Mga Pakiana Tikang ha mga Magbarasa

May-ada ba negatibo nga epekto ha pagburod kan Jesus an pagkadiri-hingpit han birhen nga babaye nga hi Maria?

May kalabotan ha ‘katawo ni Jesus,’ an giniyahan nga rekord nasiring: “Han sinaaran pa la hi Maria nga iroy niya, hi Jose, ha waray pa hira pagtampo, hin-agian hiya nga nanamkon tungod han [baraan nga espiritu].” (Mateo 1:18) Oo, an baraan nga espiritu han Dios may-ada importante hinduro nga bahin ha pagburod ni Maria.

Kondi, kumusta man hi Maria? May-ada ba bahin an iya binhi ha iya pagburod? Tungod han mga saad han Dios kan Abraham, Isaak, Jakob, Juda, ngan Hadi David—an mga kaapoy-apoyan ni Maria—an bata nga matatawo kinahanglan magin ira totoo nga tulin. (Genesis 22:18; 26:24; 28:10-14; 49:10; 2 Samuel 7:16) May-ada pa ba iba nga paagi nga an bata nga ipapanganak ni Maria magigin an may-katungod nga manurunod hiton nga mga saad han Dios? Hiya sadang magin totoo nga anak ni Maria.—Lukas 3:23-34.

An anghel ni Jehova nagpakita ha birhen nga hi Maria, nasiring: “Ayaw kahadlok Maria; kay nakaagi ka hin grasya ha Dios. Ngan, kitaa, mananamkon ka ngan [manganganak] ka hin usa nga anak, nga imo pagngangaranan kan Jesus.” (Lukas 1:30, 31) An pagburod nagkikinahanglan nga magtubo an usa nga binhi. Matin-aw, ginpahinabo ni Jehova nga Dios nga magtubo an binhi ha taguangkan ni Maria, ginbuhat ini pinaagi han pagbalhina han kinabuhi han iya bugtong nga Anak tikang ha espiritu nga lugar nganhi ha tuna.—Galasia 4:4.

Mahihimo ba nga an usa nga bata nga iginburod hini nga paagi han diri-hingpit nga babaye magin hingpit ngan waray maapektohi han sala ha iya pisikal nga istraktura? Paonan-o nagios an mga balaud han panurundon kon may-ada paghiusa han hingpit ngan han diri-hingpit? Hinumdumi nga gingamit an baraan nga espiritu ha pagbalhin han hingpit nga puwersa han kinabuhi han Anak han Dios ngan ha pagpahinabo han pagburod. Ginpara hini an bisan ano nga pagkadiri hingpit nga nag-eksister ha binhi hi Maria, salit nakahimo hin henetiko nga surubdan nga hingpit tikang ha tinikangan hito.

Ha anoman nga paagi, makakasiguro kita nga an paggios han baraan nga espiritu han Dios hito nga panahon nagsiguro han kalamposan han katuyoan han Dios. Hi anghel Gabriel nagsaysay na kan Maria: “An [baraan nga espiritu] makanhi ha imo, ngan an gahum han Gihitaasi sugad hin landong makakatabon ha imo: tungod hini an baraan nga imo ig-aanak, pagngangaranan hin Anak han Dios.” (Lukas 1:35) Oo, an baraan nga espiritu han Dios nagporma, siring pa, hin nagpapanalipod nga ulang basi waray pagkadiri-hingpit o nakakadaot nga impluwensya an makahugaw han nagtutubo nga bata ha tiyan tikang ha pagburod padayon.

Matin-aw, utang ni Jesus an iya hingpit nga tawhanon nga kinabuhi ha iya langitnon nga Amay, diri ha bisan hin-o nga tawo. Hi Jehova ‘nag-andam hin lawas’ para ha iya, ngan hi Jesus—tikang nga iginburod padayon—totoo nga “waray buring, bulag ha mga magpakasasala.”—Hebreo 7:26; 10:5.

[Retrato ha pahina 19]

“Mananamkon ka ngan manganganak ka hin usa nga anak”