Hi Jehova nga Dios Aada ha Iya Baraan nga Templo
Kapitulo Otso
Hi Jehova nga Dios Aada ha Iya Baraan nga Templo
1, 2. (a) Kakan-o nakarawat ni propeta Isaias an iya bisyon mahitungod han templo? (b) Kay ano nga nawad-an hi Hadi Usiya han pag-uyon ni Jehova?
“HAN tuig nga ikinamatay ni hadi Usiya ako nakakita han Ginoo nga nalingkod dida ha trono, nga hitaas ngan inalsa; ngan an iya saya nakapuno han templo.” (Isaias 6:1) Hini nga mga pulong han propeta, nagtitikang an ika-6 nga kapitulo han libro han Isaias. Tuig adto han 778 A.K.P.
2 An kadak-an nga bahin han 52 ka tuig nga pagmando ni Usiya sugad nga hadi han Juda, usa ka maopay nga kalamposan. Tungod ha pagbuhat han “matadong ha mga mata ni Jehova,” nagpahimulos hiya han suporta han Dios ha iya mga buruhaton ha militar, ha pagtukod, ngan ha agrikultura. Kondi an iya kalamposan nagin iya liwat kadaot. Ha kataposan, an iya kasingkasing nagin mapahitas-on, “ngan hiya nagtalapas patok kan Jehova nga iya Dios; kay hiya sinulod ngadto ha templo ni Jehova ha pagsunog hin insenso.” Tungod hinin nagbubuotbuot nga buhat ngan han iya kasina patok ha mga saserdote nga nagsaway ha iya, hi Usiya namatay nga sanlahon. (2 Kronikas 26:3-22) Hini nga panahon nagtikang hi Isaias ha iya pag-alagad sugad nga manaragna.
3. (a) Aktuwal ba nga nakikita ni Isaias hi Jehova? Isaysay. (b) Ano nga kiritaon an nakikita ni Isaias, ngan ha ano nga hinungdan?
3 Waray isumat ha aton kon nakain hi Isaias han nakita niya an bisyon. Kondi an nakikita han iya pisikal nga mga mata matin-aw nga usa ka bisyon, diri aktuwal nga pakakita ha Makagarahum-ha-ngatanan, tungod kay “waray usa nga tawo nga nakakita han Dios.” (Juan 1:18; Eksodo 33:20) Kondi, an pakakita ha Maglalarang, hi Jehova, bisan la ha bisyon, usa ka urusahon nga taran-awon. An nalingkod ha hitaas nga trono, nga nagsisimbolo han iya katungdanan sugad nga waray kataposan nga Hadi ngan Hukom, amo an Magmarando ha Uniberso ngan Surok han ngatanan matadong nga gobyerno! An saya han iya hilaba, haluag nga panapton nakapuno han templo. Gintatawag hi Isaias basi managna nga magpapadaku han soberano nga gahum ngan hustisya ni Jehova. Ha pangandam, tatagan hiya hin usa nga bisyon han pagkabaraan han Dios.
4. (a) Kay ano nga simboliko an mga paghulagway kan Jehova nga nakikita ha bisyon ngan iginrekord ha Biblia? (b) Ano an nahibabaroan mahitungod kan Jehova tikang ha bisyon ni Isaias?
4 Hi Isaias waray iginhahatag nga paghulagway han hitsura ni Jehova ha iya bisyon—diri sugad han mga bisyon nga iginsumat ni Esekiel, Daniel, ngan Juan. Ngan ito nga mga asoy nagkakaiba mahitungod han nakikita ha langit. (Esekiel 1:26-28; Daniel 7:9, 10; Pahayag 4:2, 3) Kondi, kinahanglan hunahunaon an klase ngan katuyoan hini nga mga bisyon. Diri ito literal nga mga paghulagway han presensya ni Jehova. An pisikal nga mata diri nakakakita han espirituwal, diri liwat masasabtan han may tubtoban nga hunahuna han tawo an lugar han mga espiritu. Salit, an mga bisyon nagpipresenta han impormasyon ha paagi nga masasabtan han tawo. (Itanding an Pahayag 1:1.) Ha bisyon ni Isaias diri kinahanglanon an paghulagway han hitsura han Dios. An bisyon nagsusumat kan Isaias nga hi Jehova aada ha iya baraan nga templo ngan nga hiya baraan ngan putli an iya mga paghukom.
An mga Serapin
5. (a) Hin-o an mga serapin, ngan ano an kahulogan han termino? (b) Kay ano nga igintatago han mga serapin an ira mga nawong ngan mga tiil?
5 Pamati! Hi Isaias nagpapadayon: “Ha igbaw niya nagtindog an mga serapin: kada usa may unom nga pako; han duha hiya nagtabon han iya nawong, ngan han duha hiya nagtabon han iya mga tiil, ngan pinaagi han duha hiya naglupad.” (Isaias 6:2) An Isaias kapitulo 6 la an bahin han Biblia diin makikita naton an pag-unabi hin mga serapin. Matin-aw, hira an mga anghel nga linarang nga nag-aalagad kan Jehova nga hitaas gud an mga pribilehiyo ngan kadungganan, tungod kay aada ha palibot han langitnon nga trono ni Jehova. Diri sugad ha mapahitas-on nga hi Hadi Usiya, ginbubuhat nira an ira katungdanan ha bug-os nga pagpaubos ngan pagkabuotan. Tungod kay aada ha presensya han langitnon nga Soberano, ira gintatabonan an ira mga nawong han magpadis nga mga pako; ngan sugad nga pagtahod ha baraan nga lugar, ira gintatabonan an ira mga tiil han usa pa nga magpadis. Tungod kay hirani ha Soberano han Uniberso, labaw pa gud nga ginpapaubos han mga serapin an ira kalugaringon, basi diri makuha an himaya nga para gud la ha Dios. An termino nga “mga serapin,” nga nangangahulogan “mga kalayuhon” o “mga naglalaga,” nagpapasabot nga hira nagpapasanag hin kalamrag, kondi ira igintatago an ira mga nawong tikang ha mas labaw nga kalamrag ngan himaya ni Jehova.
6. Ano an posisyon han mga serapin may kalabotan kan Jehova?
6 Ginagamit han mga serapin an ira ikatulo nga magpadis nga mga pako ha paglupad ngan, sigurado, ha paglupadlupad, o ‘pagtindog,’ ha ira mga puwesto. (Itanding an Deuteronomio 31:15.) Mahitungod han ira posisyon, hi Propesor Franz Delitzsch nasiring: “An serapin tinuod nga waray ha igbaw han ulo Niya nga nalingkod ha trono, kondi hira naglulupadlupad ha igbaw han Iya hilaba nga panapton nga nakapuno han katirokan.” (Commentary on the Old Testament) Baga in makatadunganon ini. Hira ‘natindog ha igbaw,’ diri sugad nga labaw kan Jehova, kondi sugad nga nagsiserbi ha iya, masinugtanon ngan andam mag-alagad.
7. (a) Ano nga toka an ginbubuhat han mga serapin? (b) Kay ano nga tulo ka beses nga iginpapahayag han mga serapin an pagkabaraan han Dios?
7 Pamatii yana, iton may pribilehiyo nga mga serapin! “An usa nagtawag ha iba, ngan nagsiring; Baraan, baraan, baraan, hi Jehova han mga kasundalohan: an bug-os nga tuna puno han iya himaya.” (Isaias 6:3) An ira toka amo an pagsiguro nga iginpapahayag an pagkabaraan ni Jehova ngan kinikilala an iya himaya ha bug-os nga uniberso, nga bahin hito an tuna. An iya himaya nakikita ha ngatanan nga iya linarang ngan diri na maiha masasabtan han ngatanan nga mga umurukoy ha tuna. (Numeros 14:21;Salmo 19:1-3; Habakuk 2:14) An tulo ka beses nga kapahayagan nga, “baraan, baraan, baraan,” diri ebidensya han Trinidad. Lugod, tulo ka beses nga pagpabug-at ito han pagkabaraan han Dios. (Itanding an Pahayag 4:8.) Baraan hi Jehova ha gihitaasi nga sukol.
8. Ano an resulta han mga kapahayagan han mga serapin?
8 Bisan kon waray isumat an kadamu han mga serapin, bangin may-ada mga grupo han mga serapin nga nakapuwesto hirani han trono. Ha makaruruyag nga kanta, usa-usa nga gin-uutro nira an kapahayagan han pagkabaraan ngan himaya han Dios. Ano nga resulta an matitigamnan naton? Pamati utro samtang nagpapadayon hi Isaias: “An mga patukuranan han mga puthanan namamantad tungod han tingog niya nga nagsinggit, ngan an balay puno hin aso.” (Isaias 6:4) Ha Biblia, an aso o dampog agsob nga naghahatag hin nakikita nga ebidensya han presensya han Dios. (Eksodo 19:18; 40:34, 35; 1 Hadi 8:10, 11; Pahayag 15:5-8) Nagpapasabot ito hin himaya nga kita nga mga tawo nga linarang diri makakahirani.
Diri-takos, Kondi Ginlimpyo
9. (a) Ano an epekto han bisyon kan Isaias? (b) Ano an kaibahan ni Isaias ngan ni Hadi Usiya?
9 Ini nga bisyon han trono ni Jehova nakaapekto gud kan Isaias. Iya iginrekord: “Dida hito ako nagsiring: Kairo ko! Kay ako patay na; tungod kay ako tawo nga mahugaw an mga im-im, ngan ako nag-uukoy ha butnga han katawohan nga maghugaw an mga im-im: kay an akon mga mata nakakita han Hadi, hi Jehova han mga kasundalohan.” (Isaias 6:5) Magkaiba gud hi Isaias ngan hi Hadi Usiya! Inagaw ni Usiya an katungdanan han dinihogan nga pagkasaserdote ngan mapasiparahon nga sinulod ha Baraan nga kuwarto han templo. Bisan kon nakita ni Usiya an bulawan nga mga kandelero, an bulawan nga halaran han insenso, ngan an mga lamesa han ‘tinapay han Presensya,’ waray niya makita an kan Jehova nawong han pag-uyon o makarawat an bisan ano espesyal nga toka tikang ha iya. (1 Hadi 7:48-50; footnote ha NW) Ha luyo nga bahin, hi propeta Isaias waray magbalewaray han pagkasaserdote o maghilabot ha templo. Kondi, nakikita niya ha bisyon hi Jehova ha iya baraan nga templo ngan ginpapasidunggan hiya pinaagi han direkta nga toka tikang ha Dios. Bisan kon an mga serapin waray magbuotbuot ha pagkita ha nahitrono nga Ginoo han templo, hi Isaias gintugotan, ha bisyon, nga magkita ha “Hadi, hi Jehova han mga kasundalohan”!
10. Kay ano nga nahahadlok hi Isaias ha pakakita han bisyon?
10 Tungod kay nakikita ni Isaias an kaibahan han pagkabaraan han Dios ngan han iya pagkamakasasala, inaabat niya nga mahugaw gud hiya. Tungod kay nahadlok, naghuhunahuna hiya nga hiya mamamatay. (Eksodo 33:20) Nababatian niya an mga serapin nga nagdadayaw ha Dios nga may-ada limpyo nga mga im-im, kondi an iya mga im-im mahugaw ngan nahugawan pa gud han mahugaw nga mga im-im han mga tawo nga nag-uukoy kaupod niya ngan an mga pulong iya nababatian. Baraan hi Jehova, ngan an iya mga surugoon kinahanglan magpakita hito nga kalidad. (1 Pedro 1:15, 16) Bisan kon ginpili na hi Isaias sugad nga tagapagyakan han Dios, maaram gud hiya han iya makasasala nga kahimtang ngan waray hiya limpyo nga mga im-im nga angayan ha usa nga tagapagyakan han mahimayaon ngan baraan nga Hadi. Ano an magigin baton tikang ha langit?
11. (a) Ano an ginbubuhat han usa han mga serapin, ngan ano an ginsisimbolohan hini nga buhat? (b) Paonan-o an pamalandong ha ginsisiring han serapin kan Isaias makakabulig ha aton kon inaabat naton nga kita diri-takos sugad nga mga surugoon han Dios?
11 Imbes nga paiwason an makalolooy nga hi Isaias ha atubangan han presensya ni Jehova, an mga serapin ginios ha pagbulig ha iya. An rekord nasiring: “Dida hito, linupad an usa han mga serapin ngada ha akon, nga may-ada baga ha iya kamot, nga iya kinuha pinaagi han kimpit tikang ha halaran. Ngan iya pinadut-an an baba ko hini, ngan nagsiring: Kitaa, ini dinuot ha imo im-im; ngan an imo karat-an nakuha na, ngan an imo sala iginpasaylo.” (Isaias 6:6, 7) Ha simboliko nga kahulogan, an kalayo may-ada gahum ha pagputli. Han iginduot an nagbabaga nga uring tikang ha baraan nga kalayo han halaran ngadto ha mga im-im ni Isaias, ginpapasarig han serapin hi Isaias nga an iya mga sala ginpapasaylo na tubtob ha sukol nga ginkikinahanglan basi makarawat niya an pag-uyon ngan toka han Dios. Nagpapasarig gud ini ha aton! Kita liwat magpakasasala ngan diri-takos ha pagdaop ha Dios. Kondi ginlukat na kita han bili han halad lukat ni Jesus ngan mahimo na makakarawat han pag-uyon han Dios ngan makadaop ha iya ha pag-ampo.—2 Korinto 5:18, 21; 1 Juan 4:10.
12. Ano nga halaran an nakikita ni Isaias, ngan ano an epekto han kalayo?
12 An pag-unabi han “halaran” nagpapahinumdom na liwat ha aton nga usa ini nga bisyon. (Itanding an Pahayag 8:3; 9:13.) May-ada duha nga halaran ha templo ha Jerusalem. Ha atubangan gud han kurtina han Pinakabaraan amo an gutiay nga halaran han insenso, ngan ha atubangan han ganghaan han santuaryo amo an daku nga halaran han halad, nga an kalayo padayon nga naglalaga. (Lebitiko 6:12, 13; 16:12, 13) Kondi simboliko inin tunan-on nga mga halaran, nagrirepresentar han darodaku nga mga butang. (Hebreo 8:5; 9:23; 10:5-10) An kalayo tikang ha langit an nag-ubos han halad nga sinunog ha halaran han an templo gin-inagurasyonan ni Hadi Salomon. (2 Kronikas 7:1-3) Ngan yana amo ito an kalayo tikang ha totoo, langitnon nga halaran nga nagkukuha han hugaw ha mga im-im ni Isaias.
13. Ano an iginpapakiana ni Jehova, ngan hin-o an igin-uupod niya han hiya magsiring nga “amon”?
13 Aton pamatian hi Isaias. “Ako nakabati han tingog han Ginoo, nga nasiring: Hin-o [an] akon pakakadtoon, ngan hin-o an makadto para ha amon? Dida hito siniring ako; Iini ako; pakadtoa ako.” (Isaias 6:8) An iginpakiana ni Jehova matin-aw nga gintuyo basi makuha an baton ni Isaias, tungod kay waray iba tawhanon nga propeta nga nakadto ha bisyon. Waray pagsayop nga usa ito nga pagdasig kan Isaias nga magin mensahero ni Jehova. Kondi kay ano nga hi Jehova nagpapakiana, “Hin-o an makadto para ha amon?” Pinaagi han pagbalhin tikang ha personal nga pronombre para ha usa nga “akon” ngadto ha pronombre para ha damu nga “amon,” igin-uupod yana ni Jehova an usa pa nga persona. Hin-o? Diri ba ini an iya bugtong nga Anak, nga ha urhi nagin an tawo nga hi Jesu-Kristo? Tinuod, ngada hini mismo nga Anak nga an Dios nagsiring, ‘Paghimoon naton an tawo ha aton panagway.’ (Genesis 1:26; Proberbios 8:30, 31) Oo, kaupod ni Jehova ha iya langitnon nga korte an iya bugtong nga Anak.—Juan 1:14.
14. Paonan-o binaton hi Isaias ha pagdasig ni Jehova, ngan ano nga susbaranan an ipinapakita niya para ha aton?
14 Hi Isaias waray mag-alang ha pagbaton! Anoman an magin mensahe, ha kadagmitan hiya binaton: “Iini ako; pakadtoa ako.” Waray ngani hiya magpakiana kon ano an mapapahimulsan niya ha pagkarawat han toka. An iya disidido nga espiritu usa ka maopay nga susbaranan para ha ngatanan nga mga surugoon han Dios yana, nga may-ada toka nga isangyaw ‘an maopay nga sumat han ginhadian ha bug-os inuukyan nga tuna.’ (Mateo 24:14) Pariho kan Isaias, matinumanon nga nagpapabilin hira ha ira toka ngan ‘nagpapamatuod ha ngatanan nga nasud,’ bisan pa han diri pagkarawat han kadam-an. Ngan nagpapadayon hira nga may pagsarig, sugad kan Isaias, maaram nga an ira toka nagtitikang ha gihitaasi nga awtoridad.
[Mga Pakiana]