Mga Pakiana Tikang ha mga Magbarasa

Ha ano nga sukol naaplikar ha mga Kristiano yana nga panahon an mga limitasyon ha Mosaiko nga Balaud ha pag-asawa butnga han mga magparyente?

An Balaud nga iginhatag ni Jehova ha nasud han Israel waray magdetalye mahitungod han mga seremonya ngan mga paagi han kasal. Kondi, naghatag ito hin mga pagdiri kontra han espisipiko nga mga relasyon ha pag-asawa. Pananglitan, ha Lebitiko 18:6-20, aton mabibilngan an lista han igindiri nga mga relasyon nga nahidadabi an usa nga ‘duok nga paryente.’ Ito nga asoy naghahatag hin damu nga detalye kon hin-o nga mga paryente an kinahanglan diri makighilawas ha kada tagsa. Siyempre, an mga Kristiano diri ilarom han Mosaiko nga Balaud o obligado nga sundon ito. (Efeso 2:15; Kolosas 2:14) Bisan pa, diri ini nagpapasabot nga mahimo la igbalewaray han mga Kristiano ini nga butang kon napili hin mapapangasawa. Damu an mga hinungdan kon kay ano nga ini an kahimtang.

Ha pagtikang, may-ada mga balaud han gobyerno nga nagdidiri han pag-asawa han duok nga magparyente, ngan an mga Kristiano kasagaran nga obligado ha pagsunod ha mga balaud han nasud diin hira naukoy. (Mateo 22:21; Roma 13:1) Siyempre, magkalainlain an sugad nga mga balaud ha kada lugar. Kasagaran han moderno nga mga balaud nga sugad hini, basado siyahan ha henetiko nga mga hinungdan. Hinbabaroan nga totoo nga an pag-asawa butnga han duok nga magparyente nakakahimo nga mas posible para han ngatanan nga anak nga magkaada henetiko nga mga depekto ngan mga sakit. Tungod hini ngan han ira ‘pagpasakop ha hitaas nga mga awtoridad,’ an mga Kristiano nga nag-aasawa nasunod ha mga balaud ha pag-asawa ha ira lugar.

Niyan aada an mahitungod han kinakarawat ngan han diri-kinakarawat ha komunidad nga inuukyan han usa. Haros ngatanan nga kultura may-ada mga balaud ngan mga kustomre nga nagdidiri han pag-asawa han mga tawo nga may duok nga relasyon, agsob nga ginhuhunahuna ito sugad nga insesto nga mga relasyon ngan salit igindidiri. Bisan kon an espisipiko nga mga relasyon nga igindidiri bangin magkaiba gud ha magkalainlain nga mga kultura, “kasagaran gud, kon mas duok an henetiko nga relasyon han duha nga tawo, mas makusog ngan mas duro an pagdiri o an pagpugong han pakighilawas ha butnga nira,” siring han The Encyclopædia Britannica. Salit, bisan kon waray nahidadabi nga insesto nga mga relasyon, diri karuyag han mga Kristiano nga bug-os nga igbalewaray an naandan nga mga kustomre o an husto nga mga binuhatan han komunidad, basi diri mapasiparahan an Kristiano nga kongregasyon o an ngaran han Dios.—2 Korinto 6:3.

Diri sadang ibalewaray an aton hatag-han-Dios nga konsensya. An ngatanan nga tawo iginpanganak nga may pagsabot ha husto ngan sayop, ha maopay ngan maraot. (Roma 2:15) An ira konsensya nagsusumat ha ira kon ano an normal ngan husto ngan kon ano an diri-natural ngan maraot, kon waray pa ito maimpluwensyahi o mapatig-a han sayop nga mga buhat. Gin-unabi ni Jehova ini nga kamatuoran han iginhatag niya ha mga Israelita an iya balaud kontra ha pag-asawa butnga han duok nga magparyente. Aton mababasa: “Diri kamo magbuhat sugad han mga binubuhat ha tuna, ha Ehipto diin kamo pag-ukoy: ngan diri kamo man magbuhat sugad han mga binubuhat ha tuna ha Kanaan ngain ko kamo dadad-a; ngan diri kamo maglalakat ha ira mga kasugoan.” (Lebitiko 18:3) Ginpapabilhan han mga Kristiano an ira basado-ha-Biblia nga konsensya ngan diri natugot nga mahugawan ito pinaagi han baliko nga pagsabot han husto ngan sayop han mga nasud.—Efeso 4:17-19.

Ano, kon sugad, an aton masisiring? Bisan kon an mga Kristiano diri ilarom han Mosaiko nga Balaud, an ira konsensya nagsusumat ha ira hin matin-aw nga an pag-asawa butnga han duok nga magparyente—sugad han amay ngan anak nga babaye, iroy ngan anak nga lalaki, magbugto—igindidiri gud ha Kristiano nga komunidad. a Samtang nagtitikahaluag an katulinan, hinbabaroan han mga Kristiano nga may-ada mga balaud ngan mga surundon nga ginbabasaran han legal nga pag-asawa ngan may-ada mga suruklan nga kinakarawat ha sosiedad ngan kultura. Kinahanglan tagdon ini hin maopay basi masunod naton an sagdon han Kasuratan nga: ‘Magin dungganon unta an pag-asawa ha ngatanan.’—Hebreo 13:4.

[Footnote]