Ginagamit Nira an Ngaran han Dios ha Sentral Aprika

AN KADAM-AN nga mga tawo ha Sentral Aprika natoo ha Dios. Diri hira nagruruhaduha nga hiya an Maglalarang han ngatanan nga mga butang. (Pahayag 4:11) Kondi, sugad la han damu nga mga tawo ha iba nga mga lugar, agsob nga ginbabalewaray nira an iya personal nga ngaran—nga Jehova.

An mga tawo ha Sentral Aprika, sugad man ha iba nga mga bahin han kalibotan, nag-uunabi han ngaran han Dios kon hira nasiring, “Pagdayawon an imo ngaran” ha Pag-ampo han Ginoo. (Mateo 6:9, King James Version) Kondi ha sulod hin maiha nga panahon, gutiay la an maaram hito nga ngaran. Kondi, ha paglabay han mga tuig, an madasigon nga pagsangyaw nga buruhaton han mga Saksi ni Jehova nakagbag-o han panhunahuna han mga tawo mahitungod ha paggamit han ngaran han Dios. Yana, an ngaran han Dios kaylap nga hinbabaroan ngan kinakarawat ha damu nga yinaknan ha Aprika, sugad han Zulu (uJehova), Yoruba (Jehofah), Xhosa (uYehova) ngan Swahili (Yehova). Kondi, an kadam-an nga mga hubad han Biblia hini nga mga yinaknan naglilikay pa gihapon ha paggamit han ngaran han Dios.

An maopay nga hubad nga nagamit han ngaran han Dios amo an Biblia ha Zande, an yinaknan nga ginyayakan ha mga bahin han Republika han Sentral Aprika, Sudan, ngan han Demokratiko nga Republika han Congo. Hiton nga bahin han kalibotan, ginagamit han mga tawo an ngaran han Dios, ginluluwas ito nga Yekova ha ira yinaknan. Anoman an pagpresenta han ngaran han Dios ha dialekto, importante nga gamiton ito. Kay ano? Tungod kay ‘kada usa nga natawag ha ngaran ni Jehova maluluwas.’—Roma 10:13.

[Mapa/Retrato ha pahina 32]

(Para ha aktuwal nga format, kitaa an pabulikasyon)

SUDAN

REPUBLIKA HAN SENTRAL APRIKA

DEMOKRATIKO NGA REPUBLIKA HAN CONGO

[Ginkuhaan han Retrato]

The Complete Encyclopedia of Illustration/J. G. Heck