Magpabilin nga Nagmamata, Magpadayon nga Maisugon!

Report Mahitungod han Espesyal nga mga Katirok

HIN-O an husto nga makakagnigar nga nagkikinabuhi kita ha ‘magpakalilisang nga mga panahon nga makuri pakibagayan’? Sugad nga mga Saksi ni Jehova, apektado kita han mga pag-ipit han pagkinabuhi ha “kataposan nga mga adlaw.” (2 Timoteo 3:1-5) Kondi maaram kita nga an mga tawo nagkikinahanglan hin bulig. Diri nira hinsasabtan an kahulogan han mga hitabo ha kalibotan. Nagkikinahanglan hira hin pagliaw ngan paglaom. Ano an aton importante nga bahin ha pagbulig ha aton mga igkasi-tawo?

May-ada kita hatag-han-Dios nga sugo nga ipasamwak an maopay nga sumat mahitungod han natukod nga Ginhadian han Dios. (Mateo 24:14) Kinahanglan hibaroan han mga tawo nga inin langitnon nga Ginhadian amo la an paglaom han katawohan. Kondi, diri pirme positibo an pagkarawat ha aton mensahe. Ha iba nga mga lugar igindidiri an aton buruhaton ngan gintitimaraot an aton kabugtoan. Ha gihapon, diri kita naundang. Pinaagi han bug-os nga pagsarig kan Jehova, determinado kita nga magpabilin nga nagmamata ngan magpadayon nga maisugon, nga iginpapasamwak an maopay nga sumat nga diri naundang.—Buhat 5:42.

Iton marig-on nga determinasyon nakita ha espesyal nga mga katirok nga nahitabo han Oktubre 2001. Han Sabado, Oktubre 6, an tinuig nga katirok han Watch Tower Bible and Tract Society of Pennsylvania gindumara ha Jersey City, New Jersey, Assembly Hall of Jehovah’s Witnesses ha Estados Unidos. a Kinabuwasan, an dugang nga mga katirok gindumara ha upat nga lugar, tulo ha Estados Unidos ngan usa ha Canada. b

Ha iya siyahan nga pamulong ha tinuig nga katirok, an tsirman, hi Samuel F. Herd, nga membro han Nagmamando nga Lawas han mga Saksi ni Jehova, nag-unabi han Salmo 92:1, 4 ngan katapos nagsiring: “Karuyag naton ipakita nga mapasalamaton kita.” Oo, iginhatag an mga hinungdan ha pagin mapasalamaton ha lima nga report tikang ha bug-os nga kalibotan.

Mga Report Tikang ha Bisan Diin

Hi Bugto Alfred Kwakye nagreport han pag-uswag han pagsangyaw nga buruhaton ha Ghana, nga kilala hadto sugad nga Gold Coast. An aton buruhaton dida hito nga nasud igindiri ha sulod hin damu nga mga tuig. Nagpapakiana an mga tawo: “Kay ano nga igindidiri? Ano an iyo ginbuhat?” Nag-abri ini hin mga higayon ha pagsangyaw, nagsaysay hi Bugto Kwakye. Han 1991 han ginkuha an pagdiri, may-ada  34,421 nga mga Saksi ni Jehova ha Ghana. Han Agosto 2001, may-ada kabug-osan nga kadamu nga 68,152—98 porsyento nga pag-uswag. Nagpapadayon an mga plano ha pagtukod hin Assembly Hall nga 10,000 an makakalingkod. Matin-aw, ginpapahimulsan gud han aton espirituwal nga kabugtoan ha Ghana an ira kagawasan ha relihiyon.

Bisan pa han kasamok ha politika, an aton kabugtoan ha Ireland aktibo nga nakikigbahin ha ministeryo, ngan gintatahod hira tungod han ira pagin neutral. An Ireland may-ada 115 nga kongregasyon ha 6 nga sirkito, siring han nagdudumara han Komite han Sanga nga hi Peter Andrews. Hi Bugto Andrews nagsumat hin eksperyensya mahitungod kan Liam, usa nga dyes-anyos nga bata nga lalaki nga maisugon ha pagsangyaw ha eskwelahan. Nakapahamutang hi Liam ha 25 han iya mga kaklase ngan ha iya maestra hin My Book of Bible Stories, nga iginpublikar han mga Saksi ni Jehova. Karuyag ni Liam mabawtismohan, kondi may nagpakiana kon bata pa ba hiya hinduro. Binaton hi Liam: “Diri an akon edad kondi an akon gugma kan Jehova an sadang magin basihan. An akon bawtismo magpapakita kon ano kadaku an akon gugma ha iya.” Tumong ni Liam nga magin misyonero.

Han 1968 may-ada 5,400 nga magwarali han maopay nga sumat ha Venezuela. Kondi may-ada na yana sobra 88,000, nagsiring hi Stefan Johansson, an nagdudumara han Komite han Sanga. Ngan posible nga mag-uswag pa tungod kay sobra 296,000 an tinambong ha Memoryal han 2001. Han Disyembre 1999, an duro nga uran nagin hinungdan han pagrumpag han lapok nga nagin hinungdan han kamatay han ginbanabana nga 50,000 ka tawo, upod na an pipira nga mga Saksi. Usa nga Kingdom Hall an napuno hin lapok nga haros umabot ha kisame. Han may nagsuhestyon nga sadang bayaan an tinukod, an kabugtoan binaton: “Diri mahihimo! Ini an amon Kingdom Hall, ngan diri namon karuyag nga bayaan ito yana.” Nagtikang hira magtrabaho, ginkuha an toni-tonilada nga lapok, mga bato, ngan iba pa nga mga nahibilin. Gin-ayad an Kingdom Hall, ngan an kabugtoan nasiring nga mas maopay ito pagkit-on yana kay han hadto antes an kalamidad!

May-ada 87 nga yinaknan ngan dialekto ha Pilipinas, siring ni Bugto Denton Hopkinson, an nagdudumara han Komite han Sanga. Durante han naglabay nga tuig han pag-alagad, iginpagowa an bug-os nga New World Translation of the Holy Scriptures ha tulo nga nangunguna nga yinaknan han nasud—Cebuano, Iloko, ngan Tagalog. Iginsumat ni Bugto Hopkinson an eksperyensya han usa nga noybe-anyos nga bata nga lalaki nga nakabasa han libro nga Maopay nga Sumat—Nga Magpapalipay ha Imo, nga iginpublikar han mga Saksi ni Jehova. Kinuha hiya hin iba nga mga publikasyon tikang ha sanga nga opisina, nga iya ginbasa liwat, kondi kinontra ha iya an iya pamilya. Paglabay hin mga tuig, han naeskwela na hiya hin pagka-doktor, nakigkomunikar hiya ha sanga nga opisina ngan naghangyo hin pag-aram ha Biblia. Nabawtismohan hiya han 1996 ngan waray pag-iha sinulod ha bug-os-panahon nga ministeryo. Yana nag-aalagad hiya kaupod han iya asawa ha sanga nga opisina.

‘An Puerto Rico “nagpapadara hin mga Saksi ha iba nga lugar,” ’ nagsaysay an nagdudumara han Komite han Sanga nga hi Ronald Parkin. May-ada mga 25,000 nga magwarali ha isla, ngan an kadamu waray magbag-o ha sulod hin mga tuig na. Kay ano? Bueno, ginbabanabana nga an Puerto Rico “nagpapadara” hin mga 1,000 nga magwarali kada tuig ngadto ha Estados Unidos, nga damu ha ira an nabalhin tungod han pinansyal nga mga hinungdan. Hi Bugto Parkin nagsumat mahitungod han usa ka makatirigamnan nga desisyon han korte nga naghidabi kan Luis, usa ka 17-anyos nga Saksi nga may-ada leukemia. Tungod kay nagdumiri ha pagkarawat hin dugo hi Luis, an iya kaso gindara ha korte. Karuyag han huwesa nga personal nga makaistorya hiya, salit binisita hiya kan Luis ha ospital. Nagpakiana hi Luis ha iya: “Kay ano nga kon ako makabuhat hin seryoso nga krimen, huhukman mo ako sugad nga adulto, kondi kon karuyag ko sundon an Dios, gintatrato mo ako sugad nga minor de edad?” An huwesa nakombinse nga hamtong hiya nga minor de edad ngan nakakadesisyon para ha iya kalugaringon.

Katapos han mga report tikang ha hirayo nga mga nasud, hi Harold Corkern, han Komite han Sanga ha E.U., nag-interbyu hin upat ka maiha na nga mga surugoon ni Jehova. Hi Arthur Bonno naggasto hin 51 ka tuig na ha bug-os-panahon nga pag-alagad ngan yana nag-aalagad ha Komite han Sanga ha Ecuador. Hi Angelo Catanzaro naggasto hin 59 ka tuig na ha bug-os-panahon nga pag-alagad, an kadak-an hito sugad nga nagbibiyahe nga paramangno. Hi Richard Abrahamson naggradwar ha Eskwelahan han Gilead han 1953, ngan nakapribilehiyo hiya ha pagmangno han buruhaton ha Denmark ha sulod hin 26 ka tuig antes bumalik ha Bethel ha Brooklyn. Ha kataposan, nalipay an ngatanan ha pamati ha 96-anyos nga hi Carey W. Barber.  Nabawtismohan han 1921, hi Bugto Barber naggasto hin 78 ka tuig na ha bug-os-panahon nga ministeryo ngan usa hiya nga membro han Nagmamando nga Lawas tikang pa han 1978.

Makapabantad nga mga Pahayag

An tinuig nga katirok nag-uupod han mga serye han nakakaaghat ha paghunahuna nga mga pahayag. Hi Bugto Robert W. Wallen nagpahayag ha tema nga “An Katawohan Para ha Iya Ngaran.” Kita an katawohan para ha ngaran han Dios, ngan mabibilngan kita ha sobra 230 nga nasud. Hi Jehova naghahatag ha aton hin ‘kabubuwason ngan paglaom.’ (Jeremias 29:11) Kinahanglan magpadayon kita ha pagpasamwak han Ginhadian han Dios, iginsusumat an urusahon nga mensahe han kaliawan ngan kalipay. (Isaias 61:1) “Hinaot magpadayon kita kada adlaw,” nagtapos hi Bugto Wallen, “ha pagkinabuhi uyon ha ngaran nga tungod hito, gintatawag kita nga mga Saksi ni Jehova.”—Isaias 43:10.

An kataposan nga bahin han programa amo an simposyum han tulo nga membro han Nagmamando nga Lawas. May-ada tema ito nga “Yana an Panahon nga Magpabilin nga Nagmamata, Magmarig-on, Ngan Magmakusog.”—1 Korinto 16:13.

Siyahan, hi Bugto Stephen Lett nagpahayag ha tema nga “Magpabilin nga Nagmamata Dida Hinin Kataposan nga Oras.” An pisikal nga pagkaturog usa nga regalo, siring ni Bugto Lett. Nagpapakusog-utro ito ha aton. Kondi, an espirituwal nga pagkaturog diri gud mapulsanon. (1 Tesalonika 5:6) Paonan-o, kon sugad, makakapabilin kita nga nagmamata ha espirituwal? Gin-unabi ni Bugto Lett an tulo nga espirituwal nga “tambal”: (1) Magkaada hin damu nga ginbubuhat ha buruhaton han Ginoo. (1 Korinto 15:58) (2) Magin mahunahunaon ha imo espirituwal nga panginahanglan. (Mateo 5:3) (3) Magin makinarawaton han basado ha Biblia nga sagdon basi gumios nga maaramon.—Proberbios 13:20.

Hi Bugto Theodore Jaracz nagpahayag hin makapabantad nga may tema nga “Magmarig-on Ilarom han Pagsari.” Ha pag-unabi han Pahayag 3:10, hi Bugto Jaracz nagpakiana: “Ano an ‘oras han pagsari’?” Ito nga pagsari naabot ha “adlaw han Ginoo,” ha panahon diin kita nabubuhi yana. (Pahayag 1:10) An pagsari amo an may kalabotan ha importante nga isyu—kita ba nadapig ha natukod nga Ginhadian han Dios o ha maraot nga sistema han mga butang ni Satanas? Tubtob nga matapos na ito nga oras han pagsari, sigurado nga maatubang kita hin mga pagsari o mga kakurian. Magpapabilin ba kita nga maunungon kan Jehova ngan ha iya organisasyon? ‘Kinahanglan ipakita naton ito nga pagkamaunungon sugad nga mga indibiduwal,’ siring ni Bugto Jaracz.

Ha kataposan, hi Bugto John E. Barr nagpahayag ha tema nga “Magmakusog Sugad nga Espirituwal nga Tawo.” Ha pag-unabi han Lukas 13:23-25, nagsiring hiya nga kinahanglan mangalimbasog kita ha “pagsulod ha haligotay nga ganghaan.” Damu an napapakyas tungod kay diri gud hira nangangalimbasog nga magin makusog. Basi magin hamtong nga mga Kristiano, kinahanglan mahibaro kita ha pag-aplikar han mga prinsipyo ha Biblia ha ngatanan nga bahin han kinabuhi. Hi Bugto Barr nagsagda: “Sigurado ako nga mauyon kamo nga yana an panahon nga (1) unahon hi Jehova; (2) magmakusog; ngan (3) mangalimbasog kita ha pagbuhat han kaburut-on ni Jehova. Hini nga paagi makakasulod kita ha haligot nga ganghaan nga nagtutugway ngadto ha urusahon nga kinabuhi nga waray kataposan.”

Samtang nagtikatarapos na an tinuig nga katirok, may-ada usa nga pakiana nga waray pa batona: Ano an tinuig nga teksto para ha 2002 nga tuig han pag-alagad? Ito nga pakiana ginbaton kinabuwasan.

Dugang nga Katirok

Duro gud an pagpamulat han Domingo nga aga samtang nagtitikang an programa para han dugang nga katirok. Nagtikang ito pinaagi han sumaryo han aradman ha Barantayan han semana, nga sinundan han halipot nga presentasyon han pipira han importante nga mga punto han tinuig nga katirok. Sunod, nalipay an ngatanan ha pamati han usa nga pahayag mahitungod han tinuig nga teksto para ha 2002: “Kadi, . . . ngan akon kamo tatagan hin pagpahuway.” (Mateo 11:28) An pahayag iginbasar ha aradman nga mga artikulo nga iginpublikar ha urhi ha Disyembre 15, 2001 nga gowa han An Barantayan.

Katapos hito, an iba nga nagin mga delegado ha espesyal nga “Mga Magturutdo han Pulong han Dios” nga mga Kombensyon ha Fransia ngan Italya han Agosto 2001 nagsumat han ira mga impresyon. c Ha kataposan, sugad nga pinakaimportante nga bahin han programa hito nga adlaw, duha nga pangataposan nga bahin an iginpahayag han bisita  nga mga mamumulong nga tikang ha Bethel ha Brooklyn.

An siyahan may tema nga “Maisugon nga Nasarig kan Jehova Durante Hinin Makalilisang nga mga Panahon.” Iginsaysay han mamumulong an masunod nga nangunguna nga mga punto: (1) An maisugon nga pagsarig kan Jehova amo pirme an importante para ha katawohan han Dios. An Biblia nagsusulod hin damu nga mga ehemplo hadton nagpakita hin kaisog ngan pagtoo ha atubangan han pagkontra. (Hebreo 11:1–12:3) (2) Hi Jehova nagtatagana ha aton hin maopay nga basihanan basi sumarig kita ha iya hin bug-os. An iya mga buhat ngan an iya Pulong naggagarantiya nga napaid hiya ha iya mga surugoon ngan diri gud niya hira hingangalimtan. (Hebreo 6:10) (3) Labi nga ginkikinahanglan yana an kaisog ngan pagsarig. ‘Gindudumtan’ kita, sugad han igintagna ni Jesus. (Mateo 24:9) Basi makailob, kinahanglan sumarig kita ha Pulong han Dios, tumapod nga an iya espiritu kaupod naton, ngan magin maisugon ha pagpadayon ha pagpasamwak han maopay nga sumat. (4) Ipinapakita han mga panhitabo nga naatubang kita yana hin pagkontra. Nabantad gud an ngatanan han igsumat han mamumulong an gin-aantos han aton kabugtoan ha Armenia, Fransia, Georgia, Kazakhstan, Russia, ngan Turkmenistan. Oo, yana an panahon ha pagpakita hin kaisog ngan pagsarig kan Jehova!

Iginsaysay han kataposan nga mamumulong an tema nga “Urosa nga Nagios Tipaunhan Upod han Organisasyon ni Jehova.” An pahayag naghisgot hin damu nga napapanahon nga mga impormasyon. (1) Kaylap nga naoobserbahan an padayon nga pag-uswag han katawohan ni Jehova. An aton pagsangyaw nga buruhaton ngan an aton mga kombensyon nakakadani han atensyon han publiko. (2) Hi Jehova nagtukod hin organisasyon nga nagkakaurosa. Han 29 K.P., hi Jesus gindihogan han baraan nga espiritu basi iya pagdad-on an ‘ngatanan nga mga butang’—adton may-ada langitnon nga paglaom sugad man adton may-ada tunan-on nga paglaom—ngada ha nagkakaurosa nga pamilya han Dios. (Efeso 1:8-10) (3) An mga kombensyon usa nga makatirigamnan nga pagpakita han pagkaurosa han magkalainlain nga mga nasud. Matin-aw nga naobserbahan ini ha espesyal nga mga kombensyon nga gindumara ha Fransia ngan Italya han naglabay nga Agosto. (4) An makapabantad nga resolusyon ginhimo ha Fransia ngan Italya. Iginsumat han mamumulong an pipira nga mga bahin han makapabantad nga resolusyon. An kabug-osan han resolusyon makikita ha ubos.

Ha konklusyon han kataposan nga pahayag, binasa han bisita nga mamumulong an makapabantad nga pahibaro nga igin-andam han Nagmamando nga Lawas. Ha bahin, nasiring ito: “Yana an panahon nga magpabilin nga nagmamata ngan nagbabantay, ginhuhunahuna hin maopay kon paonan-o nag-uuswag an mga panhitabo ha kalibotan. . . . Karuyag namon ipaabot ha iyo an mahigugmaon nga pagtagad han Nagmamando nga Lawas ha iyo ngan ha ngatanan nga katawohan han Dios. Hinaot hura nga bendisyonan niya kamo ha iyo bug-os-kalag nga pagbuhat han iya kaburut-on.” An katawohan ni Jehova ha bisan diin determinado nga magpabilin nga nagmamata durante hinin makalilisang nga mga panahon ngan disidido magpadayon nga maisugon upod han nagkakaurosa nga organisasyon ni Jehova.

[Mga footnote]

[Kahon/Mga Retrato ha pahina 29-31]

Resolusyon

Han Agosto 2001, an espesyal nga “Mga Magturutdo han Pulong han Dios” nga mga Kombensyon gindumara ha Fransia ngan Italya. Hito nga mga kombensyon, iginpresenta an makapabantad nga resolusyon. An masunod amo an mga pulong hito nga resolusyon.

“SUGAD nga mga Saksi ni Jehova, kita ngatanan nga nagkatirok dinhi hini nga ‘Mga Magturutdo han Pulong han Dios’ nga Kombensyon gintututdoan pinaagi han katutdoan nga mapulsanon hinduro. An surok hini nga katutdoan matin-aw nga nakilala na. An katutdoan diri tikang ha tawo. Tikang ito ha Usa nga iginsaysay ni propeta Isaias ha naglabay sugad nga an aton ‘Gihitaasi nga Instruktor.’ (Isaias 30:20) Tigamni an pahinumdom ni Jehova sugad han ginsiring ha Isaias 48:17: ‘Ako, hi Jehova, nga imo Dios, an Usa nga nagtututdo ha imo basi magpahimulos ka, an Usa nga nagtutugway ha  imo ha dalan nga sadang mo paglaktan.’ Paonan-o niya ginbubuhat ini? Siyahan pinaagi han pinakakaylap nga naihubad ngan pinakadamu nga naipanaltag nga libro ha kalibotan, an Biblia, diin ginsusumatan kita ha matin-aw nga mga pulong: ‘An ngatanan nga Kasuratan giniyahan han Dios ngan mapulsanon.’—2 Timoteo 3:16.

“Yana, an katawohan nagkikinahanglan gud han sugad kamapulsanon nga katutdoan. Kay ano nga masisiring ini? Ha pagtagad han nagbabag-o, nakakagupong nga kahimtang hini nga kalibotan, ano an nasasantop han masinabuton nga mga tawo? Ini: Bisan kon minilyon an gintututdoan han mga sistema han edukasyon han kalibotan, may-ada daku nga kakulangan hin totoo nga mga prinsipyo ngan kapakyasan ha pagkilala han husto ngan sayop. (Isaias 5:20, 21) Kaylap an kawaray kahibaro ha Biblia ngan ha mga sulod hito. Bisan kon an teknolohiya nakakapahinabo nga mapahimulsan an damu nga suplay han impormasyon pinaagi han paggamit hin mga kompyuter, hain an mga baton ha importante nga mga pakiana sugad han, Ano an katuyoan han kinabuhi? Paonan-o naton sasabuton an mga hitabo ha aton panahon? May-ada ba marig-on nga paglaom para ha tidaraon? Matutuman ba an kamurayawan ngan kasigurohan? Dugang pa, ha mga estante ha librarya mabibilngan an damu nga mga tomo han mga reperensya nga naghihisgot han haros ngatanan nga kanataran han pangalimbasog han tawo. Ha gihapon, gin-uutro han katawohan an mga sayop ha naglabay. Nag-uuswag an krimen. Nabalik an mga sakit nga ginhunahuna hadto nga nawara na, samtang an iba, sugad han AIDS, nakakaalarma an pagsarang. An pamilya nabubungkag ha urusahon nga kadagmit. Gindadaot han polusyon an palibot. An terorismo ngan mga armas para ha pamatay hin damu nga mga tawo nagtatarhog han kamurayawan ngan kasigurohan. An diri masulbad nga mga problema padayon nga nagdadamu. Ano an aton angayan nga bahin ha pagbulig ha aton igkasi-tawo hinin makuri nga mga panahon? May-ada ba katutdoan nga nagsasaysay han hinungdan han kahimtang han katawohan ngan diri la nagpapakita han dalan ngadto ha mas maopay nga kinabuhi yana kondi nagtatagana liwat hin maopay, sigurado nga paglaom ha tidaraon?

“An Kasuratanhon nga sugo ha aton amo an ‘paglakat ngan paghimo hin mga disipulo ha mga tawo ha ngatanan nga mga nasud, gintututdoan hira ha pagbuhat han ngatanan nga mga butang nga iginsugo ni Kristo.’ (Mateo 28:19, 20) Iginsugo ini ni Jesu-Kristo katapos han iya kamatay ngan kabanhaw, han pagkarawat niya han bug-os nga awtoridad ha langit ngan ha tuna. Nalabaw ito ha ngatanan nga buruhaton nga igin-aaghat han mga tawo. Ha panhunahuna han Dios, an sugo ha aton, nga nakasentro ha espirituwal nga mga panginahanglan hadton nagugutom ha katadongan, amo an pinakaimportante. May-ada kita maopay nga Kasuratanhon nga mga hinungdan nga buhaton hin seryoso ito nga sugo.

“Nagkikinahanglan ini nga unahon naton pirme an sugad nga buruhaton ha aton kinabuhi. Pinaagi han bendisyon ngan bulig han Dios, matatapos an buruhaton, bisan pa han damu nga nakakaulang nga mga impluwensya, mga problema, ngan mga nakontra tikang ha relihiyoso ngan politikal nga mga grupo, nga gindisenyo basi ulangan an pag-uswag hini nga programa ha pagtutdo ha bug-os nga kalibotan. Nasarig kita ngan natoo nga padayon nga mag-uuswag ini nga buruhaton ngan maabot ha daku nga katumanan hito. Kay ano nga makakasiguro gud kita? Tungod kay an Ginoo nga hi Jesu-Kristo nagsaad nga hiya kaupod naton ha aton hatag-han-Dios nga ministeryo tubtob ha kataposan hini nga sistema han mga butang.

“Hirani na ha kataposan an nanluluya nga katawohan. An sugo ha aton yana kinahanglan matuman antes umabot an ultimo nga kataposan. Salit, kita, sugad nga mga Saksi ni Jehova, determinado nga:

“Siyahan: Sugad nga dedikado nga mga ministro, determinado kita nga pirme unahon an mga interes han Ginhadian ha aton kinabuhi ngan padayon nga mag-uswag ha espirituwal. Basi matuman ito, an aton pag-ampo nauyon ha mga pulong han Salmo 143:10: ‘Tutdui ako ha pagbuhat han imo kaburut-on, kay ikaw an akon Dios.’ Nagkikinahanglan ini han pagin maduruto nga mga estudyante, nangangalimbasog ha pagbasa han Biblia kada adlaw, nagbubuhat hin personal nga pag-aram ngan pagsaliksik. Basi makita han ngatanan nga tawo an aton pag-uswag, hihimoon naton an ngatanan makatadunganon nga pangalimbasog ha pangandam ngan pagpahimulos hin bug-os tikang ha teokratiko nga edukasyon nga iginhahatag ha mga katirok han kongregasyon, ha mga asembleya ha sirkito, ngan ha distrito, ha nasyonal, ngan ha internasyonal nga mga kombensyon.—1 Timoteo 4:15; Hebreo 10:23-25.

  “Ikaduha: Basi matutdoan han Dios, makaon kita dida la ha iya lamesa ngan masunod hin maopay ha pahamangno han Biblia mahitungod han nakakalimbong nga mga katutdoan han mga demonyo. (1 Korinto 10:21; 1 Timoteo 4:1) Labi nga magbabantay kita basi malikyan an nakakadaot nga mga elemento, upod na an mga buwa nga iginpapasamwak han relihiyon, waray-pulos nga mga pangatadongan, makaarawod nga sayop nga mga buhat ha sekso, nakakadaot nga pagkaylap han pornograpiya, malaw-ay nga kaliawan, ngan ngatanan nga diri ‘uyon ha maopay nga katutdoan.’ (Roma 1:26, 27; 1 Korinto 3:20; 1 Timoteo 6:3; 2 Timoteo 1:13) Tungod han pagtahod ha ‘mga regalo nga kalalakin-an,’ nga kuwalipikado ha pagtutdo han maopay, aton sinsero nga tatahuron an ira mga pangalimbasog ngan bug-os-kasingkasing nga makooperar kita ha ira ha pagsuporta han limpyo ngan matadong nga mga suruklan ha moral ngan espirituwal han Pulong han Dios.—Efeso 4:7, 8, 11, 12; 1 Tesalonika 5:12, 13; Tito 1:9.

“Ikatulo: Sugad nga Kristiano nga mga kag-anak, bug-os-kasingkasing nga mangangalimbasog kita ha pagtutdo ha aton mga anak diri la pinaagi han mga pulong kondi pinaagi liwat han susbaranan. An aton siyahan nga gintatagad amo an pagbulig ha ira tikang ha ira pagkabata nga ‘mahibaro han baraan nga mga sinurat basi magin maaramon para ha kaluwasan.’ (2 Timoteo 3:15) Aton hinunumdoman pirme nga an aton pagmangno ha ira uyon ha disiplina ngan panhunahuna nga giya ni Jehova maghahatag ha ira han gimaopayi nga higayon nga makaeksperyensya han saad han Dios nga ‘makakaopay ito ha ira ngan mabubuhi hira hin maiha ha tuna.’—Efeso 6:1-4.

“Ikaupat: Kon naatubang hin mga kabaraka o seryoso nga mga problema, siyahan ha ngatanan, kita ‘manginginyupo ha Dios,’ nasarig nga ‘an kamurayawan han Dios nga labaw ha ngatanan nga panhunahuna han tawo’ magpapanalipod ha aton. (Filipos 4:6, 7) Tungod kay aada na ha ilarom han yugo ni Kristo, makakabiling kita hin pagpahuway. Tungod kay maaram nga napaid an Dios ha aton, diri kita mag-aalang ha paghatag han aton mga kabaraka ha iya.—Mateo 11:28-30; 1 Pedro 5:6, 7.

“Ikalima: Sugad nga pagpahayag han aton pagpasalamat ngadto kan Jehova tungod han pribilehiyo han pagin mga magturutdo han iya Pulong, aton paririg-unon-utro an aton mga pangalimbasog ha ‘pagdumara hin husto han iya pulong han kamatuoran’ ngan ‘pagtuman hin bug-os han aton ministeryo.’ (2 Timoteo 2:15; 4:5) Tungod kay maaram gud kita kon ano an nahidadabi, an aton kinasingkasing nga hingyap amo an pamiling hin mga takos ngan patuboon an binhi nga iginsabwag. Dugang pa, aton pauuswagon an aton pagtutdo pinaagi han epektibo nga pagdumara hin dugang nga mga pag-aram ha Biblia ha balay. Pinaagi hini magigin mas nauyon kita ha kaburut-on ni Jehova nga ‘an ngatanan nga tawo sadang maluwas ngan magkaada husto nga kahibaro ha kamatuoran.’—1 Timoteo 2:3, 4.

“Ikaunom: Ha bug-os nga naglabay nga siglo ngan ngada yana, an mga Saksi ni Jehova ha damu nga mga nasud nakakaeksperyensya hin magkalainlain nga mga paagi han pagkontra ngan pagtimaraot. Kondi hi Jehova pirme nga kaupod naton. (Roma 8:31) Ginpapasarig kita han iya diri-nagsasayop nga Pulong nga ‘waray hinganiban nga ginhimo kontra ha aton’ an maglalampos ha pagpugong, pagpahinay, o pagpaundang han aton buruhaton ha pagsangyaw ngan pagtutdo mahitungod han Ginhadian. (Isaias 54:17) Ha maopay o ha maraot man nga panahon, diri kita maundang ha pagyakan han kamatuoran. Determinado kita nga apurado nga tumanon an sugo ha aton nga magsangyaw ngan magtutdo. (2 Timoteo 4:1, 2) Aton tumong nga isumat ha bug-os nga mahihimo an maopay nga sumat han Ginhadian han Dios ha mga tawo han ngatanan nga mga nasud. Hito nga paagi, padayon nga magkakaada hira higayon nga mahibaro mahitungod han tagana para han pagkaada waray kataposan nga kinabuhi ha matadong nga bag-o nga kalibotan. Sugad nga nagkakaurosa nga grupo han mga magturutdo han Pulong han Dios, determinado kita nga padayon nga sundon an susbaranan han Bantogan nga Magturutdo, hi Jesu-Kristo, ngan ipakita an iya diosnon nga mga kuwalidad. Bubuhaton naton ini ngatanan para ha dungog ngan kadayawan han aton Gihitaasi nga Instruktor ngan Humaratag-hin-Kinabuhi, hi Jehova nga Dios.

“An ngatanan nga tinambong hini nga kombensyon nga nauyon ha pagbuhat hini nga resolusyon, alayon sumiring hin OO!”

Han iginbangon an kataposan nga pakiana han resolusyon ha 160,000 nga nagkatirok ha tulo nga kombensyon ha Fransia ngan ha 289,000 ha siyam nga lugar ha Italya, an makusog hinduro nga “Oo” iginsinggit ha damu nga mga yinaknan nga ginrepresentaran han mga delegado.