Mahibaro hin Usa nga Leksyon Tikang kan Nikodemo

“KON may usa, nga karuyag sumunod ha akon, magdumiri ha iya kalugaringon, ngan iya pagpas-anon an iya [pasakitan nga kahoy] ha adlaw-adlaw, ngan sumunod ha akon.” (Lukas 9:23) An mapainubsanon nga mga mangingisda ngan an tinamay nga parasukot hin buhis kinarawat dayon hito nga pagdapit. Ira ginbayaan an ngatanan basi sumunod kan Jesus.—Mateo 4:18-22; Lukas 5:27, 28.

An panawagan ni Jesus nababatian pa gihapon yana nga panahon, ngan damu an nakarawat. Kondi, an iba nga nalilipay ha pag-aram ha Biblia upod han mga Saksi ni Jehova nag-aalang ha ‘pagsalikway han ira kalugaringon ngan pagpas-an han ira pasakitan nga kahoy.’ Nag-aalang hira ha pagkarawat han responsabilidad ngan pribilehiyo ha pagin mga disipulo ni Jesus.

Kay ano nga an iba nag-aalang ha pagkarawat han pagdapit ni Jesus ngan pagdedikar han ira kalugaringon ngadto kan Jehova nga Dios? Oo, adton waray magdaku ha Judio-Kristiano nga ideya nga uusa la an Dios  bangin manginahanglan hin hilawig nga panahon antes makasabot hin bug-os han pag-eksister han usa nga persona, nga gamhanan-ha-ngatanan nga Maglalarang. Kondi, bisan katapos makombinse hira nga totoo an Dios, an iba nag-aalang ha pagsunod ha mga pitad ni Jesus. Bangin nahahadlok hira nga maghuhunahuna hin negatibo mahitungod ha ira an ira mga paryente ngan kasangkayan kon hira magin Saksi ni Jehova. An iba, nga nawawarayan pag-abat han pagkaapurado han mga panahon naton yana, nangangalimbasog para hin kabantogan ngan bahandi. (Mateo 24:36-42; 1 Timoteo 6:9, 10) Anoman an kahimtang, para hadton padayon nga naglalangan han ira desisyon nga magin mga sumurunod ni Jesus, may-ada usa nga leksyon nga angay hibaroan tikang ha asoy mahitungod kan Nikodemo, usa nga bahandianon nga Judio nga magmarando ha panahon ni Jesus.

Ginbendisyonan hin Maopay nga mga Higayon

Mga unom pa la ka bulan katapos nga gintikangan ni Jesus an iya ministeryo ha tuna, kinilala ni Nikodemo hi Jesus ‘sugad nga magturutdo nga nagtikang ha Dios.’ Tungod kay nainteres ha mga milagro nga bag-o pa la nga ginbuhat ni Jesus ha Jerusalem ha Paskua han 30 K.P., kinadto hi Nikodemo ha gab-i, ha pagsumat han iya pagtoo kan Jesus ngan basi dugang nga mahibaro mahitungod hini nga magturutdo. Dida hito, hi Jesus nagsumat kan Nikodemo hin hilarom nga kamatuoran mahitungod han panginahanglan nga ‘matawo utro’ basi makasulod ha Ginhadian han Dios. Hini nga okasyon, nagyakan liwat hi Jesus nga: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi ma may kinabuhi nga waray kataposan.”—Juan 3:1-16.

Maopay gud nga tidaraon an naghuhulat kan Nikodemo! Mahimo hiya magin duok nga  kaupod ni Jesus, personal nga makakita han magkalainlain nga mga kahimtang han kinabuhi ni Jesus ha tuna. Sugad nga magmarando han mga Judio ngan magturutdo ha Israel, daku an kahibaro ni Nikodemo ha Pulong han Dios. Hilarom liwat an iya pagsabot, nga nahisasabtan pinaagi han iya pagkilala kan Jesus sugad nga magturutdo nga iginpadara han Dios. Interesado hi Nikodemo ha espirituwal nga mga butang, ngan mapainubsanon gud hiya. Sigurado nga makuri gud para ha usa nga membro han gihitaasi nga hukmanan han mga Judio an pagkilala ha minos nga anak han panday sugad nga tawo nga iginpadara han Dios! An ngatanan han sugad nga mga kalidad importante hinduro basi an usa ka tawo magin disipulo ni Jesus.

An interes ni Nikodemo hini nga tawo nga tikang ha Nasaret baga hin waray mawara. Paglabay hin duha ngan tunga ka tuig, ha Piyesta han mga Payag, tinambong hi Nikodemo ha usa nga katirok han Sanhedrin. Hini nga panahon, hi Nikodemo ‘kaupod pa gihapon nira.’ An nangunguna nga mga saserdote ngan an mga Pariseo nagsugo hin mga opisyal ha pagdakop kan Jesus. Binalik an mga opisyal ngan nagsiring: “Waray pa tawo nga nagyakan sugad hini.” An mga Pariseo nagtikang pagtamay ha ira: “Mga ginpasimang man kamo? May-ada ba usa han mga punoan, o han mga Pariseo, nga nagtoo ha iya? Kondi ini nga kadam-an nga diri maaram han Kasugoanan, mga ginmaraot.” Waray na makapugong hi Nikodemo. Hiya nagyakan: “An aton kasugoanan naghuhukom ba ha usa ka tawo, nga waray pa hiya pamamatii anay, ngan waray pa hibaroi an iya ginbuhat?” Katapos hiya nagin puntirya han mga pakaraot tikang ha iba nga mga Pariseo: “Ikaw ba taga-Galilea man? Usisaha ngan kitaa, nga diri malutaw an usa nga manaragna tikang ha Galilea.”—Juan 7:1, 10, 32, 45-52.

Paglabay hin unom ka bulan, ha Adlaw han Paskua han 33 K.P., nakita ni Nikodemo an lawas ni Jesus nga iginlusad tikang ha pasakitan nga kahoy. Binulig hiya kan Jose han Arimatea, usa pa nga membro han Sanhedrin, ha pag-andam han lawas ni Jesus ha paglubong. Para hito, nagdara hi Nikodemo hin “salakot nga mira ngan aloe” nga may kabug-at nga mga 100 ka Romano nga libras, nga katugbang ha 72 ka Ingles nga libras. Nagkantidad ito hin daku nga kwarta. Nagkinahanglan liwat hiya hin kaisog ha pag-atubang han resulta nga makilala nga kaupod ‘hito nga impostor,’ sugad han pagtawag kan Jesus han mga igkasi-Pariseo ni Nikodemo. Katapos han madagmit nga  pag-andam han lawas ni Jesus ha paglubong, iginbutang nira nga duha hi Jesus ha hirani nga bag-o nga lubnganan. Kondi, bisan hini nga takna, hi Nikodemo waray pa kilalaha sugad nga usa ka disipulo ni Jesus!—Juan 19:38-42; Mateo 27:63; Markos 15:43.

Kon Kay Ano nga Waray Hiya Gumios

Kon kay ano nga nag-alang hi Nikodemo ha ‘pagpas-an han iya pasakitan nga kahoy’ ngan pagsunod kan Jesus, waray ipahayag ni Juan ha iya asoy. Kondi, nagsumat hiya hin mga pangirilal-an nga mahimo magsaysay han pag-alang hini nga Pariseo.

Siyahan ha ngatanan, iginpatin-aw ni Juan nga an Judio nga magmarando “dinaraon kan Jesus han gab-i.” (Juan 3:2) Usa nga eskolar ha Biblia an nagsiring: “Hi Nikodemo kinadto ha gab-i, diri tungod ha kahadlok, kondi basi malikyan an damu nga katawohan nga makakaulang unta han iya pagpakiana kan Jesus.” Kondi, gin-unabi ni Juan hi Nikodemo sugad nga ‘an tawo nga kinadto kan Jesus ha gab-i ha siyahan nga higayon,’ ha pariho nga konteksto diin iya gin-unabi hi Jose han Arimatea sugad nga “tinon-an ni Jesus, kondi ha tago tungod ha kahadlok ha mga Judio.” (Juan 19:38, 39) Salit, posible nga hi Nikodemo kinadto kan Jesus ha gab-i tungod ha “kahadlok ha mga Judio,” sugad la han iba ha iya panahon nga nahadlok nga makilala sugad nga kaupod ni Jesus.—Juan 7:13.

Ginlalangan mo ba an desisyon nga magin usa han mga disipulo ni Jesus tungod han mahimo sidngon han imo mga paryente, kasangkayan, o mga kakilala? “An kahadlok ha tawo nagdadara hin usa nga bitik,” siring han usa ka proberbio. Paonan-o mo malalamposan ito nga kahadlok? An proberbio nagpapadayon: “Kondi bisan hin-o nga magbutang han iya pagsarig dida kan Jehova, maluluwas.” (Proberbios 29:25) Basi maparig-on ito nga pagsarig kan Jehova, kinahanglan personal nga maeksperyensyahan mo nga bubuligan ka han Dios kon aada ka ha makuri nga mga kahimtang. Pag-ampo kan Jehova, ngan hangyoa hiya nga hatagan ka hin kaisog ha paghimo hin bisan gudtiay nga mga desisyon mahitungod han imo pagsingba. Hinayhinay nga an imo pagtoo ngan pagsarig kan Jehova magtutubo tubtob ha punto nga makakahimo ka na hin dagku nga mga desisyon uyon ha kaburut-on han Dios.

An katungdanan ngan dungog ni Nikodemo sugad nga usa nga membro han nagmamando nga grupo bangin nakapugong liwat ha iya ha paghimo han importante nga desisyon ha pagsalikway han iya kalugaringon. Hito nga panahon, sigurado nga marig-on pa an iya pagpabili ha iya katungdanan sugad nga membro han Sanhedrin. Nag-aalang ka ba nga gumios basi magin sumurunod ni Kristo tungod kay bangin mawad-an ka han dungganon nga posisyon ha sosiedad o bangin kinahanglan nga isakripisyo an pipira nga mga posibilidad para ha pag-uswag? Waray usa hini nga mga butang an maitatanding ha dungog han pag-alagad ha Gihitaasi ha uniberso, nga andam ha pagtagbaw han imo mga hangyo nga uyon ha iya kaburut-on.—Salmo 10:17; 83:18; 145:18.

An usa pa nga posible nga hinungdan han paglangan ni Nikodemo bangin may kalabotan ha iya mga bahandi. Sugad nga Pariseo, bangin naimpluwensyahan na hiya han iba, “nga mahigugmaon han salapi.” (Lukas 16:14) An kamatuoran nga nakaakos hiya han marahalon nga ginsaralakot nga mira ngan aloe nagpapamatuod han iya bahandi. An iba yana nga panahon padayon nga naglalangan ha pagdesisyon nga karawaton an mga responsabilidad han usa nga Kristiano tungod kay nababaraka hira mahitungod han ira materyal nga mga panag-iya. Kondi, hi Jesus nagsagdon ha iya mga sumurunod: “Diri kamo mangarit ha iyo kinabuhi kon ano an iyo kakaunon, o kon ano an iyo iinumon; bisan tungod ha iyo lawas kon ano an iyo igsusul-ot. . . . Kay an iyo Amay nga langitnon, maaram nga kamo nagkikinahanglan hini ngatanan. Kondi pamilnga niyo siyahan an ginhadian han Dios, ngan an iya katadongan; ngan ngatanan ini nga mga butang mahidudugang ha iyo.”—Mateo 6:25-33.

Daku an Nawara ha Iya

Makapainteres, an asoy mahitungod kan Nikodemo, nga mababasa la ha Ebanghelyo ni Juan, waray magsiring kon nagin sumurunod hiya ni Jesus o waray. Sumala ha usa nga tradisyon, hi Nikodemo tinoo kan Jesus, nabawtismohan, nagin usa nga puntirya han pagtimaraot han mga Judio, ginkuha tikang ha iya katungdanan, ngan ha  kataposan ginpaiwas tikang ha Jerusalem. Anoman an kahimtang, usa nga butang an sigurado: Daku an nawara ha iya tungod han paglangan-langan samtang nakanhi pa hi Jesus ha tuna.

Kon hi Nikodemo nagtikang unta ha pagsunod kan Jesus ha panahon han iya siyahan nga pakiistorya ha Ginoo, nagin duok unta hiya nga disipulo ni Jesus. Tungod han kahibaro, pagsabot, pagpaubos, ngan kaaram ni Nikodemo ha espirituwal nga mga panginahanglan, nagin maopay gud unta hiya nga disipulo. Oo, nahibatian unta niya an urusahon nga mga pahayag han Bantogan nga Magturutdo, nahibaro hin importante nga mga leksyon tikang ha mga ilustrasyon ni Jesus, nakakita han urusahon nga mga milagro nga ginbuhat ni Jesus, ngan nagkaada kusog tikang ha pangataposan nga sagdon ni Jesus ha iya mga apostol. Kondi waray niya mapahimulsi ito ngatanan.

An pagkamaruhaduhaon ni Nikodemo nagresulta hin daku nga kawad-i ha iya bahin. Upod na an mahigugmaon nga pagdapit ni Jesus: “Kadi ngatanan kamo ha akon, nga nagbubuhat ngan binubug-atan, ngan akon kamo tatagan hin pagpahuway. Pas-ana niyo an akon yugo, ngan magtoon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway ha iyo mga kalag. Kay an akon yugo masayon, ngan an akon pinas-an magaan.” (Mateo 11:28-30) Nawara ni Nikodemo an higayon nga maeksperyensyahan ini nga pagliaw tikang kan Jesus mismo!

Kumusta Ka Man?

Tikang han 1914, hi Jesu-Kristo presente na ha langit sugad nga Hadi han langitnon nga Ginhadian han Dios. Ha pagtagna han mahitatabo durante han iya presensya, labaw ha ngatanan hiya nagsiring: “Ini nga Maopay nga Sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (Mateo 24:14) Antes umabot an kataposan, an pagsangyaw nga buruhaton ha bug-os nga kalibotan kinahanglan matuman. Nalilipay hi Jesu-Kristo nga nakikigbahin an diri-hingpit nga mga tawo. Ikaw liwat mahimo makigbahin hini nga buruhaton.

Kinilala ni Nikodemo nga hi Jesus nagtikang ha Dios. (Juan 3:2) Tungod ha pag-aram ha Biblia, bangin pariho liwat hito an imo ginhuhunahuna. Bangin naghimo ka na hin mga pagbag-o ha imo paagi han pagkinabuhi basi magpahiuyon ha mga suruklan ha Biblia. Bangin natambong ka pa ngani ha mga katirok han mga Saksi ni Jehova basi magkaada dugang nga kahibaro ha Biblia. Angay ka kumendasyonan tungod han sugad nga mga pangalimbasog. Kondi, hi Nikodemo nagkinahanglan nga magbuhat hin labaw pa kay han simple nga pagpakita hin apresasyon para kan Jesus sugad nga an usa nga sinugo han Dios. Kinahanglan hiya “magdumiri ha iya kalugaringon, ngan iya pagpas-anon an iya [pasakitan nga kahoy] ha adlaw-adlaw, ngan sumunod [kan Jesus].”—Lukas 9:23.

Tipigi an ginsisiring ha aton ni apostol Pablo. Hiya nagsurat: “Nanginginyupo kami ha iyo, sugad nga kabulig ha pagbuhat han Dios nga diri niyo karawaton an grasya han Dios, hin waray kapulsanan. (Kay hiya nasiring; Ha panahon nga maayon pinamatian ko ikaw, ngan ha adlaw han kaluwasan tinabangan ko ikaw: Kitaa, amo na niyan an panahon nga makaruruyag; kitaa, amo na niyan an adlaw han kaluwasan).”—2 Korinto 6:1, 2.

Yana an panahon ha pagpatubo han pagtoo nga magpapagios ha imo. Basi matuman ito, pamalandonga an mga butang nga imo gin-aadman ha Biblia. Pag-ampo kan Jehova, ngan pangaro ha iya hin bulig basi maipakita an sugad nga pagtoo. Samtang imo naieksperyensyahan an iya bulig, an imo apresasyon ngan gugma ha iya magpapagios ha imo nga ‘isalikway an imo kalugaringon ngan pas-anon an imo pasakitan nga kahoy kada adlaw ngan padayon nga magsunod kan Jesu-Kristo.’ Magios ka ba yana?

[Retrato ha pahina 9]

Ha siyahan, hi Nikodemo maisugon nga nagdepensa kan Jesus

[Retrato ha pahina 9]

Bisan pa han pagkontra, binulig hi Nikodemo ha pag-andam han lawas ni Jesus ha paglubong

[Retrato ha pahina 10]

An personal nga pag-aram ngan pag-ampo makakaparig-on ha imo nga gumios

[Retrato ha pahina 10]

Kakarawaton mo ba an pribilehiyo ha pagbuhat ilarom han pagmando ni Jesu-Kristo?