Sadang Ka ba Magin Mapinasibay-on?

KADAM-AN nga mga tawo an bangin umabat nga usa nga kadayawan ito kon gintatagad hira sugad nga mapinasibay-on, relaks, kalmado, masinabuton. Kondi, may-ada lain nga kahulogan an pagin mapinasibay-on. An Biblia nasiring: “An mapinasibay-on nga kasayon han mga lurong maggugunaw ha ira.” (Proberbios 1:32) Ano an kahulogan hito?

An iba nga mga bersyon han Biblia naghubad han orihinal nga Hebreo nga pulong hito nga mga ekspresyon sugad nga “waray-pagtagad nga kahimyang” (American Standard Version), “pagin hambog” (The New American Bible), ngan “tagbaw na ha kalugaringon.” (The New English Bible) Hini nga kahulogan, an pagin mapinasibay-on iginkakaw-ing ha pagin hubya ngan kawaray pagtagad ngan salit iginkakaw-ing ha pagin tapang o kalurongan.

Ha siyahan nga siglo, an mga Kristiano ha kongregasyon ha Laodisea waray gud pagtagad o tagbaw na mahitungod han ira espirituwal nga mga kakulangan. Naghambog hira nga ‘diri na nira kinahanglan an bisan ano.’ Ginsaway hira ni Jesu-Kristo, ginpabug-atan nga kinahanglan parig-unon utro an ira Kristiano nga kadasig.—Pahayag 3:14-19.

An pagin tagbaw na ha kalugaringon amo liwat an kinaiya han mga tawo ha panahon ni Noe. Okupado hira ha diri importante nga mga butang ha kinabuhi, “nangangaon ngan nanginginom, an kalalakin-an nag-aasawa ngan an kababayin-an pinangangasawa . . . , ngan hira waray mamati tubtob nga inabot an baha ngan igin-anod hira ngatanan.” Ngan hi Jesus nagdugang: “Maaamo man ha presensya han Anak han tawo.”—Mateo 24:37-39, NW.

Ipinapakita han natuman nga mga tagna han Biblia nga nagkikinabuhi na kita ha “presensya han Anak han tawo,” hi Jesu-Kristo. Hinaot diri kita magin tagbaw na, waray pagtagad, hambog—mapinasibay-on.—Lukas 21:29-36, NW.