Mga Pakiana Tikang ha mga Magbarasa

Husto ba an pagsiring nga an kalooy ni Jehova nagkukontrol han iya hustisya?

Bisan kon ginamit na ini nga mga pulong, gimaopayi nga likyan ito tungod kay baga hin nagpapasabot ito nga an kalooy ni Jehova nagpapagaan o nagpupugong han iya hustisya, nga baga hin an iya kalooy mas hitaas ha mas mabug-at nga kalidad nga hustisya. Sayop ini.

An Hebreo nga pulong nga iginhubad nga “hustisya” ha New World Translation mahimo liwat mangahulogan hin “paghukom.” An hustisya duok nga may kalabotan ha pagkamatadong. Kondi, an hustisya agsob nga may-ada legal nga mga iginpapasabot. An pagkamatadong kasagaran nga waray. Totoo nga an hustisya ni Jehova mahimo mag-upod han pagpadapat han angayan nga sirot, kondi nag-uupod liwat ito han paghatag hin kaluwasan para ha mga takos. (Genesis 18:20-32; Isaias 56:1; Malakias 4:2) Salit, an hustisya ni Jehova diri sadang hunahunaon sugad nga mabangis o kinahanglan pagaanon.

An Hebreo nga pulong para ha “kalooy” mahimo magpasabot hin pagpugong ha pagpadapat han paghukom. Nagtutudlok liwat ito ha madasigon nga pagpahayag hin pagpaid, nga nagdadara hin kaliawan ha mga kablas.—Deuteronomio 10:18; Lukas 10:29-37.

Hi Jehova usa nga Dios han hustisya ngan kalooy. (Eksodo 34:6, 7; Deuteronomio 32:4; Salmo 145:9) An iya hustisya ngan an iya kalooy hingpit, ngan nagkakauruyon ito. (Salmo 116:5; Hosea 2:19) An duha nga kalidad timbang gud o nabulig ha kada tagsa. Salit, kon masiring kita nga ginkukontrol han kalooy ni Jehova an iya hustisya, kinahanglan sidngon liwat naton nga ginkukontrol han iya hustisya an iya kalooy.

Hi Isaias nagtagna: “Hi Jehova mahulat, ngan hiya magmaloloy-on ha iyo; ngan tungod hito hiya pagpapahitas-on, ngan hiya maymaada kalooy ha iyo: kay hi Jehova amo an Dios ha kasubayan [“hustisya,” The New English Bible].” (Isaiah 30:18) Ipinapakita dinhi ni Isaias nga an hustisya ni Jehova nag-aaghat han mga buhat han kalooy diri ito nangangahulogan nga an iya kalooy nagpapagaan o nagpupugong han iya hustisya. Nagpapakita hi Jehova hin kalooy tungod kay hiya matadong ngan tungod liwat kay hiya mahigugmaon.

Oo, an parasurat han Biblia nga hi Jakobo nagsurat: “An pagkalooy naghihimaya kontra ha paghukom.” (Jakobo 2:13b) Kondi, ha konteksto hi Jakobo nagyayakan diri mahitungod kan Jehova kondi mahitungod han mga Kristiano nga nagpapakita hin kalooy—pananglitan, ha mga tinalumpigos ngan ha mga kablas. (Jakobo 1:27; 2:1-9) Kon ginhuhukman an sugad nga mga maloloy-on, gintatagad ni Jehova an ira panggawi ngan maloloy-on nga pinapasaylo hira tungod han halad han iya Anak. Salit, an ira maloloy-on nga panggawi nagdadaog labaw ha bisan ano nga paghukom nga bangin angay unta ha ira.—Proberbios 14:21; Mateo 5:7; 6:12; 7:2.

Salit, diri husto nga sumiring nga an paghukom ni Jehova ginkukontrol han iya kalooy ha punto nga an iya hustisya nagkikinahanglan nga mapagaan pinaagi han kalooy. Kan Jehova an duha nga kalidad hingpit nga magkatimbang. Tinitimbangan hito an kada usa sugad la nga nagtitimbang ito—ngan tinitimbangan ito—han iba nga mga kalidad ni Jehova, sugad han gugma ngan kinaadman.