Mga Pakiana Tikang ha mga Magbarasa

An sugo ba han Dios nga nahisurat ha Jeremias 7:16 nangangahulogan nga an mga Kristiano diri mag-aampo mahitungod han usa nga ginpaiwas tikang ha Kristiano nga kongregasyon tungod kay diri hiya mabinasulon nga makasasala?

Katapos igpahayag an iya paghukom kontra han diri-matinumanon nga Juda, hi Jehova nagsiring kan Jeremias: “Ayaw ikaw pag-ampo tungod hini nga katawohan, ayaw man pagpasaka hin pag-ampo o pagsangpit para ha ira, ayaw man pag-ampo ha akon ha paglaban ha ira; kay diri ako mamamati ha imo.”—Jeremias 7:16.

Kay ano nga gindid-an ni Jehova hi Jeremias nga mag-ampo para ha mga Israelita? Matin-aw nga tungod ito han ira duro nga mga pagtalapas ha iya Balaud. Dayag ngan waray-kaawod nga hira ‘nangawat, nagpatay, ngan nag-adulteryo ngan buwa nga nanumpa ngan nagsunog hin insenso kan Baal ngan nagsunod ha iba nga mga dios.’ Sugad nga resulta, hi Jehova nagsiring ha waray-pagtoo nga mga Judio: “Akon kamo isasalikway ha gawas han akon paniplatan, sugad han pagsalikway ko han ngatanan niyo nga kabugtoan, bisan an bug-os nga tulin ni Epraim.” Sigurado nga magigin sayop para kan Jeremias, o ha bisan hin-o, nga mag-ampo nga bag-ohon ni Jehova an Iya paghukom.—Jeremias 7:9, 15.

Uyon hini, hi apostol Juan nagsurat mahitungod han husto nga pag-ampo ha Dios. Siyahan, iya ginpasarig an mga Kristiano: “Kon mangaro kita hin bisan ano nga bagay sumala ha iya kaburut-on, mamamati hiya ha aton.” (1 Juan 5:14) Katapos, may kalabotan ha pag-ampo para ha iba, hi Juan nagpadayon: “Kon may tawo nga makakita ha iya bugto nga nagbubuhat hin sala nga diri ngadto ha kamatayon, mangaro hiya, ngan an Dios mahatag hin kinabuhi hadton waray pakasala hin sala nga [takos] ha kamatayon. May-ada sala [nga takos] ha kamatayon: diri ako nasiring nga tungod hini mangaro hiya.” (1 Juan 5:19) Ginhisgotan liwat ni Jesus an sala nga ‘diri gud mapapasaylo,’ nga amo an sala kontra ha baraan nga espiritu.—Mateo 12: 31, 32.

Nangangahulogan ba ini nga an ngatanan nga ginpaiwas tikang ha Kristiano nga kongregasyon tungod  ha diri-mabinasulon nga pakasala nakahimo hin mga sala nga “[takos] ha kamatayon” ngan salit diri na sadang ig-ampo? Posible nga diri sugad hini tungod kay ha pipira nga mga kahimtang an sugad nga mga pagtalapas diri mga sala nga takos ha kamatayon. Ha pagkamatuod, makuri hibaroan kon sugad hito an sala. An usa nga naangay nga ehemplo amo hi Hadi Manases han Juda. Nagtukod hiya hin mga altar para ha palso nga mga dios, naghalad han iya kalugaringon nga mga anak nga lalaki, nagbuhat hin espiritismo, ngan nagbutang hin inukit nga mga imahen ha templo ni Jehova. Ha pagkamatuod, an Biblia nasiring nga hi Manases ngan an katawohan nagbuhat “hadton maraot labi kay han ginbuhat han mga nasud nga kan Jehova gingunaw ha atubangan ha mga anak han Israel.” Tungod hini ngatanan, ginsirotan ni Jehova hi Manases pinaagi han pagpadara ha iya sugad nga bihag nga nakakadena ngadto ha Babilonya.—2 Hadi 21:1-9; 2 Kronikas 33:1-11.

Bisan kon daku an mga sala ni Manases, ito ba an klase nga takos han kamatayon? Matin-aw nga diri, kay an asoy padayon nga nasiring mahitungod ha iya: “Han dida hiya ha kasakitan, hiya nangita kan Jehova an iya Dios, ngan nagpaubos ha daku gud ha atubangan han Dios han iya mga amay. Ngan hiya nag-ampo ha iya; ngan hiya pinakimalooyan niya, ngan namati han iya pakimalooy, ngan gindara liwat hiya ngadto ha Jerusalem dida ha iya ginhadian. Dida hito hi Manases nakakilala nga hi Jehova hiya amo an Dios.”—2 Kronikas 33:12, 13.

Salit, diri kita sadang maghukom dayon nga an usa ka tawo sigurado nga may-ada sala nga takos hin kamatayon tungod la kay ginpaiwas hiya tikang ha kongregasyon. Bangin magkinahanglan hin panahon basi makita an totoo nga motibo han kasingkasing han indibiduwal. Ha pagkamatuod, agsob nga iginsasaysay nga usa han mga katuyoan han pagpaiwas amo an pagbantad ha makasasala, ngan upod an paglaom nga magbasol hiya ngan bumalik.

Tungod kay an tawo diri na kaapi han kongregasyon, an bisan ano nga pagbag-o han kasingkasing ngan paggios mahimo maobserbahan siyahan hadton duok ha iya, sugad han asawa o mga membro han pamilya. Adton nakakakita han sugad nga mga pagbag-o mahimo maghunahuna nga an salaan waray makabuhat hin sala nga takos hin kamatayon. Bangin mapagios hira ha pag-ampo nga makakuha unta hiya hin kusog tikang ha inspirado nga Pulong han Dios ngan gumios hi Jehova ngada ha salaan uyon han Iya kaburut-on.—Salmo 44:21; Eklesiastes 12:14.

Bisan kon an iba bangin aada ha kahimtang nga makita an igo nga pamatuod ha pagtoo nga nagbabasol an makasasala, bangin diri ini an kahimtang han kongregasyon ha kabug-osan. Bangin hira mahipausa, mawurok, mahipakdol pa ngani kon hira makabati nga may usa nga nag-aampo ha publiko para han ginpaiwas. Tungod hini, adton naaaghat ha pag-ampo mahitungod han makasasala sadang magbuhat hito ha pribado la, iginsasarig an bisan ano dugang nga mga panhitabo ha pagdumara han responsable nga mga tigurang ha kongregasyon.

[Retrato ha pahina 30]

Ginpasaylo an daku nga mga sala ni Manases han nagpaubos hiya ha atubangan ni Jehova

[Ginkuhaan han Retrato ha pahina 31]

Ginkuha tikang ha Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s