“Ano an Nahitatabo ha Fransia?”

“Kagawasan, hinigugma nga kagawasan,” an mga pulong tikang ha “La Marseillaise,” an kanta han nasud han Fransia. Sigurado, an kagawasan usa nga butang nga sadang pabilhan. Kondi, an bag-o nga mga hitabo ha Fransia amo an hinungdan han kabaraka nga ginpapaluya an simple nga mga kagawasan. Salit, han Biernes, Nobyembre 3, 2000, napuplo ka yukot han mga Saksi ni Jehova an nanaltag han kabug-osan nga 12 ka milyon nga kopya han espesyal nga tract nga may ulohan nga “Ano an Nahitatabo ha Fransia? Mawawara Na ba an Kagawasan?”

HA PIPIRA ka mga tuig na yana, an mga Saksi ni Jehova ha Fransia gin-aatake han magkalainlain nga mga politiko ngan mga grupo nga nakontra ha sekta. Nagresulta ini hin mga kakurian ha mga Saksi sugad nga indibiduwal, sugad nga kongregasyon, ngan ha nasud. Kondi, han Hunyo 23, 2000, an Conseil d’État, an gihitaasi nga administratibo nga hukmanan han Fransia, naghimo hin makatirigamnan nga desisyon nga nagparig-on han presente nga paghukom han 31 ka hiruhibubo nga hukmanan ha sobra 1,100 nga kaso. Ginparig-on han hitaas nga hukmanan nga an pagsingba han mga Saksi ni Jehova bug-os nga nauyon ha balaud han Fransia ngan an ira mga Kingdom Hall takos han pariho nga mga kagawasan ha buhis nga iginhatag ha iba nga mga relihiyon.

Kondi, ha bug-os nga pagbalewaray hini nga desisyon, an French Ministry of Finance padayon nga nagdudumiri paghatag ha mga Saksi ni Jehova hin kagawasan tikang ha pagbayad han buhis nga igintugot han balaud ha relihiyoso nga mga organisasyon. An Ministry nangangaro hin 60-porsyento nga buhis ha mga kontribusyon han mga Saksi ngan han kasangkayan nga kaupod han 1,500 nga kongregasyon ha Fransia. Gin-uusisa ini nga kaso yana.

An tumong han gin-unabi na nga kampanya amo an pagbuhayhag hini nga pagbalewaray ha balaud ngan ha pagpatin-aw han mga peligro  nga aada ha sugad diri-makatadunganon nga pagbuhis ngan ha ipinasa nga mga balaud nga magpapaluya han relihiyoso nga kagawasan para ha ngatanan. a

Hilawig nga Adlaw

Han alas dos ha aga, an mga Saksi ha pipira nga mga kongregasyon nagtikang panaltag ha gawas han mga estasyon han tren ngan mga pabrika ngan ha mga paluparan han eruplano. Han alas sais, marisyo na an Paris. Mga 6,000 nga boluntaryo an nakapwesto na ha matawo nga mga lugar basi igkita hin mga pasahero nga tikadto ha ira trabaho. Usa nga batan-on nga babaye an nagkomento: “Maopay an iyo ginbubuhat para ha relihiyoso nga kagawasan. Diri la mga Saksi ni Jehova an nahidadabi.” Ha Marseilles, sobra 350 nga mga Saksi an nanaltag han tract ha mga estasyon han metro ngan ha kakalsadahan. Ha sulod hin usa ka oras, an radyo han nasud nagpapahayag han kampanya, nagsusumat ha mga mamarati hito nga diri mahipausa kon daupon hira han mga Saksi ni Jehova. An mga biyahero ha sentro nga estasyon ha Strasbourg, nga hinmumutangan han European Court of Human Rights, mapailubon nga naglinya basi makakarawat han ira kopya. Usa nga abogado an nagkomento nga, bisan kon diri hiya nasuporta han aton mga gintotoohan, interesado nga gin-oobserbahan niya an aton kaso, tungod kay an aton pinangangalimbasogan importante ngan husto.

Han alas-otso, bisan pa han makusog nga uran, 507 nga mga Saksi ha siyudad han Alpine ha Grenoble an sistematiko nga nanaltag ha mga kalsada o namutang han tract ha mga kahon han surat. Han makita han mga nagmamaneho han awto ngan tram nga may-ada nahitatabo, igin-ukoy an ira mga sarakyan basi mangaro hin tract. Ha weste nga siyudad han Poitiers, an mga biyahero nga nagkaabot nga sakay han tren han alas noybe nakakarawat na han tract ha lugar nga ira gintikangan. Ha Mulhouse, hirani ha giutan han Alemanya, 40,000 nga kopya an naipanaltag na.

Han alas dyes na, damu nga mga kongregasyon an nakapanaltag na hin sobra katunga han ira mga tract. Samtang nagtitikaudto na, gutiay la hinduro nga mga tawo an waray kumarawat, ngan damu nga makapainteres nga mga paghisgot an nagin resulta. Ha Besançon, sobra 80 kilometro la tikang ha giutan han Switzerland, may-ada usa nga batan-on nga lalaki nga nagpahayag hin interes ha Biblia ngan nagpakiana kon kay ano nga gintutugotan han Dios an pag-antos. Ginhangyo hiya han Saksi nga ipadayon an paghisgot ha hirani nga Kingdom Hall, diin gintikangan dayon an pag-aram ha Biblia ha brosyur nga Ano an Ginkikinahanglan ha Aton han Dios?

Ginamit han damu nga mga Saksi an ira bakante nga oras ha udto basi magsangyaw ha sulod hin usa o duha ka oras. Ha bug-os nga kulop, nagpadayon an panaltag, ngan damu nga mga kongregasyon an natapos han alas tres o alas kuwatro hito nga kulop. Ha siyudad han Reims, an iba nga mga tawo nga nag-aram o nakig-upod ha mga Saksi ni Jehova hadto nagpahayag han ira hingyap nga bumalik ha kongregasyon. Ha Bordeaux natikangan an tulo nga pag-aram ha Biblia ha balay. Ha pariho nga siyudad, usa nga Saksi an sinulod ha tindahan basi pumalit hin peryodiko ngan nakakita hin damu nga mga tract ha estante. An tindera, usa nga Saksi hadto, kinarawat hin tract ngan, tungod kay nahunahuna nga importante ito, nagpa-xerox hin damu basi personal nga ipanhatag.

Ha Le Havre, Normandy, nahipausa an usa nga Protestante nga babaye han pakabati ha radyo nga ginbubuhisan an mga kontribusyon han mga Saksi ni Jehova. Naikag hiya ha pagkarawat han tract ngan gindayaw an mga Saksi tungod ha maisugon  nga pagpahayag kontra han sugad nga kawaray-hustisya. Han alas-7:20 h.g., an mga sumat han TV ha rehiyon ha Lyons nagkomento mahitungod han panaltag, nga nasiring: “Kanina nga aga mas masayon malikyan an mga turo han uran kay han mga tract han mga Saksi ni Jehova.” Duha nga Saksi an gin-interbyu ngan nagsaysay han mga hinungdan han kampanya.

An mga Saksi nga naruruyag makigbahin katapos han ira sekular nga trabaho nanaltag hin mga tract ha tiuli nga mga pasahero ngan nagbutang han iba ha mga kahon han surat. Ha mga bungto sugad han Brest ngan Limoges—nga bantogan tungod han porselana hito—an mga tawo nga nagawas ha sinehan ha alas-11:00 h.g. kaupod han ultimo nga kinarawat han tract hito nga adlaw. An nahibilin nga mga tract gintirok ngan ginpanaltag kinabuwasan.

Mga Resulta

Usa nga Saksi an nagsurat: “An aton mga kaaway naghuhunahuna nga mapapaluya kita nira. Ha pagkamatuod, kabaliktaran an nahitatabo.” Ha kadam-an nga mga kongregasyon, sobra 75 porsyento han mga Saksi an nakigbahin hito nga adlaw, an iba naggasto hin 10, 12, o 14 ka oras para hini nga buruhaton. Ha Hem, ha norte nga bahin han Fransia, katapos magtrabaho ha pangab-i nga eskedyol, usa nga Saksi an nanaltag han tract tikang ha alas singko ha aga tubtob ha alas tres ha kulop. Ha kahirani nga Denain, diin may-ada kongregasyon tikang pa han 1906, 75 nga mga Saksi an naggasto hin 200 ka oras ha panaltag han tract han Biernes. An iba, bisan pa han kalagas, sakit, ngan maraot nga panahon, determinado liwat nga makigbahin. Ha Le Mans, pananglitan, may-ada tulo nga babaye nga sobra 80 an ira edad nga naggasto hin duha ka oras ha pamutang hin tract ha mga kahon han surat, ngan usa nga Saksi nga nakada ha lingkoran nga de kaliding an nanhatag hin tract ha atubangan han estasyon han tren. Ngan makapadasig gud nga makita an damu nga diri aktibo hadto nga mga Saksi nga nakigbahin hinin espesyal nga buruhaton!

Waray ruhaduha, ini nga panaltag nagresulta hin maopay nga pagsangyaw. An mga tawo tikang ha magkalainlain nga mga kahimtang han kinabuhi, nga damu ha ira an talagsa la makaistorya ha ira mga balay an kinarawat hin kopya han tract. Damu nga mga indibiduwal an inabat nga nakahimo ini hin labaw pa ha pagpanalipod han mga interes han mga Saksi. Ginhunahuna ito han damu sugad nga depensa han kagawasan han konsensya ngan pagsingba para han ngatanan nga mga taga-Fransia. Sugad nga ebidensya hini, an mga tawo naghangyo hin dugang nga mga kopya han tract basi ihatag ha kasangkayan, mga kakilala, o mga paryente.

Oo, an mga Saksi ni Jehova ha Fransia nagpapasigarbo ha pagpakilala han ngaran ni Jehova ngan ha pagdepensa han intereses han Ginhadian. (1 Pedro 3:15) Sinsero nga ginlalaoman nira nga hira “mag-ukoy . . . ha mahusay ngan malinaw ha ngatanan nga pagtahod ha Dios ngan kaligdong” ngan yinukot pa an maupod ha ira ha pagdayaw ha ira langitnon nga Amay, hi Jehova.—1 Timoteo 2:2.

[Footnote]