Magin Mapasalamaton Ngan Magmalipayon

“AN kadasig ha pagpasalamat usa nga importante nga eksperyensya han tawo,” siring han Calgary Herald, nga pahayagan ha Canada. Ginkotar han Herald an pipira han noybe-anyos nga mga estudyante ha elementarya nga ginhangyo han ira magturutdo nga magsurat mahitungod han ngatanan nga butang nga ira pinasasalamatan. Usa nga batan-on an nagsiring nga mapasalamaton hiya ha iya pamilya ‘tungod kay nagmangno hira ha iya.’ Usa nga batan-on nga babaye liwat an mapasalamaton ha iya pamilya, nasiring: “Ginbabantayan nira ako nga talwas, mahimsog, nagtatagad hira ha akon, nahigugma ha akon, nagpapakaon ha akon, ngan kon diri tungod han akon mga ginikanan, diri unta ako mabubuhi.”

An pagin diri-mapasalamaton nagtutugway ha duro nga kawaray-katagbaw. Sumala ha pilosopo-teologo nga hi J. I. Packer, “ginlarang kita basi mabuhi nga nadepende ha Dios ngan ha usa kag usa.” Nagpapahinumdom ini ha aton han maaramon nga sagdon han Biblia nga iginsurat mga siglo na an naglabay, nga nasiring: “Magpasalamat kamo.” (Kolosas 3:15) An mga kapahayagan han pagpasalamat ngan kinasingkasing nga pagtagad han utang nga kaburut-on ha iba nabulig ha pagpatubo han mapinairon nga mga relasyon.

Dugang pa, pinaagi han pagpasalamat ngan pagpabili ha usa kag usa, ipinapakita liwat naton nga mapasalamaton kita kan Jehova, ngan nakikita niya ini. An Biblia nasiring: “An mga mata ni Jehova nadalagan ngadto nganhi sahid an bug-os nga kalibotan, ha pagpakita ha iya ngahaw nga makusog ha ngaran nira kan kanay kasingkasing hingpit tipakadto ha iya.” (2 Kronikas 16:9) Ginpapasarig kita han Dios nga nahinunumdoman ngan pinabibilhan niya an gugma nga ipinapakita han mga tawo para ha iya ngaran. (Hebreo 6:10) Oo, may-ada kita maopay nga hinungdan nga magpasalamat tungod kay inin diosnon nga kalidad, kon iginpapahayag kada adlaw, nakakalipay kan Jehova ngan nakakadugang ha aton kalipayan. Sugad ito han ginsisiring han Proberbios 15:13: “An malipayon nga kasingkasing nakakahimo han nawong nga malipayon.”