Mga Pakiana Tikang ha mga Magbarasa

Mationan-o kaiha nga peryodo han panahon nag-antos hi Job?

An iba nga mga tawo naghuhunahuna nga an mga pagsari kan Job inabot hin maiha nga katuigan, kondi an libro ni Job waray mag-unabi han sugad kaiha nga pag-antos.

An siyahan nga bahin han mga pagsari kan Job, an kamatay han mga membro han pamilya ngan kawara han mga panag-iya, baga hin waray mag-iha. Aton mababasa: “Ngan nahinabo ha usa ka adlaw han nagpipinangaon ngan nag-iirignom hin alaksiw an [kan Job] mga anak nga kalalakin-an ngan an iya mga anak nga kababayin-an didto ha balay han ira gimagurangi nga bugto nga lalaki.” Sunod-sunod nga nakarawat ni Job an sumat nga nag-antos hiya hin kawad-i—han iya kabakahan, iya mga asno, iya mga karnero, iya mga kamelyo, ngan han mga surugoon nga nag-aataman hito nga mga hayop. Matin-aw, katapos gud hito hinbaroan ni Job an kamatay han iya mga anak nga kalalakin-an ngan kababayin-an, nga “nagpipinangaon ngan nag-iirignom hin alaksiw . . . ha balay han ira gimagurangi nga bugto nga lalaki.” Ini ngatanan baga hin nahitabo ha usa la ka adlaw.—Job 1:13-19.

An sunod nga bahin han mga pagsari kan Job posible nga mas maiha. Nakiistorya hi Satanas kan Jehova ngan nagsiring nga mapapakyas hi Job ha pagsari han integridad kon an pag-antos personal nga makaapekto ha iya—ha iya kalugaringon nga lawas. Katapos hi Job nagkaada “magsakit nga mga hubag tikang ha rapadapa han iya tiil ngadto ha iya alimpoporo.” An pagsarang hini nga sakit ha iya bug-os nga lawas bangin umabot hin maiha-iha nga panahon. Ngan posible nga nag-iha anay antes an mga sumat han “ngatanan nga karaotan” dinangat ha iya mga kunohay nga paraliaw, nga kinadto ha iya.—Job 2:3-11.

Hi Elipas tikang ha Teman ha tuna han Edom, ngan hi Sopar tikang ha norte-weste nga dapit han Arabia, salit an mga lugar han ira urukyan diri hirayo tikang kan Job ha Uz, nga bangin ha norte han Arabia. Kondi, hi Bildad usa nga Suhitanhon, ngan gintotoohan nga an iya katawohan nag-ukoy ha ligid han Euprates. Kon hi Bildad nakadto ha iya lugar hito nga panahon, bangin umabot hin mga semana o mga bulan antes niya mabatian an mahitungod han kahimtang ni Job ngan magbiyahe ngadto ha Uz. Siyempre, posible nga an tulo nakadto hirani ha lugar ni Job han nagtikang an iya pag-antos. Ha anoman nga kahimtang, han inabot an tulo nga mga sangkay ni Job, “hira nanlingkod upod ha iya dida ha tuna ha pito ka adlaw ngan pito ka gab-i” nga waray iruistorya.—Job 2:12, 13.

Katapos inabot an ultimo nga bahin han mga pagsari kan Job, nga an mga detalye hito nakakapuno han damu nga mga kapitulo han libro. May-ada sunod-sunod nga mga debate o mga pahayag hadton mga paraliaw kuno, ngan agsob nga nabaton hi Job. Han matapos ito, an batan-on nga lalaki nga hi Elihu nagtagana hin pagtadong, ngan ginsaway ni Jehova hi Job tikang ha langit.—Job 32:1-6; 38:1; 40:1-6; 42:1.

Salit, an pag-antos ni Job ngan an kasulbaran hito posible nga nahitabo ha sulod hin pipira ka mga bulan, bangin diri maabot hin usa ka tuig. Bangin hinbabaroan mo tikang ha eksperyensya nga an makuri nga mga pagsari baga hin waray kataposan. Kondi, kinahanglan diri naton hingalimtan nga matatapos ito, sugad han kan Job. Anoman kaiha an aton gin-aatubang nga mga pagsari, aton hinumdoman an suporta han Dios, sugad han ipinapakita han inspirado nga mga pulong: ‘Bisan kon an kakurian diri mag-iiha ngan magaan, nakakahimo ito ha amon hin kahimayaan nga may-ada mas labaw nga kabug-at ngan waray kataposan.’ (2 Korinto 4:17) Hi apostol Pedro nagsurat: “An Dios ha ngatanan nga grasya, nga nagtawag ha iyo ngadto ha iya himaya nga waray kataposan kan Kristo, ha katapos niyo mag-antos hin gutiay, hiya maghihingpit, magpaparig-on, ngan magpapakusog ha iyo.”—1 Pedro 5:10.