Ayaw Palimbong

AN PANLIMBONG haros kaedad na han katawohan. Usa han siyahan nga mga hitabo nga nahirekord ha kasaysayan amo an panlimbong. Nahitabo ito han ginlimbongan ni Satanas hi Eva ha hardin han Eden.—Genesis 3:13; 1 Timoteo 2:14.

Bisan kon waray pa gud panahon tikang hadto nga diri kaylap an panlimbong ha tuna, kaylap ito labi na gud yana nga panahon. Ha pagtagna han mahitatabo ha moderno nga mga panahon, an Biblia nagpahamangno: “An mga magraot ngan maglimbong nga mga tawo matubo ha maraot ngan labi pa gud nga maraot, ngan manlilimbong hira ngan panlilimbongan man hira.”—2 Timoteo 3:13.

Nalilimbongan an mga tawo tungod han ngatanan nga klase han mga hinungdan. An mga paralimbong naglilimbong ha mga tawo basi makuha an ira kwarta. An iba nga mga politiko naglilimbong ha ira mga sakop, determinado nga magpabilin ha gahum anoman an mahitabo. An mga tawo naglilimbong pa ngani ha ira kalugaringon. Imbes nga atubangon an diri maopay nga mga kamatuoran, kinukombinse nira an ira kalugaringon nga waray madadaot ha pagpadayon ha peligroso nga mga buhat, sugad han pagsigarilyo, pag-abuso ha droga, o seksuwal nga imoralidad.

Katapos, aada an panlimbong may kalabotan ha relihiyon. An mga lider han relihiyon ha panahon ni Jesus naglimbong ha mga tawo. Mahitungod hiton nga mga paralimbong, hi Jesus nagsiring: “Mga paratugway nga buta. Ngan kon buta an nagtutugway han buta, hira nga duha magkakahulog ha buho.” (Mateo 15:14) Dugang pa, ginlilimbongan han mga tawo an ira kalugaringon may kalabotan ha relihiyon. An Proberbios 14:12 nasiring: “May-ada dalan nga daw maopay ha tawo; kondi an kataposan hini amo an mga dalan ha kamatayon.”

Pariho ha panahon ni Jesus, damu yana an nalilimbongan may kalabotan ha relihiyon ngan diri ito urusahon! Hi apostol Pablo nagsiring nga hi Satanas ‘nagbubuta han mga hunahuna han mga diri magtinoohon, basi diri hira sidlakan han kalamrag han maopay nga sumat han himaya ni Kristo, nga amo an dagway han Dios.’—2 Korinto 4:4.

Kon nalilimbongan kita han usa nga paralimbong, nawawad-an kita hin kwarta. Kon an usa nga politiko naglilimbong ha aton, bangin mawad-an kita hin pipira han aton kagawasan sugad nga resulta. Kondi kon hi Satanas an naglilimbong ha aton basi isalikway naton an kamatuoran mahitungod kan Jesu-Kristo, mawawad-an kita hin kinabuhi nga waray kataposan! Salit ayaw palimbong. Tagda hin maopay an diri-karuhaduhaan nga surok han kamatuoran ha relihiyon, an Biblia. Daku hinduro an mawawara ha aton kon diri naton buhaton ito.—Juan 17:3.