin kakabayohan, waray man bisan ano nga kataposan han ira mga karomata.” (Isaias 2:7) Nagpapasalamat ba kan Jehova an katawohan para han sugad nga bahandi ngan kusog han militar? (2 Kronikas 26:1, 6-15) Waray gud! Lugod, nasarig hira ha bahandi mismo ngan nabulag tikang ha Surok hito, hi Jehova nga Dios. Ano an resulta? “An ira tuna puno liwat hin mga diosdios; nagsisingba hira han buhat han ira kalugaringon nga mga kamot, adton ginhimo han ira kalugaringon nga mga tudlo. Ngan an tawo nga banyaga ginpadaku, ngan an tawo nga harangdon ginpahiubos: busa ayaw hira pasayloa.” (Isaias 2:8, 9) Ira iginlilingiw an ira mga bayhon tikang ha buhi nga Dios ngan nayukbo ha waray-kinabuhi nga mga diosdios.
5. Kay ano nga an pagyukbo ha mga diosdios diri buhat han pagpaubos?
5 An pagyukbo mahimo magin tigaman han pagpaubos. Kondi an pagyukbo ha mga butang nga waray-kinabuhi waray kapulsanan, naghihimo han magsiringba ha diosdios nga “ginpahiubos,” maraot. Paonan-o mapapasaylo ni Jehova an sugad nga sala? Ano an pagbubuhaton hini nga mga magsiringba ha mga diosdios kon tawagon hira ni Jehova ha pakighusay?
‘An Higtaas nga mga Panan-aw Pagpapaubson’
6, 7. (a) Ano an mahitatabo ha mga mapahitas-on ha adlaw han paghukom ni Jehova? (b) Ha ano ngan kan kanay iginpapahayag ni Jehova an iya kasina, ngan kay ano?
6 Hi Isaias nagpapadayon: “Sulod ngadto ha bato, ngan tumago ka ha tapotapo, tikang ha atubangan han pagkamakaharadlok ni Jehova, ngan tikang ha himaya han iya pagkaharangdon.” (Isaias 2:10) Kondi waray bato nga igo an kadaku ha pagpanalipod ha ira, waray tabon nga igo an kadakmol ha pagtabon ha ira, tikang kan Jehova, an Makagarahum-ha-ngatanan. Kon umabot hiya ha pagpadapat han iya paghukom, “an higtaas nga mga panan-aw han tawo pagpapaubson, ngan an pagpakahitaas han mga tawo pagpapadukuon, ngan hi Jehova la an pagpapahitas-on dida hadto nga adlaw.”—Isaias 2:11.
7 “[An] adlaw ni Jehova han mga kasundalohan” tiarabot. Magigin panahon ito han pagpahayag han Dios han iya kasina “para ha ngatanan nga sedro ha Libano, nga mga higtaas ngan gin-alsa, ngan para ha ngatanan nga roble ha Basan, ngan para ha ngatanan nga higtaas nga bukid, ngan para ha ngatanan nga kabungtoran nga gin-alsa, ngan para ha tagsatagsa nga hitaas nga torre, ngan para ha tagsatagsa nga pinarig-on nga kuta, ngan para han mga sakayan ha Tarsis, ngan para ha ngatanan [hiringyapon nga mga baluto].” (Isaias 2:12-16) Oo, an ngatanan nga organisasyon nga gintukod han tawo sugad nga simbolo han iya pagpahitaas ngan an tagsa diri-diosnon nga indibiduwal tatagdon ha adlaw han kasina ni Jehova. Salit, “an pagkahitaas han tawo padudukuon, ngan an pagkamapahitas-on han mga tawo pagpapaubson: ngan hi Jehova la an pagpapahitas-on dida hadto nga adlaw.”—Isaias 2:17.
8. Paonan-o an igintagna nga adlaw han paghukom inabot ha Jerusalem han 607 A.K.P.?
8 An igintagna nga adlaw han paghukom inabot ha mga Judio han 607 A.K.P. han ginbungkag han Babilonyahanon nga hi Hadi Nabukodonosor an Jerusalem. Nakita han mga umurukoy an ira hinigugma nga siyudad nga nasusunog, nabungkag an higtaas nga mga tinukod hito, narumpag an marig-on nga pader hito. An templo ni Jehova nagin rumok nga mga bato. Waray nahimo an ira mga bahandi bisan an ira mga karomata ha “adlaw ni Jehova han mga kasundalohan.” Ngan kumusta an ira mga diosdios? Nahitabo ito sugad la han igintatagna ni Isaias: “An mga diosdios magkakawagra ha tinuod.” (Isaias 2:18) An mga Judio—upod na an mga prinsipe ngan gamhanan nga kalalakin-an—gindara nga bihag ngadto ha Babilonya. An Jerusalem magpapabilin nga binayaan ha sulod hin 70 ka tuig.
9. Ha ano nga paagi nga an kahimtang han Kakristianohan pariho han Jerusalem ngan Juda ha panahon ni Isaias?
9 An kahimtang han Kakristianohan pariho gud ha Jerusalem ngan Juda ha panahon ni Isaias! An Kakristianohan sigurado nga nakahimo hin duok nga relasyon ha mga nasud hini nga kalibotan. Aktibo hiya nga nasuporta ha Nagkakaurosa nga mga Nasud ngan ginpupuno an iya balay hin mga diosdios ngan diri-kasuratanhon nga mga buhat. Materyalistiko an iya mga sumurunod ngan nasarig hira ha kusog han militar. Ngan diri ba gintatagad nira an ira mga klero sugad nga takos han daku nga kadungganan, salit gintatagan hira hin mga titulo ngan pagpasidungog? An pagpahitaas ha kalugaringon han Kakristianohan sigurado nga mawawaray kapulsanan. Kondi san-o?
An Tiarabot nga “Adlaw ni Jehova”
10. Ano nga “adlaw ni Jehova” an gin-unabi ni apostol Pablo ngan Pedro?
10 Ipinapakita han Kasuratan an “adlaw ni Jehova” nga magigin mas makahuluganon kay ha adlaw han paghukom ha kadaan nga Jerusalem ngan Juda. Iginkaw-ing ni apostol Pablo, ilarom han giya, an “adlaw ni Jehova” ha presensya han nahitrono nga Hadi Jesu-Kristo. (2 Tesalonika 2:1, 2) Gin-unabi ni Pedro iton nga adlaw may kalabotan han katukod han ‘bag-o nga mga langit ngan bag-o nga tuna diin mag-uukoy an katadongan.’ (2 Pedro 3:10-13) Ito an adlaw han pagpadapat ni Jehova han iya paghukom ha bug-os maraot nga sistema han mga butang, upod na an Kakristianohan.
11. (a) Hin-o an “makakailob” ha tiarabot nga “adlaw ni Jehova”? (b) Paonan-o naton hihimoon hi Jehova nga aton darangpanan?
11 “Hiyay tungod han adlaw!” siring ni propeta Joel, “kay an adlaw ni Jehova hirani na, ngan sugad hin kagunawan tikang ha Makagarahum ini maabot.” Tungod kay hirani na iton nga “adlaw,” diri ba sadang mabaraka an ngatanan ha seguridad durante hiton makaharadlok nga panahon? “Hin-o an makakailob hini?” an pakiana ni Joel. Hiya nabaton: “Hi Jehova maaamo an darangpanan han iya katawohan.” (Joel 1:15; 2:11; 3:16) Hi Jehova nga Dios ba an magigin darangpanan hadton may-ada mapahitas-on nga espiritu ngan nasarig ha ira mga bahandi, kusog han militar, ngan hinimo-han-tawo nga mga dios? Imposible! Binayaan han Dios bisan an iya pinili nga katawohan han nagbuhat hira hini nga paagi. Importante gud nga ‘pamilngon an pagkamatadong, pamilngon an pagkamaaghop’ han ngatanan nga mga surugoon han Dios, ngan sinsero nga usisahon an lugar han pagsingba kan Jehova ha ira kinabuhi!—Sepania 2:2, 3.
“Ngadto ha mga Yatot Ngan ha mga Kulalaknit”
12, 13. Kay ano nga angayan para ha mga magsiringba ha mga diosdios nga ilabog an ira mga dios “ngadto ha mga yatot ngan ha mga kulalaknit” ha adlaw ni Jehova?
12 Paonan-o tatagdon han mga magsiringba ha mga diosdios an ira mga diosdios durante han daku nga adlaw ni Jehova? Hi Isaias nabaton: “An mga tawo manunulod ha mga lungib han mga bato, ngan ha mga buho han tuna, tikang ha pagkamakaharadlok ni Jehova, ngan tikang ha himaya han iya pagkaharangdon, kon hiya bumangon panguy-og han tuna ha makusog gud. Hadto nga adlaw ipananalibay han mga tawo ngadto ha mga yatot ngan ha mga kulalaknit, an ira mga ladawan nga salapi, ngan an ira mga ladawan nga bulawan, . . . ha pagsulod ngadto ha mga lungib han mga bato, ngan ngadto ha mga ginngangang-an han mga nagkatipiktipikan nga mga bato, tikang ha atubangan han pagkamakaharadlok ni Jehova, ngan tikang ha himaya han iya pagkaharangdon, kon hiya bumangon ha pag-uy-og han tuna ha makusog gud. Panhunong kamo tikang ha tawo, kanay pagginhawa aada ha iya mga pasngawan; kay ha ano an iya kapulsanan?”—Isaias 2:19-22.
13 An mga yatot nag-uukoy ha mga buho ha tuna, ngan an mga kulalaknit nanhahapon ha masirom ngan mamingaw nga mga lungib. Dugang pa, ha lugar nga hinahaponan han damu nga kulalaknit, may-ada mabaho nga amyon ngan madakmol nga tambak han hugaw. Angayan an paglabog han mga diosdios ngadto ha sugad nga mga lugar. Masirom ngan mahugaw nga lugar an angay ha ira. Para han mga tawo, hira mamimiling hin darangpanan ha mga lungib ngan mga buho ha bato ha adlaw han paghukom ni Jehova. Salit pariho an dadangatan han mga diosdios ngan han ira mga magsiringba. Uyon ha tagna ni Isaias, waray makatalwas an waray-kinabuhi nga mga diosdios ha ira mga magsiringba bisan ha Jerusalem tikang ha mga kamot ni Nabukodonosor han 607 A.K.P.
14. Ha tiarabot nga adlaw han paghukom ni Jehova ha imperyo han palso nga relihiyon ha kalibotan, ano an pagbubuhaton han mga tawo nga kalibotanon an panhunahuna?
14 Ha tiarabot nga adlaw han paghukom ni Jehova ha Kakristianohan ngan iba nga mga bahin han imperyo han palso nga relihiyon ha kalibotan, ano an pagbubuhaton han mga tawo? Tungod kay naatubang ha nagtitikaraot nga mga kahimtang ha bug-os nga tuna, masasabtan han kadam-an nga waray pulos an ira mga diosdios. Kasaliwan hini, mamimiling hira hin darangpanan ngan panalipod ha diri-espirituwal, tunan-on nga mga organisasyon, bangin upod na an Nagkakaurosa nga mga Nasud, an “mapula [ihalas] nga mananap” han Pahayag kapitulo 17. “An napulo nga sungay” hiton simboliko ihalas nga mananap an magbubungkag ha Babilonya nga Daku, an imperyo han palso nga relihiyon ha kalibotan, nga an prominente nga bahin hito amo an Kakristianohan.—Pahayag 17:3, 8-12, 16, 17.
15. Paonan-o nga hi Jehova la an “pagpapahitas-on” ha iya adlaw han paghukom?
15 Bisan kon an pagbungkag ngan pagsunog ha Babilonya nga Daku bangin amo an bubuhaton mismo han simboliko nga napulo nga sungay, ito, ha pagkamatuod, amo an pagpadapat han paghukom ni Jehova. Mahitungod han Babilonya nga Daku, an Pahayag 18:8 nasiring: “Busa ha usa ka adlaw maabot an iya mga peste, kamatayon, ngan kabidoan ngan kagutom; ngan pagsusunugon gud hiya ha kalayo; kay makusog an Ginoo nga Dios nga naghukom ha iya.” Salit kan Jehova nga Dios, nga Makagarahum-ha-ngatanan, an kadayawan tungod ha pagtalwas ha katawohan tikang ha pagmando han palso nga relihiyon. Sugad han ginsisiring ni Isaias, “hi Jehova la an pagpapahitas-on dida hadto nga adlaw. Kay [ito an] adlaw ni Jehova han mga kasundalohan.”—Isaias 2:11b, 12a.
‘Iginsisimang Ka han mga Lider’
16. (a) Ano an “sariganan ngan . . . darangpanan” han tawhanon nga sosiedad? (b) Paonan-o mag-aantos an katawohan ni Isaias ha pagkuhaa han “sariganan ngan han darangpanan” han ira sosiedad?
16 Basi magin marig-on an tawhanon nga sosiedad, kinahanglan may-ada ito “sariganan ngan . . . darangpanan”—an mga kinahanglanon sugad han pagkaon ngan tubig ngan, mas importante, masasarigan nga mga lider nga makakapanguna ha mga tawo ngan makakagtipig han kahapsay ha sosiedad. Kondi, mahitungod han kadaan nga Israel, hi Isaias nagtatagna: “Kitaa, an Ginoo, hi Jehova han mga kasundalohan, magkukuha tikang ha Jerusalem ngan tikang ha Juda han sariganan ngan han darangpanan, an bug-os nga sariganan nga tinapay, ngan an bug-os nga sariganan nga tubig; An makusog nga tawo, ngan an tawo ha pakig-away; an hukom, ngan an manaragna, ngan an tigurang; An kapitan han tinagkalim-an, ngan an tawo nga dungganan, ngan an magsaragdon, ngan an senate nga limbongan, ngan an lasgod nga [engkantador].” (Isaias 3:1-3) Mga bata la nga lalaki an magigin mga prinsipe ngan magmamando sumala han ira karuyag. Diri la mga magmarando an magtatalumpigos ha mga tawo kondi “an katawohan pagtatalumpiguson, an tagsatagsa han iba, . . . an bata manunulos ha mapalabilabihon patok ha tigurang, ngan an banyaga patok ha dungganan.” (Isaias 3:4, 5) ‘Aatakehon’ han kabataan an ira mga tigurang, nga waray na pagtahod ha ira. Magigin maraot gud an kahimtang han kinabuhi salit masisiring han usa ha iba nga waray abilidad ha pagmando: “Ikaw may panapton, maamon ka hadi, ngan ipailarom ha imo kamot ini nga guba.” (Isaias 3:6) Kondi an mga dinapit magdudumiri, ipipirit nga waray hira abilidad ha pagtambal ha nadaot nga tuna waray bisan bahandi ha pagkapot han responsabilidad. Hira masiring: “Diri ako mapaparapanambal; kay ha akon balay waray tinapay o waray panapton: ayaw ako niyo paghimoa nga maglalarang han katawohan.”—Isaias 3:7.
17. (a) Ha ano nga paagi nga an sala han Jerusalem ngan Juda “sugad han Sodoma”? (b) Hin-o an ginbabasol ni Isaias ha kahimtang han iya katawohan?
17 Hi Isaias nagpapadayon: “An Jerusalem guba, ngan an Juda napukan; tungod kay an ira dila ngan an ira mga binuhatan patok kan Jehova, ha paghagit han mga mata han iya himaya. An pagpakita han ira nawong nagsasaksi patok ha ira; ngan hira nagsasaysay han ira sala sugad han Sodoma, waray hira magtago hini. Kairo han ira kalag! Kay hira nagbuhat hin maraot ha ira ngahaw.” (Isaias 3:8, 9) An katawohan han Dios nagrebelde kontra han matuod nga Dios ha mga pulong ngan mga buhat. Bisan an waray-kaawod ngan diri-mabinasulon nga mga ekspresyon han ira mga nawong nagbubuhayhag han ira mga sala, nga mangil-ad sugad hadton ha Sodoma. May kauyonan hira kan Jehova nga Dios, kondi diri hiya magbabag-o han iya mga suruklan tungod ha ira. “Siring kamo mahitungod han matadong, nga mamaopay para ha iya; kay hira makakakaon han bunga han ira mga binuhatan. Kairo han maraot! Magmamapait para ha iya; kay kon ano an nabuhat han iya mga kamot pagbubuhaton ha iya. Mahitungod han akon katawohan, an kabataan amo an ira mga magtaralumpigos, ngan an kababayin-an naglalarang ha ira. O katawohan ko, hira nga nagmamando ha imo nag-uugsong ha imo ha pagpakasala, ngan naggugunaw han dalan han imo mga agianan.”—Isaias 3:10-12.
18. (a) Ano nga paghukom an iginpahayag ni Jehova ha mga tigurang ngan mga prinsipe ha panahon ni Isaias? (b) Ano nga leksyon an mahibabaroan naton tikang ha paghukom ni Jehova ha mga tigurang ngan ha mga prinsipe?
18 Ha mga tigurang ngan mga prinsipe ha Juda, hi Jehova ‘nagpadapat hin sirot’ ngan ‘sinulod ha paghukom’: “Amo kamo an nagkaon han urubasan; an inagaw tikang ha mga kablas aada ha iyo mga balay; . . . Ano an karuyag niyo sidngon nga ginrumok niyo an akon katawohan, ngan gingiling niyo an nawong han mga kablas?” (Isaias 3:13-15) Imbes nga magbuhat para ha kaopayan han katawohan, an mga lider malimbong nga nagbubuhat. Inaabuso nira an ira awtoridad pinaagi han pagpariko han ira kalugaringon ngan pagpasibaya ha kablas ngan nanginginahanglan. Kondi ini nga mga lider kinahanglan makighusay kan Jehova han kasundalohan tungod han ira pagtalumpigos ha mga kablas. Usa nga pahamangno gud ini ha may-ada mga responsabilidad yana nga panahon! Hinaot magbantay gud hira nga diri abusuhon an ira awtoridad.
19. Salaan an Kakristianohan han ano nga panalumpigos ngan pagtimaraot?
19 An Kakristianohan—labi na an iya mga klero ngan mga nangunguna—malimbong nga nagkakaada hin daku nga bahandi nga gintatag-iya unta han ordinaryo nga mga tawo, nga iya gintalumpigos ngan padayon nga gintatalumpigos. Iya liwat ginhahampak, gintitimaraot, ngan ginmamaltrato an katawohan han Dios ngan nagdara hin daku nga pasipara ha ngaran ni Jehova. Ha iya igo nga panahon, sigurado nga hi Jehova masulod ha paghukom ha iya.
‘Usa nga Marka Imbes han Kahusay’
20. Kay ano nga ginkondenar ni Jehova “an mga anak nga kababayin-an han Sion”?
20 Katapos kondenahon an mga sayop han mga lider, binirik hi Jehova ha kababayin-an han Sion, o Jerusalem. Matin-aw nga tungod han uso, “an mga anak nga kababayin-an han Sion” nagsusul-ot hin “mga kadenita ha [tiil]”—mga kadena ha mukubuko—nga nagtatagingting. Gintutuyo han kababayin-an nga pumitad hin halipot ngan “nanaglakat nga nanagisid-isid,” basi ipakita an pino nga paggios han usa nga babaye. Kon may-ada man, ano an sayop hini? Amo an paggios hini nga kababayin-an. Hi Jehova nasiring: “An mga anak nga kababayin-an han Sion mga mapahitas-on, ngan naglalakat nga naninikig an mga liog ngan may maglaw-ay nga mga mata.” (Isaias 3:16) An sugad nga pagkamapahitas-on diri makakapalagiw ha sirot.
21. Paonan-o nakaapekto ha Judio nga kababayin-an an paghukom ni Jehova ha Jerusalem?
21 Salit, kon umabot na an paghukom ni Jehova ha tuna, inin mapahitas-on nga “mga anak nga kababayin-an han Sion” mawawad-an han ngatanan—bisan han kahusay nga ira iginpapasigarbo. Hi Jehova nagtatagna: “An Ginoo mahampak pinaagi hin puno han alimpupuro han ulo han mga anak nga kababayin-an han Sion, ngan pagbubukasan ni Jehova an ira mga bahin nga tinago. Hadto nga adlaw kukuhaon han Ginoo an katahuman han mga rayandayan han ira mga mukubuko, ngan an mga pudong nga hinukot, ngan an mga rayandayan nga binulan; An mga pendantes, ngan an mga panglay, ngan an mga tampadong; An mga kalo, ngan an mga kadenita ha mukubuko, ngan an mga paha, ngan an mga kahon han mga talamhot, [bangin mga surudlan han pahamot] ngan an mga sangod [o, anting-anting]; an mga singsing, ngan mga alahas ha irong; An mga bisti ha piyesta, ngan an mga mantilla, ngan an mga kayab, ngan an mga bursa; An mga espiho ha kamot, ngan an pino nga lino, ngan an mga alibod ha ulo, ngan an mga kurumpot.” (Isaias 3:17-23; kitaa an mga footnote ha NW.) Makasurubo gud nga pagbag-o han mga hitabo!
22. Gawas pa han ira mga adorno, ano pa an nawara han kababayin-an han Jerusalem?
22 An matagnaon nga mensahe padayon nga nasiring: “Ha lugar han magtam-is nga mga panakot mamamay-ada kaduntan; ngan ha lugar han bakos, usa nga pisi; ngan ha lugar han maopay nga kasudlay nga buhok, an kadangasan; ngan ha lugar han bisti nga hilaba, an inaalibod nga panapton nga sako; kasunogan ha lugar han katahuman.” (Isaias 3:24) Han 607 A.K.P., an mapahitas-on nga kababayin-an han Jerusalem napukan tikang ha pagin bahandianon ngada ha pagin kablas. Nawara nira an ira kagawasan ngan nakarawat an ‘marka’ han pagkauripon.
“Hiya Mabubungkag”
23. Ano an iginpapasamwak ni Jehova mahitungod han Jerusalem?
23 Ha pakiistorya yana ha siyudad han Jerusalem, hi Jehova nagpapasamwak: “An imo mga tawo magkakapupukan pinaagi han kampilan, ngan an imo mga kusgan ha away. Ngan an iya mga ganghaan magtatangis ngan magmamabidoon; ngan hiya mabubungkag ngan malingkod dida ha tuna.” (Isaias 3:25, 26) An kalalakin-an han Jerusalem, bisan an iya mga kusgan, pamamatayon ha away. An siyudad bug-os nga maruruba. Para han “iya mga ganghaan,” magigin panahon ito han ‘pagtangis ngan kabidoan.’ An Jerusalem “mabubungkag” ngan magigin binayaan.
24. An kamatay han kalalakin-an pinaagi han kampilan nagkaada ano nga mga epekto para ha kababayin-an han Jerusalem?
24 An pagkamatay han kalalakin-an pinaagi han kampilan magkakaada maraot nga mga epekto ha kababayin-an han Jerusalem. Ha pagtapos hini nga bahin han iya matagnaon nga libro, hi Isaias nagtatagna: “An pito nga babaye magkakapot ha usa nga lalaki hadto nga adlaw, nga masiring: Makaon kami han amon kalugaringon nga tinapay, ngan magsusul-ot han amon kalugaringon nga panapton: itugot la nga matawag kami han imo ngaran; kuhaon mo an amon kaarawdan.” (Isaias 4:1) Magigin duro an kakulang hin maarasawa nga kalalakin-an salit an pipira nga kababayin-an mahirani ha usa nga lalaki basi tawagon ha iya ngaran—nga iginpapasabot nga makilala ha publiko sugad nga iya mga asawa—ngan salit matatalwas ha kaarawdan han pagin waray bana. An Mosaiko nga Balaud nagkinahanglan nga an bana magtagana hin karaunon ngan panapton han iya asawa. (Eksodo 21:10) Kondi, ha pag-uyon nga ‘kumaon han ira kalugaringon nga tinapay ngan magsul-ot han ira kalugaringon nga panapton,’ disidido ini nga kababayin-an nga mahigawas an lalaki tikang ha iya legal nga mga obligasyon. Makasurubo gud nga kahimtang para han mapahitas-on hadto nga “mga anak nga kababayin-an han Sion”!
25. Ano an hirani na mahitabo ha mga mapahitas-on?
25 Ginpapaubos ni Jehova an mga mapahitas-on. Han 607 A.K.P., tinuod nga iya ‘ginpayukbo’ an pagkamapahitas-on han iya pinili nga katawohan ngan ginpahinabo an ira ‘pagkahitaas’ nga ‘mahiubos.’ Hinaot diri gud hingalimtan han totoo nga mga Kristiano nga “an Dios nakontra ha mga palabilabihon, kondi naghahatag hin [diri takos nga kalooy] ha mga mapainubsanon.”—Jakobo 4:6.
[Mga Pakiana]