Mga Batan-on nga Nahigugma han Kamatuoran

“OONANHON nga an batan-on nga lalaki makaghamis han iya dalan?” nagpakiana an usa nga Hebreohanon nga salmista, sobra 2,400 ka tuig na an naglabay. (Salmo 119:9) Angayan pa gihapon ini nga pakiana yana nga panahon tungod kay an mga batan-on naatubang hin damu nga mga problema ha kalibotan. An waray-pagtagad nga buhat ha sekso nagigin hinungdan nga damu nga mga batan-on an nagkakaada AIDS, ngan mga katunga hadton may-ada hinin makangingirhat nga sakit an nag-iedad butnga han 15 ngan 24. An pag-abuso ha droga nagigin hinungdan liwat han damu nga mga problema, nagriresulta ha temprano nga kamatayon han mga batan-on. An magraot nga musika; madarahog ngan imoral nga mga pelikula, mga kiritaon ha TV, ngan mga video; ngan pornograpiya ha Internet may-ada nakakadaot nga impluwensya ha mga batan-on. Salit, an pakiana nga iginbangon han salmista importante gud para ha damu nga mga kag-anak ngan mga batan-on yana nga panahon.

Ha iya kalugaringon nga pakiana, ito mismo nga salmista nagbaton: “Ha pagbantay hito sugad han imo mga pulong.” Sigurado, an Pulong han Dios, an Biblia, nagsusulod hin mag-opay nga giya para ha mga batan-on, ngan pinaagi ha pagsunod hito, damu nga mga batan-on an naglalampos ha kinabuhi. (Salmo 119:105) Aton usisahon an pipira nga mga susbaranan han mga batan-on nga nahigugma ha Dios ngan nangangalimbasog nga magpabilin nga makusog ha espirituwal ha kalibotan nga mahilig hin kalipayan ngan materyal.

Inaapresyar Nira an Giya han mga Kag-anak

Hi Jacob Emmanuel usa ka bug-os-panahon nga payunir nga ministro ha sulod hin mga tuig antes mag-alagad ha sanga nga opisina han mga Saksi ni Jehova ha Mexico. May-apresasyon nga nahinunumdoman niya kon paonan-o nagtubo an iya gugma ha pag-alagad ha Dios: “An akon mga kag-anak amo an daku nga impluwensya ha akon, bisan kon nakabulig liwat hinduro an pakigsangkay ha pipira nga eksperyensyado nga kabugtoan ha espirituwal. Gin-aghat nira ako nga higugmaon an pagsangyaw nga buruhaton. Hinay-hinay nga giniyahan nira ako ha husto nga dalan; waray ko gud abata nga ginpirit nira ako.”

Hi David, nga naggasto na hin pipira ka mga tuig ha bug-os-panahon nga ministeryo, nahinunumdom kon paonan-o nakaimpluwensya ha iya nga an iya mga kag-anak nagtikang mag-alagad sugad nga espesyal nga mga payunir han gutiay pa hiya ngan an iya bugto nga lalaki. Han namatay an iya amay, an iya iroy nagpadayon ha pag-alagad sugad nga espesyal payunir. Iya gin-ataman hira dugang pa ha pagsangyaw han maopay nga sumat. “Waray gud nira ako pirita nga magpayunir,” siring ni David, “kondi nalilipay gud kami ha pagpayunir sugad nga pamilya salit an asosasyon ngan palibot nag-aghat ha akon nga buhaton liwat ito.” May kalabotan ha bili han maopay nga giya ngan atensyon tikang ha mga kag-anak, hi David nasiring: “Kada gab-i, ginbabasahan kami han amon iroy hin mga istorya tikang ha libro nga Tikang ha Paraiso nga Nawara Tubtob ha Paraiso nga Nahapabalik. a An paagi han iya pag-istorya hito ha amon nakabulig ha amon nga maruyag ha pagkarawat han espirituwal nga pagkaon.”

Apresasyon Para ha mga Katirok

An iba nga mga batan-on nakukurian ha pag-apresyar han Kristiano nga mga katirok. Natambong hira tungod kay igin-uupod hira han ira mga kag-anak. Kondi, kon padayon nga tumambong hira ha katirok, maabot an panahon nga bangin pabilhan na nira an mga katirok. Tagda hi Alfredo, nga nagtikang  ha bug-os-panahon nga pag-alagad han 11 anyos hiya. Kinakarawat niya nga han mga singko anyos hiya, nangalimbasog hiya nga malikyan an pagtambong ha mga katirok tungod kay ginpipiraw hiya didto kondi diri hiya gintutugotan han iya mga kag-anak nga kumaturog durante han mga katirok. Hiya nahinunumdom: “Samtang nagtutubo ako, hinay-hinay nga nagigin mas interesado ako ha mga katirok, labi na han mahibaro ako pagbasa ngan pagsurat tungod kay hito nga panahon nagtikang ako magkomento ha akon kalugaringon nga mga pulong.”

Hi Cintia, 17-anyos nga babaye nga nag-aalagad sugad nga regular payunir, nagsusumat kon kay ano nga importante an maopay nga asosasyon ha iya pagpatubo hin gugma ha pag-alagad ha Dios. Hiya nasiring: “An maopay nga relasyon ha kabugtoan ngan regular nga pagtambong ha mga katirok nakapugong ha akon nga pamilngon an akon kalibotanon nga kasangkayan ngan an mga buruhaton nga popular ha mga batan-on, sugad han pagdisko. An pagpamati ha mga komento ngan mga eksperyensya ha mga katirok nakaaghat dida ha akon hin hingyap nga ihatag kan Jehova an ngatanan nga akon tinatag-iya, ngan inaabat ko nga an gimaopayi nga butang nga akon tinatag-iya amo an akon pagkabatan-on. Salit nagdesisyon ako nga gamiton ito ha pag-alagad ha iya.”

Kondi, hiya nasiring: “May-ada panahon hadto, antes ako nabawtismohan, nga masayon para ha akon an diri pagtambong ha mga katirok, nga ginagamit an mga asaynment o iba nga mga buruhaton ha eskwelahan sugad nga pasangil. Waray ako makatambong ha pipira nga mga katirok, ngan nagtikang ini makaapekto ha akon ha espirituwal. Nagtikang ako makig-upod-upod ha usa nga lalaki nga diri nag-aaram ha Biblia. Ha bulig ni Jehova, natadong ko an mga butang hin temprano pa.”

Usa nga Personal nga Desisyon

Han ginpakianhan hi Pablo, usa pa nga batan-on nga bug-os-panahon nga nag-aalagad kan Jehova, kon ano an iya ginhuhunahuna nga pinakaimportante basi mapatubo an gugma para ha kamatuoran han Pulong han Dios, hiya nagsiring: “Para ha akon may-ada duha nga butang: regular nga personal nga pag-aram ngan kadasig ha pagsangyaw nga buruhaton. Mapasalamaton ako ha akon mga kag-anak ha pagtutdo ha akon han kamatuoran mahitungod kan Jehova, ngan inaabat ko nga ini an gimaopayi nga butang nga ira iginhatag ha akon. Kondi, kinahanglan personal nga makombinse ako kon kay ano nga hinigugma ko hi Jehova. Basi mahimo ito, importante nga hibaroan ‘an kahilapad ngan kahilarom’ han kamatuoran han Biblia. Hini la nga paagi nga maaabat naton an hingyap para han Pulong han Dios, nga nagpapatubo hin ‘naglalaga nga kalayo’ ha sulod naton basi makiistorya ha iba mahitungod hito. Ito nga kadasig ha pagsangyaw nga buruhaton an magpapahilarom han aton apresasyon ha kamatuoran.”—Efeso 3:18; Jeremias 20:9.

Hi Jacob Emmanuel, nga gin-unabi na, nahinunumdom liwat han bili han personal nga pagdesisyon ha pag-alagad kan Jehova. Hiya nagsiring nga waray gud hiya pirita han iya mga kag-anak nga magpabawtismo. “Natoo ako nga gimaopayi ini tungod kay nakita ko an mag-opay nga mga resulta. Pananglitan, an pipira nga mga batan-on nga akon pirme kaupod-upod nagdesisyon nga durungan nga magpabawtismo. Bisan kon maopay ito, nakita ko nga an iba nagpabawtismo tungod kay nadara la han emosyon, ngan waray pag-iha katapos hito, nawara an ira kadasig ha mga buruhaton para han Ginhadian. Ha akon kahimtang, waray ako pirita han akon mga kag-anak nga magdesisyon ha pagdedikar  han akon kalugaringon ngadto kan Jehova. Personal adto nga desisyon.”

An Bahin han Kongregasyon

An iba nga mga batan-on naglugaring la paghibaro han kamatuoran han Pulong han Dios, nga waray bulig han ira mga kag-anak. Sigurado nga diri masayon nga mahibaro ha pagbuhat han maopay ngan magpadayon dida hito ilarom han sugad nga mga kahimtang.

Hi Noé nahinunumdom kon mationan-o gud niya napahimulosan an kamatuoran. Tikang ha pagkabata, madagmit hiya masina ngan magin madarahog. Han magtikang hiya mag-aram han Biblia ha edad nga 14, an iya pagpailob nagtikang mag-uswag, salit an iya mga kag-anak, nga diri interesado ha Biblia hito nga panahon, nagpasalamat gud. Samtang hi Noé nag-uuswag ha espirituwal, karuyag niya gamiton hin mas bug-os an iya kinabuhi ha pag-alagad ha Dios. Nag-aalagad hiya yana ha bug-os-panahon nga ministeryo.

Ha pariho nga paagi, hi Alejandro nagtikang magkainteres ha Kristiano nga kamatuoran han bata pa hiya hinduro, bisan kon diri interesado hito an iya mga kag-anak. Ha pagpahayag han iya apresasyon ha kamatuoran, hiya nagsiring: “Nagdaku ako ha tradisyonal nga Katoliko nga panimalay. Kondi nagtubo an akon interes ha pagin ateyista han mga Komunista, tungod kay waray batona han iglesia an mga pakiana nga nakawurok ha akon tikang ha pagkabata. An organisasyon ni Jehova nakabulig ha akon nga magkaada kahibaro mahitungod ha Dios. Literal nga nagluwas ito han akon kinabuhi tungod kay kon waray ako mag-aram ha Biblia, bangin nahidabi na ako ha imoralidad, alkoholismo, o droga. Bangin nagin kaapi pa ngani ako han usa nga rebolusyonaryo nga grupo, nga may-ada makasurubo nga mga resulta.”

Paonan-o an usa nga batan-on makakagpadayon ha iya pamiling han kamatuoran ngan makakapabilin dida hito nga waray bulig han iya mga kag-anak? Matin-aw, an mga tigurang ngan an iba ha kongregasyon may-ada importante hinduro nga bahin. Nahinunumdom hi Noé: “Waray pa gud ako umabat nga nag-uusahan, tungod kay hi Jehova duok gud pirme ha akon. Binubuligan liwat ako han damu nga mahigugmaon nga kabugtoan nga kababayin-an ngan kalalakin-an nga akon nagin espirituwal nga mga amay, mga iroy, ngan kabugtoan.” Nag-aalagad hiya yana ha Bethel ngan ginagamit an iya panahon ha pag-alagad ha Dios. Ha pariho nga paagi, hi Alejandro nasiring: “Usa nga butang nga pirme ko pasasalamatan amo an kapulsanan han pagin kaupod ha usa nga kongregasyon nga may lawas han mga tigurang nga nagpapakita hin mahigugmaon nga interes ha akon sugad nga indibiduwal. Labi nga mapasalamaton ako tungod kay han magtikang ako mag-aram ha Biblia, ha edad nga 16, an kaikag nga komon ha mga batan-on nakaapekto liwat ha akon. Waray gud ako pabay-i han mga pamilya ha kongregasyon. May-ada pirme usa nga maabiabihon nga nakarawat ha akon ngan iginpapaangbit ha akon diri la an iya balay ngan pagkaon kondi an iya kasingkasing liwat.” Sobra 13 anyos na yana hi Alejandro ha bug-os-panahon nga pag-alagad.

An iba nga mga tawo naghuhunahuna nga an relihiyon para la ha mga edaran. Kondi, damu nga mga batan-on an nahibaro ha kamatuoran han Biblia ha batan-on nga pangidaron ngan nahibaro ha paghigugma kan Jehova ngan nagpapabilin nga matinumanon ha iya. Ngada hini nga mga batan-on aplikado an mga pulong ni David nga nakasurat ha Salmo 110:3: “An imo katawohan naghahalad hira ngahaw hin maopay nga kaburut-on ha adlaw han imo kagamhanan, upod an rayandayan han ira kabaraan: sugad hin tun-og nga tikang ha butnga han kaagahon amo man may-ada ha imo an tun-og han imo kabatan-on.”

Usa ka ayat ha mga batan-on nga mahibaro ha kamatuoran ngan magpabilin dida hito. Makalilipay gud nga makita nga damu an nagpapabilin nga duok hinduro ha organisasyon ni Jehova, regular nga natambong ha mga katirok, ngan maduruto nga nag-aaram ha Biblia. Ha pagbuhat hito, napatubo nira an totoo nga gugma ha Pulong han Dios ngan ha pag-alagad ha iya!—Salmo 119:15, 16.

[Footnote]