Totoo ba ha Imo nga hi Kristo an Aton Lider?

“Diri man kamo magpatawag nga ‘mga lider,’ kay usa la an iyo Lider, hi Kristo.”—MATEO 23:10, NW.

1. Hin-o la an Lider han totoo nga mga Kristiano?

 MARTES hadto, Nisan 11. Tulo na la ka adlaw, papatayon na hi Jesu-Kristo. Ini an iya kataposan nga pagbisita ha templo. Hini nga adlaw, iginsumat ni Jesus an importante nga katutdoan ha damu nga mga tawo nga nagkatirok didto ngan ha iya mga disipulo. Hiya nagsiring: “Diri kamo pagngaranan nga Rabi, kay usa la an iyo magturutdo: ngan kamo ngatanan magburugto. Ngan waray bisan hin-o nga iyo tawagon nga amay niyo dinhi ha tuna, kay usa la an iyo Amay nga aadto ha langit. Bisan pagtawagon kamo nga mga [lider], kay usa la an iyo [Lider] nga amo hi Kristo.” (Mateo 23:8-10) Matin-aw, hi Jesu-Kristo amo an Lider han totoo nga mga Kristiano.

2, 3. Ano an epekto ha aton mga kinabuhi han pagpamati kan Jehova ngan pagkarawat han Lider nga iya pinili?

² Mapulsanon gud an mga epekto han pagkalider ni Jesus ha aton mga kinabuhi kon kinakarawat naton ito! Ha pagtagna mahitungod han pag-abot hini nga Lider, hi Jehova nga Dios nagpahayag pinaagi kan propeta Isaias: “Hala, an tagsatagsa nga inuuhaw, kadi kamo ha mga tubig, ngan hiya nga waray kwarta; kadi kamo, palit, ngan kumaon; oo, kadi, palit hin alaksiw ngan hin gatas hin waray kwarta ngan waray bali. . . . Pamati ha mainuyatmon ha akon, ngan kumaon kamo hadton maopay, ngan papaghimungayaa an iyo kalag ha pagkamatambok. . . . Kitaa, ako naghatag ha iya sugad nga usa nga saksi ha mga katawohan, usa nga [lider ngan kumander] ha mga katawohan.”—Isaias 55:1-4.

³ Ginamit ni Isaias an ordinaryo nga mga likido—tubig, gatas, ngan alaksiw—sugad nga mga metapora ha pagpakita kon paonan-o naaapektohan an aton kinabuhi kon namamati kita kan Jehova ngan nasunod ha Lider ngan Kumander nga iya iginhatag ha aton. Nakakarepresko an resulta. Pariho ito han pag-inom hin usa ka baso han matugnaw nga tubig ha adlaw nga mapaso. Natatagbaw an aton kauhaw ha kamatuoran ngan pagkamatadong. Sugad nga an gatas nagpapakusog han mga minasus-an ngan nabulig ha ira nga magtubo, ‘an gatas han pulong’ nagpaparig-on ha aton ngan nabulig ha espirituwal nga pagtubo ha aton relasyon ha Dios. (1 Pedro 2:1-3) Ngan hin-o an makakagnigar nga an alaksiw naghahatag hin kalipay durante han mga panagtawo? Ha pariho nga paagi, an pagsingba ha matuod nga Dios ngan pagsunod ha mga pitad han iya pinili nga Lider nakakahimo han kinabuhi nga ‘malipayon gud.’ (Deuteronomio 16:15) Importante, kon sugad, nga kita ngatanan—batan-on ngan lagas, lalaki ngan babaye—magpakita nga totoo ha aton an pagkalider ni Kristo. Kondi, paonan-o naton maipapakita ha aton adlaw-adlaw nga pagkinabuhi nga an Mesias an aton Lider?

Mga Batan-on—Padayon nga ‘Mag-uswag ha Kinaadman’

 4. (a) Ano an nahitabo han an 12-anyos nga hi Jesus binisita ha Jerusalem ha panahon han Paskua? (b) Mationan-o kahilarom an kahibaro ni Jesus han 12-anyos pa la an iya edad?

⁴ Tagda an susbaranan nga ipinakita han aton Lider para ha mga batan-on. Bisan kon gutiay la an hinbabaroan mahitungod han pagkabata ni Jesus, usa nga hitabo an nakakahatag gud hin pagsabot mahitungod ha iya. Han 12 anyos hi Jesus, igin-upod hiya han iya mga ginikanan ha ira tinuig nga pagbisita ha Jerusalem para han Paskua. Hini nga okasyon nahisentro gud hiya ha paghisgot ha Kasuratan, ngan diri-tinuyo nga nabayaan hiya han iya pamilya. Paglabay hin tulo ka adlaw nabilngan hiya han iya nabaraka nga mga ginikanan, hi Jose ngan Maria, didto ha templo, “nga nalingkod ha butnga han mga magturutdo, ngan nagpinamati, ngan nagpipinamakiana ha ira.” Dugang pa, “an ngatanan nga nanmamati, nanhipausa han iya hibaro, ngan han iya mga baton.” Handurawa, han  12-anyos la an edad, diri la nagpapakiana hi Jesus hin nakakaaghat ha paghunahuna, may kalabotan ha espirituwal nga mga pakiana kondi naghahatag liwat hin intelihente nga mga baton! Sigurado, nabuligan hiya han pagbansay han mga ginikanan.—Lukas 2:41-50.

 5. Paonan-o sadang usisahon han mga batan-on an ira pagtagad ha pamilya nga pag-aram ha Biblia?

⁵ Bangin usa ka nga batan-on. Kon an imo mga ginikanan debotado nga mga surugoon han Dios, posible nga may-ada regular nga programa han pamilya nga pag-aram ha Biblia ha iyo balay. Ano an imo pagtagad ha pamilya nga pag-aram? Kay ano nga diri hunahunaon an mga pakiana sugad han: ‘Bug-os-kasingkasing ba nga nasuporta ako ha kahikayan han pag-aram ha Biblia ha akon pamilya? Nakooperar ba ako hito, diri nagbubuhat hin bisan ano ha pag-ulang han eskedyol?’ (Filipos 3:16) ‘Aktibo ba ako nga nakikigbahin ha pag-aram? Kon angayan, nagpapakiana ba ako mahitungod han materyal nga gin-aadman ngan nagkukomento ha aplikasyon hito? Samtang nag-uuswag ako ha espirituwal, ginpapatubo ko ba an pagkaruyag ha “mabaskog nga kakaunon [nga] kanan katigurangan”?’—Hebreo 5:13, 14.

6, 7. Mationan-o kabirilhon ha mga batan-on an programa han adlaw-adlaw nga pagbasa han Biblia?

⁶ Birilhon liwat an adlaw-adlaw nga programa han pagbasa han Biblia. An salmista nagkanta: “Mahimayaon an tawo nga diri naglalakat ha sagdon han mga magraot, . . . kondi ha balaud ni Jehova aada an iya kalipay; Ngan adlaw ug gab-i hiya namamalandong ha iya balaud.” (Salmo 1:1, 2) An sumunod kan Moises, hi Josue, ‘nagbasa ha libro han balaud ha gutiay nga tingog ha adlaw ngan gab-i.’ Nakabulig ini ha iya nga magbuhat hin maaramon ngan magmalampuson ha pagbuhat han iya hatag-han-Dios nga toka. (Josue 1:8) An aton Lider, hi Jesu-Kristo nagsiring: ‘Nahisurat na: Diri la ha tinapay nabubuhi an tawo, kondi ha ngatanan nga pulong nga nagowa ha baba ni Jehova.’ (Mateo 4:4) Kon nagkikinahanglan kita hin pisikal nga pagkaon kada adlaw, labaw pa gud nga nagkikinahanglan kita hin regular nga espirituwal nga pagkaon!

⁷ Tungod kay hinsabtan an iya espirituwal nga panginahanglan, an 13-anyos nga hi Nicole nagtikang magbasa han Biblia kada adlaw. a Yana, ha edad nga 16, nabasa na niya an bug-os nga Biblia hin makausa ngan katunga na para ha ikaduha. Simple an iya paagi. “Ginsisiguro ko gud nga makabasa hin bisan usa la nga kapitulo ha usa ka adlaw,” siring niya. Paonan-o nabulig ha iya an iya adlaw-adlaw nga pagbasa han Biblia? Hiya binaton: “Damu an magraot nga mga impluwensya yana nga panahon. Adlaw-adlaw nga naatubang ako ha mga pag-ipit ha eskwelahan ngan ha iba nga lugar nga nagsasari han akon pagtoo. An pagbasa han Biblia kada adlaw nabulig ha akon nga mahinumdoman dayon an mga sugo ngan mga prinsipyo han Biblia nga nagdadasig ha akon nga atohan ini nga mga pag-ipit. Sugad nga resulta, inaabat ko nga mas duok ako kan Jehova ngan kan Jesus.”

 8. Ano an batasan ni Jesus ha sinagoga, ngan paonan-o masusubad hiya han mga batan-on?

 ⁸ Batasan ni Jesus an pamati ngan pakigbahin ha pagbasa han Kasuratan ha sinagoga. (Lukas 4:16; Buhat 15:21) Mapulsanon gud para ha mga batan-on nga sundon ito nga susbaranan pinaagi han regular nga pagtambong ha Kristiano nga mga katirok, diin ginbabasa ngan gin-aadman an Biblia! Ha pagpahayag hin apresasyon ha sugad nga mga katirok, an 14-anyos nga hi Richard nasiring: “An mga katirok birilhon gud ha akon. Napapahinumdom ako pirme didto kon ano an maopay ngan maraot, kon ano an moral ngan imoral, kon ano an sugad-kan-Kristo ngan kon ano an diri. Diri ko kinahanglan hibaroan ito ha makuri nga paagi—pinaagi han pakaeksperyensya hito.” Oo, ‘masasarigan an pahinumdom ni Jehova, ginhihimo nga makinaadmananon an usa nga waray-eksperyensya.’ (Salmo 19:7) Ginsisiguro liwat ni Nicole nga tumambong ha ngatanan lima nga katirok han kongregasyon kada semana. Nagasto liwat hiya hin duha tubtob tulo ka oras ha pangandam para hito.—Efeso 5:15, 16.

 9. Paonan-o an mga batan-on makakagpadayon ha ‘pag-uswag ha kinaadman’?

⁹ An pagkabatan-on amo an maopay nga panahon ha pagkaada ‘kahibaro mahitungod ha amo la matuod nga Dios, ngan ha usa nga iya sinugo, hi Jesu-Kristo.’ (Juan 17:3) Bangin may kilala ka nga mga batan-on nga nagasto hin daku nga panahon ha pagbinasa hin komiks, pagkinita ha telebisyon, pag-inuyag hin mga video game, o pag-inusisa ha Internet. Kay ano nga subaron mo hira samtang mahimo mo sundon an hingpit nga susbaranan han aton Lider? Sugad nga bata, nalipay hiya ha paghibaro mahitungod kan Jehova. Ngan ano an resulta? Tungod han iya gugma ha espirituwal nga mga butang, “hi Jesus nagtitikauswag ha kinaadman.” (Lukas 2:52) Mahihimo mo liwat ito.

‘Magpasakop ha Usa kag Usa’

10. Ano an mabulig ha kinabuhi han pamilya nga magin surok han kamurayawan ngan kalipayan?

¹⁰ An panimalay mahimo magin lugar han kamurayawan ngan kakontento o magin lugar han araway ngan kasamok. (Proberbios 21:19; 26:21) An aton pagkarawat han pagkalider ni Kristo nabulig ha pagpauswag han kamurayawan ngan kalipayan ha pamilya. An susbaranan ni Jesus, ha pagkamatuod, amo an modelo para ha mga relasyon han pamilya. An Kasuratan nasiring: “Magpasakop kamo an usa kag usa ha kahadlok kan Kristo. Mga asawa nga kababayin-an, magpasakop kamo ha iyo mga asawa [nga kalalakin-an], sugad nga ha Ginoo. Kay an asawa nga lalaki amo an ulo han asawa nga babaye, sugad man nga hi Kristo amo iton ulo han singbahan, kay hiya amo an manluluwas han lawas. . . . Mga asawa nga kalalakin-an, [padayon nga] higugmaa niyo an iyo mga asawa nga kababayin-an, sugad man nga hi Kristo naghigugma ha singbahan ngan igintubyan niya an iya kalugaringon tungod hito.” (Efeso 5:21-25) Ha kongregasyon ha Kolosas, hi apostol Pablo nagsurat: “Mga anak, magmatinumanon kamo ha iyo mga kag-anak ha ngatanan nga bagay, kay amo ini an karuyag han Ginoo.”—Kolosas 3:18-20.

11. Paonan-o maipapakita han bana nga totoo ha iya an pagkalider ni Kristo?

¹¹ An pagsunod hini nga sagdon nangangahulogan nga an bana nangunguna ha pamilya, an iya asawa maunungon nga nasuporta ha iya, ngan an mga anak nasugot ha ira mga ginikanan. Kondi, an pagkaulo han lalaki nagriresulta la hin kalipayan kon gindudumara ito hin husto. An maaramon nga bana kinahanglan mahibaro ha pagpakita han pagkaulo pinaagi han pagsubad ha iya Ulo ngan Lider, hi Kristo Jesus. (1 Korinto 11:3) Bisan kon hi Jesus ha urhi nagin ‘ulo han ngatanan nga mga butang ha kongregasyon,’ hiya kinanhi ha tuna, ‘diri basi pag-alagdon, kondi ha pagmangno.’ (Efeso 1:22; Mateo 20:28) Ha pariho nga paagi, an Kristiano nga bana nagpapakita  han iya pagkaulo, diri para ha hakugnon nga bentaha, kondi ha pagmangno ha mga kaopayan han iya asawa ngan mga anak—oo, han bug-os nga pamilya. (1 Korinto 13:4, 5) Nangangalimbasog hiya ha pagsubad han diosnon nga mga kalidad han iya ulo, hi Jesu-Kristo. Pariho kan Jesus, hiya maaghop ngan mapainubsanon ha kasingkasing. (Mateo 11:28-30) An mga pulong sugad han “Pasayloa ako” o “husto ka” diri makuri para ha iya nga yaknon kon sayop hiya. An iya maopay nga susbaranan nakakahimo nga mas masayon para ha iya asawa nga magin “kabulig,” usa nga ‘komplemento,’ ngan usa nga ‘padis’ ha sugad nga lalaki, nahibabaro tikang ha iya ngan nagbubuhat upod niya.—Genesis 2:20; Malakias 2:14.

12. Ano an mabulig ha asawa nga karawaton an prinsipyo han pagkaulo?

¹² An asawa, ha iya bahin, sadang magpasakop ha iya bana. Kondi, kon apektado hiya han espiritu han kalibotan, bangin magtikang makadaot ini ha iya panhunahuna ha prinsipyo han pagkaulo, ngan an ideya han pagpasakop ha lalaki magigin diri makaruruyag ha iya. Diri iginpapasabot han Kasuratan nga an lalaki sadang magin dominante, kondi nagkikinahanglan ito nga an mga asawa magpasakop ha ira mga bana. (Efeso 5:24) An Biblia nagkikinahanglan liwat ha bana o amay nga magin responsable, ngan kon iaplikar an sagdon hito, nabulig ini ha kamurayawan ngan pagkaurosa ha pamilya.—Filipos 2:5.

13. Ano nga susbaranan han pagpasakop an iginhatag ni Jesus para ha mga anak?

¹³ An mga anak sadang magin masinugtanon ha ira mga ginikanan. Hini nga bahin, hi Jesus nagpakita hin maopay nga susbaranan. Katapos han nahitabo ha templo han an 12-anyos nga hi Jesus nabayaan didto ha sulod hin tulo ka adlaw, “linusad hiya bunyog ha [iya mga ginikanan], ngan dinangat ha Nasaret: ngan nagpasakop hiya ha ira.” (Lukas 2:51) An pagpasakop han mga anak ha ira mga ginikanan nabulig ha pag-uswag han kamurayawan ngan pagkaurosa ha pamilya. Kon an ngatanan ha pamilya nagpapasakop ha pagkalider ni Kristo, malipayon nga pamilya an resulta.

14, 15. Ano an mabulig ha aton nga maglampos kon naatubang ha makuri nga kahimtang ha panimalay? Paghatag hin ehemplo.

¹⁴ Bisan kon nabangon an makuri nga mga kahimtang ha panimalay, an yawi ha kalamposan amo an pagsubad kan Jesus ngan pagkarawat han iya giya. Pananglitan, an pag-asawa han 35-anyos nga hi Jerry kan Lana, nga iroy han tinedyer nga babaye, nakahimo hin problema nga waray nira hunahunaa. Hi Jerry nagsasaysay: “Maaram ako nga basi maglampos sugad nga ulo, kinahanglan iaplikar ko an pariho nga mga prinsipyo han Biblia nga nagmalampuson ha iba nga mga pamilya. Kondi hinbaroan ko dayon nga kinahanglan iaplikar ko ito upod an labaw nga kinaadman ngan pagsabot.” An iya hinsundan nga anak nga babaye naghunahuna ha iya sugad nga ulang ha iya ngan ha iya iroy ngan nasina gud ha iya. Ginkinahanglan ni Jerry an pagsabot basi makita nga ini nga paggios nakaapekto ha ginsiring ngan ginbuhat han daragita. Paonan-o niya gindumara an kahimtang? Hi Jerry binaton: “Nagkauyon kami ni Lana nga hiya anay an magdidisiplina sugad nga ginikanan samtang akon isisentro an akon atensyon ha pagpatubo hin maopay nga relasyon ha akon hinsundan nga anak. Inabot an panahon, ini nga paagi nagdara hin mag-opay nga mga resulta.”

¹⁵ Kon naatubang ha makuri nga mga kahimtang ha panimalay, ginkikinahanglan naton an pagsabot basi hibaroan kon kay ano nga an mga membro han pamilya nagyayakan ngan nagbubuhat ha paagi nga ira ginbubuhat ito. Ginkikinahanglan liwat naton an kinaadman ha husto nga pag-aplikar han mga prinsipyo han Dios. Hi Jesus, pananglitan, matin-aw nga nakasabot kon kay ano nga an babaye nga nag-aantos han pag-agasi hin dugo kinapot ha iya, ngan maaramon ngan mapinairon nga gintrato niya hiya. (Lebitiko 15:25-27; Markos 5:30-34) An kinaadman ngan pagsabot mga kinaiya han aton Lider. (Proberbios 8:12) Malipayon kita kon nagbubuhat kita ha paagi han iya pagbuhat hito.

‘Pamilnga Siyahan an Ginhadian’

16. Ano an sadang magin pinakaimportante ha aton mga kinabuhi, ngan paonan-o ipinakita ini ni Jesus pinaagi han iya susbaranan?

¹⁶ Iginpatin-aw ni Jesus kon ano an pinakaimportante ha mga kinabuhi hadton nakarawat han iya pagkalider. Hiya nagsiring: “Pamilnga niyo siyahan an ginhadian han Dios, ngan an iya [kanan Dios] katadongan.” (Mateo 6:33) Ngan pinaagi han iya susbaranan, ipinakita niya ha aton kon paonan-o bubuhaton ini. Ha kataposan han 40-ka-adlaw nga pagpuasa, pamalandong, ngan pag-ampo katapos han iya bawtismo, inatubang ni Jesus an pagsulay. Igintanyag ni Satanas nga Yawa ha iya an  pagmando ha “ngatanan nga ginhadian han kalibotan.” Handurawa la an magigin kinabuhi unta ni Jesus kon ginkarawat niya an tanyag han Yawa! Kondi, hi Jesus determinado ha pagbuhat han kaburut-on han iya Amay. Hinsabtan liwat niya nga halipot an sugad nga kinabuhi ha kalibotan ni Satanas. Iya iginsalikway dayon an tanyag han Yawa, nasiring: “Nahisurat na: Magsingba ka ha imo Ginoo nga Dios, ngan ha iya la ikaw mag-aalagad.” Waray pag-iha katapos hito, hi Jesus “nagtikang panwali ngan pagsiring: Magbasol kamo, kay an ginhadian han langit tikahirani na.” (Mateo 4:2, 8-10, 17) Ha nahibilin nga bahin han iya kinabuhi ha tuna, hi Kristo usa ka bug-os-panahon nga parasamwak han Ginhadian han Dios.

17. Paonan-o naton maipapakita nga an mga interes han Ginhadian an pinakaimportante ha aton mga kinabuhi?

¹⁷ Sadang subaron naton an aton Lider ngan diri tugotan an kalibotan ni Satanas nga makadani ha aton nga magin siyahan nga tumong ha aton kinabuhi an pagkaada hitaas-an-suweldo nga trabaho ngan karera. (Markos 1:17-21) Magigin kalurongan gud para ha aton nga mahilit-ag ha kalibotanon nga mga tinguha nga nagigin ikaduha na la an mga interes han Ginhadian! Igintapod ni Jesus ha aton an pagsangyaw-han-Ginhadian ngan paghimo-disipulo nga buruhaton. (Mateo 24:14; 28:19, 20) Oo, bangin may-ada kita pamilya o iba nga mga responsabilidad nga ginmamangnoan, kondi diri ba kita nalilipay ha paggamit han mga gab-i ngan mga kataposan han semana ha pagbuhat han aton Kristiano nga responsabilidad ha pagsangyaw ngan pagtutdo? Ngan makapadasig gud nga durante han 2001 nga tuig han pag-alagad, mga 780,000 an nakag-alagad sugad nga bug-os-panahon nga mga ministro, o mga payunir!

18. Ano an nabulig ha aton nga malipay ha ministeryo?

¹⁸ An mga asoy han Mga Ebanghelyo naghuhulagway kan Jesus sugad nga tawo nga damu an buruhaton ngan usa ka tawo nga may mahumok nga mga pagbati. Ha pakakita han espirituwal nga mga panginahanglan hadton mga nakapalibot ha iya, nalooy hiya ha ira ngan kinaburut-on nga nagtanyag ha ira hin bulig. (Markos 6:31-34) Nagigin makalilipay an aton ministeryo kon nakikigbahin kita hito tungod han gugma ha iba ngan sinsero nga hingyap ha pagbulig ha ira. Kondi paonan-o kita magkakaada han sugad nga hingyap? “Han tinedyer pa ako,” siring ni Jayson, “diri gud ako nalilipay ha ministeryo.” Ano an nakabulig ha iya nga mapatubo an gugma para hini nga buruhaton? Hi Jayson binaton: “Ha akon pamilya, an Sabado nga mga aga pirme iginlalain para ha pag-alagad ha kanataran. Maopay ini para ha akon tungod kay han mas nagawas ako ha ministeryo, mas nakita ko an maopay nga nahihimo hito ngan mas malipayon ako hito.” Kita liwat sadang magin regular ngan mauyatom nga makigbahin ha ministeryo.

19. Ano an sadang magin determinasyon naton may kalabotan ha pagkalider ni Kristo?

 ¹⁹ Tinuod nga makarepresko ngan mapulsanon an pagkarawat han pagkalider ni Kristo. Kon ginbubuhat naton ito, an pagkabatan-on nagigin panahon para ha pag-uswag ha kahibaro ngan kinaadman. An kinabuhi han pamilya nagigin surok han kamurayawan ngan kalipayan, ngan an ministeryo usa nga buruhaton nga nagdadara hin kalipayan ngan katagbaw. Salit, magin determinado gud kita ha pagpakita ha aton adlaw-adlaw nga kinabuhi ngan ha mga desisyon nga ginhihimo naton nga an pagkalider ni Kristo totoo ha aton. (Kolosas 3:23, 24) Kondi, hi Jesu-Kristo amo an aton Lider ha usa pa nga bahin—ha Kristiano nga kongregasyon. An masunod nga artikulo maghihisgot kon paonan-o kita magpapahimulos tikang hini nga kahikayan.

[Footnote]

Nahinunumdoman Mo Ba?

• Paonan-o mapulsanon para ha aton an pagsunod ha aton pinili-han-Dios nga Lider?

• Paonan-o maipapakita han mga batan-on nga karuyag nira sundon an pagkalider ni Jesus?

• Ano an epekto han pagkalider ni Kristo ha kinabuhi han pamilya hadton nagpapasakop hito?

• Paonan-o maipapakita han aton ministeryo nga totoo ha aton an pagkalider ni Kristo?

[Mga Pakiana]

[Mga Retrato ha pahina 9]

An pagkabatan-on an maopay nga panahon ha pagkaada kahibaro mahitungod ha Dios ngan han pinili nga Lider naton

[Retrato ha pahina 10]

An pagpasakop ha pagkalider ni Kristo nakakadugang han kalipayan han pamilya

[Mga Retrato ha pahina 12]

Ginbiling siyahan ni Jesus an Ginhadian. Sugad ka ba hito?