Paghatag hin Labaw han Imo Maakos

“MAHIMO mo ako tawagon nga makililimos; diri ako masisina. Nakikilimos ako para kan Jesus.” Ito nga mga pulong han usa nga Protestante nga ministro nagpapabug-at ha isyu mahitungod han pagkaada hin kwarta para ha relihiyon. An establisado na nga relihiyon baga hin nakakagpadayon la kon nakakakuha hin damu nga kwarta. Kinahanglan bayaran an mga suweldo, kinahanglan tukuron ngan mintinaron an mga templo, kinahanglan mataparan an gastos han mga pag-ebanghelyo. Paonan-o makukuha an ginkikinahanglan nga kwarta?

Para ha damu nga mga relihiyon, an baton amo an ikanapulo. a “An ikanapulo amo an paagi han Dios ha pagtapar han mga gastos han Iya ginhadian ha tuna,” siring han ebanghelisador nga hi Norman Robertson. “Ito an pinansyal nga pamaagi han Dios basi maisangyaw an Ebanghelyo.” Tungod kay diri nag-aalang ha pagpahinumdom han iya mga sumurunod han ira responsabilidad ha paghatag, hiya marig-on nga nasiring: ‘An ikanapulo diri usa ka butang nga imo binubuhat tungod kay akos mo ito. Usa ka buhat ito han pagsugot. Kon diri ka maghatag han ikanapulo, matin-aw nga pagtalapas ito ha mga sugo han Dios. Pariho ito ha pagkuha hin kwarta nga gintatag-iya han iba.’—Tithing—God’s Financial Plan.

Sigurado nga nauyon ka nga an paghatag sadang magin bahin han Kristiano nga pagsingba. Kondi, nadidisturbo ka ba, bangin diri naruruyag pa ngani ha padayon nga pagpinangaro hin kwarta? Gin-aakusahan han teologo nga taga-Brazil nga hi Inácio Strieder an mga relihiyon ha paggamit han ikanapulo basi “masulbad an ira mga problema” ngan gintatawag niya an sugad nga mga buhat nga “diri husto, nag-aabuso, ngan diri uyon ha teolohiya.” An resulta, siring niya, amo nga “an waray trabaho nga mga tawo, mga balo, mga eskwater, ngan adton diri nakakapamalandong hin maopay naghuhunahuna nga ginbayaan hira han Dios ngan obligado hira ha paghatag hin sobra ha ‘magsarangyaw’ salit nagugutom an ira kalugaringon nga pamilya.”

Bangin ka maghunahuna: ‘Husto nga gin-aaplikar ba an Kasuratan han mga relihiyon nga nag-oobligar han ikanapulo? O posible ba nga ginhahadlok han pipira nga relihiyon an ira mga membro hin sirot han Dios basi makakuha hin kwarta pinaagi hin panlimbong? Ginlalaoman gud ba han Dios nga mahatag kita hin labaw han aton maaakos?’

[Footnote]