Sumat han mga Parasamwak han Ginhadian

Pagdangat Hadton Makuri Madangat

AN MGA SAKSI NI JEHOVA nangangalimbasog nga makaistorya an ngatanan nga posible makaistorya nira mahitungod han mensahe han Ginhadian. Usahay, nagkikinahanglan hin daku nga pangalimbasog nga madangat adton talagsa mabilngan ha balay. (Markos 13:10) May kalabotan hini, usa nga espesyal payunir nga ministro ha usa nga nasud ha Amerika del Sur an nagsusumat han masunod nga eksperyensya.

“Usa ka adlaw hinbaroan ko nga an gobernador han estado mabisita ha lugar diin igintoka ako ngan an akon asawa. Tungod kay sigurado nga usa hiya hadton talagsa la ha balay, ginsuratan ko hiya ngan ginlakipan hin pipira nga mga publikasyon han Biblia, upod na an brosyur nga Ano an Ginkikinahanglan ha Aton han Dios? ngan mga libro nga Mankind’s Search for God ngan Kahibaro nga Nagtutugway Ngadto ha Kinabuhi nga Waray Kataposan. Iginsaysay ko ha surat an katuyoan han tagsa hini nga mga publikasyon.

“Tungod kay interesado ako nga hibaroan an iya reaksyon ha mga literatura, naghangyo ako nga makigkita ha iya. Paglabay hin mga semana gintugotan ako nga makigkita, ngan gindara ko an video nga Jehovah’s Witnesses—The Organization Behind the Name. Inabot adto nga pakigkita hin mga duha ka oras. Katapos magkita han video kaupod han gobernador, ginpakianhan ko hiya kon ano an iya opinyon mahitungod hito. Hiya binaton: ‘Waray iba nga organisasyon ha tuna nga pariho han iyo. Kon may-ada la unta ako mga tawo nga pariho ha iyo nga mabulig ha akon ha pagtapos han akon mga proyekto ha gobyerno!’ Katapos nagpakiana hiya kon nakakadto na ba ako ha pinakasentro nga opisina han aton organisasyon. Ginsumatan ko hiya nga bisan kon ito an akon tumong tikang han 14 anyos pa la ako, waray pa ako magkaada hin higayon nga mabisita an aton pinakasentro nga opisina ha Brooklyn, New York. Usa ito han makuri madangat nga mga tumong. Direkta nga siniplat hiya ha akon hin madaliay. Katapos hiya siniring nga karuyag niya magkaada ako hito nga higayon. Iya ginsiguro nga magkaada kami legal nga mga papeles ngan ginregalohan kami hin mga tiket ha eruplano!

“Yana an gobernador regular nga nakarawat hin Barantayan ngan Awake! nga mga magasin. Naglalaom kami nga ha diri maiha matitikangan namon hiya hin pag-aram ha Biblia.”