Kapitulo Onse

“Ayaw Niyo Ibutang an Iyo Pagsarig ha mga Prinsipe”

Isaias 50:1-11

1, 2. (a) Ano nga giniyahan nga sagdon an waray pamatii han mga Judio, ngan ano an resulta? (b) Kay ano nga hi Jehova nagpakiana: ‘Hain an kasuratan han pagbulag?’

 “AYAW niyo ibutang an iyo pagsarig ha mga prinsipe, bisan ngani dida ha anak han tawo, ha kan kanay waray pagbulig [“kaluwasan,” NW]. . . . Malipayon adton may-ada magbarantay nga amo an Dios ni Jakob, nga an iya paglaom aada kan Jehova nga iya Dios: hiya nga naghimo han langit ngan han tuna.” (Salmo 146:3-6) Kon ginbuhat la unta han mga Judio nga buhi ha panahon ni Isaias an iginsagdon han salmista! Kon sinarig la unta hira, diri ha Ehipto o ha bisan ano nga pagano nga nasud, kondi ha “Dios ni Jakob”! Niyan, ha pag-abot han mga kaaway han Juda, pananalipdan unta hiya ni Jehova. Kondi, an Juda waray mangaro han bulig ni Jehova. Sugad nga resulta, gintugotan ni Jehova nga mabungkag an Jerusalem ngan dad-on nga bihag an mga umurukoy han Juda ngadto ha Babilonya.

² Waray iba nga mababasol han Juda kondi an iya kalugaringon. Diri hiya mahimo sumiring nga inabot an iya kabungkagan tungod kay naglingo ha iya hi Jehova o nagpasibaya ha iya kauyonan ha nasud. An Maglalarang diri nagbubungkag hin kauyonan. (Jeremias 31:32; Daniel 9:27; Pahayag 15:4) Ha pagpabug-at hini nga kamatuoran, nagpakiana hi Jehova ha mga Judio: “Hain man an surat han kanan iyo iroy pagbulag, nga tungod hini akon hiya isinalikway?” (Isaias 50:1a) Ilarom han Mosaiko nga Balaud, an lalaki nga nagdidiborsyo ha iya asawa kinahanglan maghatag ha iya hin kasuratan han diborsyo. Katapos hito, may kagawasan na hiya nga magin asawa hin iba nga lalaki. (Deuteronomio 24:1, 2) Ha simboliko nga kahulogan, hi Jehova naghatag hin sugad nga kasuratan ha bugto nga ginhadian han Juda, an Israel, kondi waray niya ito buhata ha Juda. a Hiya la gihapon an “bana nga tag-iya” hito. (Jeremias 3:8, 14, NW) An Juda sigurado nga waray kagawasan nga makig-upod ha pagano nga mga nasud. Magpapadayon an relasyon ni Jehova hito “tubtob nga umabot hi Shilo [an Mesias].”—Genesis 49:10.

 3. Tungod ha ano nga hinungdan “iginbaligya” ni Jehova an iya katawohan?

³ Nagpakiana liwat hi Jehova ha Juda: “Hain han akon pinanhihiutangan an ginbaligyaan ko ha iyo?” (Isaias 50:1b) An mga Judio diri ipapadara nga bihag ha Babilonya basi mabayaran an utang kuno ni Jehova. Hi Jehova diri pariho ha kablas nga Israelita nga kinahanglan magbaligya han iya mga anak ha usa nga gin-utangan basi mabayaran an utang. (Eksodo 21:7) Lugod, iginpatin-aw ni Jehova an tinuod nga hinungdan kon kay ano nga an iya katawohan magigin uripon: “Kitaa, tungod han iyo mga karaotan kamo iginbaligya, ngan tungod han iyo mga pagtalapas an iyo iroy isinalikway.” (Isaias 50:1c) An mga Judio an nagsalikway kan Jehova; diri hiya an nagsalikway ha ira.

4, 5. Paonan-o ipinakita ni Jehova an iya gugma ha iya katawohan, kondi paonan-o ginios an Juda?

⁴ An sunod nga pakiana ni Jehova matin-aw nga nagpapabug-at han iya gugma ha iya katawohan: “Kay ano nga han akon pag-abot waray tawo? Han akon pagtawag, waray binaton?” (Isaias 50:2a, “NW”) Pinaagi han iya mga surugoon nga mga propeta, hi Jehova sinulod, siring pa, ha balay han iya katawohan basi makimalooy ha ira nga bumalik hin kinasingkasing ha iya. Kondi waray hira gumios. Mas ginpili han mga Judio nga sumarig ha tunan-on nga tawo para hin bulig, ngan may mga panahon nga sinarig pa ngani hira ha Ehipto.—Isaias 30:2; 31:1-3; Jeremias 37:5-7.

⁵ An Ehipto ba mas masasarigan nga manluluwas kay ha kan Jehova? Adton diri matinumanon nga mga Judio matin-aw nga nahingalimot ha mga hitabo nga nagresulta ha kaporma han ira nasud mga siglo na an naglabay. Hi Jehova nagpakiana ha ira: “Nahalipot na ba an akon kamot nga ini diri na makaglukat? o waray ba ako gahum ha pagluwas? Kitaa, ha akon pagsaway ako makakapamara han dagat, akon mahihimo an mga salog nga kamingawan: an ira mga isda magbabaho tungod kay waray na tubig, ngan magkakamatay ha kauhaw. Akon ginbistihan an mga langit hin maitom, ngan akon ginhimo an panapton nga sako nga ira tabon.”—Isaias 50:2b, 3.

6, 7. Paonan-o ipinakita ni Jehova an iya gahum ha pagtalwas ha atubangan han tarhog han Ehipto?

⁶ Han 1513 A.K.P., an Ehipto amo an matalumpiguson—diri an ginlalaoman nga manluluwas—han katawohan han Dios. An mga Israelita mga uripon dida hiton pagano nga nasud. Kondi ginluwas hira ni Jehova, ngan makalilipay gud adto nga kaluwasan! Siyahan, iya iginpadapat ha nasud an Napulo nga Peste. Katapos han makabungkag gud nga ikanapulo nga peste, ginsagda han Paraon han Ehipto an mga Israelita nga bumaya na ha nasud. (Eksodo 7:14–12:31) Kondi, nabaya pa la hira, nagbag-o dayon  an desisyon ni Paraon. Gintirok niya an iya kasundalohan ngan ginbukod an mga Israelita basi piriton hira nga bumalik ha Ehipto. (Eksodo 14:5-9) Tungod kay aada ha urhi nira an gidadamui nga mga sundalo han Ehipto ngan ha ira unhan amo an Dagat nga Pula, an mga Israelita waray na makakadtoan! Kondi nakadto hi Jehova basi makig-away para ha ira.

⁷ Ginpugngan ni Jehova an pagsulong han mga Ehiptohanon pinaagi han pagbutang hin harigi nga dampog ha butnga nira ngan han mga Israelita. Madulom an madakmol nga dampog ha dapit han mga Ehiptohanon; ha dapit han mga Israelita, malamrag. (Eksodo 14:20) Katapos, samtang nagpapabilin ha ira hinmumutangan an kasundalohan han Ehipto, kan Jehova “ginpabalik an dagat pinaagi hin makusog nga hangin tikang ha sinirangan ha bug-os nga gab-i, ngan ginhimo an dagat nga mamara nga tuna.” (Eksodo 14:21) Han nabahin na an tubig, an ngatanan nga katawohan—kalalakin-an, kababayin-an, ngan kabataan—nakatabok ha Dagat nga Pula ngadto ha katalwasan. Han an iya katawohan hirani na ha luyo nga baybayon, ginkuha ni Jehova an dampog. Tungod kay disidido ha pagbukod, an mga Ehiptohanon waray pag-alang nga linugsong ha tuna han nabahin nga dagat. Han an iya katawohan talwas na ha baybayon, ginbuhian ni Jehova an katubigan, ngan nalumos hi Paraon ngan an iya kasundalohan. Hito nga paagi nakig-away hi Jehova para ha iya katawohan. Daku gud nga pagdasig ito para ha mga Kristiano yana!—Eksodo 14:23-28.

 8. Ha kataposan, an mga umurukoy han Juda nabihag tungod ha pagsalikway ha ano nga mga pahamangno?

⁸ Ha panahon ni Isaias, pito ka gatos ka tuig na an naglabay tikang nga nahitabo ito nga kadaogan han Dios. An Juda usa na yana nga nasud nga may-ada kalugaringon nga mga katungod. Usahay, naghihimo hiya hin diplomatiko nga mga pakigtransaksyon ha langyaw nga mga gobyerno, sugad han Asirya ngan Ehipto. Kondi an mga lider hinin pagano nga mga nasud diri matataporan. Pirme nira uunahon an ira kalugaringon nga kaopayan kay ha bisan ano nga mga ginkasabotan nira ngan han Juda. Nagyayakan ha ngaran ni Jehova, ginpahamangnoan han mga propeta an katawohan nga diri hira tumapod ha sugad nga mga tawo, kondi waray namati ha ginsiring han mga propeta. Ha kataposan, an mga Judio magigin bihag ha Babilonya ha sulod hin 70 ka tuig nga pagin uripon. (Jeremias 25:11) Kondi, diri hingangalimtan ni Jehova an iya katawohan, diri man niya isasalikway hira ha kadayonan. Ha itinanda nga panahon, iya hira hinunumdoman, ngan iya aabrihan an dalan para ha ira pagbalik ha ira tuna nga natawohan basi igpahiuli an putli nga pagsingba. Ha ano nga katuyoan? Basi mag-andam para ha pag-abot ni Shilo, an usa nga susugton han ngatanan nga katawohan!

Inabot hi Shilo

 9. Hin-o hi Shilo, ngan ano hiya nga klase hin magturutdo?

⁹ Linabay an mga siglo. Inabot an “kahingpitan han takna,” ngan an usa nga tinatawag nga Shilo, an Ginoo nga hi Jesu-Kristo, kinanhi ha tuna. (Galasia 4:4; Hebreo 1:1, 2) An kamatuoran nga ginsugo ni Jehova an iya pinakaduok nga kaupod sugad nga iya Tagapagyakan ha mga Judio nagpapakita kon mationan-o kahinigugma ni Jehova an iya katawohan. Nagin ano nga klase hin tagapagyakan hi Jesus? Hiya an gimaopayi nga tagapagyakan! Hi Jesus labaw pa ha usa nga tagapagyakan, usa hiya nga magturutdo—Maabtik nga Magturutdo. Diri ito urusahon, tungod kay may-ada hiya gihitaasi nga Instruktor—hi Jehova nga Dios mismo. (Juan 5:30; 6:45; 7:15, 16, 46; 8:26) Pinamamatud-an ini han matagnaon nga ginsiring ni Jesus pinaagi kan Isaias: “An Ginoo hi Jehova naghatag ha akon han dila nira nga gintutdoan, nga ako mahibaro kon inoonan-o an pag-alang-agang pinaagi hin mga pulong ha iya nga ginugol-an: hiya namata ha ikinaaga, hiya nagpupukaw han akon talinga ha pamati sugad ha ira nga gintututdoan.”—Isaias 50:4. b

10. Paonan-o ipinakita ni Jesus an gugma ni Jehova para ha Iya katawohan, ngan ano nga reaksyon an nakarawat ni Jesus?

¹⁰ Antes kumanhi ha tuna, hi Jesus nagbuhat kaupod han iya Amay ha langit. An duok nga relasyon han Amay ngan han Anak iginhuhulagway ha sugad-siday nga paagi ha Proberbios 8:30: “Hadto dida ako ha [kan Jehova] hirani, sugad hin labaw nga magburuhat; . . . kanunay malipayon ha iya atubangan.” An pagpamati ha iya Amay nakalipay hinduro kan Jesus. Pariho ha iya Amay, may-ada liwat hiya gugma ha “mga anak han mga tawo.” (Proberbios 8:31) Han kinanhi hiya ha tuna, ginbaton ni Jesus ‘pinaagi hin mga pulong an ginugol-an.’ Iya gintikangan an iya ministeryo pinaagi han pagbasa hin nakakaliaw nga teksto tikang ha tagna ni Isaias: “An espiritu han Ginoo aadi ha akon; kay iya ako ginhirogan ha pagwali han mag-opay nga mga sumat ha mga makalolooy; . . . ha pagpagawas ha kaluwasan hadton may mga lapsok.” (Lukas 4:18; Isaias 61:1) Maopay nga sumat para ha kablas! Kapahuwayan para ha kinakapoy! Makalilipay gud ito nga sumat ha mga tawo! An iba nagrayhak gud man—kondi diri ngatanan. Ha kataposan, damu an waray kumarawat han mga kredensyal ni Jesus sugad nga usa nga gintutdoan ni Jehova.

11. Hin-o an nagpailarom ha yugo kaupod ni Jesus, ngan ano an ira naeksperyensyahan?

¹¹ Kondi, karuyag han iba nga makabati hin dugang pa. Malipayon nga ginios hira uyon ha makapadasig nga pagdapit ni Jesus: “Kadi ngatanan kamo ha akon, nga nagbubuhat ngan binubug-atan, ngan akon kamo tatagan hin pagpahuway. Pas-ana niyo an akon yugo, ngan magtoon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway ha iyo mga kalag.” (Mateo 11:28, 29) Kaupod hadton nagin duok kan Jesus amo an kalalakin-an nga nagin iya mga apostol. Maaram hira nga an pagpailarom ha yugo kaupod ni Jesus nangangahulogan hin mauyatom nga pagbuhat nira. Gawas han iba pa nga mga butang, nahiuupod hini nga buruhaton an pagsangyaw han maopay nga sumat han Ginhadian tubtob ha sidsid han tuna. (Mateo 24:14)  Samtang ginbubuhat han mga apostol ngan han iba nga mga disipulo ini nga buruhaton, ira nakita nga tinuod nga naghahatag gud ito hin kapahuwayan ha ira mga kalag. Ito nga buruhaton ginbubuhat liwat han matinumanon nga mga Kristiano yana, ngan an pakigbahin hito nakakalipay liwat ha ira.

Diri Hiya Rebelyoso

12. Ha ano nga mga paagi iginpapakita ni Jesus an iya pagsugot ha iya langitnon nga Amay?

¹² Waray gud hingalimot hi Jesus ha katuyoan han iya pagkanhi ha tuna—basi magbuhat han kaburut-on han Dios. Igintagna an iya pagtagad hini nga butang: “An Ginoo nga hi Jehova nag-abri han akon talinga, ngan ako waray magmasukihon, waray man ako umisol.” (Isaias 50:5) Hi Jesus pirme masinugtanon ha Dios. Ha tinuod, nagsiring pa ngani hiya: “An Anak diri sadang makagbuhat tikang ha iya ngahaw, kondi an nakita niya nga ginbuhat han Amay.” (Juan 5:19) Antes hiya nagin tawo, sigurado nga hi Jesus nagbuhat kaupod han iya Amay sulod hin minilyon, binilyon pa ngani nga katuigan. Han nakanhi na ha tuna, padayon nga ginsunod niya an mga instruksyon ni Jehova. Sugad nga diri-hingpit nga mga sumurunod ni Kristo, mas labaw pa gud nga sadang kita mangalimbasog ha pagbuhat han iginsusugo ni Jehova!

13. Ano an naghuhulat kan Jesus, kondi paonan-o niya ipinakita nga maisugon hiya?

¹³ An iba hadton nagsalikway ha bugtong nga Anak han Dios nagtimaraot ha iya, ngan igintagna liwat ini: “Ihinatag ko an akon bungkog ngadto ha mga parapanhampak, ngan an akon mga bayhon ngadto ha ira nga nan-gagabot han buhok; waray ako magtago han akon nawong tikang ha kaalo ngan ha paglura.” (Isaias 50:6) Sumala ha tagna, an Mesias mag-aantos hin kasakit ngan pakaalo ha mga kamot han mga parakontra. Maaram hini hi Jesus. Ngan maaram hiya kon tubtob diin ini nga pagtimaraot. Dugang pa, han hirani na matapos an iya panahon dinhi ha tuna, waray hiya magpakita hin kahadlok. Tungod kay may-ada determinasyon nga sugad katig-a han bato nga bantilis, nagpakadto hiya ha Jerusalem diin matatapos an iya tawhanon nga kinabuhi. Ha dalan tipakadto, ginsumatan ni Jesus an iya mga disipulo: “Kitaa, tisaka kita ha Jerusalem, ngan an Anak han tawo igtutubyan ha mga punoan han mga saserdote, ngan mga eskriba, ngan ira hiya paghuhukman ha kamatayon, ngan igtutubyan hiya ngadto ha mga Hentil; ngan pagyuyubitan hiya nira, ngan paglulud-an hiya; ngan paghahampakon hiya nira, ngan papatayon hiya, ngan ha ikatulo ka adlaw mababanhaw.” (Markos 10:33, 34) An hinungdan hini ngatanan nga maraot nga pagtrato amo an mga pagsulsol han mga tawo nga amo unta an mas maaram—an punoan nga mga saserdote ngan an mga eskriba.

14, 15. Paonan-o natuman an ginsiring ni Isaias nga hi Jesus paghahampakon ngan pagpapakaalohan?

¹⁴ Ha gab-i han Nisan 14, 33 K.P., hi Jesus nakadto ha hardin han Getsemani kaupod an iba han iya mga sumurunod. Nag-iinampo hiya. Tigda nga inabot an damu nga mga tawo ngan gindakop hiya. Kondi waray hiya mahadlok. Maaram hiya nga kaupod niya hi Jehova. Ginpasarig ni Jesus an iya nahahadlok nga mga apostol nga kon iya karuyag, mahimo hiya maghangyo ha iya Amay nga magpadara hin sobra dose ka lehiyon nga mga anghel basi talwason hiya, kondi hiya nagsiring: “Kon mahitabo ito, paonan-o matutuman an Kasuratan?”—Mateo 26:36, 47, 53, 54, NW.

¹⁵ Natuman an ngatanan nga igintagna may kalabotan ha mga pagsari ngan kamatayon han Mesias. Katapos hin malimbong nga pagbista ha atubangan han Sanhedrin, hi Jesus gin-usisa ni Ponsio Pilato, nga nagsugo nga latiguhon hiya. ‘Gindagulan hiya hin usa nga bagakay, ngan ginlud-an hiya’ han Romano nga mga sundalo. Hito nga paagi natuman an mga pulong ni Isaias. (Markos 14:65; 15:19; Mateo 26:67, 68) Bisan kon waray magsiring an Biblia nga aktuwal nga ginrabot an pipira han barangas ni Jesus—nga nagpapasabot hin duro nga pagtamay—sigurado nga natuman ini, sugad la han igintagna ni Isaias. c—Nehemia 13:25.

16. Ha atubangan han duro nga pag-ipit, paonan-o ginios hi Jesus, ngan kay ano nga waray hiya maawod?

¹⁶ Han inatubang hi Jesus kan Pilato, waray hiya makimalooy nga talwason an iya kinabuhi kondi nagpabilin hiya nga kalmado, maaram nga kinahanglan hiya mamatay basi matuman an Kasuratan. Han nagsiring an Romano nga gobernador nga may-ada hiya gahum ha paghukom kan Jesus hin kamatayon o ha pagpagawas ha iya, hi Jesus waray kahadlok nga binaton: “Ikaw waray bisan ano nga gahum kontra ha akon, kon diri ihinatag ha imo tikang ha igbaw.” (Juan 19:11) Sugad hin hayop nga gintrato han mga sundalo ni Pilato hi Jesus, kondi napakyas hira ha pagpakaalo ha iya. Kay ano nga maaawod hiya? Diri-makatadunganon nga ginsisirotan hiya tungod han diri totoo nga sala. Lugod, ginpapakurian hiya tungod han katadongan. Tungod hini, natuman an dugang pa nga matagnaon nga mga pulong ni Isaias: “An Ginoo hi Jehova mabulig ha akon; busa waray ako magupong; busa akon iginpahamutang an akon nawong pariho hin usa nga bato nga bantilis, ngan ako maaram nga ako diri pagpapakaalohan.”—Isaias 50:7.

17. Ha ano nga mga paagi nagpabilin hi Jehova ha sapit ni Jesus ha iya bug-os nga ministeryo?

¹⁷ An kaisog ni Jesus nagtikang ha iya bug-os nga pagsarig kan Jehova. An iya paggios nagpakita nga bug-os nga nauyon hiya ha ginsiring ni Isaias: “Hiya hiraniay nga nagmamatadong ha akon; hin-o an makikigsuhay ha akon? Panindog kita ngatanan: Hin-o an akon kasibang? Pahirania hiya ha akon. Kitaa, an Ginoo hi Jehova mabulig ha akon; hin-o hiya nga magsasayop ha akon? Kitaa, hira ngatanan magtitikalagas sugad hin usa nga panapton; an tangkob makaon ha ira.” (Isaias 50:8, 9) Ha adlaw han pagbawtismuhi kan Jesus, iginpahayag ni Jehova nga matadong hiya sugad nga espiritu nga anak han Dios. Ha pagkatinuod, hinbatian an tingog mismo han Dios hito nga takna, nasiring: “Ini amo an akon hinigugma nga Anak, nga akon nalilipayan.” (Mateo 3:17) Han hirani na matapos an iya tunan-on nga kinabuhi, samtang naluhod nga nag-aampo hi Jesus ha hardin han Getsemani,  “nagpakita ha iya an usa nga anghel tikang ha langit, ha pagparig-on ha iya.” (Lukas 22:41-43) Salit maaram hi Jesus nga inuuyonan han iya Amay an iya ginbubuhat. Inin hingpit nga Anak han Dios waray gud makasala. (1 Pedro 2:22) Gin-akusahan hiya hin buwa han iya mga kaaway nga hiya usa nga nagtatalapas han Sabbath, parahubog, ngan tawo nga ginsudlan hin demonyo, kondi hi Jesus waray mawad-i hin dungog bisan pa han ira mga buwa. Kaupod niya an Dios, salit hin-o an makontra ha iya?—Lukas 7:34; Juan 5:18; 7:20; Roma 8:31; Hebreo 12:3.

18, 19. Ano an naieksperyensyahan han dinihogan nga mga Kristiano nga pariho han naeksperyensyahan ni Jesus?

¹⁸ Hi Jesus nagpahamangno ha iya mga disipulo: “Kon ako ginbiling nira hin pagtimaraot amo man kamo pagbibilngon hin pagtimaraot.” (Juan 15:20) Pinamatud-an han mga hitabo nga totoo ini. Han Pentekostes 33 K.P., inabot an baraan nga espiritu ha matinumanon nga mga disipulo ni Jesus, ngan natukod an Kristiano nga kongregasyon. Nangalimbasog dayon an mga lider han relihiyon nga pugngan an pagsangyaw nga buruhaton hinin matinumanon nga kalalakin-an ngan kababayin-an nga kaupod na yana ni Jesus sugad nga bahin han ‘mga katulinan ni Abraham’ ngan sugad nga espirituwal nga mga anak han Dios. (Galasia 3:26, 29; 4:5, 6) Tikang han siyahan nga siglo tubtob yana, an dinihogan nga mga Kristiano, samtang marig-on nga nadapig ha katadongan, nagpapailob ha buwa nga propaganda ngan mapait nga pagtimaraot han mga kaaway ni Jesus.

¹⁹ Nahinunumdom pa gihapon hira ha makapadasig nga mga pulong ni Jesus: “Bulahan kamo, kon kamo pagdurugasan, ngan pagtitimarat-an ngan kon pagyayaknan ha ngatanan nga magraot hin buwa kontra ha iyo tungod ha akon. Magkalipay ngan maghimaya kamo, kay daku an iyo balos ha langit.” (Mateo 5:11, 12) Salit, bisan durante han pinakamapait nga mga pag-atake, an dinihogan nga mga Kristiano nagpapabilin ha ira integridad. Anoman an sidngon han ira mga kaaway, maaram hira nga iginpahayag na han Dios nga matadong hira. Ha iya paniplatan hira “waray buring, ngan diri sarawayon.”—Kolosas 1:21, 22.

20. (a) Hin-o an nasuporta ha dinihogan nga mga Kristiano, ngan ano an ira naieksperyensyahan? (b) Paonan-o an dinihogan nga mga Kristiano ngan an “iba nga mga karnero” nagkaada han dila han mga natutdoan?

²⁰ Ha moderno nga mga panahon an dinihogan nga mga Kristiano sinusuportahan han “daku nga panon” han “iba nga mga karnero.” Marig-on nga nadapig liwat hira ha katadongan. Tungod hini, nag-aantos hira kaupod han ira dinihogan nga kabugtoan ngan ira “pinanmunakan an ira higlawig nga panapton ngan ginpabusag ito ha dugo han Kordero.” Iginpahayag ni Jehova nga matadong hira nga ginhuhunahuna an pagtalwas ha ira ha “daku nga kagol-anan.” (Pahayag 7:9, 14, 15, NW; Juan 10:16, NW; Jakobo 2:23) Bisan kon an ira mga kaaway baga hin makusog yana mismo, an tagna ni Isaias nasiring nga ha itinanda nga panahon han Dios, ito nga mga kaaway magigin sugad gud han panapton nga ginkutkot han tangkob, angay la nga ilabog. Samtang yana, an dinihogan nga mga Kristiano ngan “an iba nga mga karnero” nagpapabilin nga marig-on pinaagi han regular nga pag-ampo, pag-aram han Pulong han Dios, ngan pagtambong ha mga katirok para ha pagsingba. Hito nga paagi gintututdoan hira ni Jehova ngan nahibabaro hira ha pagyakan nga may dila han mga natutdoan.

Sarig ha Ngaran ni Jehova

21. (a) Hin-o adton naglalakat ha kalamrag, ngan ano an ira dadangatan? (b) Ano an mahitatabo ha mga naglalakat ha kasisidman?

²¹ Tigamni yana an daku nga kaibahan: “Hin-o dida ha iyo an nahadlok kan Jehova, nga nasugot han tingog han iya surugoon? Hiya nga naglalakat ha kasisidman, ngan waray suga, pasariga hiya ha ngaran ni Jehova, ngan patapora ha iya Dios.” (Isaias 50:10) Adton namamati ha tingog han Surugoon han Dios, hi Jesu-Kristo, naglalakat ha kalamrag. (Juan 3:21) Diri la kay ginagamit nira an ngaran han Dios, nga Jehova, kondi nasarig liwat hira ha usa nga nagtatag-iya hito nga ngaran. Bisan kon hadto naglakat hira ha kasisidman, yana diri na hira nahahadlok ha mga tawo. Nasarig hira ha Dios. Kondi, adton nagpapadayon ha paglakat ha kasisidman nadadaog han kahadlok ha tawo. Ito an kahimtang ni Ponsio Pilato. Bisan kon maaram hiya nga hi Jesus waray sala ha buwa nga mga akusasyon kontra ha iya, an kahadlok nagpugong hito nga Romano nga opisyal nga buhian hi Jesus. Ginpatay han Romano nga mga sundalo an Anak han Dios, kondi ginbanhaw hiya ni Jehova ngan ginkoronahan hiya hin himaya ngan dungog. Kumusta man hi Pilato? Sumala ha Judio nga historyador nga hi Flavius Josephus, upat pa la ka tuig katapos mamatay hi Jesus, ginsaliwnan hi Pilato sugad nga Romano nga gobernador ngan ginpauli ha Roma basi batunon an mga akusasyon kontra ha iya mahitungod hin seryoso nga pakasala. Kumusta man an mga Judio nga nagpapatay kan Jesus? Waray pa mag-upat ka dekada ha urhi, ginbungkag han kasundalohan han Roma an Jerusalem ngan ginpatay o ginbihag an mga umurukoy hito. Waray makalilipay nga dadangatan adton nagpipili han kasisidman!—Juan 3:19.

22. Kay ano nga daku gud nga kalurongan an pagsarig ha mga tawo para han kaluwasan?

²² Matin-aw nga kalurongan gud nga sumarig ha mga tawo para han kaluwasan. Iginsasaysay han tagna ni Isaias an hinungdan: “Kitaa, kamo ngatanan nga nagharing hin kalayo, nga nag-aalimon ha iyo ngahaw hin mga isusurit; paglakat kamo dida ha laga han iyo kalayo, ngan dida ha mga isusurit [“siga,” “NW”] nga iyo ginparuktan. Mamamay-ada kamo hini tikang ha akon kamot; kamo mahigda ha kasubo.” (Isaias 50:11) An tawhanon nga mga lider diri permanente. Bangin madani han karinyoso nga indibiduwal an hunahuna han mga tawo sulod hin halipot nga panahon. Kondi bisan an pinakasinsero nga tawo may-ada limitado la nga mahihimo. Imbes nga magpasiga hin naglalaga nga kalayo, sugad han ginlalaoman han iya mga parasuporta, bangin maglampos la hiya ha pagdagkot hin gutiay nga “mga siga,” nga naghahatag hin gutiay nga kalamrag ngan kapaso kondi napaparong dayon. Ha luyo nga bahin, adton nasarig ha Shilo, an Mesias nga iginsaad han Dios, diri gud mapapakyas.

[Mga footnote]

[Mga Pakiana]