Mga Pakiana Tikang ha mga Magbarasa

Ano an iginpapasabot ni Pablo han hiya nagsiring: “Kada pangangaon niyo hini nga tinapay, ngan [pag-inom] hini nga tagayan”?

Ha pag-unabi ha tinikangan han Memoryal han kamatayon ni Jesus, hi Pablo nagsurat: “Kada pangangaon niyo hini nga tinapay, ngan [pag-inom] hini nga tagayan, iyo iginwawali an kamatayon han Ginoo ngada ha iya pagkanhi.” (1 Korinto 11:25, 26) Ginhuhunahuna han iba nga an pulong dinhi nga “kada” nagpapasabot nga an kamatayon ni Kristo sadang isaurog hin agsob, nga nangangahulogan hin damu ka beses. Salit, iginsasaurog nira ito hin mas agsob pa kay han makausa ha usa ka tuig. Ito ba an iginpapasabot ni Pablo?

Haros 2,000 ka tuig na yana tikang nga gintikangan ni Jesus an Memoryal han iya kamatayon. Salit, an pagselebrar han Memoryal bisan makausa ha usa ka tuig nangangahulogan nga ginsiselebrar ito hin agsob tikang pa han 33 K.P. Kondi, ha konteksto han 1 Korinto 11:25, 26, ginhisgotan ni Pablo, diri kon mationan-o kaagsob, kondi kon paonan-o sadang iselebrar an Memoryal. Ha orihinal nga Griego, waray niya gamita an pulong nga pol·laʹkis, nga nangangahulogan hin “kada” o “agsob.” Lugod, ginamit niya an pulong nga ho·saʹkis, nga nangangahulogan hin “ha kada,” usa nga ekspresyon nga nangangahulogan hin “ha bisan san-o,” “ha kada panahon nga.” Hi Pablo baga hin nasiring: ‘Ha kada panahon nga ginbubuhat niyo ini, iyo iginwawali an kamatayon han Ginoo.’ a

Mationan-o kaagsob, kon sugad, sadang isaurog an Memoryal han kamatayon ni Jesus? Angayan nga isaurog ito hin makausa ha usa ka tuig. Totoo gud nga usa ito ka memoryal, ngan an mga memoryal kasagaran nga tinuig nga ginsasaurog. Dugang pa, namatay hi Jesus ha adlaw han Judio nga Paskua, nga gindumara hin makausa ha usa ka tuig. Angayan la nga gintawag ni Pablo hi Jesus sugad nga “hi Kristo an aton paskua,” tungod kay an halad nga kamatayon ni Jesus nag-abri han dalan ha kinabuhi para han espirituwal nga Israel, sugad la nga an siyahan nga halad ha Paskua nagtipig nga buhi han mga suhag han natural nga mga Israelita ha Ehipto ngan nag-abri han dalan para han kagawasan han nasud tikang ha pagkauripon. (1 Korinto 5:7, NW; Galasia 6:16) An kalabotan hini ha tinuig nga Paskua han mga Judio amo an dugang nga pamatuod nga an Memoryal han kamatayon ni Jesus sadang saurugon hin makausa la ha usa ka tuig.

Dugang pa, iginkaw-ing ni Pablo an kamatayon ni Jesus ha usa pa nga tinuig nga piyesta han mga Judio, an Adlaw han Pagbayad han Sala. Ha Hebreo 9:25, 26, aton mababasa: “Diri na ngani [hi Jesus] makakadamu pa paghalad han iya kalugaringon, sugad han gihitaasi nga saserdote nga nasulod ngadto ha baraan nga lugar ha ikinatuig [ha Adlaw han Pagbayad han Sala] nga may dugo, nga diri iya kalugaringon. . . . Kondi niyan ha makausa ha kataposan han mga katuigan iginpahayag hiya ha pagpara ha mga sala tungod ha paghalad han iya kalugaringon.” Tungod kay an halad ni Jesus nagsaliwan han tinuig nga Adlaw han Pagbayad han Sala, an Memoryal han iya kamatayon angayan nga saurugon kada tuig. Waray Kasuratanhon nga hinungdan nga saurugon an Memoryal hin mas agsob pa hito.

Uyon hito, an historyador nga hi John Laurence von Mosheim nagreport nga an mga Kristiano han ikaduha ka siglo ha Asia Minor nahiara ha pagsaurog han Memoryal han kamatayon ni Jesus “ha ikakatorse nga adlaw han siyahan nga bulan han mga Judio [Nisan].” Ha urhi la nga mga tuig nga nagin kustomre ha Kakristianohan nga isaurog ito hin mas agsob kay ha makausa ha usa ka tuig.

[Footnote]