Paghatag nga Nagpapalipay

HI Genival, nga nag-uukoy ha kablas nga bungto ha norte-este nga bahin han Brazil, nagsuporta ha iya asawa ngan mga anak pinaagi han iya gutiay nga suweldo sugad nga guwardya ha usa nga ospital. Bisan pa han iya kakurian, hi Genival matinumanon nga naghatag han ikanapulo. “Usahay nagutom an akon pamilya,” nahinunumdoman hiya samtang ginhahapyod an iya tiyan, “kondi karuyag ko ihatag an akon gimaopayi ha Dios, anoman nga pagsakripisyo an ginkinahanglan.”

Han nawad-an han iya trabaho, padayon nga naghatag hi Genival han iya ikanapulo. Ginsagda hiya han iya ministro nga sarihan an Dios pinaagi han paghimo hin usa ka daku nga donasyon. Nagpasarig an klero nga an Dios sigurado nga magbububo hin hura nga bendisyon. Salit nagdesisyon hi Genival nga ibaligya an iya balay ngan ihatag an kwarta ha singbahan.

Diri la hi Genival an may-ada sugad nga sinseridad ha paghatag. Damu nga kablas gud nga mga tawo an matinumanon nga nahatag han ikanapulo tungod kay gintutdoan hira han ira mga relihiyon nga an paghatag han ikanapulo usa nga kinahanglanon sumala ha Biblia. Totoo ba ito?

An Paghatag han Ikanapulo Ngan an Balaud

An sugo ha paghatag han ikanapulo bahin han Balaud nga iginhatag ni Jehova nga Dios ha 12 nga tribo han kadaan nga Israel sobra 3,500 ka tuig na an naglabay. Ito nga Balaud nagsugo nga an ikanapulo nga bahin han ani han tuna ngan bunga han mga puno ngan an ikanapulo nga bahin han pagdamu han kahayopan kinahanglan ihatag ha tribo ni Lebi ha pagsuporta han ira pag-alagad ha tabernakulo.—Lebitiko 27:30, 32; Numeros 18:21, 24.

Ginpasarig ni Jehova an mga Israelita nga an Balaud ‘diri magigin makuri hinduro para ha ira.’ (Deuteronomio 30:11) Samtang matinumanon nga ginsusunod nira an mga sugo ni Jehova, upod na an paghatag han ikanapulo, makakarawat nira an iya saad nga hura nga mga ani. Ngan sugad nga panalipod kontra ha kakulangan, regular nga igingahin an dugang nga tinuig nga ikanapulo, nga kasagaran nga ginagamit kon nagkakatirok an katawohan para ha relihiyoso nga mga kapiyestahan hito. Salit, ‘an humarapit, an ilo ha amay nga bata nga lalaki, ngan an balo nga babaye’ mabubusog.—Deuteronomio 14:28, 29; 28:1, 2, 11-14.

Waray isaysay han Balaud an sirot ha diri paghatag han ikanapulo, kondi an tagsa nga Israelita may-ada marig-on nga obligasyon ha moral nga suportahan an totoo nga pagsingba hini nga paagi. Ha pagkamatuod, an mga Israelita nga waray maghatag han ikanapulo ha panahon ni Malakias gin-akusahan ni Jehova hin ‘panikas ha iya han mga ikanapulo ngan han mga halad.’ (Malakias 3:8) Mahimo ba liwat akusahan hin sugad hito an mga Kristiano nga diri nahatag han ikanapulo?

Bueno, aton paghisgotan. An mga balaud han nasud kasagaran nga waray bili ha gawas han mga giutan han usa nga nasud. Pananglitan, an balaud nga nag-oobligar han mga motorista ha Britanya ha pagmaneho ha wala nga dapit han kalsada diri aplikado ha mga nagmamaneho ha Fransia. Ha pariho nga paagi, an balaud nga nagkikinahanglan ha paghatag han ikanapulo bahin han esklusibo nga kauyonan han Dios ngan han nasud han Israel. (Eksodo 19:3-8; Salmo 147:19, 20) An mga Israelita la an obligado ha pagsunod hito nga balaud.

Dugang pa, bisan kon totoo nga an Dios diri gud nagbabag-o, an iya mga kinahanglanon usahay nagbabag-o. (Malakias 3:6) Direkta nga nasiring an Biblia nga an halad nga kamatayon ni Jesus han 33 K.P., ‘nagpara,’ o ‘nagkuha,’ han Balaud ngan upod hito, han ‘sugo ha pagkolekta han ikanapulo.’—Kolosas 2:13, 14; Efeso 2:13-15; Hebreo 7:5, 18.

Kristiano nga Paghatag

Kondi, kinahanglanon pa gihapon an mga kontribusyon ha pagsuporta han totoo nga pagsingba. Ginsugo ni Jesus an iya mga disipulo nga ‘magin mga testigo ngadto ha sidsid gud han kalibotan.’ (Buhat 1:8) Samtang nagtitikadamu an mga tumuroo,  nagtitikadaku man an panginahanglan hin Kristiano nga mga magturutdo ngan mga paramangno nga mabisita ngan magpaparig-on han mga kongregasyon. An mga balo, mga ilo, ngan iba nga mga kablas kinahanglan atamanon usahay. Paonan-o gintaparan an gastos han siyahan-siglo nga mga Kristiano?

Han mga 55 K.P., ginhangyo an Hentil nga mga Kristiano ha Europa ngan Asia Minor nga buligan an nagkukuri nga kongregasyon ha Judea. Ha iya mga surat ha kongregasyon ha Korinto, iginsaysay ni apostol Pablo kon paonan-o gin-organisa ini nga ‘pangulekta para ha mga baraan.’ (1 Korinto 16:1) Bangin mahipausa ka ha iginpapahayag han mga pulong ni Pablo mahitungod han Kristiano nga paghatag.

Waray pirita ni apostol Pablo an mga igkasi-tumuroo nga humatag. Ha pagkamatuod, an taga-Masedonia nga mga Kristiano nga “nagkukuri” ngan “kablas hinduro” kinahanglan ‘padayon nga maghangyo ha iya para han pribilehiyo ha paghatag ngan ha pakigbahin ha ministeryo nga para ha mga baraan.’—2 Korinto 8:1-4, NW.

Oo, gindasig ni Pablo an mas bahandianon nga mga taga-Korinto nga subaron an ira mahinatagon nga kabugtoan ha Masedonia. Bisan pa hito, siring han usa nga sinurat, hiya ‘waray magsugo, mas kinaruyag lugod niya nga maghangyo, magsuhestyon, magdasig, o mag-aghat. Waray unta an kinaburut-on nga paggios ngan gugma tikang ha paghatag han mga taga-Korinto kon ginpirit hira.’ Maaram hi Pablo nga “an Dios nahigugma ha malipayon nga humaratag,” diri ha usa nga naghahatag “ha kasubo o ha kinahanglan [“pinirit,” NW].”—2 Korinto 9:7.

An daku nga pagtoo ngan kahibaro upod an putli nga gugma para ha mga igkasi-Kristiano an nag-aghat ha mga taga-Korinto nga kinaburut-on nga maghatag.—2 Korinto 8:7, 8.

“Sugad han Uyon han Iya Kasingkasing”

Imbes nga ihatag an espisipiko nga kantidad o porsyento, nagsuhestyon la hi Pablo nga “ha siyahan nga adlaw han kada semana, an kada usa . . . sadang maggahin hin usa nga kantidad hin kwarta uyon ha iya kita.” (Amon an italiko; 1 Korinto 16:2, NIV) Pinaagi han pagplano ngan regular nga paggahin hin kantidad, diri mapipiritan an mga taga-Korinto ha paghatag o matigdaan kon umabot hi Pablo. Para ha tagsa nga Kristiano, personal nga desisyon kon pira an ihahatag, desisyon nga “uyon han iya kasingkasing.”—2 Korinto 9:5, 7.

Basi hura nga mag-ani, an mga taga-Korinto kinahanglan hura nga magsabwag. Waray gud ginhimo nga suhestyon ha paghatag hin labaw han maaakos. ‘Diri ko karuyag nga magin makuri ito para ha iyo,’ ginpasarig hira ni Pablo. An mga amot ‘labi nga kinakarawat sumala ha tinatag-iya han tawo, diri sumala ha kon ano an waray niya.’ (2 Korinto 8:12, 13; 9:6, NW) Ha usa nga urhi nga surat, an apostol nagpahamangno: “Kon may-ada diri magpatigayon . . . ha iya panimalay, naglirong na hiya han pagtoo, ngan mamaraot pa ha diri matinoohon.” (1 Timoteo 5:8) Waray iaghat ni Pablo an paghatag nga matalapas hini nga prinsipyo.

Makatirigamnan nga gindumara ni Pablo an ‘pangulekta para ha mga baraan’ nga nanginahanglan. Waray naton mababasa ha Kasuratan mahitungod kan Pablo o han iba nga mga apostol nga nag-organisa hin mga pangulekta o nagkarawat hin ikanapulo ha pagtapar han gastos han  ira kalugaringon nga mga ministeryo. (Buhat 3:6) Tungod kay pirme mapasalamaton ha pagkarawat han mga regalo nga iginpadara ha iya han mga kongregasyon, matinumanon nga ginlikyan ni Pablo an pag-obligar hin ‘magastos nga pinas-an’ ha iya kabugtoan.—1 Tesalonika 2:9; Filipos 4:15-18.

Kinaburut-on nga Paghatag Yana nga Panahon

Matin-aw, durante han siyahan nga siglo, an mga sumurunod ni Kristo kinaburut-on nga naghahatag, diri nag-oobligar han ikanapulo. Kondi, bangin maghunahuna ka kon epektibo pa ba ini nga paagi ha pagtapar han gastos han pagsangyaw han maopay nga sumat ngan ha pag-ataman han mga Kristiano nga nanginginahanglan.

Tagda an masunod. Han 1879 an mga editor hini nga magasin dayag nga nagsiring nga hira “diri gud makikilimos o mamimirit ha mga tawo para hin bulig.” Ito ba nga desisyon nakapugong ha mga pangalimbasog han mga Saksi ni Jehova nga ipasarang an kamatuoran han Biblia?

Yana nga panahon, an mga Saksi nananaltag hin mga Biblia, mga libro mahitungod kan Kristo, ngan iba nga mga publikasyon ha 235 nga nasud. Ha tinikangan, An Barantayan nga usa ka edukasyonal nga magasin han Biblia, iniimprinta ha 6,000 nga kopya ha usa nga yinaknan kada bulan. Tikang nga nagkaada ito duha nga gowa kada bulan iniimprinta na ito yana ha sobra 24,000,000 nga kopya ha 146 nga yinaknan. Basi maorganisa an ira pagtutdo nga buruhaton mahitungod han Biblia ha bug-os nga tuna, an mga Saksi nakagtukod na o nakapalit hin mga sanga nga opisina ha 110 nga nasud. Dugang pa, nagtutukod hira hin yinukot nga lokal nga katirokan sugad man hin dagku nga mga katirokan para ha asembleya basi may malingkoran adton interesado ha pagkarawat hin dugang nga instruksyon ha Biblia.

Bisan kon pinakaimportante an pag-ataman han espirituwal nga mga panginahanglan han katawohan, diri ginbabalewaray han mga Saksi ni Jehova an materyal nga mga panginahanglan han mga igkasi-tumuroo. Kon nag-aantos an ira kabugtoan han epekto han mga girra, mga linog, mga huraw, ngan mga bagyo, madagmit hira ha pagtagana hin medikal nga mga suplay, pagkaon, mga bado, ngan iba pa nga mga kinahanglanon. Gintataparan ini  nga mga gastos pinaagi han mga donasyon nga ginhimo han tagsa nga mga Kristiano ngan han mga kongregasyon.

Dugang pa ha pagin epektibo, an kinaburut-on nga pag-amot nagkukuha han pinas-an hadton mga kablas, sugad kan Genival nga gin-unabi kanina. Maopay na la nga antes niya maibaligya an iya balay, ginbisita hi Genival ni Maria, usa nga bug-os-panahon nga ministro han mga Saksi ni Jehova. “Ito nga pag-istorya nakatalwas han akon pamilya tikang ha damu nga diri-kinahanglanon nga kakurian,” nahinunumdom hi Genival.

Hinsabtan ni Genival nga an buruhaton han Dios diri nadepende ha mga ikanapulo. Ha pagkamatuod, an paghatag han mga ikanapulo diri na Kasuratanhon nga kinahanglanon. Hinbaroan niya nga ginbibendisyonan an mga Kristiano kon naghahatag hira hin hura kondi diri hira obligado ha paghatag hin lahos han ira maaakos.

An kinaburut-on nga paghatag nakahatag hin totoo nga kalipay kan Genival. Iya ito iginpahayag ha sugad hini nga paagi: “Posible nga makahatag ako hin 10 porsyento o posible nga diri, kondi malipayon ako ha akon iginhahatag, ngan sigurado ako nga malipayon liwat hi Jehova.”

[Kahon/Mga Retrato ha pahina 6]

Igintutdo ba han Siyahan nga mga Amay han Iglesia an Paghatag han Ikanapulo?

“An mga riko nga amon kaupod nabulig ha mga pobre . . . Hira nga may pinansyal nga kapasidad, ngan disidido, nahatag han ginhuhunahuna nga angayan han kada tagsa.”—The First Apology, Justin Martyr, c. 150 K.P.

“Ha pagkamatuod iginpahinungod han mga Judio an ikanapulo han ira mga gintag-iya ha Dios, kondi igingahin han mga Kristiano an ngatanan nira nga mga panag-iya para ha mga katuyoan han Dios, . . . sugad han ginbuhat hiton kablas nga babaye nga balo nga naghulog han ngatanan niya nga pinakabuhian ha burutangan han bahandi han Dios.”—Against Heresies, Irenaeus, c. 180 K.P.

“Bisan kon may-ada kami burutangan-hin-bahandi, an kwarta hito diri iginpalit hin kaluwasan, sugad han relihiyon nga nagpapabayad hito. Makausa ha usa ka bulan, kon karuyag niya, an tagsa makakaghulog hin gutiay nga donasyon; kondi kon karuyag la niya, ngan kon mahihimo la niya: kay diri ito iginpipirit; boluntaryo an ngatanan.”—Apology, Tertullian, c. 197 K.P.

“Samtang nagtikadaku an Iglesia ngan gintukod an magkalainlain nga mga institusyon, nagin kinahanglanon an paghimo hin mga balaud nga magsisiguro han husto ngan permanente nga pinansyal nga suporta han mga klero. An pagbayad han mga ikanapulo ginsubad tikang ha Daan nga Balaud . . . An pinakasiyahan nga pagpasa hin balaud mahitungod ha isyu baga hin nakada ha surat han mga obispo nga nagkatirok ha Tours han 567 ngan ha [mga kanon] han Konsilyo han Macon han 585.”—The Catholic Encyclopedia.

[Ginkuhaan han Retrato]

Sinselyo, wala ha igbaw: Pictorial Archive (Near Eastern History) Est.

[Retrato ha pahina 4,5]

Nagpapalipay an kinaburut-on nga paghatag

[Mga Retrato ha pahina 7]

An boluntaryo nga mga amot nagtatapar han mga gastos ha pagsangyaw nga buruhaton, pagbulig durante han kasuruk-an, ngan han pagtukod hin mga katirokan