An Gimaopayi nga Panahon nga Magin Buhi

KON naatubang ha makuri nga mga kahimtang, ginhihingyap mo ba an “mag-opay nga mga adlaw nga naglabay”? Niyan, tagda an mga pulong han maaramon nga hi Hadi Salomon: “Diri ka magsiring: Ano an kasugad nga an una nga mga adlaw maoroopay kay hini? Kay ikaw diri nagpapakiana ha makinaadmananon mahitungod hini.”—Eklesiastes 7:10.

Kay ano nga iginhatag ni Salomon ini nga sagdon? Tungod kay maaram hiya nga an pagkaada maminatud-on nga panlantaw ha naglabay usa nga birilhon nga bulig ha paglampos han diri maopay nga mga kahimtang ha presente. Adton naghihingyap han “maopay nga mga adlaw nga naglabay” bangin aktuwal nga nahingangalimot nga adto nga mga adlaw puno liwat hin mga problema ngan mga kakurian ngan an kinabuhi diri gud makaruruyag. An pipira nga mga butang ha naglabay bangin maoroopay, kondi posible nga diri maopay an iba. Sugad han naobserbahan ni Salomon, diri maaramon an diri-angayan nga paghunahuna han naglabay, tungod kay matin-aw nga diri naton maibabalik an mga kahimtang han naglabay nga panahon.

Makakadaot ba an sobra nga paghandom han naglabay? Oo, kon nagpupugong ito ha aton ha pagin mapauyon-uyon ngan nasunod ha presente o kon nagpupugong ito ha aton ha pag-apresyar han mga panahon naton yana ngan han paglaom nga mahimo magin aton.

Oo, yana an gimaopayi nga panahon nga magin buhi, bisan pa han nagdadamu nga mga problema ha kalibotan. Kay ano? Tungod kay nagtitikahirani na kita ha katumanan han katuyoan han Dios mahitungod han aton tuna ngan han mga bendisyon han mamurayawon nga pagmando han iya Ginhadian. An Biblia nagsasaad: “Pagpapahiron niya an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud: kay an siyahan nga mga bagay nag-agi na.” (Pahayag 21:4) Hito nga panahon, tungod kay an mga kahimtang mas maopay na gud, waray usa nga magkakaada hinungdan nga maghingyap han “maopay nga mga adlaw nga naglabay.”