An Yawa Diri kay Patootoo La

“Ha bug-os han Bag-o nga Testamento may-ada daku nga away butnga han mga puwersa han Dios ngan han pagkamaopay, ha usa nga bahin, ngan han karaotan nga gindudumarahan ni Satanas, ha luyo nga bahin. Diri ini ideya han usa o duha nga parasurat han Biblia, kondi han kadam-an. . . . Matin-aw kon sugad an pamatuod han Bag-o nga Testamento. Hi Satanas totoo ngan tinuod nga maraot, pirme nakontra ha Dios ngan ha katawohan han Dios.”—“The New Bible Dictionary.”

KAY ano, kon sugad, nga damu han nag-aangkon nga mga Kristiano—ngan nag-aangkon nga natoo ha Biblia—an nagdudumiri han ideya nga naeksister an Yawa? Tungod kay ha kamatuoran, diri nira kinakarawat an Biblia sugad nga Pulong han Dios. (Jeremias 8:9) An mga parasurat han Biblia, siring nira, nagpakita han mga pilosopiya han mga nasud nga nakapalibot ha ira ngan waray magpahayag hin husto han kamatuoran tikang ha Dios. Pananglitan, an teologo han Katoliko nga hi Hans Küng nagsurat: “An hinimohimo nga mga ideya mahitungod kan Satanas nga kaupod an daku nga grupo han mga demonyo . . . nakasulod tikang ha mga susmatanon han Babilonya ngadto ha siyahan nga Judaismo ngan tikang  didto ngadto ha Bag-o nga Testamento.”—On Being a Christian.

Kondi an Biblia diri pulong la han mga tawo; totoo nga giniyahan ito nga Pulong han Dios. Maaramon, kon sugad nga aton tagdon hin seryoso an ginsisiring hito mahitungod han Yawa.—2 Timoteo 3:14-17; 2 Pedro 1:20, 21.

Ano an Panhunahuna ni Jesus?

Tinoo hi Jesu-Kristo nga totoo an Yawa. Waray sulaya hi Jesus hin yawa nga aada ha iya sulod. Gin-atake hiya hin totoo nga persona nga ha urhi iya gintawag nga “an prinsipe han kalibotan.” (Juan 14:30; Mateo 4:1-11) Tinoo liwat hiya nga an iba nga espiritu nga mga linarang sinuporta kan Satanas ha iya maraot nga mga plano. Gintambal niya an “yawan-on” nga mga tawo. (Mateo 12:22-28) Bisan an ateyistiko nga publikasyon nga A Rationalist Encyclopædia nakaobserba han bili hini han siniring ito: “Ulang pirme para ha mga teologo kon paonan-o ginkarawat ni Jesus han mga Ebanghelyo an pagtoo ha magraot nga mga espiritu.” Han maghisgot hi Jesus mahitungod han Yawa ngan han iya mga demonyo, diri niya gin-uutro la an mga patootoo nga nagtikang ha Babilonyahanon nga mga susmatanon. Maaram hiya nga nag-eksister gud hira.

Damu an aton mahibabaroan mahitungod han Yawa kon aton tatagdon an mga pulong ni Jesus ha relihiyoso nga mga magturutdo ha iya panahon: “Kamo tinikang ha iyo amay nga Yawa, ngan an mga kaipa han iyo amay buot niyo buhaton. Hiya parapatay tikang ha tinikangan, ngan diri hiya nagpapadayon ha kamatuoran, kay waray kamatuoran ha iya. Kon hiya nagyayakan han buwa, hiya nagyayakan ha iya kalugaringon, kay hiya buwaon ngan amay hiya han buwa.”—Juan 8:44.

Sumala hini, an Yawa, an ngaran nga nangangahulogan hin “parapakaraot,” “buwaon ngan amay hiya han buwa.” Hiya an siyahan nga linarang nga nagbuwa mahitungod han Dios, ngan ginbuhat niya ito hadto ha hardin han Eden. Hi Jehova nagsiring nga an aton orihinal nga mga ginikanan ‘mamamatay gud’ kon kumaon hira tikang ha puno nga kahoy han kahibaro han maopay ngan maraot. Pinaagi han baba han halas, hi Satanas nagsiring nga diri totoo ito nga mga pulong. (Genesis 2:17; 3:4) Angayan nga gintawag hiya nga “an daan nga halas, nga ginngangaranan Yawa ngan Satanas.”—Pahayag 12:9.

An Yawa nagbuwa mahitungod han puno nga kahoy han kahibaro han maopay ngan maraot. Hiya nangatadongan nga an pagdiri ha pagkaon tikang hito nga puno diri makatadunganon; usa ito nga pag-abuso han gahum. Hiya nagsiring nga hira Adan ngan Eva mahimo ‘magin pariho han Dios’ ha pagdesisyon para ha ira kalugaringon kon ano an maopay ngan an maraot. Iginpasabot ni Satanas nga sugad nga mga tawo nga may kagawasan ha pagbuot, sadang hira magkaada bug-os nga katungod ha pagdesisyon. (Genesis 3:1-5) Nagbangon hin importante nga mga isyu ini nga pag-atake ha pagkahusto han paagi han Dios ha pagmando.  Salit naghatag hi Jehova hin panahon basi masulbad ini nga mga isyu. Nangangahulogan ini nga gintutugotan hi Satanas nga mabuhi hin halipot nga panahon. An iya limitado nga panahon madagmit nga nagtitikaubos. (Pahayag 12:12) Ha gihapon, padayon nga iginpapahirayo niya an katawohan tikang ha Dios pinaagi han mga buwa ngan panlimbong, ginagamit an mga tawo nga pariho han mga eskriba ngan han mga Pariseo ha panahon ni Jesus basi ipasarang an iya mga katutdoan.—Mateo 23:13, 15.

Hi Jesus nagsiring liwat nga an Yawa “parapatay tikang ha tinikangan” ngan “diri hiya nagpapadayon ha kamatuoran.” Diri ini nagpapasabot nga ginlarang ni Jehova an Yawa sugad nga “parapatay.” Waray hiya laranga basi magin usa nga klase hin makaharadlok nga hayop nga bantay ha lugar han kalayo ngan pagsakit para han bisan hin-o nga nakontra ha Dios. An “impyerno” ha Biblia diri urukyan ni Satanas. Usa la ito nga komon nga lubnganan han katawohan.—Buhat 2:25-27; Pahayag 20:13, 14.

An Yawa ha tinikangan ‘nakada ha kamatuoran.’ Bahin hiya hadto han langitnon nga pamilya ni Jehova sugad nga hingpit nga espiritu nga anak han Dios. Kondi waray hiya ‘magpabilin ha kamatuoran.’ Mas ginpili niya an iya kalugaringon nga mga paagi ngan mga prinsipyo nga iginbasar ha mga buwa. ‘Nagtikang hiya magin Yawa,’ diri han ginlarang hiya sugad nga anghel nga anak han Dios, kondi han tinuyo nga nagrebelde hiya kontra kan Jehova ngan nagbuwa kan Adan ngan Eva. An Yawa pariho hadton mga tawo nga nagrebelde kontra kan Jehova ha panahon ni Moises. Mahitungod ha ira aton mababasa: “Hira nagbuhat ha mahugaw ha iya, diri hira iya mga anak, ito ira kasurusnan.” (Deuteronomio 32:5) Ito gihapon an masisiring mahitungod kan Satanas. Hiya nagin “parapatay” han hiya nagrebelde ngan nagin hinungdan han kamatay ni Adan ngan ni Eva ngan, ha pagkamatuod, han bug-os nga pamilya han katawohan.—Roma 5:12.

Masinupakon nga mga Anghel

An iba nga mga anghel inupod kan Satanas ha iya pagrebelde. (Lukas 11:14, 15) “Binayaan [hini nga mga anghel] an ira kalugaringon nga inukyanan” ngan naggamit han lawas hin mga tawo basi magpahimulos hin seksuwal nga mga relasyon ha ‘anak nga kababayin-an han katawohan’ ha panahon ni Noe. (Judas 6; Genesis 6:1-4; 1 Pedro 3:19, 20) “An ikatulo ka bahin han mga bitoon ha langit,” o gutiay nga bahin han mga linarang nga espiritu, nagsunod hini nga klase hin pagkinabuhi.—Pahayag 12:4.

An simboliko hinduro nga libro han Pahayag naghuhulagway han Yawa sugad nga “daku nga mapula nga dragon.” (Pahayag 12:3) Kay ano? Diri tungod kay ha literal may-ada hiya makaharadlok pagkit-on, maraksot nga lawas. Ha pagkamatuod, diri kita maaram kon ano nga klase hin lawas may-ada an espiritu nga mga linarang, kondi posible nga hi Satanas diri naiiba ha iba nga espiritu nga linarang nga mga anghel hito nga bahin. Kondi, an “daku nga mapula nga dragon” amo an angayan nga paghulagway ha hakog, makaharadlok, gamhanan, ngan nakakadaot nga disposisyon ni Satanas.

Hi Satanas ngan an mga demonyo limitado na gud an kagawasan yana. Diri na hira mahimo gumamit han lawas hin tawo sugad han nahimo nira hadto. Waray pag-iha katapos matukod an Ginhadian han Dios pinaagi kan Kristo han 1914, iginlabog hira ha tuna.—Pahayag 12:7-9.

An Yawa Makuri Mapirde nga Kaaway

Bisan pa hito, an Yawa nagpapabilin nga makuri mapirde nga kaaway. Hiya “sugad hin maaringasa nga leon, naglilinakatlakat, pagpinamiling hin iya lalamyon.” (1 Pedro 5:8) Diri hiya usa la ka maraot nga bahin nga aada ha aton diri-hingpit nga lawas. Oo, kada adlaw nakikig-away kita kontra ha aton kalugaringon makasasala nga mga hilig. (Roma 7:18-20) Kondi an totoo nga pakig-away amo an “kontra ha mga magburuot hini nga masirom nga kalibotan, kontra ha mga espirituhanon nga kasundalohan han karaotan ha mga langitnon nga lugar.”—Efeso 6:12.

 Mationan-o ka kaylap an impluwensya han Yawa? ‘An bug-os nga kalibotan aada ha gahum han usa nga maraot,’ siring ni apostol Juan. (1 Juan 5:19) Siyempre, diri naton karuyag nga magin interesado gud ha Yawa o tugotan nga madaot kita han kahadlok ha iya tungod han patootoo. Kondi, maaramon para ha aton, nga magpabilin nga mabinantayon ha iya mga pangalimbasog nga butahon kita ha kamatuoran ngan bungkagon an aton integridad ha Dios.—Job 2:3-5; 2 Korinto 4:3, 4.

Diri pirme ginagamit han Yawa an madarahog nga mga paagi basi atakehon adton naruruyag magbuhat han kaburut-on han Dios. Usahay, “nagpapakaaroanghel [hiya] han kahayag.” Ginpahamangnoan ni apostol Pablo an mga Kristiano mahitungod hini nga peligro han hiya magsurat: “Nahahadlok ako, bangin ha bisan ano nga paagi, nga sugad nga hi Eva ginlimbongan han usa nga malimbong nga halas, bangin man an iyo mga hunahuna pagrauton tikang ha kabunayag ngan kaputli nga ngadto kan Kristo.”—2 Korinto 11:3, 14.

Salit, kinahanglan aton ‘tipigan an aton maopay nga panhunahuna, magin mabinantayon, ngan magin marig-on kontra ha iya, nga marig-on ha pagtoo.’ (1 Pedro 5:8, 9; 2 Korinto 2:11) Likayi nga magin masayon malimbongan ni Satanas pinaagi han pag-usisa han bisan ano nga may kalabotan ha espiritismo. (Deuteronomio 18:10-12) Magin maduruto nga estudyante han Pulong han Dios, nahinunumdom nga pauroutro nga ginkotar ni Jesu-Kristo an Pulong han Dios han ginsulay hiya han Yawa. (Mateo 4:4, 7, 10) Mag-ampo para han espiritu han Dios. An mga bunga hito makakabulig ha imo nga malikyan an mga buhat han unod, nga epektibo gud nga igin-aaghat ni Satanas. (Galasia 5:16-24) Sinsero nga mag-ampo liwat ngadto kan Jehova kon naabat ka nga gin-iipit han Yawa ngan han iya mga demonyo ha usa nga paagi.—Filipos 4:6, 7.

Diri kinahanglan nga mahadlok ha Yawa. Hi Jehova nagsasaad hin tinuod nga panalipod kontra ha bisan ano nga mabubuhat ni Satanas. (Salmo 91:1-4; Proberbios 18:10; Jakobo 4:7, 8) “Magmarig-on kamo ha Ginoo, ngan ha kusog han iya gahum,” siring ni apostol Pablo. Niyan “[makakahimo ka] pag-atubang kontra ha mga limbong han yawa.”—Efeso 6:10, 11.

[Retrato ha pahina 5]

Maaram hi Jesus nga an Yawa totoo nga persona

[Retrato ha pahina 6]

‘An bug-os nga kalibotan aada ha gahum han usa nga maraot’

[Ginkuhaan han Retrato]

NASA photo

[Mga Retrato ha pahina 7]

Magin marig-on kontra ha Yawa pinaagi han pag-aram ha Pulong han Dios ngan pag-ampo hin regular