Sumpay han Kapitulo Noybe

Sarig kan Jehovah ha Atubangan han KakurianDugang nga mga Resulta han Pagkadiri-matinumanon

18. (a) Kay ano nga an sunod nga mga pulong ni Isaias nakapahadlok ha iya mga mamarati? (b) Ano nga pagbag-o han mga hitabo an hirani na matuman?

¹⁸ Bisan kon nakakaliaw an iya pinakaurhi nga mga pulong, an sunod nga mga pahayag ni Isaias nakapahadlok ha iya mga mamarati: “Hi Jehova magdadara ngada ha imo, ngan ngada ha imo katawohan, ngan ngada ha balay han imo amay, hin mga adlaw nga waray umabot, tikang ha adlaw nga ilinakat ni Epraim tikang ha Juda bisan an hadi han Asirya.” (Isaias 7:17) Oo, tiarabot an kalamidad, ngan ha kamot han hadi han Asirya. An ginlalaoman nga pagmando han mabangis nga mga Asiryahanon posible nga amo an hinungdan han agsob nga diri hingaturog ha mga gab-i ni Ahas ngan han iya katawohan. Nangatadongan hi Ahas nga an pakigsangkay ha Asirya magluluwas ha iya tikang ha Israel ngan Sirya. Oo, an hadi han Asirya magios uyon ha pakimalooy ni Ahas pinaagi han pag-atake ha Israel ngan Sirya ha urhi. (2 Hadi 16:9) Posible nga ini an hinungdan kon kay ano nga hi Peka ngan hi Resin mapipiritan ha pag-undang han ira paglikos ha Jerusalem. Salit, diri mahihimo han liga han Siryo-Israelita nga sakupon an Jerusalem. (Isaias 7:1) Kondi, yana, ginsusumatan ni Isaias an iya nakalasan nga mga mamarati nga an Asirya, an ira ginlalaoman nga magpapanalipod, amo an magtatalumpigos ha ira!—Itanding an Proberbios 29:25.

19. Ano an iginpapahamangno hinin makasaysayan nga drama para ha mga Kristiano yana?

¹⁹ Para ha mga Kristiano yana, nagpapahamangno inin totoo nga asoy han kasaysayan. Kon naatubang hin pag-ipit bangin masulay kita ha pagkompromiso han Kristiano nga mga prinsipyo, iginsasalikway an panalipod ni Jehova. Halipot nga panlantaw ini, peligroso ha kinabuhi pa ngani, sugad han makikita ha sunod nga mga pulong ni Isaias. An propeta nagpadayon ha pagsaysay han pagbubuhaton han pagsulong han mga Asiryahanon ha tuna ngan ha katawohan hito.

20. Hin-o ‘an mga langaw’ ngan ‘an mga putyokan,’ ngan ano an ira pagbubuhaton?

²⁰ Gin-upat ka bahin ni Isaias an iya mga pahayag, an kada usa nagtatagna kon ano an mahitatabo “hadto nga adlaw”—nga amo an adlaw han pag-atake han Asirya ha Juda. “Mahinanabo hadto nga adlaw, nga hi Jehova masitsit han langaw nga aadto ha gikakatapusani nga bahin han mga salog [Nilo] ha Ehipto, ngan han putyokan nga aadto ha tuna ha Asirya. Ngan hira makada, ngan mamamahuway hira ngatanan dida ha mga bungkag nga mga walog, ngan dida ha mga ginuguakan han mga bato, ngan dida ha ngatanan nga alad nga tunukon, ngan ngada ha ngatanan nga pasabsaban.” (Isaias 7:18, 19) An kasundalohan han Ehipto ngan Asirya, pariho han panon han mga langaw ngan mga putyokan, mabirik han ira atensyon ha Tuna nga Iginsaad. Diri ini madaliay la nga pagsulong. ‘An mga langaw’ ngan ‘an mga putyokan’ makada, magdadaot han ngatanan nga bahin ngan gutak han tuna.

21. Ha ano nga paagi magigin pariho han labaha an Asiryahanon nga hadi?

²¹ Hi Isaias nagpapadayon: “Hadto nga adlaw an Ginoo magtutusar pinaagi han labaha nga plinitehan dida ha mga bahin ha tabok han Salog, bisan pinaagi han hadi ha Asirya, han ulo ngan han barahibo han mga tiil; ngan ini liwat mag-aagaw han barangas.” (Isaias 7:20) Yana an Asirya la, an nangunguna nga tarhog, an gin-uunabi. Ginbayaran ni Ahas an Asiryahanon nga hadi basi ‘ahitan’ an Sirya ngan Israel. Kondi, inin “labaha nga plinitehan” tikang ha rehiyon han Euprates magios kontra han “ulo” han Juda ngan aahitan ito, kukuhaon bisan an barangas!

22. Ano nga mga ehemplo an ginagamit ni Isaias ha pagpakita han mga resulta han tiarabot nga pagsulong han Asirya?

²² Ano an magigin resulta? “Mahinanabo hadto nga adlaw, nga usa ka tawo magtitipig nga buhi hin usa nga baka, ngan hin duha nga karnero; Ngan mahinanabo, nga tungod han kahura hin gatas nga ira ihahatag, hiya makakakaon hin mantikilya; kay han mantikilya ngan han dugos makaon an tagsatagsa nga nahibibilin ha butnga han tuna.” (Isaias 7:21, 22) Katapos ‘ahitan’ han mga Asiryahanon an tuna, pipira na la nga mga tawo an mahibibilin salit gutiay na la nga mga hayop an pagkikinahanglanon basi maghatag hin pagkaon. Kakaunon an “mantikilya ngan [an] dugos”—waray iba, waray alaksiw, waray tinapay, waray iba nga importante nga mga pagkaon. Baga in sugad nga pagpabug-at han kahaluag han pagkabinayaan, tulo ka beses nga ginsiring ni Isaias nga ha lugar nga may-ada mapulsanon, mabungahon nga tuna hadto, magkakaada yana mga tunok ngan mga banwa. Adton magsasari ha paggawas ha bungto magkikinahanglan hin “mga udyong ngan bawog” basi mapanalipdan kontra han ihalas nga mga hayop nga nagtatago ha madakmol nga kabanwaan. An mahawan nga kaumhan magigin lugar nga tatamakan han mga toro nga baka ngan mga karnero. (Isaias 7:23-25) Ini nga tagna nagtikang matuman ha panahon mismo ni Ahas.—2 Kronikas 28:20.

Eksakto nga mga Tagna

23. (a) Ano an iginsugo yana nga pagbuhaton ni Isaias? (b) Paonan-o pinamamatud-an an tigaman han papan?

²³ Nabalik yana hi Isaias ha kahimtang nga nahitatabo mismo. Samtang ginlilikosan pa gihapon an Jerusalem han alyansa nga Siryo-Israelita, hi Isaias nagsusumat: “Hi Jehova nagsiring ha akon: Kumuha ka hin daku nga papan, ngan pagsurat dida hito pinaagi han pluma han tawo, mahitungod kan Maher-salal-has-bas; Ngan ako makuha ngada ha akon hin magtinumanon nga mga saksi ha pagpamatuod, hi Uriya an saserdote, ngan hi Sakarias an anak nga lalaki ni  Jeberekia.” (Isaias 8:1, 2) An ngaran nga Maher-salal-has-bas nangangahulogan hin “Pagdagmit, O Dinag-an! Hiya Inabot hin Madagmit ha Panikas.” Hi Isaias naghangyo ha duha nga talahuron nga lalaki ha komunidad nga pamatud-an an iya pagsurat hini nga ngaran ha daku nga papan, basi parig-unon nira ha urhi an pagkatotoo han dokumento. Kondi, ini nga tigaman kinahanglan parig-unon pa han ikaduha nga tigaman.

24. Ano an sadang magin epekto han tigaman ni Maher-salal-has-bas ha katawohan han Juda?

²⁴ Hi Isaias nasiring: “Ngan ako nakadto ha manaragna nga babaye; ngan hiya nanamkon ngan nag-anak hin anak nga lalaki. Dida hito nagsiring hi Jehova ha akon: Tawga an iya ngaran nga Maher-salal-has-bas. Kay nga diri pa an bata mahibabaro pagsangpit: Amay ko, ngan, Iroy ko, an bahandi han Damasko ngan an dinag-an han Samaria pagdadad-on ha kahigrayoan ha atubangan han hadi ha Asirya.” (Isaias 8:3, 4) An daku nga papan ngan an natawo pa la nga bata nga lalaki magigin mga tigaman nga hirani na agawon han Asirya an mga nagtatalumpigos ha Juda, an Sirya ngan Israel. Mationan-o kahirani iton nga panahon? Antes mayakan han bata an siyahan nga mga pulong nga nahibabaroan han kadam-an nga mga bata—an “Tatay ngan “Nanay.” An sugad eksakto nga tagna sadang magparig-on han pagsarig han katawohan kan Jehova. O mahimo magin hinungdan ito nga tamayon han iba hi Isaias ngan an iya mga anak. Anoman an kahimtang, natuman an matagnaon nga mga pulong ni Isaias.—2 Hadi 17:1-6.

25. Ano an mga pagkapariho han mga panahon ni Isaias ngan han yana nga panahon?

²⁵ Mahibabaro an mga Kristiano tikang ha pauroutro nga mga pahamangno ni Isaias. Iginpahayag ha aton ni apostol Pablo nga hinin makasaysayan nga drama, hi Isaias nagpadagaw kan Jesu-Kristo ngan an mga anak ni Isaias nagpadagaw han dinihogan nga mga disipulo ni Jesus. (Hebreo 2:10-13) Pinaagi han iya dinihogan nga mga sumurunod dinhi ha tuna, ginpapahinumdom ni Jesus an totoo nga mga Kristiano han panginahanglan nga ‘magpabilin nga nagmamata’ hinin magpakalilisang nga mga panahon. (Lukas 21:34-36) Ha pariho nga panahon, an diri-mabinasulon nga mga parakontra ginpapahamangnoan han ira tiarabot nga kabungkagan, bisan kon an sugad nga mga pahamangno agsob nga gintatamay. (2 Pedro 3:3, 4) An katumanan han mga tagna may kalabotan han panahon ha mga adlaw ni Isaias usa nga garantiya nga an orasan han Dios para ha aton panahon liwat “ha waray ruhaduha maabot, ini diri maglalangan.”—Habakuk 2:3.

Makabungkag nga “mga Tubig”

26, 27. Ano nga mga hitabo an igintatagna ni Isaias? (b) Ano an iginpapasabot han mga pulong ni Isaias para ha mga surugoon ni Jehova yana?

²⁶ Hi Isaias nagpapadayon han iya mga pahamangno: “Salit kay ini nga katawohan diniri han katubigan ha Siloa nga naawas ha hinayhinay, ngan nagkakalipay kan Resin ngan han anak nga lalaki ni Remalia; Busa yana, kitaa, an Ginoo magdadara ngada ha ira han mga tubig han Salog, makusog ngan damu, bisan an hadi ha Asirya ngan han iya bug-os nga himaya: ngan ini makada ha ngatanan niya nga agianan, ngan malapwas han ngatanan niya nga pangpang; Ngan ini magsisiphid tipakadto ha Juda; ini malayap ngan maglalatas; ini maabot bisan ngada ha liog; ngan an uunatan han iya mga pako makakapuno han kahaluag han imo tuna, O Imanuel.”—Isaias 8:5-8.

²⁷ “Ini nga katawohan,” an norte nga ginhadian han Israel, nagsasalikway han kauyonan ni Jehova kan David. (2 Hadi 17:16-18) Para ha ira, baga in sugad kaluya ito han hinayhinay nga awas han mga tubig han Siloa, an suplay han tubig han Jerusalem. Iginhahambog nira an ira pakig-away kontra han Juda. Kondi ini nga pagpasipara diri kay waray sirot. Tutugotan ni Jehova an mga Asiryahanon nga ‘bahaan,’ o lapwasan, an Sirya ngan Israel, sugad la nga hirani na tugotan ni Jehova an presente politikal nga bahin han kalibotan nga bahaan an nasasakopan han palso nga relihiyon. (Pahayag 17:16; itanding an Daniel 9:26.) Katapos, hi Isaias nasiring, an nalapwas nga “mga tubig” “magsisiphid tipakadto ha Juda,” maabot “bisan ngada ha liog,” tubtob ha Jerusalem, diin nagmamando an ulo (hadi) han Juda. a Ha aton panahon an politikal nga mga parapamatay han palso nga relihiyon maatake liwat ha mga surugoon ni Jehova, lilikosan hira “ngada ha liog.” (Esekiel 38:2, 10-16) Ano an magigin resulta? Bueno, ano an nahitabo ha panahon ni Isaias? An mga Asiryahanon ba sinulong ha mga kuta han siyudad ngan gindara an katawohan han Dios? Waray. An Dios kaupod nira.

Ayaw Kahadlok—“An Dios Upod ha Aton”

28. Bisan pa han duro nga mga pangalimbasog han ira mga kaaway, ha ano ginpapasarig ni Jehova an Juda?

²⁸ Hi Isaias nagpapahamangno: “Pag-alsa, O kamo nga mga katawohan [nga nakontra ha may kauyonan nga katawohan han Dios], ngan madugmok; ngan hatag hin talinga, ngatanan kamo han higrayo nga mga tuna: pagsangkap kamo, ngan madugmok; pagsangkap kamo ngan madukmok. Pagsarabot kamo ha tingob, ngan ini makakawang; paghimangraw han pulong, ngan ini diri matindog: kay an Dios upod ha aton.” (Isaias 8:9, 10) Paglabay hin pipira ka tuig, durante han pagmando han matinumanon nga anak ni Ahas nga hi Hesekia, natuman ini nga mga pulong. Han gintatarhog han mga Asiryahanon an Jerusalem, pinatay han usa nga anghel ni Jehova an 185,000 ha ira. Matin-aw, an Dios kaupod han iya katawohan ngan han hadianon nga katulinan ni David. (Isaias 37:33-37) Durante han tiarabot nga girra han Armagedon, susugoon liwat ni Jehova an Darodaku nga Imanuel diri la ha pagdugmok ha Iya mga kaaway kondi liwat ha pagluwas ha ngatanan nga nasarig ha Iya.—Salmo 2:2, 9, 12.

29. (a) Paonan-o naiiba an mga Judio ha panahon ni Ahas kay hadton ha panahon ni Hesekia? (b) Kay ano nga naglilikay an mga surugoon ni Jehova yana nga magkaada relihiyoso ngan politikal nga mga alyansa?

²⁹ Diri sugad ha mga Judio ha panahon ni Hesekia, an mga kadungandungan ni Ahas waray pagtoo ha panalipod ni Jehova. Ginpili nira an pakig-alyansa, o ‘pakigsabot,’ ha mga Asiryahanon sugad nga panalipod kontra han liga han Siryo-Israelita. Kondi, an “kamot” ni Jehova nag-aaghat kan Isaias nga magyakan kontra ha ‘paagi hini nga katawohan,’ o ha hilig han kadam-an. Hiya nagpapahamangno: “Diri man kamo mahadlok ha ira kahadlok, o diri han makaharadlok dida. Hi Jehova han mga kasundalohan, ha iya kamo magbaraan; ngan hiya an iyo kahadlokan, ngan hiya an iyo makaharadlok.”  (Isaias 8:11-13) Tungod kay ini an ginhuhunahuna, an mga surugoon ni Jehova yana nagbabantay kontra han pakigsabot o pagsarig ha relihiyoso nga mga konseho ngan politikal nga mga liga. An mga surugoon ni Jehova bug-os nga nasarig ha nagpapanalipod nga gahum han Dios. Aw, kon ‘hi Jehova dapig ha aton, ano ba an mabubuhat han tawo ha aton?’—Salmo 118:6.

30. Ano an dadangatan hadton diri nasarig kan Jehova?

³⁰ Hi Isaias nagpapadayon ha pagpabug-at nga hi Jehova magigin sugad hin “santuaryo,” usa nga panalipod, para hadton nasarig ha iya. Ha kabaliktaran, adton nagsasalikway ha iya “mahipapakdol dida, ngan matutumba, ngan mapipiol, ngan mabibitik, ngan makukuha”—lima nga matin-aw nga berbo nga nagsisiguro han dadangatan hadton diri nasarig kan Jehova. (Isaias 8:14, 15) Han siyahan nga siglo, adton nagsalikway kan Jesus nahipakdol ngan natumba liwat. (Lukas 20:17, 18) Pariho nga dadangatan an naghuhulat hadton diri nagpapakita hin pagkamaunungon ha nahitrono nga langitnon nga Hadi, hi Jesus.—Salmo 2:5-9.

31. Paonan-o masusubad han totoo nga mga Kristiano yana an susbaranan ni Isaias ngan hadton namamati ha iya katutdoan?

³¹ Ha panahon ni Isaias, diri an ngatanan nahipakdol. Hi Isaias nasiring: “[Putosa] an pagpamatuod, lakrehe an balaud dida ha akon mga tinon-an. Ngan ako maghuhulat kan Jehova, nga natago han iya nawong tikang ha balay ni Jakob, ngan ako mangingita ha iya.” (Isaias 8:16, 17) Hi Isaias ngan adton nasunod ha iya katutdoan diri mabaya ha Balaud han Dios. Padayon nga nasarig hira kan Jehova, bisan kon an ira maraot nga mga kahimungto nagdudumiri ngan salit igintatago ni Jehova an iya nawong tikang ha ira. Hinaot sundon naton an susbaranan hadton nasarig kan Jehova ngan magkaada pariho nga determinasyon ha pagpabilin ha putli nga pagsingba!—Daniel 12:4, 9; Mateo 24:45; itanding an Hebreo 6:11, 12.

‘Mga Tigaman’ Ngan ‘mga Milagro’

32. (a) Hin-o yana an nag-aalagad ‘sugad nga mga tigaman ngan sugad nga mga milagro’? (b) Kay ano nga an mga Kristiano sadang makita gud nga naiiba tikang ha kalibotan?

³² Hi Isaias yana nagpapasamwak: “Kitaa, ako ngan an kabataan nga kan Jehova ihinatag ha akon para han mga [tigaman] ngan para han mga [milagro] dida ha Israel tikang kan Jehova han mga kasundalohan, nga nag-uukoy ha bukid han Sion.” (Isaias 8:18) Oo, hi Isaias, Seer-hasub, ngan Maher-salal-has-bas mga tigaman han mga katuyoan ni Jehova para han Juda. Yana, hi Jesus ngan an iya dinihogan nga kabugtoan mga tigaman liwat. (Hebreo 2:11-13) Ngan kaupod nira ha ira buruhaton an ‘daku nga panon’ han ‘iba nga mga karnero.’ (Pahayag 7:9, 14; Juan 10:16) Siyempre, birilhon la an usa nga tigaman kon mas nakikita gud ito kay ha iba nga mga hitabo. Sugad man, gintutuman han mga Kristiano an toka ha ira sugad nga mga tigaman kon nakikita gud hira sugad nga naiiba tikang hini nga kalibotan, bug-os nga nasarig kan Jehova ngan maisugon nga nagpapasamwak han iya mga katuyoan.

33. (a) Determinado an totoo nga mga Kristiano nga buhaton an ano? (b) Kay ano nga an totoo nga mga Kristiano makakatindog hin marig-on?

³³ Salit, hinaot sundon naton ngatanan an mga suruklan han Dios, diri an kanan hini nga kalibotan. Magpadayon nga naiiba gud nga waray kahadlok—sugad nga mga tigaman—nga nagbubuhat han toka nga iginhatag ha Darodaku nga Isaias, hi Jesu-Kristo: ‘Ipasamwak an tuig han maopay nga kaburut-on ngan an adlaw han panimalos han aton Dios.’ (Isaias 61:1, 2; Lukas 4:17-21) Oo, kon an baha han mga Asiryahanon umabot na ha bug-os nga tuna—bisan kon umabot ito tubtob ha aton mga liog—an totoo nga mga Kristiano diri ig-aanod. Matindog kita hin marig-on tungod kay “an Dios upod ha aton.”

[Footnote]

[Mga Pakiana]