Paghingyap han Pagkamatadong Ngan han “Hinumdoman” ni Jehova

16. Ano nga maopay nga susbaranan han debosyon an ipinapakita ni Isaias?

¹⁶ Katapos hini nga kanta han kadaogan, iginpapahayag ni Isaias an kahilarom han iya debosyon ngan an mga balos han pag-alagad ha Dios han pagkamatadong. (Basaha an Isaias 26:7-9.) An propeta naghahatag hin maopay nga susbaranan han ‘paglaom kan Jehova’ ngan han hilarom nga paghingyap han “ngaran” ngan “hinumdoman” ni Jehova. Ano an hinumdoman ni Jehova? An Eksodo 3:15 nasiring: “Hi Jehova . . . amo an akon ngaran ha waray kataposan, ngan amo ini an akon hinumdoman ha ngatanan nga mga katulinan.” Hinigugma gud ni Isaias an ngaran ni Jehova ngan an ngatanan nga ginrirepresentaran hito, upod na an Iya matadong nga mga suruklan ngan mga paagi. Adton nagpapatubo hin pariho nga gugma kan Jehova sigurado han iya bendisyon.—Salmo 5:8; 25:4, 5; 135:13; Hosea 12:5.

17. Ano nga mga pribilehiyo an diri ihahatag ha magraot?

¹⁷ Kondi, diri ngatanan nahigugma kan Jehova ngan ha iya hitaas nga mga suruklan. (Basaha an Isaias 26:10.) An magraot, bisan kon hangyoon pa, matig-a nga nagdudumiri nga mahibaro han pagkamatadong basi makasulod ha ‘tuna han pagkamatinumanon,’ an tuna nga inuukyan han mga surugoon ni Jehova nga matinumanon ha moral ngan ha espirituwal. Salit, an magraot “diri makakakita han pagkaharangdon ni Jehova.” Diri hira mabubuhi ha pagpahimulos han mga bendisyon nga maabot ha katawohan katapos pagbaraanon an ngaran ni Jehova. Bisan ha bag-o nga kalibotan, kon an bug-os nga tuna magin ‘tuna han pagkamatinumanon,’ an iba mapapakyas ha pagbalos ha mahigugmaon-nga-kalooy ni Jehova. An ira mga ngaran diri isusurat ha libro han kinabuhi.—Isaias 65:20; Pahayag 20:12, 15.

18. Ha ano nga paagi ginpili han iba ha panahon ni Isaias nga magin buta, ngan san-o hira pipiriton nga “makita” hi Jehova?

¹⁸ “Jehova, an imo kamot inalsa, kondi diri hira nakita; kondi hira makakakita han imo kainit para ha katawohan, ngan mahimutang ha kaarawdan; oo, an kalayo maglalamoy han imo mga kaaway.” (Isaias 26:11) Ha panahon ni Isaias, an kamot ni Jehova inalsa han ginpanalipdan ni Jehova an iya katawohan pinaagi han pagbuhat kontra han ira mga kaaway. Kondi waray kilalaha ito han kadam-an. Ito nga mga tawo, nga nagpili pa nga magin buta ha espirituwal, ha kataposan pipiriton nga “makita,” o makilala, hi Jehova kon lamuyon na hira han kalayo han iya kadasig. (Sepania 1:18) An Dios ha urhi nagsiring kan Esekiel: “Hira makakakilala nga ako hi Jehova.”—Esekiel 38:23.

‘An Hinigugma ni Jehova Iya Dinidisiplina’

19, 20. Kay ano ngan paonan-o dinidisiplina ni Jehova an iya katawohan, ngan hin-o an nagpahimulos han sugad nga disiplina?

¹⁹ Maaram hi Isaias nga tungod han bendisyon ni Jehova pinahihimulsan han iya mga igkasi-tuminungnong an anoman nga kamurayawan ngan kauswagan. “Jehova, ikaw magbubutang hin kamurayawan para ha amon; kay ikaw liwat nagbuhat han ngatanan nga buruhaton para ha amon.” (Isaias 26:12) Bisan pa hini ngan bisan pa han pagbutang ni Jehova ha atubangan han iya katawohan han higayon nga magin ‘usa nga ginhadian han mga saserdote ngan baraan nga nasud,’ an Juda nagkaada maopay ngan maraot nga kasaysayan. (Eksodo 19:6) Pauroutro nga binalik an iya katawohan ha pagsingba ha palso nga mga dios. Sugad nga resulta, pauroutro nga gindisiplina hira. Kondi, an sugad nga disiplina pamatuod han gugma ni Jehova tungod kay ‘an hinigugma ni Jehova iya dinidisiplina.’—Hebreo 12:6.

²⁰ Agsob nga dinidisiplina ni Jehova an iya katawohan pinaagi han pagtugot ha iba nga mga nasud, “iba nga mga ginoo,” nga magmando ha ira. (Basaha an Isaias 26:13.) Han 607 A.K.P., iya gintugotan an mga Babilonyahanon nga bihagon hira. Nakabulig ba ini ha ira? An pag-antos mismo diri nakakabulig ha usa ka tawo. Kondi, kon an nag-aantos nahibabaro tikang ha nahitatabo, nagbabasol, ngan naghahatag kan Jehova hin esklusibo nga debosyon, niyan hiya nagpapahimulos hito. (Deuteronomio 4:25-31) May-ada ba bisan hin-o ha mga Judio nga nagpapakita ha Dios hin pagbasol? Oo! Hi Isaias matagnaon nga nasiring: “Tungod la ha imo ngangaranan namon an imo ngaran.” Katapos han ira pagbalik tikang ha pagkabihag han 537 A.K.P., an mga Judio agsob nga nagkinahanglan hin disiplina tungod han iba pa nga mga sala, kondi waray na gud hira mabiktima utro ha pagsingba ha mga dios nga bato.

21. Ano an mahitatabo hadton nagtatalumpigos ha katawohan han Dios?

²¹ Kumusta man an mga nagbihag han Juda? “Hira mga patay, diri hira mabangon: busa imo hira dinuaw ngan gin-gunaw, ngan ginhimo nga an ngatanan nga handumanan ha ira mahanaw.” (Isaias 26:14) An Babilonya mag-aantos tungod han kabangis nga iya ginbuhat  ha pinili nga nasud ni Jehova. Pinaagi han mga Medes ngan mga Persiahanon, bubungkagon ni Jehova an mapahitas-on nga Babilonya ngan pagagawson an iya bihag nga katawohan. Iton daku nga siyudad, an Babilonya, hihimoon nga waray-gahum, sugad hin patay. Ha kataposan, hiya diri na maeksister.

22. Ha moderno nga mga panahon, paonan-o ginbibendisyonan an katawohan han Dios?

²² Ha moderno nga katumanan, an nanhibilin han ginlimpyo nga espirituwal nga Israel ginpagawas tikang ha Babilonya nga Daku ngan ginpabalik ha pag-alagad kan Jehova han 1919. Tungod kay nabag-o an kusog, an dinihogan nga mga Kristiano nagin madasigon ha ira pagsangyaw nga buruhaton. (Mateo 24:14) Tungod hito, hi Jehova nagbibendisyon ha ira hin pag-uswag, nagdadara pa ngani hin daku nga panon han ‘iba nga mga karnero’ ha pag-alagad kaupod nira. (Juan 10:16) “Imo gindugangan an nasud, O Jehova, imo gindugangan an nasud; ikaw ginhihimaya; imo ginpadaku an ngatanan nga pag-ultan han tuna. Jehova, ha kasamokan hira dinuaw ha imo; hira nagbubo hin usa nga pag-ampo han nakada ha ira an imo pagbadlong.”—Isaias 26:15, 16.

“Hira Mabangon”

23. (a) Ano nga makatirigamnan nga kapahayagan han gahum ni Jehova an nahitabo han 537 A.K.P.? (b) Ano nga pariho nga kapahayagan an nahitabo han 1919 K.P.?

²³ Nahinumdom hi Isaias han kahimtang nga inatubang han Juda samtang bihag pa ito han Babilonya. Iya iginpariho an nasud ha usa nga babaye nga nagbabati kondi diri makapanganak kon waray bulig. (Basaha an Isaias 26:17, 18.) Ito nga bulig inabot han 537 A.K.P., ngan an katawohan ni Jehova binalik ha ira natawohan nga tuna, disidido nga tukuron-utro an templo ngan ibalik an totoo nga pagsingba. Salit, an nasud sugad hin iginbangon tikang ha mga patay. “An imo mga patay mabubuhi; an akon patay nga kalawasan mabangon. Pagmata ngan pagkanta, kamo nga nag-uukoy ha tapotapo; kay an imo tun-og sugad hin tun-og han mga tanom, ngan an tuna masalikway han mga patay.” (Isaias 26:19) Kapahayagan gud ito han gahum ni Jehova! Dugang pa, nagkaada daku gud nga kapahayagan han natuman ini nga mga pulong ha espirituwal nga paagi han 1919! (Pahayag 11:7-11) Ngan ginpapamulat gud naton an panahon nga ini nga mga pulong literal na nga matuman ha bag-o nga kalibotan ngan adton mga patay ‘makakabati han tingog ni Jesus ngan magawas’ tikang ha handumanan nga mga lubnganan!—Juan 5:28, 29.

24, 25. (a) Paonan-o ginsunod han mga Judio han 539 A.K.P. an sugo ni Jehova nga itago an ira kalugaringon? (b) Ano an bangin iginpapasabot han “mga sulod” ha moderno nga panahon, ngan ano nga pagtagad an kinahanglan patuboon naton ngada hini?

²⁴ Kondi, basi magpahimulos an mga magtinumanon han espirituwal nga mga bendisyon nga iginsaad pinaagi kan Isaias, kinahanglan sundon nira an mga sugo ni Jehova: “Kadi, katawohan ko, sulod ikaw ha imo mga sulod, ngan panadhi an imo mga ganghaan palibot ha imo: tumago ka ha madali nga panahon, ngada nga an kaaligutgot matapos. Kay, kitaa, hi Jehova magawas tikang ha iya lugar ha pagsirot han mga umurukoy ha tuna tungod han karat-an: an tuna liwat magpapakita han iya dugo, ngan diri na magtatabon han iya mga patay.” (Isaias 26:20, 21; itanding an Sepania 1:14.) Ini nga mga bersikulo bangin nagkaada siyahan nga katumanan han an mga Medes ngan an mga Persiahanon, nga pinangunahan ni Hadi Ciro, nagsakop han Babilonya han 539 A.K.P. Sumala ha Griego nga historyador nga hi Xenophon, han sinulod ni Ciro ha Babilonya, ginsugo niya an ngatanan nga diri gumawas ha ira mga balay tungod kay an iya nangangabayo nga kasundalohan “ginsugo nga pamatayon an ngatanan nga mabilngan nira ha gawas han mga purtahan.” Yana nga panahon, an “mga sulod” hini nga tagna duok nga maikakaw-ing ha napuplo ka yukot nga mga kongregasyon han katawohan ni Jehova ha bug-os nga kalibotan. An sugad nga mga kongregasyon padayon nga magkakaada importante nga bahin ha aton mga kinabuhi, bisan lahos pa ha “daku nga kagol-anan.” (Pahayag 7:14) Importante gud nga tipigan naton an maopay nga pagtagad ha kongregasyon ngan regular nga makig-upod hito!—Hebreo 10:24, 25.

²⁵ Diri na mag-iiha, maabot an kataposan han kalibotan ni Satanas. Kon paonan-o pananalipdan ni Jehova an iya katawohan durante hiton makalilisang nga panahon, diri pa kita maaram. (Sepania 2:3) Kondi, maaram kita nga an aton kaluwasan madepende ha aton pagtoo kan Jehova ngan ha aton pagkamaunungon ngan pagsugot ha iya.

26. Ano an “Lebiatan” ha panahon ni Isaias ngan ha aton panahon, ngan ano an mahitatabo hinin ‘daku nga hayop ha dagat’?

²⁶ Samtang ginpapamulat ito nga panahon, hi Isaias nagtatagna: “Hadto nga adlaw hi Jehova pinaagi han iya matig-a ngan daku ngan makusog nga kampilan magsisirot han lebiatan an malaksi nga halas, ngan kan lebiatan an nagbabarobaliko nga halas; ngan iya papatayon an [daku nga hayop] nga aada ha dagat.” (Isaias 27:1) Ha siyahan nga katumanan, an “Lebiatan” nagtutudlok ha mga nasud nga dida hito nagsarang an Israel, sugad han Babilonya, Ehipto, ngan Asirya. Ini nga mga nasud diri makakapugong han pagbalik han katawohan ni Jehova ngadto ha ira natawohan nga tuna ha husto nga panahon. Kondi, hin-o an moderno nga Lebiatan? Amo hi Satanas—“an daan nga halas”—ngan an iya maraot nga sistema han mga butang dinhi ha tuna, an iya instrumento ha pakig-away kontra han espirituwal nga Israel. (Pahayag 12:9, 10; 13:14, 16, 17; 18:24) Waray na makapugong an “Lebiatan” ha katawohan han Dios han 1919, ngan hirani na gud hiya mawara kon ‘patayon na ni Jehova an daku nga hayop ha dagat.’ Samtang yana, waray bisan ano nga bangin himoon ni “Lebiatan” kontra  han katawohan ni Jehova nga totoo nga maglalampos.—Isaias 54:17.

‘An Urubasan han Alaksiw nga Nagbubura’

27, 28. (a) Ginpuno han urubasan ni Jehova an bug-os nga tuna hin ano? (b) Paonan-o ginpapanalipdan ni Jehova an iya urubasan?

²⁷ Pinaagi han usa pa nga kanta, igin-iilustrar hin maopay ni Isaias yana an pagkamabungahon han ginpagawas nga katawohan ni Jehova: “Hadto nga adlaw: An usa nga urubasan han alaksiw [nga nagbubura], pagkanta kamo ngada hini. Ako hi Jehova amo an magbarantay hini; akon ini babaribihan ha tagsatagsa ka dali: bangin may bisan hin-o nga magdaot hini, akon ini babantayan ha gab-i ngan ha adlaw.” (Isaias 27:2, 3) An nanhibilin han espirituwal nga Israel ngan an ira mauyatom nga mga kaupod nagpuno gud han bug-os nga tuna hin espirituwal nga bunga. Hinungdan gud ini han selebrasyon—han pagkanta! An ngatanan nga kadayawan ngadto kan Jehova, an usa nga mahigugmaon nga nag-aataman han iya urubasan.—Itanding an Juan 15:1-8.

²⁸ Tinuod, an kasina ni Jehova hadto sinaliwnan hin kalipay! “An kapungot waray dinhi ha akon: Pumatok pa unta an kabaknitan ngan an katunokan ha akon dida ha away! Ako magmamartsa ngada ha ira, susunugon ko hira ngatanan. O kon diri man pagunita hiya han akon kusog, nga hiya makigdait ha akon; oo, makigdait hiya ha akon.” (Isaias 27:4, 5) Basi masiguro nga an iya mga ubas magpapadayon ha paghatag hin damu nga ‘alaksiw nga nagbubura,’ ginbubungkag ngan ginsusunog ni Jehova an bisan ano nga sugad-banwa nga impluwensya nga makakadaot ha iya urubasan. Salit, hinaot waray bisan hin-o nga magbutang ha peligro han kaopayan han Kristiano nga kongregasyon! Lugod, hinaot an ngatanan ‘kumapot ha panalipdanan ni Jehova,’ naghihingyap han iya pag-uyon ngan panalipod. Ha pagbuhat hito, nakikigmurayaw hira ha Dios—butang nga importante hinduro salit makaduha nga gin-unabi ito ni Isaias. Ano an resulta? “Ha mga adlaw nga umarabot hi Jakob magamot; an Israel mabukad ngan mabiyoos; ngan ira pupun-on an nawong han kalibotan hin bunga.” (Isaias 27:6) Urusahon gud nga pamatuod han gahum ni Jehova an katumanan hini nga bersikulo! Tikang han 1919, ginpuno han dinihogan nga mga Kristiano an tuna hin “bunga,” han masustansya nga espirituwal nga pagkaon. Sugad nga resulta, inupdan hira han minilyon han maunungon nga iba nga mga karnero, nga kaupod nira ‘naghahatag ha Dios hin baraan nga pag-alagad ha adlaw ngan gab-i.’ (Pahayag 7:15) Ha butnga han maraot nga kalibotan, malipayon nga gintitipigan nira an iya hitaas nga mga suruklan. Ngan hi Jehova padayon nga nagbibendisyon ha ira hin pag-uswag. Hinaot diri gud naton hingalimtan an daku nga pribilehiyo nga kumuha han “bunga” ngan ipaangbit ito ha iba pinaagi han aton kalugaringon nga pagsinggit hin pagdayaw!

[Mga Pakiana]