Sumpay han Kapitulo Syete

Kairo han Diri-matinumanon nga Urubasan!

An Resulta han Kahakog

17. Ano nga maraot nga paggawi an ginkukondenar ha siyahan nga kairo nga iginpahayag ni Isaias?

¹⁷ Ha Isa 5 bersikulo 8, diri na ginkukotar ni Isaias an mga pulong ni Jehova. Ha pagkondenar ha pipira han “mga ihalas nga ubas” nga nagin bunga ha Juda, personal nga iginpapahayag niya an siyahan han unom nga kairo: “Kairo nira nga nagsusurosumpay han mga balay, nga nagtatakiptakip han mga uma, ngada nga waray na lugar, ngan kamo pagpapaukyon nga usa la ha butnga han tuna! Ha akon mga talinga nasiring hi Jehova han mga kasundalohan: Ha pagkamatuod damu nga balay an mabubungkag, bisan an daku ngan mag-anyag, mawawaray umurukoy. Kay an napulo ka akre han urubasan mabunga hin usa ka batos, ngan an usa ka homer han liso mabunga la hin usa ka epa.”—Isaias 5:8-10.

18, 19. Paonan-o ginbabalewaray han mga kadungandungan ni Isaias an mga balaud ni Jehova mahitungod han panag-iya, ngan ano an magigin resulta para ha ira?

¹⁸ Ha kadaan nga Israel kan Jehova an bug-os nga tuna. An tagsa nga pamilya may-ada hatag-han-Dios nga panurundon, nga mahimo nira paplitehan o iprenda kondi diri gud ibabaligya “ha waray kataposan.” (Lebitiko 25:23) Napugngan hini nga balaud an mga pag-abuso, sugad han pagtag-iya hin damu nga mga tuna ngan mga balay. Napanalipdan liwat hito an mga pamilya basi diri mahilubong ha duro nga kakablas. Kondi, an iba ha Juda hakugnon nga nagtatalapas han mga balaud han Dios may kalabotan han mga panag-iya. Hi Mika nagsurat: “Hira naawa han mga uma, ngan agawon ini; ngan mga balay, ngan kuhaon ini: ngan ira gintatalumpigos an tawo ngan an iya balay, bisan an tawo ngan an iya panurundon.” (Mika 2:2) Kondi an Proberbios 20:21 nagpapahamangno: “An panurundon [nakukuha] ha hinanali ha tinikangan; Kondi an kataposan hini diri mabubulahan.”

¹⁹ Hi Jehova nagsasaad nga kukuhaon niya tikang hini nga mga hakog an ira mga ganansya nga nakuha pinaagi han panlimbong. An mga balay nga ira ginpuwersa pagkuha “mawawaray umurukoy.” An mga tuna nga ira gin-agaw magbubunga hin gutiay la nga bahin kay ha mahihimo hito. Diri gin-uunabi kon paonan-o ngan kon san-o gud matutuman ini nga panhimaraot. Posible nga gin-uunabi hito, ha anoman nga paagi, an mga kahimtang nga magigin resulta han tidaraon nga pagkabihag ha Babilonya.—Isaias 27:10.

20. Paonan-o malilikyan han mga Kristiano yana an pagsubad ha hakugnon nga paggios nga ipinakita han iba ha Israel?

²⁰ Kinahanglan kangalasan han mga Kristiano yana an sobra nga kahakog pariho han ipinakita han iba nga mga Israelita hadto. (Proberbios 27:20) Kon an materyal nga mga butang sobra nga pinabibilhan, masayon na mahilubong ha maraot nga mga paagi ha pagkaada hin salapi. An usa masayon mahilit-ag ha kustyonable nga mga pakignegosyo o diri totoo nga mga paagi han madagmit nga pagin bahandianon. “Hiya nga nag-aapiki ha pagkadato diri kay diri sisirotan.” (Proberbios 28:20) Importante gud, kon sugad, nga magin kontento kita ha kon ano an gintatag-iya naton!—1 Timoteo 6:8.

An Lit-ag han Diri-maopay nga Kaliawan

21. Ano nga mga sala an ginkukondenar ha ikaduha nga kairo sumala kan Isaias?

²¹ Sunod an ikaduha nga kairo sumala kan Isaias: “Kairo nira nga nabangon ha sayo pa ha aga, nga hira makakadto ha maisog nga irinmon; nga nahamamalanga ha maiha ha gab-i, ngada nga an alaksiw nakakapamula ha ira! Ngan an harpa ngan an laud, an tamboreles ngan an plawta, ngan an alaksiw, aada ha ira mga piyesta; kondi waray hira magtagad han buhat ni Jehova, waray man hira magpainoino han buhat han iya mga kamot.”—Isaias 5:11, 12.

22. Ano nga kawaray pagpugong an nakikita ha Israel, ngan ano an magigin resulta para ha nasud?

²² Hi Jehova ‘an malipayon nga Dios’ ngan diri niya igindidiri ha iya mga surugoon an makatadunganon nga kaliawan. (1 Timoteo 1:11) Kondi, inin mga nagbibiling hin kalipayan linahos ha ngatanan nga mga tubtoban! “An mga hubog, nanhubog ha gab-i,” siring han Biblia. (1 Tesalonika 5:7) Kondi an mga parahubog sumala ha tagna nagtitikang han ira paghubog ha kaagahon ngan nagpapadayon ha pag-inom tubtob ha gab-i! Nagios hira nga baga in diri naeksister an Dios, nga baga in diri hiya makikighusay ha ira tungod han ira mga binuhatan. Hi Isaias nagtatagna hin madulom nga tidaraon para ha sugad nga mga tawo. “An akon katawohan nahingadto ha kabihagan tungod han kakulang hin hibaro; ngan an ira mga tawo nga dungganan pinanrurunosan ngan an ira kadam-an nasusunog han kauhaw.” (Isaias 5:13) Tungod ha pagdumiri ha pagbuhat sumala han totoo nga kahibaro, an may kauyonan nga katawohan  han Dios—an hitaas ngan an hamubo—malusad ha Sheol.—Basaha an Isaias 5:14-17.

23, 24. Ano nga pagpugong ngan kasadangan nga paggawi an ginkikinahanglan nga ipakita han mga Kristiano?

²³ An ‘sobra nga mga kalipayan,’ o ‘maaringasa nga mga panagtawo,’ problema liwat ha pipira nga mga Kristiano ha siyahan nga siglo. (Galasia 5:21; Byington; 2 Pedro 2:13) Salit diri urusahon nga an iba han dedikado nga mga Kristiano yana nagpapakita hin maluya nga pagtirotimbang may kalabotan ha sosyal nga mga katirok. An waray pagpugong nga pag-inom hin alaksiw nag-aaghat ha iba nga magin maaringasa ngan masamok. (Proberbios 20:1) May-ada pa ngani nagios hin imoral tungod han sobra nga kahubog ha alaksiw, ngan an pipira nga mga panagtawo gintutugotan nga magpadayon haros ha bug-os nga gab-i, nga nakakaulang ha Kristiano nga mga buruhaton kinabuwasan.

²⁴ Kondi, an timbang nga mga Kristiano, nagbubunga hin diosnon nga mga bunga ngan nagpapakita hin pagpugong ngan kasadangan ha ira pagpili hin kaliawan. Ginsusunod nira an sagdon ni Pablo ha Roma 13:13: “Manggawi kita hin maopay, sugad hin adlaw na; diri ha aringasa ngan paghubog.”

Napupungot ha Sala Ngan Nahigugma ha Kamatuoran

25, 26. Ano nga maraot nga panhunahuna han mga Israelita an iginbubuhayhag ni Isaias ha ikatulo ngan ikaupat nga kairo?

²⁵ Pamatii yana an ikatulo ngan ikaupat nga kairo sumala kan Isaias: “Kairo nira nga nagyuyudyod han karat-an pinaagi han mga hapon han pagkabuwaon, ngan han sala sugad nga ginyuyudyod pinaagi han gikos han karomata; Nga nasiring: Padagmita hiya, ipadagmit an iya buhat, nga kita makakita hini; ngan paduoka ngan pakanhia an sagdon han Baraan nga Uusa han Israel, nga kami mahibaro hini! Kairo nira nga natawag han karaotan nga maopay, ngan han maopay nga maraot; nga nabutang han kasisidman para han kapawa, ngan han kapawa para han kasisidman; nga nabutang han mapait para han matam-is, ngan han matam-is para han mapait!”—Isaias 5:18-20.

²⁶ Matin-aw gud nga iginhuhulagway hini an mahitungod han mga nagbubuhat hin sala! Uripon hira han sala sugad han mga hayop nga nagdadanas hin mga karomata. Ini nga mga magpakasasala diri nahahadlok ha bisan ano nga tiarabot nga adlaw han paghukom. Nagtatamay hira nga nasiring: “Ipadagmit an [buhat han Dios]!” Imbes nga magpasakop ha Balaud han Dios, ginbabaliko nira an mga butang, nasiring nga ‘maraot an maopay ngan maopay an maraot.’—Itanding an Jeremias 6:15; 2 Pedro 3:3-7.

27. Paonan-o malilikyan han mga Kristiano yana an paggios nga pariho han mga Israelita?

²⁷ Kinahanglan likyan han mga Kristiano yana an sugad nga paggios ha ngatanan nga kahimtang. Pananglitan, nagdudumiri hira han panhunahuna han kalibotan nga makaruruyag an pakighilawas ngan an homoseksuwalidad. (Efeso 4;18, 19) Totoo, an usa nga Kristiano bangin ‘makahimo hin sayop nga pitad’ nga mahimo magtugway ha pagbuhat hin seryoso nga sala. (Galasia 6:1) An mga tigurang ha kongregasyon andam ha pagbulig hadton nakakasala ngan nagkikinahanglan hin bulig. (Jakobo 5:14, 15) Pinaagi han bulig han mga pag-ampo ngan basado-ha-Biblia nga sagdon, posible an kahibalik ha espirituwal nga kahimsog. Kon diri, aada an peligro nga magin “uripon man han sala.” (Juan 8:34) Imbes nga tamayon an Dios ngan mawad-an han pagkamaaram ha tiarabot nga adlaw han paghukom, nangangalimbasog an mga Kristiano nga magpabilin nga “waray buring ngan kasaypanan” ha atubangan ni Jehova.—2 Pedro 3:14; Galasia 6:7, 8.

28. Ano nga mga sala an ginkukondenar ha ultimo nga mga kairo sumala kan Isaias, ngan paonan-o malilikyan han mga Kristiano yana an sugad nga mga sala?

²⁸ Angayan la nga igindudugang ni Isaias inin ultimo nga mga kairo: “Kairo nira nga mga makinaadmananon ha ira kalugaringon nga mga mata, ngan mainalam-agamon ha ira kalugaringon nga paniplatan! Kairo nira nga magkusog ha pag-inom han alaksiw, ngan han mga tawo nga kusgan ha pagsakot han maisog nga irinmon; Nga nagmamatadong han maraot tungod han hukip, ngan nagkukuha han katadongan han matadong tikang ha iya!” (Isaias 5:21-23) Ini nga mga pulong matin-aw nga iginyakan ngada hadton nag-aalagad sugad nga mga hukom ha tuna. Linilikyan han mga tigurang ha kongregasyon yana an pagin baga in “makinaadmananon ha ira kalugaringon nga mga mata.” Mapainubsanon nga kinakarawat nira an sagdon tikang ha mga igkasi-tigurang ngan ginsusunod hin maopay an mga instruksyon han organisasyon. (Proberbios 1:5; 1 Korinto 14:33) Kasadangan hira ha ira paggamit hin mga irinmon nga de-alkohol, diri gud nainom hito antes buhaton an mga responsabilidad ha kongregasyon. (Hosea 4:11) Linilikyan liwat han mga tigurang bisan an tigaman han pagpakita hin pagpasulabi. (Jakobo 2:9) Naiiba gud ha mga klero han Kakristianohan! Gintatabonan han damu ha ira an maimpluwensya ngan bahandianon nga mga magpakasasala ha butnga nira, nga direkta nga kabaliktaran han mga pahamangno ni apostol Pablo ha Roma 1:18, 26, 27; 1 Korinto 6:9, 10; ngan Efeso 5:3-5.

29. Ano nga makabungkag nga kataposan an naghuhulat ha Israelita nga urubasan ni Jehova?

²⁹ Gintatapos ni Isaias inin matagnaon nga mensahe pinaagi han pagsaysay han makabungkag nga kataposan hadton ‘nagdumiri han balaud ni Jehova’ ngan napakyas ha pamunga hin matadong nga bunga. (Isaias 5:24, 25; Hosea 9:16; Malakias 4:1) Hiya nagpapahayag: “Aalsahon [ni Jehova] an bandera ngadto ha mga nasud tikang ha kahigrayoan, ngan masitsit para ha ira tikang ha kataposan han tuna; ngan, kitaa, hira makada  ha kadagmitan gud.”—Isaias 5:26; Deuteronomio 28:49; Jeremias 5:15.

30. Hin-o an magtitirok hin ‘daku nga nasud’ kontra han katawohan ni Jehova, ngan ano an magigin resulta hito?

³⁰ Ha kadaan nga mga panahon an usa nga poste ha hitaas nga lugar nagsiserbi nga “tigaman,” o sentro han katirok, para han katawohan o kasundalohan. (Itanding an Isaias 18:3; Jeremias 51:27.) Yana titirukon mismo ni Jehova inin waray ngarani nga ‘daku nga nasud’ basi ipadapat an iya paghukom. a Hiya ‘magsisitsit ngada hito,’ nga amo an pagtawag han atensyon hito ngada ha iya matinalapason nga katawohan sugad nga takos sakupon. Sunod nga iginsasaysay han propeta an madagmit ngan makaharadlok nga pag-atake hinin sugad-leon nga mga mananakop nga “magunit han pinanganganop,” nga amo an nasud han Dios, “ngan pagdadad-on [ito] ha siguro” ngadto ha pagkabihag. (Basaha an Isaias 5:27-30a.) Ngan makasurubo gud ito nga resulta para han tuna han katawohan ni Jehova! “Kon an usa tuman-aw ngadto ha tuna, kitaa, kasisidman ngan kagol-anan; ngan an kapawa dudulman dida ha mga dampog hini.”—Isaias 5:30b.

31. Paonan-o malilikyan han totoo nga mga Kristiano an pag-antos han sirot nga iginpadapat ha Israelita nga urubasan ni Jehova?

³¹ Oo, an urubasan nga mahigugmaon gud nga igintanom han Dios napamatud-an nga diri mabungahon—takos la han kabungkagan. May-ada gamhanan gud nga leksyon an mga pulong ni Isaias para ha ngatanan nga mag-aalagad kan Jehova yana! Hinaot mangalimbasog hira nga mamunga hin matadong la nga bunga, ha kadayawan ni Jehova ngan ha ira kalugaringon nga kaluwasan!

[Footnote]

[Mga Pakiana]