Paglampos ha “Usa nga Tunok ha Unod”

“Iton akon grasya igo ha imo.”—2 KORINTO 12:9.

1, 2. (a) Kay ano nga diri kita sadang magupong kon naatubang kita ha mga pagsari ngan mga problema? (b) Kay ano nga makakasarig kita bisan pa han mga pagsari?

 “AN NGATANAN nga nahigugma mabuhi nga matinahuron ha Dios kan Kristo Jesus mag-aantos hin pagtimarauta.” (2 Timoteo 3:12) Kay ano? Tungod kay iginpipirit ni Satanas nga an tawo nag-aalagad ha Dios tungod la han hakugnon nga mga hinungdan, ngan determinado gud hiya nga pamatud-an an iya punto. Hi Jesus nagpahamangno hadto ha iya matinumanon nga mga apostol: “Hi Satanas nangangaro hin pagkapot ha iyo basi hiya magsisig ha iyo sugad han trigo.” (Lukas 22:31) Maaram gud hi Jesus nga tinutugotan han Dios hi Satanas nga sarihan kita pinaagi han masakit nga mga problema. Siyempre, diri ito nangangahulogan nga an tagsa nga kakurian nga inaatubang naton ha kinabuhi direkta nga nagtitikang kan Satanas o ha iya mga demonyo. (Eklesiastes 9:11) Kondi disidido hi Satanas nga gamiton an bisan ano nga paagi nga iya mahihimo ha pagbungkag han aton integridad.

² An Biblia nagsusumat ha aton nga diri kita sadang magupong ha mga pagsari ha aton. Anoman an umabot ha aton, diri ito urusahon o diri-ginlalaoman. (1 Pedro 4:12) Ha pagkamatuod, “ini nga mga pag-antos natutuman man ha [aton] mga kabugtoan nga aada ha kalibotan.” (1 Pedro 5:9) Yana nga panahon, duro nga gin-iipit ni Satanas an tagsa nga surugoon han Dios. Nalilipay an Yawa nga makita kita nga ginsasakit pinaagi han damu nga sugad-tunok nga mga problema tubtob nga mahihimo. Basi mahimo ito, ginagamit niya an iya sistema han mga butang ha paagi nga makakadugang o makakapasakit pa gud han bisan ano nga ‘mga tunok ha aton unod.’ (2 Korinto 12:7) Kondi, an mga pag-atake ni Satanas diri makakabungkag han aton integridad. Sugad la nga hi Jehova “mahatag . . . hin katigayonan ha paglikay” basi makailob kita han pagsulay, bubuhaton liwat niya ito kon naatubang kita ha mga problema nga pariho hin mga tunok ha aton unod.—1 Korinto 10:13.

Kon Paonan-o Malalamposan an Usa nga Tunok

 3. Paonan-o binaton hi Jehova han ginhangyo hiya ni Pablo nga kuhaon an tunok ha iya unod?

³ Hi apostol Pablo nakimalooy ha Dios nga kuhaon an tunok tikang ha iya unod. “Mahitungod hini nga bagay, nanginginyupo ako ha Ginoo hin makatulo nga kuhaon ini tikang ha akon.” Ano an baton ni Jehova ha sinsero nga hangyo ni Pablo? “Iton akon grasya igo ha imo: kay iton akon gahum mahihingpit ha kamaluya.” (2 Korinto 12:8, 9) Aton usisahon ini nga baton  ngan kitaon kon paonan-o ito makakabulig ha aton nga malamposan an bisan ano nga sugad-tunok nga mga problema nga nagpapasakit ha aton.

 4. Ha ano nga mga paagi pinahimulsan ni Pablo an diri-takos nga kalooy ni Jehova?

⁴ Tigamni nga gindasig han Dios hi Pablo nga magpasalamat ha diri-takos nga kalooy nga iginhatag na ha iya pinaagi kan Kristo. Oo, ginbendisyonan gud hi Pablo ha damu nga mga paagi. Mahigugmaon nga tinagan hiya ni Jehova han pribilehiyo nga magin disipulo ni Jesus, bisan kon usa ka panatiko nga parakontra hiya hadto ha mga sumurunod ni Jesus. (Buhat 7:58; 8:3; 9:1-4) Katapos hito, maloloy-on nga tinagan ni Jehova hi Pablo hin damu nga makaruruyag nga mga toka ngan mga pribilehiyo ha pag-alagad. Matin-aw an leksyon para ha aton. Bisan ha pinakamakuri nga mga panahon, may-ada pa gihapon kita damu nga mga bendisyon nga sadang pasalamatan. An mga pagsari ha aton diri gud sadang makahimo ha aton nga hingalimtan an hura nga pagkamaopay nga ipinapakita ha aton ni Jehova.—Salmo 31:19.

5, 6. (a) Paonan-o gintutdoan ni Jehova hi Pablo nga an Iya gahum “mahihingpit ha kamaluya”? (b) Paonan-o pinamatud-an han susbaranan ni Pablo nga hi Satanas usa nga buwaon?

⁵ An diri-takos nga kalooy ni Jehova napapamatud-an nga igo na ha usa pa nga paagi. An gahum han Dios sobra pa kay ha igo na ha pagbulig ha aton ha mga pagsari. (Efeso 3:20) Gintutdoan ni Jehova hi Pablo nga an Iya gahum “mahihingpit ha kamaluya.” Paonan-o? Mahigugmaon nga tinagan Niya hi Pablo han bug-os nga kusog nga ginkinahanglan niya basi malamposan an pagsari ha iya. Tungod hito, an pagpailob ni Pablo ngan an iya marig-on nga pagsarig kan Jehova nagpakita ha ngatanan nga mga Kristiano nga an gahum han Dios nagdadaog ha kahimtang hinin maluya ngan makasasala nga tawo. Yana tagda an epekto ha Yawa, nga nasiring nga an mga tawo nag-aalagad la ha Dios kon mahimyang an kinabuhi ngan waray mga problema. An integridad ni Pablo nagin sugad hin pagtampalo ha nawong hiton nga parapakaraot!

⁶ Hi Pablo, nga kaupod hadto ni Satanas ha iya pakig-away ha Dios, usa nga mapahitas-on nga persigidor ha mga Kristiano, madasigon nga Pariseo nga sigurado nga nagpahimulos hadto hin damu nga kahimyang ha kinabuhi tungod kay natawo hiya ha bahandianon nga pamilya. Hi Pablo nag-aalagad na yana kan Jehova ngan kan Kristo sugad nga “labi nga ubos ha ngatanan nga mga apostol.” (1 Korinto 15:9) Tungod hito, mapainubsanon nga nagpasakop hiya ha awtoridad han siyahan-siglo nga Kristiano nga nagmamando nga lawas. Ngan matinumanon nga nagpailob hiya bisan pa han iya tunok ha unod. Nangangalas gud hi Satanas, tungod kay an mga pagsari ha kinabuhi waray makapaluya han kadasig ni Pablo. Waray gud hingalimti ni Pablo an paglaom nga mahiuupod hiya ha langitnon nga Ginhadian ni Kristo. (2 Timoteo 2:12; 4:18) Waray tunok, bisan ano kasakit, an makakaiban han iya kadasig. Hinaot an aton kadasig, magpadayon liwat nga marig-on! Pinaagi han pagparig-on ha aton ha mga pagsari, ginpapasidunggan kita ni Jehova pinaagi han pribilehiyo ha pagbulig nga pamatud-an nga hi Satanas usa nga buwaon.—Proberbios 27:11.

Importante an mga Tagana ni Jehova

7, 8. (a) Pinaagi han ano ginpaparig-on ni Jehova an iya mga surugoon yana? (b) Kay ano nga importante gud an adlaw-adlaw nga pagbasa ngan pag-aram ha Biblia basi malamposan an usa nga tunok ha aton unod?

⁷ Yana nga panahon, ginpaparig-on ni Jehova an matinumanon nga mga Kristiano pinaagi han iya baraan nga espiritu, han iya Pulong, ngan han aton Kristiano nga pagminagburugto. Pariho kan apostol Pablo, maipapasa naton an aton mga pinas-an kan Jehova ha pag-ampo. (Salmo 55:22) Bisan kon bangin diri kuhaon han Dios an mga pagsari ha aton, ihahatag niya ha aton an kinaadman basi malamposan ito, bisan an mga pagsari nga makuri gud ilubon. Hi Jehova makakaghatag liwat ha aton hin kusog—maghahatag ha aton hin “kapin kaopay nga gahum”—basi buligan kita nga makailob.—2 Korinto 4:7.

⁸ Paonan-o naton nakakarawat an sugad nga bulig? Kinahanglan mauyatom nga pag-adman naton an Pulong han Dios, kay dida hito mabibilngan naton an iya sigurado nga mga pagliaw. (Salmo 94:19) Ha Biblia, mababasa naton an makapabantad nga mga pulong han mga surugoon han Dios han nakimalooy hira han Iya bulig. An mga baton ni Jehova, nga agsob nga nag-uupod han paggamit hin nakakaliaw nga mga pulong, angay pamalandungon. An pag-aram ha Pulong han Dios magpaparig-on ha aton basi “an kapin kaopay nga gahum makanan Dios, ngan diri matikang ha [aton] ngahaw.” Sugad la han aton pagkinahanglan hin pisikal nga pagkaon kada adlaw para han sustansya ngan  kusog, kita kinahanglan kumaon liwat hin regular han mga pulong han Dios. Ginbubuhat ba naton ini? Kon amo, makikita naton nga an aton pagkarawat han “kapin kaopay nga gahum” nabulig ha aton nga ilubon an bisan ano nga simboliko nga mga tunok nga bangin nagpapasakit ha aton yana.

 9. Paonan-o makakasuporta an mga tigurang ha mga nangangalimbasog nga malamposan an mga problema?

⁹ An mahadlukon-ha-Dios nga Kristiano nga mga tigurang “masusugad hin lugar nga luluk-an tikang ha hangin” han kaguol, “usa nga sirongan tikang ha bagyo” han mga problema. An mga tigurang, nga karuyag magin angayan hiton inspirado nga paghulagway, mapainubsanon ngan sinsero nga naghahangyo kan Jehova nga hatagan hira hin ‘dila han mga gintutdoan’ basi mahibaro hira ha pagbaton ha mga nag-aantos pinaagi han husto nga mga pulong. An mga pulong han mga tigurang mahimo igpariho ha mahinay nga uran nga nakakatugnaw ngan nakakaliaw han aton panhunahuna durante han makuri nga mga panahon ha kinabuhi. Pinaagi han pagyakan hin ‘nakakaliaw ha nasusubo nga mga kalag,’ totoo nga sinusuportahan han mga tigurang an ira espirituwal nga kabugtoan nga bangin nanluluya o nasusubo tungod han pipira nga tunok ha ira unod.—Isaias 32:2; 50:4; 1 Tesalonika 5:14.

10, 11. Paonan-o madadasig han mga surugoon han Dios an iba nga nag-aantos hin makuri nga mga pagsari?

¹⁰ An ngatanan nga mga surugoon ni Jehova bahin han iya nagkakaurosa Kristiano nga pamilya. Oo, kita “mga bahin ha usa kag usa,” ngan “kinahanglan man nga maghigugmaay kita an usa kag usa.” (Roma 12:5; 1 Juan 4:11) Paonan-o naton gintutuman ini nga obligasyon? Sumala ha 1 Pedro 3:8, ginbubuhat naton ito pinaagi han ‘pagpakita hin pagpaid ha igkasi-tawo, mahigugmaon sugad ha magburugto, ngan maloloy-on’ ha ngatanan hadton kaurupod naton ha pagtoo. Para hadton nangangalimbasog nga malamposan an usa ka maul-ol hinduro nga tunok ha unod, batan-on man hira o lagas, kita ngatanan makakaghatag ha ira hin espesyal nga pagtagad. Paonan-o?

¹¹ Sadang mangalimbasog kita nga magin mapinairon ha ira pag-antos. Kon kita waray pagpaid, waray pagbati, o waray pagtagad, bangin diri-tinuyo nga gindudugangan pa gud naton an ira pag-antos. Tungod kay maaram kita han ira mga kakurian, sadang mapagios kita nga magin matinagaron ha kon ano an aton isisiring, paonan-o ito isisiring, ngan paonan-o kita magios. An aton pagin positibo ngan makapadasig makakabulig ha pag-iban han duro nga kasakit tungod han anoman nga tunok nga nagpapasakit ha ira. Pinaagi hito mahimo kita magin nagpaparig-on nga bulig ha ira.—Kolosas 4:11.

Kon Paonan-o Naglalampos an Iba

12-14. (a) Ano an ginbuhat han usa nga Kristiano basi malamposan an mga kakurian may kalabotan han kanser? (b) Paonan-o an espirituwal nga kabugtoan hini nga babaye sinuporta ngan nagdasig ha iya?

¹² Samtang nagtitikahirani kita ha tubtoban hinin kataposan nga mga adlaw, an “kasakitan” nagdudugang kada adlaw. (Mateo 24:8) Salit, an mga pagsari posible nga magpapasakit ha ngatanan dinhi  ha tuna, labi na ha matinumanon nga mga surugoon ni Jehova, nga nangangalimbasog ha pagbuhat han iya kaburut-on. Pananglitan, tagda an usa nga Kristiano nga nag-aalagad ha bug-os-panahon nga ministeryo. An doktor nagsiring nga may-ada hiya kanser ngan kinahanglan kuhaon an iya salivary ngan lymphatic glands. Han hinbaroan niya ngan han iya bana nga may-ada hiya hini nga sakit, dinaop dayon hira kan Jehova pinaagi han hilawig, nanginginyupo nga pag-ampo. Ha urhi nagsiring hiya nga nagkaada hira hin diri-katoohan nga kamurayawan. Ha gihapon, nag-ilob hiya hin damu nga maopay ngan makuri nga mga panahon, labi na han gin-aantos niya an mga epekto han pagtambal ha iya.

¹³ Basi malamposan an iya kahimtang, ini nga bugto nga babaye nangalimbasog nga mahibaro hin damu mahitungod han kanser. Ginkonsulta niya an iya mga doktor. Ha An Barantayan, Awake!, ngan may kalabotan nga Kristiano nga mga publikasyon, nabilngan niya an personal nga mga istorya han kinabuhi nga nagpapakita kon paonan-o ha emosyon nalamposan han mga indibiduwal ini nga sakit. Iya ginbasa liwat an may kalabotan nga mga teksto ha Biblia nga nagpapakita han abilidad ni Jehova ha pagparig-on ha iya katawohan durante han mga kakurian, ngan iba pa mapulsanon nga impormasyon.

¹⁴ Usa nga artikulo mahitungod han paglampos han pagturaw an nagkotar hinin maaramon nga mga pulong: “Hiya nga nahibubulag namimiling han iya kalugaringon nga tinguha.” (Proberbios 18:1) Salit an artikulo naghatag hini nga sagdon: “Ayaw ibulag an imo kalugaringon.” a An bugto nagsasaysay: “Damu an nagsumat ha akon nga nag-inampo hira para ha akon; an iba nagtawag ha akon ha telepono. Duha nga tigurang an regular nga nangungumusta ha akon ha telepono. Nakakarawat ako hin mga bukad ngan damu nga kard. An iba nag-andam pa ngani hin pagkaon. Damu liwat an nagboluntaryo nga updan ako ha akon pagpatambal.”

15-17. (a) Paonan-o nalamposan han usa nga Kristiano an mga kakurian nga resulta han mga aksidente? (b) Ano nga suporta an iginhatag hadton aada ha kongregasyon?

¹⁵ Usa nga maiha na nga surugoon ni Jehova ha New Mexico, E.U.A., an makaduha nga naaksidente ha sarakyan. Nadaot an iya liog ngan mga sugbong, nga nakapagrabe han iya arthritis nga iya gin-iilob ha sulod hin sobra 25 ka tuig na. Hiya nagsasaysay: “Nakurian gud ako ha pagtadong han akon ulo ngan pagdara hin bisan ano nga sobra duha ka kilo an bug-at. Kondi an kinasingkasing nga pag-ampo kan Jehova nagpapakusog gud ha akon. Sugad man an mga artikulo ha An Barantayan nga aton gin-aadman. An usa nagkomento ha Mika 6:8, nagsiring nga an pagin mapainubsanon ha paglakat kaupod han Dios nangangahulogan hin paghibaro han mga limitasyon han usa. Nakabulig ini ha akon nga masabtan nga bisan pa han akon kahimtang, diri ako sadang manluya, bisan kon an panahon nga ginasto ko ha ministeryo kulang gud kay ha akon karuyag. An pag-alagad ha iya nga may putli nga mga motibo amo an pinakaimportante.”

¹⁶ Nagsusumat liwat hiya: “An mga tigurang pirme naghahatag hin kumendasyon ha akon mga pangalimbasog ha pagtambong ha mga katirok ngan paggawas ha ministeryo ha kanataran. An mga batan-on nahangkop ha akon sugad nga pangumusta. An payunir nga mga ministro mapailubon hinduro ha akon ngan agsob nga ginbag-o an ira eskedyol ha pag-alagad ha kanataran ha mga adlaw nga masakit ako hinduro. Kon maraot an panahon, mapinairon nga igin-uupod ako nira ha mga pagbalik bisita o gindadapit ako nga umupod ha ira mga pag-aram ha Biblia. Ngan tungod kay diri ako nakakadara hin bag, iginbubutang han iba nga mga magwarali ha ira bag an akon literatura kon nagawas ako ha pagsangyaw.”

¹⁷ Tigamni kon paonan-o binuligan han mga tigurang ha kongregasyon ngan han mga igkasi-tumuroo inin duha nga bugto nga babaye basi malamposan an ira sugad-tunok nga mga sakit. Naghatag hira hin praktikal, mapinairon nga bulig nga gintuyo para han espisipiko nga espirituwal, pisikal, ngan emosyonal nga mga panginahanglan. Diri ba ito nagdadasig ha imo nga bumulig ha iba nga kabugtoan nga nag-aantos hin mga problema? Kamo nga mga batan-on makakabulig liwat hadton aada ha iyo kongregasyon nga nag-iilob han mga tunok ha ira unod.—Proberbios 20:29.

18. Ano nga pagdasig an mabibilngan naton ha mga istorya han kinabuhi nga iginpublikar ha Barantayan ngan Awake! nga mga magasin?

¹⁸ Iginpupublikar ha Barantayan ngan Awake!  nga mga magasin an damu nga mga istorya han kinabuhi ngan mga eksperyensya han mga Saksi nga naglampos, ngan nangangalimbasog pa ha paglampos han mga problema ha kinabuhi. Samtang regular nga binabasa mo iton nga mga artikulo, makikita mo nga damu han imo espirituwal nga kabugtoan ha bug-os nga kalibotan an nag-iilob han mga kakurian ha pinansyal, kamatay han mga hinigugma ha mga kalamidad, ngan peligroso nga mga kahimtang ha panahon han girra. An iba nag-iilob han mga sakit nga nakakabaldado. Damu an diri na nakakagbuhat han pipira han simple nga mga buruhaton ha kinabuhi nga ginbabalewaray han mga mahimsog. Duro gud nga pagsari ha ira an ira mga sakit, labi na kon diri hira nakakahimo pakigbahin ha Kristiano nga mga buruhaton sugad han ira karuyag. Mapasalamaton gud hira ha bulig ngan suporta nga iginhahatag han ira kabugtoan, batan-on man o lagas!

An Pagpailob Nagriresulta hin Kalipayan

19. Kay ano nga nagmalipayon hi Pablo bisan pa han iya sugad-tunok nga mga pagsari ngan mga kaluyahan?

¹⁹ Nalipay gud hi Pablo nga makita kon paonan-o ginparig-on hiya han Dios. Hiya nagsiring: “Maghihimaya gud ako hin labi ha akon mga kaluyahan, basi nga an gahum ni Kristo mapabilin dinhi ha akon. Busa nalilipay ako ha mga kamaluyahon, ha mga pagpakaraot, ha mga kakablasan, ha mga pagtimaraot, ha mga kakurian, tungod kan Kristo: kay kon ako maluya, niyan makusog ako.” (2 Korinto 12:9, 10) Tungod han iya personal nga mga eksperyensya, hi Pablo may pagsarig nga makakasiring: “Diri nga nagyayakan ako mahitungod han kinahanglan: kay naton-an ko na, nga bisan ano an akon himutangan, malipayon ako hito. Maaram ako ha makalolooy nga panginabuhi, ngan maaram ako ha panginabuhi ha kahuraan: ha tagsatagsa nga bagay ngan ha ngatanan nga mga bagay naton-an ko an kahibaro, han kabusog, sugad man han kagutom, han kahuraan sugad man han kakablasan. Ngatanan mahihimo ko ha gahum han Nagpaparig-on ha akon.”—Filipos 4:11-13.

20, 21. (a) Kay ano nga mahimo kita magmalipayon ha pamalandong ha “mga butang nga diri-nakikita”? (b) Ano an pipira han “mga butang nga diri-nakikita” nga ginlalaoman mo nga makita ha tunan-on nga Paraiso?

²⁰ Salit, pinaagi han pag-ilob han bisan ano nga simboliko nga tunok ha aton unod, mahimo kita magmalipayon gud ha pagpakita ha ngatanan nga an gahum ni Jehova nahihingpit ha aton kaluyahan. Hi Pablo nagsurat: “Waray kami panluya . . . An amon pagkatawo nga ha sulod nagbabag-o ha adlaw-adlaw. Kay an amon magaan nga kagol-anan, nga ha madali la, nagbubuhat ha amon hin labaw pa gud nga waray kataposan nga kabug-at hin himaya; . . . kami nagtatan-aw . . . ha mga butang nga diri-nakikita: kay an mga butang nga . . . diri-nakikita mga waray kataposan.”—2 Korinto 4:16-18.

²¹ Naglalaom an kadam-an han katawohan ni Jehova yana nga panahon nga magkinabuhi ha iya tunan-on nga Paraiso ngan magpahimulos han mga bendisyon nga iya iginsaad. An sugad nga mga bendisyon bangin tagdon nga “diri-nakikita” naton yana. Kondi, madagmit nga nagtitiarabot an panahon nga makikita naton pinaagi han aton mga mata mismo iton nga mga bendisyon, oo, ngan mapapahimulosan ito ha kadayonan. An usa han sugad nga mga bendisyon amo an katalwasan nga diri na gud kita mag-iilob pa utro han bisan ano nga sugad-tunok nga problema! An Anak han Dios ‘magbubungkag han mga buhat han Yawa’ ngan “paglaglagon niya an may gahum han kamatayon.”—1 Juan 3:8; Hebreo 2:14.

22. Ano an sadang magin pagsarig ngan determinasyon naton?

²² Salit, anoman nga tunok an aada ha aton unod nga nakakadaot ha aton yana, padayon nga ilubon naton ito. Pariho kan Pablo, magkakaada kita kusog ha pagbuhat hito tungod kan Jehova, nga hura nga naghahatag ha aton hin kusog. Kon nagkikinabuhi na kita ha tunan-on nga Paraiso, aton pagbubulahanon hi Jehova nga aton Dios kada adlaw tungod han ngatanan nga iya urusahon nga mga buhat para ha aton.—Salmo 103:2.

[Footnote]

Paonan-o Mo Babatunon?

• Kay ano ngan paonan-o nangangalimbasog an Yawa ha pagbungkag han integridad han totoo nga mga Kristiano?

• Paonan-o an gahum ni Jehova “mahihingpit ha kamaluya”?

• Paonan-o madadasig han mga tigurang ngan han iba adton ginsasakit han mga problema?

[Mga Pakiana]

[Retrato ha pahina 18]

Makatulo nga nag-ampo hi Pablo nga kuhaon unta han Dios an tunok ha iya unod