Mga Magburungkag han Kakahoyan

HA MGA panahon han Biblia, gintagad an kakahoyan sugad nga birilhon nga mga produkto. Pananglitan, han pinalit hi Abraham hin lugar nga lubnganan han iya hinigugma nga asawa, hi Sara, iginlista an kakahoyan ha kontrata para ha pagbalhin han panag-iya.—Genesis 23:15-18.

Sugad man yana, birilhon gud an kakahoyan, ngan daku nga pagtagad ha bug-os nga kalibotan an nakasentro ha pagpanalipod ha mga kagurangan. An libro nga State of the World 1998 nasiring: “Bisan kon damu nga tawo ha matugnaw nga mga nasud an nababaraka ha mga kagurangan ha mapaso nga mga lugar, bangin diri hira maaram nga an mga kagurangan ha matugnaw nga klima ha ira mismo mga nasud an pinakanahibubulag ngan pinakamasayon maapektohan han nakakadaot nga mga impluwensya ha ngatanan nga klase han kagurangan.” Ano an nagtatarhog han kahimsog han mga kagurangan hiton nga mga nasud ha norte han Europa ngan Amerika del Norte? An ginbabasol han damu nga tawo amo an pamulod han kakahoyan, kondi may-ada iba pa nga mga puwersa nga diri-direkta nga nakakadaot han kakahoyan, han tagsa nga dahon, siring pa. Ano ito? Polusyon ha hangin ngan asido nga uran. Ini nga mga hugaw hinayhinay nga nakakapaluya han kakahoyan, salit masayon maapektohan ito han mga peste ngan sakit.

Mga dekada na, an mga nagbabantay han palibot ngan an iba nga nagtatagad nga mga tawo nagpapahamangno mahitungod han panginahanglan nga panalipdan an sistema han palibot han tuna. Han dekada han 1980, katapos pag-adman han mga syentista ha Alemanya an mga epekto han polusyon ha hangin ngan asido nga uran ha palibot, hira nagsiring: ‘Kon waray pagbubuhaton, ha tuig 2000, an mga tawo makakagdayaw han mga kagurangan dida na la ha daan nga mga retrato ngan ha mga pelikula.’ Makalilipay, daku gud an abilidad han tuna ha pag-ayad-utro ha kalugaringon nga tubtob yana an mga kagurangan nakakailob lahos pa han igintagna nga kadaot.

Kondi, ha kadayonan, an Dios an magbubuhat han gidadakui basi panalipdan an sistema han aton palibot. “Ginbibisibisan niya an mga bukid tikang han iya mga kahimurutangan” ngan “nagpapaturok hiya han banwa para ha mga kabakahan, ngan urutanon tungod han paggamit han tawo.” Ngan nagsasaad hiya ha “paghibang ha mga naghihibang han tuna.” (Salmo 104:13, 14; Pahayag 11:18) Makalilipay gud kon an mga umurukoy han tuna makakapahimulos na hin kalibotan nga waray polusyon ha kadayonan!—Salmo 37:9-11.