An Totoo nga Pagsingba Nakakag-urosa han mga Tawo

BISAN kon an relihiyon ha kabug-osan nagbabahinbahin han katawohan, an pagsingba ha amo la totoo nga Dios may-ada gahum ha pag-urosa han katawohan. Han an Israel amo an pinili nga nasud han Dios, damu han sinsero nga mga Hentil an nadani ha totoo nga pagsingba. Pananglitan, iginsalikway ni Rut an mga dios han iya natawohan nga Moab ngan nagsiring kan Noemi: “An imo katawohan maaakon katawohan, ngan an imo Dios akon Dios.” (Rut 1:16) Han siyahan nga siglo K.P., usa ka daku nga grupo han mga Hentil an nagin mga magsiringba han totoo nga Dios. (Buhat 13:48; 17:4) Ha urhi han magtikang magbiyahe an mga apostol ni Jesus ngadto ha higrayo nga mga lugar nga dara an maopay nga sumat, an iba sinsero nga mga tawo gin-urosa ha pagsingba ha totoo nga Dios. ‘Kamo binirik ha Dios tikang ha iyo mga ladawan, basi mag-alagad ha buhi ngan matuod nga Dios,’ nagsurat hi apostol Pablo. (1 Tesalonika 1:9) An pagsingba ba ha totoo nga Dios may-ada han sugad nakakag-urosa nga gahum yana nga panahon?

An magruhaduhaon nainsister nga sayop an paghisgot mahitungod han “totoo nga mga magsiringba” o “matuod nga Dios.” Mahimo nira abaton ito tungod kay diri hira maaram han bisan ano nga makukuhaan han kahibaro ha kamatuoran. Kondi an mga namimiling han kamatuoran tikang ha damu nga gintikangan nahibabaro nga an pagsingba diri sadang ibasar ha personal nga karuyag. An takos la han aton pagsingba amo an Maglalarang han ngatanan nga mga butang—hi Jehova nga Dios. (Pahayag 4:11) Hiya amo an totoo nga Dios, ngan may-ada hiya katungod ha pagdesisyon kon paonan-o hiya sisingbahon.

Basi mabuligan kita ha paghibaro han iya mga ginkikinahanglan, nakikipagkomunikar ha aton hi Jehova pinaagi han iya Pulong, an Biblia. Haros an ngatanan yana ha tuna mahimo makagamit han bug-os nga Biblia o han mga bahin hito. Dugang pa, an Anak han Dios nagsiring: “Kon kamo magpabilin ha akon pulong, . . . kamo mahibabaro han kamatuoran.” (Juan 8:31, 32) An kamatuoran, kon sugad, mahibabaroan. Ngan minilyon han tangkod-an-kasingkasing nga mga tawo tikang ha magkalainlain nga mga relihiyon an maisugon nga nakarawat hini nga kamatuoran ngan gin-uurosa ha totoo nga pagsingba.—Mateo 28:19, 20; Pahayag 7:9, 10.

Bug-os-kalibotan nga Pagkaurosa ha Aton Panahon!

Usa nga makatirigamnan nga tagna ha libro han Sepania ha Biblia an naghihisgot han pag-urosa han mga tawo nga magkalainlain an mga gintikangan. Ito nasiring: “Hadto akon [Jehova nga Dios] pakakadaon ha mga katawohan an uray nga yinaknan, nga hira ngatanan makatawag han ngaran ni Jehova, ha pag-alagad ha iya ha usa nga pagkahiringyon.” (Sepania 3:9) Usa gud ini ka maopay nga paghulagway han nabag-o nga katawohan nga urosa nga nag-aalagad ha Dios!

San-o ini mahitatabo? An Sepania 3:8 nasiring: “Maghulat kamo ha akon, nasiring hi Jehova, ngada ha adlaw nga ako bumangon ngadto ha pangirinaunon; kay an akon tinguha amo an pagtirok han mga nasud, nga ako makagtirok han mga ginhadian, ha [paghuho] ngada ha ira han akon kaaligutgot, bisan han ngatanan ko nga mabangis nga kasina: kay an bug-os nga tuna pagsisibaron han kalayo han akon pangabugho.” Oo, durante han panahon nga gintitirok ni Jehova an mga nasud kondi antes niya ighuho ha ira an iya mabangis nga kasina, iya iginhahatag ha mga maaghop han tuna an pagbag-o ngadto ha putli nga yinaknan. Yana na ito nga panahon, tungod kay nahitatabo na an pagtirok han ngatanan nga mga nasud ha girra han daku nga adlaw han Dios nga Makagarahum-ha-ngatanan ha Armagedon.—Pahayag 16:14, 16.

Basi magkaurosa an iya katawohan, iginhahatag ni Jehova ha ira an putli nga yinaknan. Ini nga bag-o nga yinaknan nag-uupod han husto nga pagsabot ha kamatuoran han Biblia mahitungod ha Dios ngan han iya mga katuyoan. An pagyakan han putli nga yinaknan nag-uupod han pagtoo ha kamatuoran, pagtutdo hito ngadto ha iba, ngan pagkinabuhi uyon ha mga balaud ngan mga prinsipyo han Dios. Nagkikinahanglan ito han paglikay ha nakakagbahinbahin nga politika ngan pagkuha  ha kasingkasing han hakog nga mga batasan, sugad han rasismo ngan nakakagbahinbahin nga nasyonalismo nga kinaiya hini nga kalibotan. (Juan 17:14; Buhat 10:34, 35) An ngatanan nga mga tangkod an kasingkasing nga nahigugma ha kamatuoran mahibabaro hini nga yinaknan. Tagda kon paonan-o an lima nga tawo nga gin-unabi ha nauna nga artikulo—nga hadto nabahin gud tungod han relihiyon—urosa na yana ha pagsingba ha usa ngan amo la totoo nga Dios, hi Jehova.

Hira Nagkakaurosa ha Totoo nga Pagsingba

Han hi Fidelia, an debotado nga Romano Katoliko, pinalit hin Biblia para ha buruhaton ha eskwelahan han iya anak nga babaye, ginhangyo niya an iya padi nga isaysay tikang hito kon ano an nahitabo ha iya lima nga anak nga namatay. “Daku gud nga kapakyasan!” hiya siniring. Salit han bumisita ha iya an mga Saksi ni Jehova, nagbangon hiya hin pariho nga pakiana ha ira. Han mabasa tikang ha iya Biblia an kamatuoran mahitungod han kahimtang han mga patay, hinbaroan niya nga ginlimbongan hiya han iglesia. Hinbaroan niya nga waray sarabotan an mga patay ngan salit diri nag-aantos ha Limbo o ha bisan diin. (Salmo 146:4; Eklesiastes 9:5) Iginlabog ni Fidelia an ngatanan niya nga relihiyoso nga mga imahen, binaya ha iglesia, ngan nagtikang mag-aram ha Biblia. (1 Juan 5:21) Ha naglabay nga napulo ka tuig, nalilipay hiya pagtutdo han Kasuratanhon nga kamatuoran ngadto ha iba.

Hi Tara nga tikang ha Kathmandu binalhin ngadto ha usa nga nasud nga gutiay la an Hindu nga mga templo. Salit binisita hiya ha Metodista nga singbahan naglalaom nga matatagbaw an iya espirituwal nga mga panginahanglan. Kondi waray hiya makabiling hin baton ha iya pakiana mahitungod han pag-antos han tawo. Katapos hito ginbisita hiya han mga Saksi ni Jehova ngan gintanyagan hiya hin pag-aram ha Biblia. Hi Tara nasiring: “Hinbaroan ko nga an usa nga Dios han gugma diri mahimo magin responsable han ngatanan nga pag-antos ha kalibotan . . . Nalipay ako ha paglaom han usa nga bag-o nga kalibotan nga may kamurayawan ngan pagkaurosa.” (Pahayag 21:3, 4) Iginlabog ni Tara an iya Hindu nga mga imahen, waray na magbuhat han relihiyoso nga mga kustomre han iya natawohan nga nasud, ngan nakabiling hin totoo nga kalipay ha pagbulig nga matagbaw an espirituwal nga mga panginahanglan han iba sugad nga Saksi ni Jehova.

Hi Panya, an Budhista, usa nga parapanigo han siyahan nga mabisita hiya han mga Saksi ni Jehova ha Bangkok, salit an mga tagna ha Biblia nakapainteres ha iya. Hi Panya nagsasaysay: “Han hinbaroan ko kon kay ano nga an presente nga mga kahimtang naiiba tikang ha orihinal nga katuyoan han Maglalarang ngan kon paonan-o niya ginhihikay nga mawara an kadaot nga ginbuhat hadton nagdudumiri ha iya ngan ha iya pagkasoberano, sugad hin nakuha an tabon tikang ha akon mga mata. An ngatanan han mensahe han Biblia nagkakauruyon gud. Nahibaro ako ha paghigugma kan Jehova sugad nga persona; nakaaghat ini ha akon ha pagbuhat han akon hinbaroan nga husto. Disidido ako nga buligan an iba nga makita an kaibahan butnga han tawhanon nga kinaadman ngan han kinaadman han Dios. An totoo nga kinaadman nagbag-o gud han akon kinabuhi.”

Inabot an panahon, hi Virgil nagtikang magkaada seryoso nga mga pagruhaduha mahitungod han gintotoohan han iya relihiyon. Imbes nga mag-ampo ha Dios para han paagi nga mabuligan an mga itom ngan para han iya gintagad nga organisasyon nga nagpapasulabi han rasa nga baga hin nakakaaghat hin kasina ha mga busag, nag-ampo hiya para han kamatuoran, anoman ito, diin man ito. “Han magmata ako kinabuwasan katapos han akon sinsero nga pag-inampo ngadto ha Dios,” nahinunumdom hi Virgil, “nabilngan ko an usa nga Barantayan nga magasin ha balay. . . . Posible nga iginpalusot ito ha ilarom han purtahan.” Waray pag-iha maduruto nga nag-aaram na hiya ha Biblia kaupod han mga Saksi ni Jehova. Hiya nagpapadayon: “Ha siyahan nga higayon ha akon kinabuhi, inabat ako hin katagbaw. . . . Nagtikang ako pakaeksperyensya han kahayag han paglaom.” Waray pag-iha hi Virgil iginkaurosa hadton nagtatanyag  ha mga tawo han amo la totoo nga paglaom sugad han ginsisiring ha Pulong han Dios, an Biblia.

Hi Charo nga tikang ha Latin Amerika naaghat han nakakita an Saksi nga hi Gladys nga nakukurian hiya ha iya gudtiay nga mga anak ngan nagtikang pagbulig ha iya pinaagi han pagpasakay ha iya tipakadto ha merkado. Inabot an panahon, ginkarawat ni Charo an tanyag ni Gladys—an libre nga pag-aram ha Biblia. Han hinbaroan ni Charo tikang ha iya Biblia nga diri ngatanan nga tawo makadto ha langit kondi bibendisyonan liwat ni Jehova an katawohan ha tuna hin waray kataposan nga kinabuhi, nahipausa hiya. (Salmo 37:11, 29) Iginsusumat mismo ni Charo ini nga paglaom ha iba ha naglabay nga 15 ka tuig.

Handurawa an bug-os nga tuna nga inuukyan han sinsero nga mga tawo nga nagkakaurosa ha pagsingba kan Jehova, an amo la totoo nga Dios! Diri ini usa ka imahinasyon. Ito an iginsasaad ni Jehova. Pinaagi han iya propeta nga hi Sepania, an Dios nagpahayag: “Ako mabilin dida ha butnga mo hin mabidoon ngan kablas nga katawohan, ngan hira madangop ha ngaran ni Jehova. . . . [Hira] diri magbubuhat hin karat-an, o diri magyayakan hin mga buwa; diri man an malimbungon nga dila hiaagian dida ha ira baba; . . . ngan waray bisan hin-o nga maghahadlok ha ira.” (Sepania 3:12, 13) Kon nadadani ka hini nga saad, buhata an sagdon han Biblia: “Pangitaa niyo hi Jehova, ngatanan kamo nga mga maaghop ha tuna, nga nagbantay han iya mga lagda; pangitaa an pagkamatadong, pangitaa an pagkamaaghop: manggad na kamo panagoon ha adlaw han kan Jehova kasina.”—Sepania 2:3.