Sumpay han Kapitulo Otso

Hi Jehova nga Dios Aada ha Iya Baraan nga Templo

An Sugo kan Isaias

15, 16. (a) Ano an isisiring ni Isaias “hini nga katawohan,” ngan ano an ira magigin paggios? (b) Tungod ba han sayop ni Isaias an paggios han katawohan? Isaysay.

¹⁵ Iginsasaysay yana ni Jehova an isisiring ni Isaias ngan an magigin paggios: “Kadto na, ngan pagsumati ini nga katawohan: Nakakabati kamo hin [pauroutro], kondi diri nasabot; ngan nakakakita kamo hin tinuod, kondi diri nakakapaniid. Patamboka an kasingkasing hini nga katawohan, ngan pabug-ata an ira mga talinga, ngan ipapiyong an ira mga mata; bangin hira makakita pinaagi han ira mga mata, ngan makabati pinaagi han ira mga talinga, ngan makasabot pinaagi han ira kasingkasing, ngan bumalik liwat, ngan mag-oopay.” (Isaias 6:9, 10) Nangangahulogan ba ini nga hi Isaias magigin prangka ngan diri mataktika ngan isasalikway an mga Judio, basi magpabilin hira nga nakontra kan Jehova? Diri gud! Hira an katawohan ni Isaias nga gintatagad niya nga mga paryente. Kondi iginpapasabot han mga pulong ni Jehova kon paonan-o magios an katawohan ha iya mensahe, bisan kon matinumanon nga ginbubuhat ni Isaias an sugo ha iya.

¹⁶ Ha katawohan an sayop. Hi Isaias magyayakan ha ira hin ‘pauroutro,’ kondi diri hira makarawat han mensahe o magkakaada hin pagsabot. An kadam-an magigin matig-a ngan diri mamamati, sugad hin buta ngan bungol. Pinaagi han pauroutro nga pagkadto ha ira, ipapakita ni Isaias “hini nga katawohan” nga diri nira karuyag makasabot. Pamamatud-an nira nga ira sinasadhan an ira mga hunahuna ngan mga kasingkasing ha mensahe ni Isaias—an mensahe han Dios—ha ira. Totoo gud ini ha katawohan yana! Damu gud ha ira an nadiri nga mamati ha mga Saksi ni Jehova kon hira nagsasangyaw han maopay nga sumat han tiarabot nga Ginhadian han Dios.

17. Han nagpapakiana hi Isaias, “Ngada san-o?” ano an iginpapasabot niya?

¹⁷ Hi Isaias nababaraka: “Dida hito nagsiring ako: Ginoo, ngada san-o? Ngan hiya nagbaton: Ngada nga an mga bungto magkabubungkag nga waray na umurukoy, ngan an mga balay mawaray na tawo, ngan an tuna mabungkag na gud, ngan kan Jehova pamalhinon an mga tawo ha hirayo, ngan an binayaan nga mga lugar madamu na ha butnga han tuna.” (Isaias 6:11, 12) Ha pagpakiana, “Ngada san-o?” hi Isaias diri nagpapakiana kon tubtob san-o hiya magpapadayon ha pagsangyaw ha diri-namamati nga mga tawo. Lugod, nababaraka hiya mahitungod han katawohan ngan nagpapakiana kon tubtob san-o magpapadayon an ira maraot nga kahimtang ha espirituwal ngan kon tubtob san-o papasiparahan an ngaran ni Jehova ha tuna. (Kitaa an Salmo 74:9-11.) Salit, tubtob san-o magpapadayon an waray pulos nga kahimtang?

18. Tubtob san-o magpapadayon an maraot nga kahimtang ha espirituwal han katawohan, ngan magpapabilin ba nga buhi hi Isaias basi makita an bug-os nga katumanan han tagna?

¹⁸ Makasurubo nga ipinapakita han baton ni Jehova nga an maraot nga kahimtang ha espirituwal han katawohan magpapadayon tubtob nga matuman an bug-os nga mga resulta han pagtalapas ha Dios, sugad han iginsaysay ha iya kauyonan. (Lebitiko 26:21-33; Deuteronomio 28:49-68) An nasud mabubungkag, an katawohan bibihagon, ngan an tuna magigin binayaan. Hi Isaias diri magpapabilin nga buhi basi makita an kabungkagan han Jerusalem ngan han templo hito pinaagi han Babilonyahanon nga kasundalohan pag-abot han 607 A.K.P., bisan kon mananagna hiya ha sobra 40 ka tuig, nga magpapadayon tubtob ha pagmando han apo-ha-tuhod ni Hadi Usiya, hi Hesekia. Kondi, hi Isaias magpapabilin nga  matinumanon ha sugo ha iya tubtob nga hiya mamatay, sobra 100 ka tuig antes mahitabo iton nga kalamidad ha nasud.

19. Bisan kon an nasud pupudlon sugad hin usa nga kahoy, ano an iginpasarig han Dios kan Isaias?

¹⁹ An kabungkagan nga makakahimo han Juda nga ‘mabungkag ngadto ha pagkabinayaan’ sigurado nga maabot, kondi an kahimtang diri kay bug-os nga waray na paglaom. (2 Hadi 25:1-26) Hi Jehova nagpapasarig kan Isaias: “May-ada pa usa ka ikanapulo ka bahin dida, ini liwat pagkakaunon man: sugad han terebinto, ngan sugad han roble, kanay puno nahibibilin, kon hira ginpupulod; amo man an baraan nga liso amo an puno dida.” (Isaias 6:13) Oo, “usa ka ikanapulo ka bahin, . . . an baraan nga liso,” magpapabilin, sugad la han tuód han daku nga kahoy nga ginpulod. Ini nga pasarig, sigurado nga nagliliaw kan Isaias—usa ka baraan nga nanhibilin an mabibilngan dida ha iya katawohan. Bisan kon an nasud nakakaeksperyensya hin pauroutro nga pagkasunog, pariho han daku nga kahoy nga ginpulod basi igsungo, magpapabilin an importante nga tuód han simboliko nga kahoy han Israel. Magigin usa nga liso ito, o binhi, nga baraan kan Jehova. Maabot an panahon, maturok ito utro, ngan an kahoy matubo utro.—Itanding an Job 14:7-9; Daniel 4:26.

20. Paonan-o siyahan nga natuman an kataposan nga bahin han tagna ni Isaias?

²⁰ Natuman ba an mga pulong han tagna? Oo. Katapos han setenta ka tuig nga pagkabinayaan han tuna han Juda, an mahadlukon ha Dios nga nanhibilin binalik tikang ha pagkabihag ha Babilonya. Ira gintukod-utro an templo ngan an siyudad, ngan ira iginbalik an totoo nga pagsingba ha tuna. Ini nga pagbalik han mga Judio ha ira hatag-han-Dios nga tuna nga natawohan nakahimo han ikaduha nga katumanan hini nga tagna nga iginhatag ni Jehova kan Isaias. Ano daw la ito?—Esra 1:1-4.

Iba nga mga Katumanan

21-23. (a) Kan kanay natuman han siyahan nga siglo an tagna ni Isaias, ngan paonan-o? (b) Hin-o an ‘baraan nga binhi’ ha siyahan nga siglo, ngan paonan-o ito naluwas?

²¹ An matagnaon nga buruhaton ni Isaias nagpadagaw han buruhaton nga pagbubuhaton han Mesias, hi Jesu-Kristo, paglabay hin mga 800 ka tuig. (Isaias 8:18; 61:1, 2; Lukas 4:16-21; Hebreo 2:13, 14) Bisan kon darodaku kan Isaias, hi Jesus disidido liwat nga sugoon han iya langitnon nga Amay, nasiring: “Kitaa, iini ako ha pagbuhat han imo kaburut-on.”—Hebreo 10:5-9; Salmo 40:6-8.

²² Pariho kan Isaias, matinumanon nga ginbuhat ni Jesus an buruhaton nga igintoka ha iya ngan nakaeksperyensya hin pariho nga paggios. An mga Judio ha panahon ni Jesus diri nakarawat han mensahe sugad la hadton ginsangyawan ni propeta Isaias. (Isaias 1:4) An paggamit hin mga ilustrasyon usa nga bahin han ministeryo ni Jesus. Ini an nagpagios ha iya mga disipulo nga magpakiana: “Kay ano an imo pagyakan ha ira hin mga pananglitan?” Hi Jesus binaton: “Ha iyo ihinahatag an pagpakilala han mga tinago han ginhadian han langit, kondi ha ira waray ihatag. Tungod hini ako nagyayakan ha ira hin mga pananglitan, kay ha pagkita, diri hira makakita; ngan ha pamati, diri hira makabati, bisan pakasabot. Ngan natuman ha ira an igintagna ni Isaias nga manaragna, nga nasiring: Ha pamati, kamo makakabati ngan diri makakasabot; ha pagkita, kamo makakita, ngan diri makakilala. Kay an kasingkasing hini nga katawohan magdakmol, ngan an ira mga talinga mangarol ha pamati, ngan an ira mga mata ira pinamiyong, bangin hira makakita ha ira mga mata, ngan makabati ha ira mga talinga, ngan makasabot ha ira kasingkasing, ngan magbalik, ngan akon pananambalon hira.”—Mateo 13:10, 11, 13-15; Markos 4:10-12; Lukas 8:9, 10.

²³ Ha pagkotar tikang ha Isaias, ipinapakita ni Jesus nga an tagna may-ada katumanan ha iya panahon. An katawohan ha kabug-osan may-ada paggios han kasingkasing nga pariho han ha mga Judio ha panahon ni Isaias. Ginhimo nira an ira kalugaringon nga buta ngan bungol ha iya mensahe ngan hira liwat nag-antos hin kabungkagan. (Mateo 23:35-38; 24:1, 2) Nahitabo ini han an Romano nga kasundalohan ilarom ni Heneral Tito inabot ha pakig-away ha Jerusalem han 70 K.P. ngan ginbungkag an siyudad ngan an templo hito. Kondi, an iba namati kan Jesus ngan  nagin iya mga disipulo. Tinawag hira ni Jesus nga ‘malipayon.’ (Mateo 13:16-23, 51) Iya ginsumatan hira nga kon makita nira “an Jerusalem, nga ginlilibotan han mga sundalo,” sadang hira “manmalagiw ngadto ha mga kabukiran.” (Lukas 21:20-22) Hito nga paagi naluwas an ‘baraan nga binhi’ nga nagbuhat hin pagtoo ngan naporma nga espirituwal nga nasud, ‘an Israel han Dios.’ a—Galasia 6:16.

24. Ano nga aplikasyon an ginhimo ni Pablo ha tagna ni Isaias, ngan ano an iginpapasabot hini?

²⁴ Han mga 60 K.P., napriso hi apostol Pablo ha usa nga balay ha Roma. Didto ginhikay niya an usa nga katirok kaupod an ‘nangunguna nga kalalakin-an han mga Judio’ sugad man an iba ngan kinarawat hira hin ‘maopay nga pagpamatuod mahitungod han ginhadian han Dios.’ Han damu an diri nakarawat han iya mensahe, iginsaysay ni Pablo nga katumanan ini han tagna ni Isaias. (Buhat 28:17-27; Isaias 6:9, 10) Salit ginbuhat han mga disipulo ni Jesus an sugo nga pariho han kan Isaias.

25. Ano an nasasabtan han mga Saksi han Dios yana, ngan paonan-o hira nagios?

²⁵ Sugad man, nasasabtan han mga Saksi ni Jehova yana nga hi Jehova nga Dios aada ha iya baraan nga templo. (Malakias 3:1) Pariho kan Isaias, hira nasiring: “Iini ako; pakadtoa ako.” Madasigon nga iginsusumat nira an nagpapahamangno nga mensahe mahitungod han tiarabot nga kataposan hinin maraot nga sistema han mga butang. Kondi, sugad han iginpasabot ni Jesus, pipira la nga mga tawo an nag-aabri han ira mga mata ngan mga talinga basi makakita ngan makabati ngan maluwas. (Mateo 7:13, 14) Malipayon gud adton nahilig han ira mga kasingkasing basi mamati ngan ‘matambal hira’!—Isaias 6:8, 10.

[Footnote]

[Mga Pakiana]