“Adlaw han Relihiyoso nga Kagawasan”

TUNGOD kay nainteres ha iya pakiistorya hadto ha mga Saksi ni Jehova, an nagdudumara han usa nga eskwelahan ha Polandia naggahin hin usa ka “Adlaw han Relihiyoso nga Kagawasan” para han iya eskwelahan. Nagsuhestyon hiya nga an mga boluntaryo ha mga estudyante—mga Katoliko, mga Budhista, ngan mga Saksi ni Jehova—mag-andam hin halipot nga mga presentasyon basi mahatagan hin impormasyon an iba nga mga estudyante mahitungod han ira mga gintotoohan ngan mga buruhaton. Tulo nga tinedyer nga mga Saksi ni Jehova an nagboluntaryo dayon.

Han inabot ito nga adlaw, an siyahan nga nagyakan amo an 15-anyos an edad nga hi Malwina. Ha bahin, hiya nagsiring: “Damu ha iyo an nakilala na ha amon antes kami magtikang pag-eskwela dinhi tungod kay nabisita kami ha iyo kabalayan. Bangin magpakiana kamo kon kay ano nga nagpapadayon kami ha pagbuhat hito. Tungod ito kay ginsusunod namon an susbaranan ni Jesu-Kristo, an Nagtikang han Kristianidad. Iya iginsangyaw an maopay nga sumat han Ginhadian han Dios diin man mabilngan an mga tawo. An mga apostol ngan an iba nga siyahan nga mga Kristiano nagbuhat hin pariho. Ha damu nga mga lugar, an mga Saksi ni Jehova nag-aantos hin makuri nga mga pagsari ha pagtoo, kondi nalilipay kami nga ha aton eskwelahan may-ada kami kamurayawan, nga kamo ngatanan may-ada bahin. Nagpapasalamat kami ha iyo tungod hito!”

Ha ikatarapos han iya presentasyon, hi Malwina nagsiring: “May-ada usa pa nga hinungdan kon kay ano nga nabisita kami ha iyo balay. Napaid kami ha iyo. An Biblia nasiring nga ha diri maiha an katawohan makakaeksperyensya hin makabay-og-ha-kalibotan nga mga panhitabo. Salit ha sunod nga panahon nga tumuktok kami ha iyo purtahan, alayon magkaada panahon ha pamati. Karuyag namon isumat ha iyo kon paonan-o mahimo kita mabuhi nga urosa ha waray kataposan ha paraiso ha tuna.”

An sunod nga tagapagyakan amo hi Mateusz, 15-anyos liwat. Ginsumatan ni Mateusz an iya mamarati nga ha mga katuigan, an mga Saksi ni Jehova nagamit hin magkalainlain nga mga paagi ha pagpasarang han maopay nga sumat. Pananglitan, han 1914—durante han panahon han waray-tunog nga mga sine—an mga Saksi nagpapasalida han “Photo-Drama of Creation,” nagkikiwa nga sine ngan presentasyon pinaagi han slide nga may-ada dungan nga tunog.

Ginhisgotan ni Mateusz an gamit han radyo ha  pagpasarang han mensahe han Ginhadian ngan katapos iginsaysay an naiiba nga programa ha kompyuter nga multilanguage electronic phototypesetting system (MEPS) nga ginhimo han mga Saksi ni Jehova. Iya liwat iginsaysay kon paonan-o nakakabulig an mga Saksi ni Jehova ha pagpahibaro ha mga doktor mahitungod han mga pamaagi ha pagtambal nga diri nagamit hin dugo. “Yana, an bantogan nga mga doktor ha Polandia positibo nga nakomento mahitungod han amon gintotoohan ngan nagpapabug-at nga kada tuig nagtitikadamu nga diri-Saksi nga mga pasyente an gin-ooperahan nga diri nagamit hin dugo,” nagsiring hiya.

Nagtapos hi Mateusz pinaagi han pagsumat mahitungod han pagtukod hin mga Kingdom Hall ngan nagsiring: “Karuyag ba niyo bisitahon an amon? Libre an pagsulod, ngan waray pangulekta hin kwarta.” Ha paghisgot mahitungod han lugar han kombensyon ha Sosnowiec, hi Mateusz nagsiring: “Sadang gud niyo makita inin haluag ngan praktikal nga tinukod. Kay ano nga diri kita urosa nga kumadto? May-ada kami suhestyon, ngan an aton sangkay nga hi Katarzyna an magsusumat ha iyo mahitungod hito.”

Sunod, an 15-anyos nga hi Katarzyna malipayon nga nagsiring: “Gin-aabiabi kamo nga kumadto ha Sosnowiec para han distrito nga kombensyon han mga Saksi ni Jehova. Paghihisgotan an mga tema nga may kalabotan ha mga batan-on.” Gin-unabi liwat ni Katarzyna an pinakaimportante nga pagsaurog para ha mga Kristiano—an Memoryal han kamatayon ni Jesu-Kristo. Iya gin-aghat an iya mga mamarati: “Ha naglabay nga tuig sobra 14 milyon nga katawohan ha bug-os nga kalibotan an tinambong hito nga pagsaurog. Kay ano nga diri kamo magsaurog kaupod ha amon ha sunod nga higayon?”

Katapos han ira mga presentasyon, iginhatag nira Malwina, Mateusz, ngan Katarzyna ha mga magturutdo an libro nga Jehovah’s Witnesses—Proclaimers of God’s Kingdom ngan an duha nga videocassette nga naghihisgot han mga gintotoohan ngan mga buruhaton han mga Saksi ni Jehova. a Mapasalamaton nga ginkarawat ito han mga magturutdo ngan nagsaad nga gagamiton ito ha pagtutdo mahitungod han kasaysayan.

Katapos han sesyon, ginpatokar han 12-anyos nga hi Martyna an kanta nga may ulohan nga “Nagpapasalamat Kami ha Imo, Jehova” para ha ngatanan nga nagkatirok. Inin batan-on nga mga Saksi ‘nagtirok hin kaisog pinaagi han ira Dios’ ngan nagbuhat hin maopay nga pagpamatuod. (1 Tesalonika 2:2) Maopay gud nga susbaranan para ha batan-on nga mga Saksi ha bisan diin!

[Footnote]

[Retrato ha pahina 26]

Nag-aandam hi Malwina han presentasyon pipira ka adlaw antes ipahayag ito ha eskwelahan

[Retrato ha pahina 26]

Ginpipili ni Katarzyna an mga teksto para han presentasyon