Paonan-o Ka Maluluwas ha Kataposan Hini nga Kalibotan?

IGINSASAYSAY han Biblia an kataposan hini nga presente nga sistema han mga butang sugad nga “an adlaw ha kapungot, an adlaw han kasamok ngan kaguol, an adlaw han kabungkagan ngan kalaglagan, an adlaw han kangitngitan ngan han kadulman, an adlaw han mga dampog ngan han madakmol nga kasisidman.” (Sepania 1:15) Sigurado nga diri ini an klase han adlaw nga ha normal nga kahimtang karuyag mo makita! Kondi, ginsagdonan ni apostol Pedro an iya mga igkasi-Kristiano nga “[maghulat ngan magtinguha gud] han pag-abot han adlaw han Dios, nga hito nga adlaw an mga langit nga aada ha kalayo ngan an ngatanan nga mga kasangkapan matutunaw tungod han paso nga [nakakasunog!] Kondi, sumala ha iya saad, naghuhulat kita hin mga bag-o nga langit ngan bag-o nga tuna, diin mag-uukoy an katadongan.”—2 Pedro 3:12, 13.

Diri ginhihisgotan dinhi ni Pedro an kabungkagan han literal nga mga langit ngan tuna. An “mga langit” ngan “tuna” nga gin-unabi ni Pedro hini nga konteksto nagsisimbolo han presente nga maraot nga mga gobyerno han tawo ngan han diri-diosnon nga sosiedad han tawo. ‘An adlaw ni Jehova’ diri magbubungkag han tuna mismo kondi “[maggugunaw] han mga makasasala dida tikang hini.” (Isaias 13:9) Salit para hadton “nanhahayhay ngan nagsisinggit tungod han ngatanan nga kangil-aran” nga ginbubuhat ha maraot nga sosiedad han tawo yana, an adlaw ni Jehova magigin adlaw han kaluwasan.—Esekiel 9:4.

Niyan, paonan-o maluluwas an usa ha “makalilisang nga adlaw ni Jehova”? “An pulong ni Jehova” nga iginpahayag ha usa han iya mga propeta nabaton hito nga mga pakiana: “Mahinanabo, nga bisan hin-o nga magtawag han ngaran ni Jehova maluluwas.” (Joel 1:1; 2:31, 32) An mga Saksi ni Jehova malilipay ha pagbulig ha imo nga mahibaro kon ano an iginpapasabot han pagtawag ha ngaran ni Jehova.