Paonan-o Ka Nagios ha Pagkasalingkapaw?

HA HARDIN han Getsemani, kinadto hi Judas Iskariote kan Jesus ngan “hinadkan hiya.” Ordinaryo ini nga kapahayagan han mapinairon nga gugma. Kondi an buhat ni Judas usa la nga pasangil basi makilala hi Jesus hadton kinadto hito nga gab-i ha pagdakop ha iya. (Mateo 26:48, 49) Salingkapaw hi Judas—usa nga tawo nga nagpapakunokuno ha pagin bisan kon diri hiya sugad, usa nga nagtatago han iya maraot nga mga motibo ha luyo han tabon han pagkasinsero. An Griego nga pulong nga iginhubad nga “salingkapaw” nangangahulogan hin “usa nga nabaton” ngan nangangahulogan liwat hin usa nga artista ha entablado. Inabot an panahon, an pulong nagtutudlok na ha bisan hin-o nga nagpapakunokuno la basi malimbongan an iba.

Paonan-o ka nagios ha pagkasalingkapaw? Pananglitan, nasisina ka ba kon nakikita mo an mga parahimo hin sigarilyo nga nag-aaghat hin pagsigarilyo bisan pa han ebidensya ha mediko nga nakakadaot an ira produkto? Nangangalas ka ba ha pagkasalingkapaw han mga paraataman nga nag-aabuso hadton iginsarig ha ira pag-ataman? Nasusubo ka ba kon an usa nga ginhuhunahuna mo nga tinuod nga sangkay hinbaroan mo nga diri ngay-an maunungon? Paonan-o nakakaapekto ha imo an pagkasalingkapaw ha relihiyon?

“Kairo Niyo, mga Salingkapaw!”

Tagda an relihiyoso nga kahimtang han nakanhi pa hi Jesus ha tuna. An mga eskriba ngan mga Pariseo nagpakunokuno nga maunungon nga mga magturutdo han Balaud han Dios, kondi ha kamatuoran ira ginpuno an mga hunahuna han mga tawo hin tawhanon nga mga katutdoan nga nagpahirayo han atensyon tikang ha Dios. An mga eskriba ngan mga Pariseo istrikto nga nagpirit han literal nga kahulogan han balaud, kondi ira ginbalewaray an importante nga mga prinsipyo nga nagpapakita han gugma ngan pagpaid. Ha publiko nagpakunokuno hira nga debotado ha Dios, kondi ha pribado puno hira hin karaotan. An ira mga buhat diri gud nauyon ha ira mga pulong. An ira tumong ha pagbuhat han mga butang amo nga basi “hikit-an han mga tawo.” Sugad hira hin “pinabusag nga mga lurubngan, nga ha gawas matahom, kondi an sakob puno han mga tul-an han mga patay nga mga tawo, ngan han ngatanan nga mga kahugawan.” Tungod kay maisugon nga iginbubuhayhag an ira pagkasalingkapaw, pauroutro nga nagsiring hi Jesus ha ira: “Kairo niyo, mga salingkapaw nga mga eskriba ngan mga Pariseo!”—Mateo 23:5, 13-31.

Kon nabuhi ka hiton nga mga panahon, pariho han iba nga tangkod an kasingkasing nga mga tawo bangin mangalas ka gud ha sugad nga pagkasalingkapaw ha relihiyon. (Roma 2:21-24; 2 Pedro 2:1-3) Kondi tutugotan mo ba nga mahiubos ka tungod han pagkasalingkapaw han mga eskriba ngan mga Pariseo tubtob nga isalikway mo an ngatanan nga relihiyon, upod na an igintutdo ngan ginbuhat ni Jesu-Kristo ngan han iya mga disipulo? Diri ba ito makakadaot ha imo?

An salingkapaw nga paggios han relihiyoso nga mga tawo bangin magin hinungdan nga isalikway naton an relihiyon tungod han kapungot. Kondi, ini nga paggios makakapugong liwat ha aton nga makita an sinseridad han totoo nga mga magsiringba. Ha iba nga pagkayakan, an mga ulang mismo nga aton gintutukod ha pagpanalipod kontra ha pagkasalingkapaw, mahimo magpahirayo ha aton tikang ha totoo nga kasangkayan. Salit, an aton paggios ha pagkasalingkapaw sadang magin makatadunganon ngan timbang.

“Magmatngon Kamo”

Siyahan, kinahanglan naton hibaroan an pagkilala ha mga salingkapaw. Diri ini pirme masayon. Hinbaroan ini han usa nga pamilya katapos hira mawad-an hin daku. Nakoma an iroy. Han  nagkiha tungod han sayop nga pagbuhat han propesyon kontra ha ospital diin ini nahitabo, nagbayad an pamilya hin usa nga abogado nga usa liwat nga parawali ha lokal nga iglesia. Bisan kon an ospital nagbayad hin $3.4 milyon ha danyos, nagdugang an kakurian han pamilya. An iroy namatay nga pobre, ngan waray kwarta nga maibayad ha pagpalubong ha iya. Kay ano? Tungod kay iginbulsa han abogado an kadam-an han kwarta. Mahitungod hini nga abogado, an usa nga magasin mahitungod han balaud nagsiring: “Kon iwawali niya an klase han binuhatan nga iya ginhimo . . . , an iya mensahe magigin sugad hini: manlimbong kita.” Paonan-o naton mapapanalipdan an aton kalugaringon tikang ha mga tawo nga pariho hito?

“Magmatngon kamo,” an sagdon ni Jesus hadton inatubang hin relihiyoso nga pagkasalingkapaw ha iya panahon. (Mateo 16:6; Lukas 12:1) Oo, kinahanglan magmatngon kita. An mga tawo bangin mag-angkon hin pinakamaopay nga mga motibo ngan magpakita hin sobra nga pagkasinsero, kondi kinahanglan magin maaramon kita ngan diri dayon karawaton an ngatanan nga nakikita. Diri ba naton uusisahon hin maopay an aton mga kwarta kon maaram kita nga nagsasarang an palsipikado nga kwarta?

Nakikita an mga salingkapaw bisan ha sulod han totoo Kristiano nga kongregasyon. Hi disipulo Judas nagpahamangno mahitungod ha ira, nasiring: “Ini hira amo an mga buring nga natago ha iyo mga panagtawo kon mangangaon hira upod niyo, mga magbarantay hin karnero nga ha waray hin kahadlok nangangaon ha ira ngahaw; mga dampog nga waray tubig, nga mga iginpapalid han mga hangin; mga kahoy ha amihan nga waray bunga.”—Judas 12.

An ‘pagmatngon naton’ nangangahulogan hin paglikay nga malimbongan han usa nga nagpapakunokuno nga mahigugmaon kondi ha pagkamatuod naghuhunahuna la ha kalugaringon ngan nag-aaghat hin mga opinyon nga diri basado ha Pulong han Dios. Pariho hin garatud-gatod nga bato ha ubos han malinaw nga katubigan, an sugad nga tawo makakadaot han espirituwalidad han diri-mabinantayon. (1 Timoteo 1:19) Bangin daku nga espirituwal nga karepresko an igsaad han salingkapaw kondi magin “mga dampog nga waray tubig” ngay-an—nga waray maihahatag nga uran. Pariho hin waray bunga nga puno hin kahoy, an malimbong diri nagbubunga hin totoo Kristiano nga bunga. (Mateo 7:15-20; Galasia 5:19-21) Oo, kinahanglan magin mabinantayon kita kontra han sugad nga mga malimbong. Kondi, kinahanglan buhaton naton ito nga diri nagsususpetsa ha mga motibo han kada usa.

“Diri Kamo Maghukom”

Masayon gud para ha diri-hingpit nga mga tawo nga unabihon an mga kapakyasan han iba nga mga tawo samtang ginbabalewaray an ira! Kondi, ini nga paggios nakakahimo ha aton nga masayon maapektohan han pagkasalingkapaw. “Salingkapaw,” nagsiring hi Jesus. “Siyahan kuhaa an sapayan, nga aada ha imo mata, ngan niyan ikaw makita hin maopay ha pagkuha han puling nga aadto ha mata han imo bugto.” Maopay nga sundon naton an iya sagdon: “Diri kamo maghukom, basi diri kamo paghukman. Kay an paghukom nga iyo iginhuhukom, kamo man paghuhukman . . . Ngan kay ano an imo pagkinita han puling nga aada ha mata han imo bugto, ngan waray mo kikitaa an sapayan, nga aada ha imo mata?”—Mateo 7:1-5.

Kon an iba usahay nagbubuhat hin mga butang nga baga hin salingkapaw, kinahanglan magin mabinantayon kita nga diri pagngaranan hira dayon sugad nga mga salingkapaw. Pananglitan, hi apostol Pedro “binalik ngan naglugaring hin pagbulag” tikang ha mga igkasi-tumuroo nga Hentil  ha Antiokia basi mapalipay an mga bisita nga Judio nga tikang ha Jerusalem. Hi Bernabe ‘inupod liwat kan Pedro ngan ha iba hini nga pagpakunokuno.’ Ginbuhat ini ni Pedro bisan pa han kamatuoran nga nakapribilehiyo hiya ha pag-abri han dalan ha pagkarawat han mga Hentil ha Kristiano nga kongregasyon. (Galasia 2:11-14; Buhat 10:24-28, 34, 35) Kondi ini nga kapakyasan ni Bernabe ngan Pedro sigurado nga waray makahimo ha ira nga magin pariho ha mga eskriba ngan mga Pariseo o kan Judas Iskariote.

“An Gugma Diri Updan hin Kasalingkapaw”

“Kon magbuhat ka hin maopay ha iba nga mga tawo,” nagsagdon hi Jesus, “ayaw pagplete hin parabudyong ha imo unhan—pariho hadton mga artista ha mga sinagoga ngan mga kalsada nga naniniguro nga dayawon hira han katawohan.” (Mateo 6:2, Phillips) “An gugma diri updan hin kasalingkapaw,” nagsurat hi apostol Pablo. (Roma 12:9) Iya gindasig an batan-on nga hi Timoteo nga magkaada “gugma tikang ha usa nga kasingkasing nga putli . . . ngan [waray kasalingkapaw] nga pagtoo.” (1 Timoteo 1:5) Kon totoo an aton gugma ngan pagtoo—waray mahugawi han pagkahakog ngan panlimbong—matapod ha aton an iba. Magigin surok kita han totoo nga karig-on ngan kadasig hadton nakapalibot ha aton. (Filipos 2:4; 1 Juan 3:17, 18; 4:20, 21) Ngan labaw ha ngatanan, uuyonan kita ni Jehova.

Ha luyo nga bahin, an pagkasalingkapaw mapapamatud-an nga makamaratay ha ira nga nagbubuhat hito. Ha kataposan, an pagin salingkapaw hibabaroan han publiko. “Waray bisan ano nga natatabonan nga diri mabubukasan,” siring ni Jesu-Kristo, “ngan waray tinago, nga diri hibabaroan.” (Mateo 10:26; Lukas 12:2) An maaramon nga hi Hadi Salomon nagpahayag: “Dadad-on han Dios an tagsatagsa nga buhat ngadto ha hukmanan, kaupod han tagsatagsa nga butang nga natatago, mamaopay ba ini o mamaraot ba ini.”—Eklesiastes 12:14.

Samtang yana, kay ano nga tugotan naton nga maapektohan kita han pagkasalingkapaw han iba tubtob nga mawarayan kita han totoo nga gugma han aton tinuod nga kasangkayan? Mahimo kita magin mabinantayon nga diri sobra nga magsuspetsa. Ngan labaw ha ngatanan, mangalimbasog kita ha pagtipig han aton gugma ngan pagtoo nga waray pagkasalingkapaw.—Jakobo 3:17; 1 Pedro 1:22.

[Mga Retrato ha pahina 22, 23]

Tutugotan mo ba nga an pagkasalingkapaw han mga eskriba ngan mga Pariseo magpahirayo ha imo tikang kan Jesu-Kristo ngan ha iya mga disipulo?