Panalipdi an Imo Konsensya

MAKAHARADLOK hunahunaon an pagbiyahe ha eruplano nga sayop nga nakaprograma an kompyuter. Handurawa, lugod, nga may-ada usa nga sayop nga nagbag-o han sistema han giya han eruplano o tinuyo nga nagpalsipikar han impormasyon hito! Bueno, ha simboliko nga paagi, ito gud an ginpapangalimbasogan han usa nga buhaton ha imo konsensya. Determinado hiya ha pagdaot han sistema han imo giya ha moral. Iya tumong nga magin kaaway ka han Dios!—Job 2:2-5; Juan 8:44.

Hin-o inin madarahog nga nandadaot? Ha Biblia, tinatawag hiya nga “an daan nga halas, nga ginngangaranan Yawa ngan Satanas, nga amo an [nanlilimbong] ha bug-os nga kalibotan.” (Pahayag 12:9) Nakita an iya binuhatan ha hardin han Eden han, pinaagi han salingkapaw nga pangatadongan, iya gindani hi Eva nga isalikway an iya hinbaroan nga husto ngan magrebelde kontra ha Dios. (Genesis 3:1-6, 16-19) Tikang hito nga panahon, ginpangunahan ni Satanas an pagkahimo han ngatanan nga mga institusyon han panlimbong basi giyahan an bug-os nga katawohan ha pakig-away ha Dios. An pinakamaraot hini nga mga institusyon amo an palso nga relihiyon.—2 Korinto 11:14, 15.

Gindadaot han Palso nga Relihiyon an Konsensya

Ha libro han Pahayag ha Biblia, an palso nga relihiyon iginhuhulagway sugad nga simboliko nga puta nga tinatawag nga Babilonya nga Daku. An iya mga katutdoan nakadaot han pagin mahunahunaon ha moral han damu nga mga tawo ngan salit nasisina hira ngan madarahog nga nagios pa ngani kontra hadton iba an mga gintotoohan. Ha pagkamatuod, sumala ha Pahayag, gintatagad han Dios nga an palso nga relihiyon amo an labi nga may baratunon ha dugo “han ngatanan nga pinamatay ha tuna,” upod na an kalugaringon nga mga magsiringba han Dios.—Pahayag 17:1-6; 18:3, 24.

Ginpahamangnoan ni Jesus an iya mga disipulo han sukol han kadaot nga hihimoon han palso nga relihiyon ha moral nga mga suruklan han pipira han hiya nagsiring: “An oras nagtitidaraon, nga an ngatanan nga magpatay ha iyo, maghuhunahuna, nga naghahatag hin pag-alagad ha Dios.” Buta gud ha moral an sugad mabangis nga mga indibiduwal! Hi Jesus nagsiring: “Hira diri nakilala ha Amay bisan ha akon.” (Juan 16:2, 3) Waray pag-iha katapos magyakan hi Jesus hito nga mga pulong, hiya mismo ginpatay ha sugo han pipira nga mga lider han relihiyon, nga an ira konsensya nagtugot han ira krimen. (Juan 11:47-50) Ha kabaliktaran, hi Jesus nagsiring nga an iya totoo nga mga sumurunod kinikilala tungod han ira gugma ha usa kag usa. Kondi an ira gugma mahimo pa pahiluagon hin dugang, tungod kay nag-uupod ito bisan han ira mga kaaway.—Mateo 5:44-48; Juan 13:35.

Usa pa nga paagi nga nakadaot an palso nga relihiyon ha konsensya han damu amo an pagsunod ha bisan ano nga moralidad, o kakulang hito, nga baga hin popular. Ha pagtagna hini, hi apostol Pablo nagsiring: “Maabot an panahon nga diri hira mag-aantos han putli nga pagturon-an; kondi, tungod  ha ira magkatol nga mga talinga, magtitirok hira hin ira mga lugaringon nga magturutdo nga magsusunod ha ira mga kalugaringon nga kaipa.”—2 Timoteo 4:3.

Yana nga panahon, gingigitik han relihiyoso nga mga lider an mga talinga han mga tawo pinaagi ha pagsiring nga an pakighilawas han diri mag-asawa mahimo karawaton han Dios. An iba natugot han homoseksuwal nga mga binuhatan. Ha pagkamatuod, an iba nga mga klero aktuwal nga nagbubuhat hin homoseksuwalidad. Usa nga artikulo ha pahayagan nga The Times han Britanya an nagsiring nga “trese nga kilala han publiko nga homoseksuwal nga klero” an ginpili nga magin membro han Nagmamando nga Grupo han Iglesia han Inglatera. Kon iginsasalikway han mga lider han iglesia an moralidad han Biblia ngan gutiay la an ginbubuhat han ira mga iglesia mahitungod hito, ano nga mga suruklan an susundon han ira mga membro? Diri urusahon nga minilyon an bug-os nga nawuwurok.

Mas maopay gud nga giyahan hin pariho han parola nga moral ngan espirituwal nga mga kamatuoran nga igintututdo ha Biblia! (Salmo 43:3; Juan 17:17) Pananglitan, an Biblia nagtututdo nga an mga nagbubuhat hin pornikasyon o nag-aadulteryo diri “makakapanunod ha ginhadian han Dios.” (1 Korinto 6:9, 10) Nagsusumat ito ha aton nga an kalalakin-an ngan kababayin-an nga nagsaliwan “ha kinaiya nga gawi ngadto ha kontra han ira kinaiya” ‘nagbubuhat hin malaw-ay’ ha atubangan han Dios. (Roma 1:26, 27, 32) Ini nga mga kamatuoran ha moral diri mga hinimo han diri-hingpit nga mga tawo; ito an giniyahan nga mga suruklan han Dios, nga diri gud niya iginsasalikway. (Galasia 1:8; 2 Timoteo 3:16) Kondi hi Satanas may-ada iba nga mga paagi ha pagdaot han konsensya.

Magin Mapili ha Kaliawan

Maraot an pagpirit ha usa nga magbuhat hin maraot, kondi mas maraot an pag-aghat ha iya nga maghingyap ha pagbuhat hito. Ini an tumong han ‘magmarando han kalibotan,’ hi Satanas. Basi maipasilsil an iya maraot nga ideya ha mga hunahuna ngan mga kasingkasing han mga lurong o han mga diri-naghuhunahuna—labi na ha masayon hinduro maapektohan, an mga batan-on—iya ginagamit an maraot nga mga literatura, mga sine, musika, mga uyag ha kompyuter, ngan pornograpiya ha Internet.—Juan 14:30; Efeso 2:2.

“An mga batan-on [ha Estados Unidos] nakakakita hin ginbabanabana nga 10000 nga buhat hin kamadarahog kada tuig,” siring han usa nga report ha magasin nga Pediatrics, “nga an mga programa para ha kabataan amo an pinakamadarahog.” An report nagsumat liwat nga “kada tuig, an mga tinedyer nakakakita hin haros 15000 nga mga pag-unabi, mga pag-aghat, ngan mga intremes mahitungod ha sekso.” Bisan an mga programa ha telebisyon diin damu an magkirita, nagsiring ito, “may-ada sobra 8 nga pakighilawas kada oras, labaw hin upat ka beses kay han 1976.” Diri urusahon, naobserbahan liwat han surbey nga an “malaw-ay nga mga pulong madagmit liwat nga nag-uuswag.” Kondi, an Biblia ngan an damu nga mga pag-aram han syensya nagpapahamangno nga an permanente nga pagkarawat han sugad nga materyal naghihimo han mga tawo nga magin maraot. Salit kon karuyag mo gud nga lipayon an Dios ngan magpahimulos, sunda an Proberbios 4:23,  nga nasiring: “Bantayi an imo kasingkasing ha bug-os nga kamaduruto; kay natikang dida an mga burabod han kinabuhi.”—Isaias 48:17.

Damu han popular nga musika an nakakadaot liwat han konsensya. Usa nga parakanta han nangunguna nga mga kanta ha damu nga mga nasud ha Weste an naghihimo hin “espesyal nga pangalimbasog ha pagpakalas,” nagpahamangno an usa nga report ha pahayagan nga The Sunday Mail han Australia. An artikulo nasiring nga an “iya mga kanta naghihimaya han mga droga, insesto ngan panlugos” ngan hiya “nagkakanta mahitungod han pagpatay han iya asawa ngan paglabog han iya lawas ha danaw.” An iba nga mga pulong nga gin-unabi mangil-ad hinduro para utruhon dinhi. Kondi, tungod han iya musika kinarawat niya an dungganon nga pagpasidungog. Karuyag mo ba itanom ha imo hunahuna ngan kasingkasing an nakakadaot nga mga ideya sugad han gin-unabi na, bisan kon ginpaopay ito han musika? Ginlalaoman nga diri, tungod kay adton nagbubuhat ha sugad nga paagi naghuhugaw han ira konsensya ngan ha kataposan nagkakaada “maraot nga kasingkasing,” ginhihimo hira nga mga kaaway han Dios.—Hebreo 3:12; Mateo 12:33-35.

Salit magin maaramon ha imo pagpili hin kaliawan. An Biblia nagsasagda ha aton: “An ngatanan nga matuod, an ngatanan nga harangdon, an ngatanan nga matadong, an ngatanan nga putli, an ngatanan nga makaruruyag, an ngatanan nga may kadungganan; kon may-ada kusog, ngan kon may-ada pagdayeg, paghunahunaa niyo ini nga mga bagay.”—Filipos 4:8.

An mga Kaupod Nakakaapekto han Imo Konsensya

Sugad nga kabataan, hi Neil ngan Franz nagpahimulos hin maopay nga pakig-upod ha sinsero nga mga Kristiano. a Kondi, inabot an panahon, hi Neil nagsiring, “nagtikang ako makig-upod ha maraot nga mga kasangkayan.” Ginbasulan gud niya an resulta, nga krimen ngan kapriso. Pariho an istorya ni Franz. “Kahuna ko nga malalamposan ko an pakig-upod ha mga batan-on han kalibotan nga diri nira maaapektohan,” nasusubo nga siniring hiya. “Kondi sugad han siring han Galasia 6:7, ‘An Dios diri sadang pagtiawtiawan: kay kon ano an igpugas han tawo, amo man an iya pag-aanihon.’ Hinbaroan ko ha makuri nga paagi nga sayop ako ngan husto hi Jehova. Ginsentensyahan ako hin bug-os-kinabuhi nga kapriso tungod han sayop nga akon nahimo.”

An mga tawo nga pariho kan Neil ngan Franz ha ordinaryo nga kahimtang diri tigda na la nga nagigin kriminal; ha siyahan, ginhunahuna nira an krimen nga maraot nga buhat. Damu nga proseso an nagriresulta han kahianod, an siyahan agsob nga an maraot nga mga kaupod. (1 Korinto 15:33) An pag-abuso ha droga ngan alkohol mahimo sumunod. An konsensya, ha pagkamatuod, angayan nga iginhulagway sugad nga an “bahin han personalidad nga natutunaw ha alkohol.” Tikang hito, gutiay na la ito nga pitad ngadto ha krimen o imoralidad.

Kay ano, kon sugad, nga himoon pa iton siyahan nga pitad? Lugod, makig-upod ha maaramon nga mga tawo nga nahigugma gud ha Dios. Mabulig hira ha imo nga maparig-on an imo konsensya basi  giyahan ka hito ha husto nga paagi, iginbubulag ka ha damu nga mga kasakit. (Proberbios 13:20) Bisan kon priso pa gihapon, gintatagad yana nira Neil ngan Franz an ira konsensya sugad nga regalo han Dios nga kinahanglan bansayon hin husto, ngan ha pagkamatuod, apresyaron. Dugang pa, nangangalimbasog gud hira nga magkaada maopay nga relasyon ha ira Dios, hi Jehova. Magin maaramon, ngan mahibaro tikang ha ira mga sayop.—Proberbios 22:3.

Panalipdi an Imo Konsensya

Iginpapakita naton nga karuyag naton panalipdan an aton konsensya kon aton ginpaparig-on an gugma ngan pagtoo ha Dios, upod an husto nga kahadlok ha iya. (Proberbios 8:13; 1 Juan 5:3) An Biblia nagsusumat nga an konsensya nga waray hini nga mga impluwensya agsob nga waray karig-on ha moral. Pananglitan, an Salmo 14:1 naghihisgot mahitungod hadton nasiring ha ira kasingkasing: “Waray Dios.” Paonan-o inin kawaray pagtoo nakakaapekto han ira pamatasan? An bersikulo nagpapadayon: “Mangil-ad hira, naghimo hira han mga maghugaw nga mga buhat.”

An mga tawo nga waray tinuod nga pagtoo ha Dios waray liwat marig-on nga paglaom para ha maoroopay nga tidaraon. Salit, nahihilig hira ha pagkinabuhi para ha presente, nagpapatagbaw han ira unudnon nga mga hingyap. An ira pilosopiya amo an: “Pangaon ngan panginom kita, kay buwas mapatay kita.” (1 Korinto 15:32) Ha luyo nga bahin, adton an mga mata nakatutok ha premyo han kinabuhi nga dayon diri nasusulay han lumalabay nga mga kalipayan han kalibotan. Pariho han kompyuter ha pagbiyahe nga nakaprograma ha husto nga paagi, gintitipigan hira han ira nabansay nga konsensya ha dalan han maunungon nga pagsugot ha Dios.—Filipos 3:8.

Basi matipigan han imo konsensya an karig-on ngan an pagkahusto, nagkikinahanglan ito hin regular nga paggiya tikang ha Pulong han Dios. An Biblia nagsusumat ha aton nga an sugad nga paggiya makukuha, han ha simboliko nga mga pulong, ito nagsiring: “An imo mga talinga makakabati han usa nga pulong ha imo luyo, nga nasiring: Amo ini an dalan, maglakat kamo dida hini; kon kamo sumimang ha too nga kamot, ngan kon kamo sumimang ha wala.” (Isaias 30:21) Salit maggahin hin panahon para ha pagbasa han Biblia kada adlaw. Magpaparig-on ngan magdadasig ini ha imo kon nangangalimbasog ka pagbuhat han husto o kon an tarhog han kabaraka ngan pangarit aada ha imo atubangan. Sarig nga gigiyahan ka ni Jehova ha moral ngan espirituwal kon bug-os nga masarig ka ha iya. Oo, subara an salmista nga nagsurat: “Hi Jehova iginbutang ko gihapon ha atubangan ko: Tungod kay aadi hiya ha akon too nga kamot, diri ako hitatalindas.”—Salmo 16:8; 55:22.

[Footnote]

[Mga Retrato ha pahina 5]

An palso nga relihiyon, nga iginhulagway ha Biblia sugad nga ‘Babilonya nga Daku,’ amo an responsable ha pagpaluya han konsensya han damu

[Ginkuhaan han Retrato]

Padi nga nagbibendisyon ha mga sundalo: U.S. Army photo

[Mga Retrato ha pahina 6]

An pagkinita hin kamadarahog ngan imoralidad makakadaot han imo konsensya

[Retrato ha pahina 7]

An regular nga giya tikang ha Pulong han Dios magpapanalipod han imo konsensya