Mga Pakiana Tikang ha mga Magbarasa

Ano nga giya an iginhahatag han Kasuratan mahitungod ha pagbansay ha anak kon an usa nga kag-anak usa han mga Saksi ni Jehova ngan an usa diri?

Duha nga importante nga Kasuratanhon nga prinsipyo mahitungod ha pagbansay ha anak an naggigiya ha Saksi nga kag-anak nga may-ada diri-Saksi nga padis. An usa amo an: “Kinahanglan namon nga sugton an Dios san-o an mga tawo.” (Buhat 5:29) An usa pa amo an: “An asawa nga lalaki amo an ulo han asawa nga babaye, sugad man nga hi Kristo amo iton ulo han singbahan.” (Efeso 5:23) An ikaduha aplikado diri la ha mga asawa nga may-ada Saksi nga mga bana kondi liwat para hadton may-ada diri-Saksi nga mga bana. (1 Pedro 3:1) Paonan-o hihimoon nga timbang han Saksi nga kag-anak ini nga mga prinsipyo kon nagtututdo ha iya mga anak?

Kon an bana usa han mga Saksi ni Jehova, responsable hiya ha pagtagana hin espirituwal ngan materyal ha iya pamilya. (1 Timoteo 5:8) Bisan kon an diri-tumuroo nga iroy mahimo gumasto hin dugang nga panahon ha ira mga anak, sadang tutdoan han Saksi nga amay an iya mga anak pinaagi han paghatag hin espirituwal nga pagbansay ha balay ngan pagdara ha ira ha Kristiano nga mga katirok, diin makakapahimulos hira tikang ha moral nga instruksyon ngan maopay nga pakig-upod.

Kumusta man kon an iya diri-tumuroo nga asawa nagpipirit nga iupod an ira mga anak ha lugar han iya pagsingba o pagtutdo ha ira han iya mga gintotoohan? An balaud han nasud mahimo maghatag ha iya han katungod ha pagbuhat hito. Kon madani man an mga anak ha mga buhat han pagsingba ha sugad nga mga lugar nadepende gud ha kuwalidad han espirituwal nga pagtutdo han amay. Samtang nagtutubo an mga anak, an Kasuratanhon nga pagtutdo han ira amay sadang makabulig ha ira ha pagsunod ha kamatuoran han Pulong han Dios. Magigin malipayon gud an tumuroo nga bana kon an iya mga anak magdesisyon ha pagdapig ha kamatuoran!

Kon an iroy usa han mga Saksi ni Jehova, kinahanglan tahuron niya an prinsipyo han pagkaulo samtang gintatagad an waray kataposan nga kaopayan han iya mga anak. (1 Korinto 11:3) Ha damu nga mga kahimtang, an iya diri-tumuroo nga padis natugot kon an iya Saksi nga asawa naghahatag hin moral ngan espirituwal nga edukasyon ha ira mga anak, ngan an bulig para hito nga tumong makukuha ha mga katirok han katawohan ni Jehova. Mabubuligan han iroy an iya diri-tumuroo nga bana nga makita an mga kapulsanan han maopay nga edukasyon nga nakakarawat han ira mga anak pinaagi han organisasyon ni Jehova. Mataktika nga mapapabug-atan niya an kaopayan han pagpasilsil han mga prinsipyo han Biblia ha moral ha ira mga anak, samtang naatubang hira ha kalibotan nga nagtitikaraot an moralidad.

Kondi, bangin ipirit han diri-tumuroo nga bana nga buhaton han iya mga anak an iya relihiyon, dad-on hira ha lugar han iya pagsingba ngan tagan hira hin edukasyon ha relihiyon sumala han iya pagtoo. O bangin kumontra an bana ha ngatanan nga relihiyon ngan magpirit nga diri hatagan hin edukasyon ha relihiyon an iya mga anak. Sugad nga ulo han pamilya, hiya an siyahan nga may responsabilidad ha pagdesisyon. a

Samtang gintatahod an pagkaulo han iya bana, sugad nga dedikado nga Kristiano, sadang hinumdoman han Saksi nga asawa an disposisyon nira apostol Pedro ngan Juan, nga nagsiring: “Diri kami makakahimo, kon diri an pagyakan han mga bagay  nga amon hinkit-an ngan hinbatian.” (Buhat 4:19, 20) Tungod han pagtagad ha espirituwal nga kaopayan han mga anak, an Saksi nga iroy makakabiling hin mga higayon ha pagtagana ha ira hin giya ha moral. May-ada hiya responsabilidad kan Jehova ha pagtutdo ha iba mahitungod han iya hinbabaroan nga totoo, ngan diri sadang magin eksepsyon an iya mga anak. (Proberbios 1:8; Mateo 28:19, 20) Paonan-o susulbaron han Saksi nga iroy an makuri nga problema?

Tagda pananglitan an may kalabotan ha pagtoo ha Dios. An Saksi nga asawa bangin diri mahimo magdumara hin pormal nga pag-aram ha Biblia ha iya mga anak tungod ha pagdumiri han iya bana. Sadang ba niya likyan an pagsumat ha iya mga anak hin bisan ano mahitungod kan Jehova tungod hini? Diri. An iya mga pulong ngan mga buhat natural nga magpapakita han iya pagtoo ha Maglalarang. An iya mga anak waray ruhaduha nga may-ada mga pakiana mahitungod han tema. Diri niya sadang pugngan an pagbuhat han iya kagawasan ha relihiyon pinaagi ha pagpahayag han iya pagtoo ha Maglalarang, upod na ha iya mga anak. Bisan kon bangin diri hiya makagdumara hin regular nga pag-aram ha Biblia ha iya mga anak o regular nga mahiupod hira ha mga katirok, maisusumat niya ha ira an kahibaro mahitungod kan Jehova nga Dios.—Deuteronomio 6:7.

Mahitungod han relasyon han usa nga Saksi ngan han iya diri-tumuroo nga padis, hi apostol Pablo nagsurat: “An asawa nga lalaki nga diri matinoohon ginpakaputli han asawa nga babaye, ngan an asawa nga babaye nga diri matinoohon ginpakaputli han bugto; o an iyo mga anak nga diri putli; kondi niyan mga baraan hira.” (1 Korinto 7:14) Ginlalantaw ni Jehova an relasyon han mag-asawa nga baraan tungod han tumuroo nga padis, ngan an mga anak gintatagad nga baraan ha paniplatan ni Jehova. Sadang buhaton han Saksi nga asawa an iya gimaopayi ha pagbulig ha iya mga anak nga makasabot han kamatuoran, igintatapod an ultimo nga resulta ha pagdumara ni Jehova.

Samtang nagtutubo an mga anak, kinahanglan hira magdesisyon kon ano an ira totoohan basado ha impormasyon nga ira nakakarawat ha ira mga kag-anak. Bangin magdesisyon hira ha paggios uyon ha mga pulong ni Jesus: “An nahigugma hin labi ha iya amay o iroy kay ha akon, diri takos ha akon.” (Mateo 10:37) Ginsugo liwat hira: “Mga anak, magtuman kamo ha iyo mga kag-anak ha Ginoo.” (Efeso 6:1) Damu nga mga batan-on an nagdesisyon ha ‘pagsunod ha Dios sugad nga magmarando’ imbes ha diri-Saksi nga kag-anak, bisan pa ha pag-antos hin kakurian tikang hito nga kag-anak. Makalilipay gud para ha Saksi nga kag-anak nga makita an mga anak nga magdesisyon ha pag-alagad kan Jehova bisan pa han pagkontra!

[Footnote]