“Hiya Magigin Duok ha Iyo”

“[An Dios] diri hirayo ha tagsatagsa ha aton.”—BUHAT 17:27.

1, 2. (a) Kon nagkikita ha igbaw ha damu-an-bitoon nga kalangitan, ano an bangin igpakiana naton mahitungod han Maglalarang? (b) Paonan-o ginpapasarig kita han Biblia nga an mga tawo birilhon gud ha paniplatan ni Jehova?

 NAGKITA ka na ba ha igbaw ha damu-an-bitoon nga kalangitan ha malinaw nga gab-i ngan nahipausa? Urusahon gud an kadamu han mga bitoon ngan an kahaluag han kawanangan. Hinin daku hinduro nga uniberso, an tuna usa la ka gutiay nga tuldok. Nangangahulogan ba ini nga an Maglalarang, “an Gihitaasi ha bawbaw han tuna,” hitaas hinduro nga magin interesado pa ha mga tawo o hirayo hinduro ngan diri hiaagian basi makilala nira?—Salmo 83:18.

² An Biblia nagpapasarig ha aton nga an mga tawo birilhon gud ha paniplatan ni Jehova. Ha pagkamatuod, an Pulong han Dios nagdadasig ha aton nga pamilngon hiya, nasiring: “Hiya diri hirayo ha tagsatagsa ha aton.” (Buhat 17:27; 1 Kronikas 28:9) Oo, kon maghimo kita hin mga paagi basi magin duok ha Dios, hiya magios uyon ha aton mga pangalimbasog. Ha ano nga paagi? An mga pulong han aton tinuig nga teksto para ha 2003 naghahatag hin makalilipay nga baton: “Hiya magigin duok ha iyo.” (Jakobo 4:8, NW) Aton paghisgotan an pipira han urusahon nga mga bendisyon nga iginhahatag ni Jehova ngada hadton duok ha iya.

Usa ka Personal nga Regalo Tikang kan Jehova

 3. Ano nga regalo an iginhahatag ni Jehova ngada hadton duok ha iya?

³ Siyahan, an mga surugoon ni Jehova may-ada usa ka presyoso nga regalo nga iya igin-andam para ha iya katawohan. An ngatanan nga gahum, bahandi, ngan edukasyon nga igintatanyag hini nga sistema han mga butang diri makakahatag hini nga regalo. Usa ka personal nga regalo ito, usa nga iginhahatag ni Jehova ngada la hadton duok ha iya. Ano ito? An Pulong han Dios nabaton: “Kon . . . alsahon mo an imo tingog para ha sarabotan; kon mamiling ka ha iya sugad hin salapi, ngan magsusi para ha iya sugad hin para ha tinago nga mga bahandi: dida hito makakasabot ka han kahadlok kan Jehova, ngan makakaagi han paghibaro han Dios. Kay hi Jehova nahatag hin kinaadman.” (Proberbios 2:3-6) Handurawa an diri-hingpit nga mga tawo nga makakaagi han ‘kahibaro ha Dios’! Ito nga regalo—an kahibaro nga makikita ha Pulong  han Dios—iginpapariho ha “tinago nga mga bahandi.” Kay ano?

4, 5. Kay ano nga ‘an kahibaro ha Dios’ maipapariho ha “tinago nga mga bahandi”? Iilustrar.

⁴ An usa nga hinungdan, birilhon hinduro an kahibaro ha Dios. Usa han pinakapresyoso nga mga balos hito amo an paglaom ha kinabuhi nga waray kataposan. (Juan 17:3) Kondi ito nga kahibaro nagpapauswag han aton kinabuhi bisan yana. Pananglitan, sugad nga resulta han aton maopay nga pag-aram ha Pulong han Dios, hinbaroan na naton an mga baton ha importante nga mga pakiana sugad han: Ano an ngaran han Dios? (Salmo 83:18) Ano an totoo nga kahimtang han mga patay? (Eklesiastes 9:5, 10) Ano an katuyoan han Dios para han tuna ngan katawohan? (Isaias 45:18) Hinbaroan na liwat naton nga an gimaopayi nga paagi han pagkinabuhi amo an pag-aplikar han maaramon nga sagdon han Biblia. (Isaias 30:20, 21; 48:17, 18) Salit, may-ada kita maopay nga giya nga nabulig ha aton nga malamposan an mga pangarit ha kinabuhi ngan igpadayon an paagi han kinabuhi nga nagriresulta hin totoo nga kalipayan ngan katagbaw. Labaw ha ngatanan, an aton pag-aram ha Pulong han Dios nakabulig ha aton nga hibaroan an urusahon nga mga kalidad ni Jehova ngan magin duok ha iya. Ano pa an mas birilhon kay ha duok nga relasyon kan Jehova nga iginbasar ha ‘kahibaro ha Dios’?

⁵ May-ada usa pa nga hinungdan kon kay ano nga an kahibaro ha Dios maipapariho ha “tinago nga mga bahandi.” Pariho han damu nga mga bahandi, talagsahon la ito hini nga kalibotan. Ha unom ka bilyon nga umurukoy ha tuna, mga unom ka milyon la an mga magsiringba ni Jehova, o mga 1 ha kada 1,000, an nakaagi han ‘kahibaro ha Dios.’ Ha pag-ilustrar nga talagsahon an pribilehiyo nga mahibaro han kamatuoran han Pulong han Dios, tagda an usa la nga pakiana ha Biblia: Ano an nahitatabo kon an tawo namamatay? Maaram kita tikang ha Kasuratan nga an kalag namamatay ngan nga an patay waray na hinbabaroan. (Esekiel 18:4) Kondi, an sayop nga pagtoo nga may-ada nagpapadayon nga buhi ha sulod han usa ka tawo katapos mamatay, kinakarawat han kadam-an nga mga relihiyon han kalibotan. Importante ito nga bahin han mga relihiyon han Kakristianohan. Tinotoohan liwat ito ha Budhismo, Hinduismo, Islam, Jainismo, Judaismo, Shinto, Sikhismo, ngan Taoismo. Hunahunaa la—binilyon nga tawo an nalilimbongan hinin usa nga sayop nga doktrina!

6, 7. (a) Hin-o la an makakaagi han ‘kahibaro ha Dios’? (b) Ano nga ehemplo an nagpapakita nga ginbabalosan kita ni Jehova hin pagsabot nga igintago ha damu nga “mga makinaadmananon ngan masinabuton”?

⁶ Kay ano nga gutiay la nga mga tawo an nakakaagi han ‘kahibaro ha Dios’? Tungod kay diri masasabtan hin bug-os han usa an kahulogan han Pulong han Dios kon waray han Iya bulig. Hinumdumi, ini nga kahibaro usa nga regalo. Iginhahatag ito ni Jehova ngada la hadton disidido nga usisahon an iya Pulong nga may katangkod ngan pagpaubos. An sugad nga mga tawo bangin diri “mag-aram sumala ha unod.” (1 Korinto 1:26) Damu ha ira an bangin tagdon pa ngani nga “waray hibabroan ngan waray sarabotan” sumala ha mga suruklan han kalibotan. (Buhat 4:13) Kondi, diri ito importante. Ginbabalosan kita ni Jehova hin ‘kahibaro ha Dios’ tungod han mga kalidad nga nakikita niya ha aton kasingkasing.

⁷ Tagda an usa nga ehemplo. Damu nga mga eskolar ha Kakristianohan an naghihimo hin damu nga mga komentaryo mahitungod han Biblia. An sugad nga mga barasahon bangin naghihisgot han kasaysayan, han kahulogan han Hebreo ngan Griego nga mga pulong, ngan damu pa. Ha ngatanan nga ira hibabroan, an sugad ba nga mga eskolar tinuod nga nakaagi han ‘kahibaro ha Dios’? Bueno, nasasabtan ba nira hin matin-aw an tema han Biblia—an pagbindikar han pagkasoberano ni Jehova pinaagi han iya langitnon nga Ginhadian? Maaram ba hira nga hi Jehova nga Dios diri bahin han Trinidad? Kondi, kita may-ada gud husto nga pagsabot ha sugad nga mga butang. Kay ano? Tinatagan kita ni Jehova hin pagsabot ha espirituwal nga mga kamatuoran nga igintago ha “mga makinaadmananon ngan masinabuton.” (Mateo 11:25) Ginbabalosan gud ni Jehova adton duok ha iya!

“Hi Jehova Nagbabantay ha Ira Ngatanan nga Nahigugma ha Iya”

8, 9. (a) Paonan-o iginhulagway ni David an usa pa nga bendisyon para hadton duok kan Jehova? (b) Kay ano nga ginkikinahanglan han mga Kristiano an panalipod han Dios?

⁸ Adton duok kan Jehova nagpapahimulos hin usa pa nga bendisyon—an Iya panalipod. Hi salmista David, nga damu an mga kakurian ngan mga problema, nagsurat: “Hi Jehova hirani ha ira ngatanan nga nagsasangpit ha iya, ha ira ngatanan  nga nagsasangpit ha iya hin kamatuoran. Magtutuman hiya han tinguha nira nga nahahadlok ha iya; hiya liwat makakabati han ira singgit, ngan magluluwas ha ira. Hi Jehova nagbabantay ha ira ngatanan nga nahigugma ha iya.” (Salmo 145:18-20) Oo, hi Jehova hirani ngada hadton nahigugma ha iya ngan salit madagmit gumios ha pagbulig ha ira.

⁹ Kay ano nga ginkikinahanglan naton an panalipod han Dios? Dugang pa ha pag-abat han mga epekto han pagkinabuhi dida hinin “peligroso nga mga panahon nga makuri pakibagayan,” an totoo nga mga Kristiano an labi na nga puntirya han punoan nga Kaaway ni Jehova, hi Satanas nga Yawa. (2 Timoteo 3:1, NW) Iton tuso nga kaaway determinado ha ‘paglamoy’ ha aton. (1 Pedro 5:8) Hi Satanas nagtitimaraot, nag-iipit, ngan nagsusulay ha aton. Namimiling liwat hiya hin mga disposisyon han hunahuna ngan kasingkasing nga magagamit niya. An iya katuyoan: pagpaluya han aton pagtoo ngan pagdaot han aton espirituwalidad. (Pahayag 12:12, 17) Tungod kay may-ada kita han sugad kagamhanan nga kaaway nga kinahanglan atohan, diri ba nagpapasarig nga hibaroan nga “hi Jehova nagbabantay ha ira ngatanan nga nahigugma ha iya”?

10. (a) Paonan-o ginbabantayan ni Jehova an iya katawohan? (b) Ano an pinakaimportante nga klase hin panalipod, ngan kay ano?

¹⁰ Kondi, paonan-o ginbabantayan ni Jehova an iya katawohan? An iya saad nga panalipod diri naggagarantiya ha aton hin kinabuhi nga waray problema dida hini nga sistema; diri liwat ito nangangahulogan nga obligado hiya ha pagbuhat hin mga milagro para ha aton. Kondi, hi Jehova naghahatag hin pisikal nga panalipod para ha iya katawohan sugad nga grupo. Aw, diri gud niya tutugotan an Yawa nga poohon an totoo nga mga magsiringba dinhi ha tuna! (2 Pedro 2:9) Labaw ha ngatanan, ginpapanalipdan kita ni Jehova ha espirituwal. Iya kita sinasangkapan han aton ginkikinahanglan basi makailob ha mga kakurian ngan bantayan an aton relasyon ha iya. Ha kataposan, an espirituwal nga panalipod an pinakaimportante nga klase hin panalipod. Kay ano? Tubtob nga gintitipigan naton an aton relasyon kan Jehova, waray bisan ano—bisan an kamatayon—nga makakadaot ha aton hin permanente.—Mateo 10:28.

11. Ano nga mga tagana an ginhihimo ni Jehova basi panalipdan ha espirituwal an iya katawohan?

¹¹ Hi Jehova naghihimo hin damu nga mga tagana basi panalipdan ha espirituwal adton duok ha iya. Pinaagi han iya Pulong, an Biblia, iya iginhahatag ha aton an kinaadman basi malamposan an magkalainlain nga mga kakurian. (Jakobo 1:2-5) An pag-aplikar han praktikal nga sagdon han Kasuratan usa nga panalipod mismo. Dugang pa, hi Jehova naghahatag han ‘baraan nga espiritu ha mga nangangaro ha iya.’ (Lukas 11:13) Ito nga espiritu amo an pinakagamhanan nga puwersa ha uniberso, salit sigurado nga magsasangkap ito ha aton basi atubangon hin malampuson an bisan ano nga pagsari o pagsulay nga maabot ha aton. Pinaagi kan Kristo, hi Jehova nagtatagana hin “mga regalo nga kalalakin-an.” (Efeso 4:8, NW) Inin kuwalipikado ha espirituwal nga kalalakin-an nangangalimbasog nga magpakita han kinasingkasing nga pagpaid ni Jehova kon binubuligan nira an mga igkasi-magsiringba.—Jakobo 5:14, 15.

12, 13. (a) Pinaagi han ano iginhahatag ni Jehova ha aton an espirituwal nga pagkaon ha husto nga panahon? (b) Ano an inaabat mo mahitungod han mga tagana ni Jehova para ha aton espirituwal nga kahimsog?

¹² May-ada pa igintatagana hi Jehova ha pagpanalipod ha aton: espirituwal nga pagkaon ha husto nga panahon. (Mateo 24:45) Pinaagi han inimprinta nga mga publikasyon, upod na an mga  magasin nga An Barantayan ngan Awake!, ngan pinaagi han mga katirok, mga asembleya, ngan mga kombensyon, iginhahatag ni Jehova ha aton kon ano an aton ginkikinahanglan ha panahon nga ginkikinahanglan naton ito. Nahinunumdoman mo ba an okasyon han hinbatian mo an usa nga butang ha Kristiano nga katirok, asembleya, o ha kombensyon nga nakabantad han imo kasingkasing ngan nagparig-on o nakaliaw ha imo? May-ada ka na ba nabasa nga artikulo ha usa han mga magasin nga gin-unabi ha igbaw ngan inabat mo nga iginsurat ito para gud ha imo?

¹³ Usa han pinakaepektibo nga mga armas ni Satanas amo an kahulop, ngan diri kita talwas ha mga epekto hito. Maaram gud hiya nga an maiha nga pagbati hin pagturaw makakawara han aton kusog, makakapaluya pa ngani ha aton. (Proberbios 24:10) Tungod kay nangangalimbasog hi Satanas ha pagsalingabot han mga pagbati hin kahulop, ginkikinahanglan naton an bulig. An Barantayan ngan Awake! nga mga magasin ha panapanahon nagpupublikar hin mga artikulo nga nabulig ha aton nga maatohan an kahulop. Mahitungod han usa han sugad hito nga mga artikulo, usa nga Kristiano nga bugto nga babaye an nagsurat: “Binabasa ko an artikulo haros kada adlaw, ngan naturo pa gihapon an akon mga luha. Gintitipigan ko ito ha akon higdaan basi mabasa ko ito kon naabat ako hin kahulop. Pinaagi han sugad hini nga mga artikulo, inaabat ko gud an nagpapanalipod nga mga butkon ni Jehova nga nahangkop ha akon.” a Diri ba kita mapasalamaton kan Jehova tungod ha paghatag ha aton hin napapanahon nga espirituwal nga pagkaon? Hinumdumi, an iya mga tagana para han aton espirituwal nga kahimsog amo an mga ebidensya nga duok hiya ha aton ngan iginbubutang kita niya ilarom han iya nagpapanalipod nga pagmangno.

Pagdaop ha “Parapamati han Pag-ampo”

14, 15. (a) Ano nga personal nga bendisyon an iginhahatag ni Jehova ngada hadton duok ha iya? (b) Kay ano nga birilhon nga pribilehiyo an libre nga pagdaop kan Jehova ha pag-ampo?

¹⁴ Naoobserbahan mo ba nga samtang an mga tawo nagkakaada gahum ngan awtoridad, agsob nga nagigin makuri hira madaop hadton ilarom han ira awtoridad? Kondi, kumusta man hi Jehova nga Dios? Hirayo ba hiya hinduro salit diri na interesado ha mga iginpapahayag ha iya han mga tawo? Diri gud! An regalo nga pag-ampo usa pa nga bendisyon nga iginhahatag ni Jehova ngada hadton duok ha iya. Usa ka birilhon gud nga regalo an iginhatag nga libre nga pagdaop ha “Parapamati han pag-ampo.” (Salmo 65:2) Kay ano?

¹⁵ Ha pag-ilustrar: An usa nga manidyer han daku nga korporasyon may-ada damu nga mga responsabilidad. Hiya an nagdidesisyon kon ano an iya personal nga bubuhaton ngan kon ano an itatapod niya ha iba. Ha pariho nga paagi, an Soberano nga Magmarando han uniberso makakapili kon ano nga mga butang an iya bubuhaton mismo ngan kon ano an iya itatapod ha iba. Tagda an ngatanan nga igintapod ni Jehova ha iya hinigugma nga Anak, hi Jesus. An Anak tinagan hin “gahum ha paghukom.” (Juan 5:27) An mga anghel “ginpasakop niya.” (1 Pedro 3:22) An gamhanan nga baraan nga espiritu ni Jehova andam pirme nga gamiton ni Jesus basi buligan hiya ha panguna ha iya mga disipulo dinhi ha tuna. (Juan  15:26; 16:7) Salit hi Jesus makakasiring: “Ngatanan nga kagamhanan iginhatag ha akon ha langit ngan ha tuna.” (Mateo 28:18) Kondi, mahitungod han aton mga pag-ampo, karuyag ni Jehova nga personal nga mahiupod hiya. Salit an Biblia nagtututdo ha aton nga ipahayag an aton mga pag-ampo ngadto kan Jehova gud la, ginbubuhat ito ha ngaran ni Jesus.—Salmo 69:13; Juan 14:6, 13.

16. Kay ano nga makakasarig kita nga hi Jehova namamati gud ha aton mga pag-ampo?

¹⁶ Namamati gud ba hi Jehova ha aton mga pag-ampo? Kon diri hiya interesado, diri gud unta hiya magsasagda ha aton nga ‘magpadayon gud ha pag-ampo’ o ipasa ha iya an aton mga pinas-an ngan mga pangarit. (Roma 12:12; Salmo 55:22; 1 Pedro 5:7) An matinumanon nga mga surugoon ha mga panahon han Biblia may-ada bug-os nga pagsarig nga hi Jehova namamati ha pag-ampo. (1 Juan 5:14) Salit, hi salmista David nagsiring: “Makakabati [hi Jehova] han akon tingog.” (Salmo 55:17) Kita liwat may-ada han ngatanan nga hinungdan nga sumarig nga hi Jehova duok, andam ha pamati ha ngatanan nga aton panhunahuna ngan pangarit.

Ginbabalosan ni Jehova an Iya mga Surugoon

17, 18. (a) Ano an inaabat ni Jehova mahitungod han matinumanon nga pag-alagad han iya intelihente nga mga linarang? (b) Isaysay kon paonan-o ipinapakita han Proberbios 19:17 nga nakikita ni Jehova an aton maloloy-on nga mga buhat.

¹⁷ An katungdanan ni Jehova sugad nga Soberano ha Uniberso diri naaapektohan han ginbubuhat o diri ginbubuhat han mga tawo. Kondi, maapresyaron nga Dios hi Jehova. Iya pinabibilhan—ha pagkamatuod, hinigugma—an matinumanon nga pag-alagad han iya intelihente nga mga linarang. (Salmo 147:11) Ini, kon sugad, an usa pa nga kapulsanan nga pinahihimulsan hadton duok kan Jehova: Iya ginbabalosan an iya mga surugoon.—Hebreo 11:6.

¹⁸ Matin-aw nga ipinapakita han Biblia nga pinabibilhan ni Jehova an ginbubuhat han iya mga magsiringba. Pananglitan, aton mababasa: “Hiya nga may pagbati han kablas naalayon kan Jehova, ngan han iya maopay nga buhat iya hiya pagbabayaran liwat.” (Proberbios 19:17) An maloloy-on nga pagtagad ni Jehova ha mga kablas ipinakita ha  Mosaiko nga Balaud. (Lebitiko 14:21; 19:15) Ano an inaabat ni Jehova kon aton ginsusubad an iya kalooy ha aton pagtrato ha mga kablas? Kon kita naghahatag ha kablas, nga diri naglalaom hin bisan ano sugad nga balos, gintatagad ini ni Jehova sugad nga utang Niya. Hi Jehova nagsasaad nga babayaran ito nga utang pinaagi han pag-uyon ngan bendisyon. (Proberbios 10:22; Mateo 6:3, 4; Lukas 14:12-14) Oo, kon napaid kita ha igkasi-magsiringba nga nanginginahanglan, nakakalipay ito han kasingkasing ni Jehova. Mapasalamaton gud kita nga an aton maloloy-on nga mga buhat nahinunumdoman han aton langitnon nga Amay!—Mateo 5:7.

19. (a) Kay ano nga makakasarig kita nga pinabibilhan ni Jehova an aton ginbubuhat ha pagsangyaw ngan paghimo-hin-disipulo nga buruhaton? (b) Paonan-o ginbabalosan ni Jehova an mga buhat han pag-alagad ha pagsuporta ha iya Ginhadian?

¹⁹ Pinabibilhan gud ni Jehova an aton ginbubuhat para ha iya Ginhadian. Kon naduok kita kan Jehova, natural la nga karuyag naton gamiton an aton panahon, kusog, ngan mga bahandi basi makigbahin hin bug-os ha pagsangyaw han Ginhadian ngan paghimo-hin-disipulo nga buruhaton. (Mateo 28:19, 20) Usahay, bangin umabat kita nga gutiay la an aton nahihimo. An aton diri-hingpit nga kasingkasing bangin magpagios pa ngani ha aton nga maghunahuna kon nalilipay ba hi Jehova ha aton mga pangalimbasog. (1 Juan 3:19, 20) Kondi pinabibilhan ni Jehova an tagsa nga regalo—bisan kon gutiay gud ito—nga nagtitikang ha kasingkasing nga ginpagios han gugma. (Markos 12:41-44) An Biblia nagpapasarig ha aton: “An Dios diri nga diri matadong, nga hikalimtan niya an iyo buhat ngan an iyo gugma nga iyo iginpakita tungod ha iya ngaran.” (Hebreo 6:10) Oo, nahinunumdoman ngan ginbabalosan ni Jehova bisan an gigutiayi nga buhat han pag-alagad ha pagsuporta ha iya Ginhadian. Dugang pa han hura nga espirituwal nga mga bendisyon yana, makakalaom kita han mga kalipayan han kinabuhi ha tiarabot nga bag-o nga kalibotan, diin hura nga ihahatag ngan tatagbawon ni Jehova an matadong nga mga hingyap han ngatanan nga duok ha iya!—Salmo 145:16; 2 Pedro 3:13.

20. Ha bug-os nga tuig han 2003, paonan-o naton matitipigan ha hunahuna an mga pulong han aton tinuig nga teksto, ngan ano an resulta?

²⁰ Ha bug-os nga tuig han 2003, pakianhan naton an aton kalugaringon kon padayon ba nga nangangalimbasog kita nga magin duok ha aton langitnon nga Amay. Kon nangangalimbasog kita, makakasiguro kita nga bubuhaton niya an iya iginsaad. Aw, ‘an Dios diri nagbubuwa.’ (Tito 1:2) Kon magin duok ka ha iya, hiya magigin duok ha imo. (Jakobo 4:8) Ngan ano an resulta? Hura nga mga bendisyon yana ngan paglaom nga magin mas duok kan Jehova ha kadayonan!

[Footnote]

Nahinunumdoman Mo Ba?

• Ano nga regalo an iginhahatag ni Jehova ngada hadton duok ha iya?

• Ano an mga tagana ni Jehova basi panalipdan ha espirituwal an iya katawohan?

• Kay ano nga an paghatagi hin libre nga pagdaop kan Jehova ha pag-ampo usa ka makatirigamnan nga pribilehiyo?

• Paonan-o ipinapakita han Biblia nga pinabibilhan ni Jehova an matinumanon nga pag-alagad han iya intelihente nga mga linarang?

[Mga Pakiana]

[Retrato ha pahina 15]

Ginbibendisyonan kita ni Jehova hin pagsabot ha espirituwal nga mga kamatuoran

[Mga Retrato ha pahina 16, 17]

Hi Jehova nagtatagana hin espirituwal nga panalipod

[Retrato ha pahina 18]

Hi Jehova duok, andam mamati ha aton tagsa nga pag-ampo