Inaapresyar Mo ba an Gugma han Dios?

AN LALAKI nga hi Job naghulagway hadto han diri-hingpit nga kahimtang han tawo pinaagi hini nga mga pulong: “An tawo nga [igin-anak] han usa nga babaye, gutiay la an iya mga adlaw, ngan puno hin kasamokan. Hiya nagawas sugad hin bukad ngan inuutod: Hiya liwat nawawara sugad hin usa nga lambong, ngan diri nagpapadayon.” (Job 14:1, 2) An kinabuhi, sugad han naieksperyensyahan hadto ni Job, puno hin pag-antos ngan kasub-anan. Inabat mo na ba an sugad hito?

Kondi, bisan pa han ngatanan nga mga kakurian ngan mga problema nga bangin atubangon naton, may-ada marig-on nga paglaom, nga iginbasar ha pagpaid ngan gugma han Dios. Siyahan ha ngatanan, an aton maloloy-on nga langitnon nga Amay naghatag han halad lukat ha pagtubos ha katawohan tikang ha ira diri-hingpit, makasasala nga kahimtang. Sumala ha Juan 3:16, 17, hi Jesu-Kristo nagsiring: “An Dios naghigugma gud han kalibotan [han katawohan], nga iya iginhatag an iya Bugtong nga Anak, basi nga an ngatanan nga natoo ha iya, diri mawara, kondi ma may kinabuhi nga waray kataposan. Kay an Dios waray pagpakanhi han iya Anak [Jesus] ngadto ha kalibotan pagsirot han kalibotan, kondi nga an kalibotan maluwas tungod ha iya.”

Hunahunaa liwat an buotan nga pagtagad han Dios ha aton nga diri-hingpit nga mga tawo. Hi apostol Pablo nagpahayag: “Tikang ha usa iya ginbuhat an ngatanan nga mga nasud han mga tawo, basi paukyon ha ngatanan nga bayhon han tuna, ngan igintungod ha ira an pagkasunod-sunod han mga panahon, ngan an mga ginkatakipan han ira urukyan; Basi hira mamiling han Dios, kay bangin la hira makahikap ha iya, ngan hiagian hiya nira; bisan kon hiya diri hirayo ha tagsatagsa ha aton.” (Buhat 17:26, 27) Hunahunaa kon ano an kahulogan hito para ha aton! Bisan kon kita diri-hingpit nga mga tawo, makakapahimulos pa gihapon kita hin duok nga relasyon ha aton mahigugmaon nga Maglalarang, hi Jehova nga Dios.

Salit, may pagsarig nga maaatubang naton an tidaraon, tungod kay maaram kita nga an Dios nagtatagad ha aton ngan mahigugmaon nga nagtagana para han aton nagpapadayon nga kaopayan. (1 Pedro 5:7; 2 Pedro 3:13) Salit, sigurado gud nga may-ada kita marig-on nga hinungdan ha paghibaro hin damu pa mahitungod han aton mahigugmaon nga Dios pinaagi han pag-aram ha iya Pulong, an Biblia.