An “Madasigon nga mga Parasamwak han Ginhadian” Malipayon nga Nagkatirok

AN MGA krisis ha moral, ekonomiya, ngan politika nagbabay-og han kalibotan. Kondi, ha butnga hini ngatanan nga kasamok, an mga Saksi ni Jehova mamurayawon nga nagkatirok para ha tulo-ka-adlaw nga “Madasigon nga mga Parasamwak han Ginhadian” Distrito nga mga Kombensyon. Tikang han Mayo 2002, ini nga mga katirok gindumara na ha bug-os nga kalibotan.

Makalilipay gud nga mga okasyon an mga kombensyon. Aton repasuhon hin madaliay an makaparig-on nga programa nga basado ha Biblia.

An Siyahan nga Adlaw Nagpabug-at han Kadasig ni Jesus

“Subara an Kadasig han Aton Ginoo, hi Jesus” an tema han siyahan nga adlaw han kombensyon. (Juan 2:17) An pahayag nga “Malipay ha Pagkatirok Sugad nga mga Parasamwak han Ginhadian” mahigugmaon nga nag-aghat hadton natambong nga makigbahin ha kalipay nga amo pirme an pangirilal-an han mga kombensyon han katawohan han Dios. (Deuteronomio 16:15) Ini nga pahayag sinundan hin mga interbyu ha madasigon nga mga magsarangyaw han maopay nga sumat.

An pahayag nga “Magkaada Daku nga Kalipay kan Jehova Mismo” naghisgot ha kada bersikulo han Salmo 37:1-11. Ginsasagdonan kita nga “diri . . . magmasamdong” ha baga hin kalamposan han maraot. Bisan kon an maraot nga mga tawo bangin mag-istorya hin sayop mahitungod ha aton, maabot an panahon nga ipapakita ni Jehova kon hin-o gud an iya matinumanon nga katawohan. An pahayag nga “Ipakita Niyo an Pagin Mapasalamaton” naghisgot kon paonan-o kita magigin mapasalamaton ha Dios. An ngatanan nga mga Kristiano kinahanglan maghatag hin “halad han pagdayeg” ngadto kan Jehova. (Hebreo 13:15) Siyempre, an kadamu han panahon nga aton iginhahatag ha pag-alagad kan Jehova nadepende ha aton apresasyon ngan mga kahimtang.

An keynote address may-ada ulohan nga “Mga Parasamwak han Ginhadian nga Napagios han Kadasig.” Nagtudlok ito kan Jesu-Kristo sugad nga an aton gimaopayi nga susbaranan han kadasig. Katapos matukod an langitnon nga Ginhadian han 1914, an totoo nga mga Kristiano nagkinahanglan hin kadasig ha pagpasamwak hiton maopay nga sumat. Gin-unabi han mamumulong an kombensyon ha Cedar Point, Ohio, E.U.A., han 1922 ngan iginpahinumdom ha aton an makasaysayan nga panawagan: “Ipasamwak an Hadi ngan an iya Ginhadian”! Samtang nalabay an panahon, an kadasig han matinumanon nga mga surugoon han Dios nagpagios ha ira nga ipasamwak an urusahon nga mga kamatuoran han Ginhadian ha ngatanan nga mga nasud.

An pahayag nga “Magin Maisugon ha Paghibaro nga hi Jehova Kaupod Naton,” nga iginpahayag ha kulop han siyahan nga adlaw, nagpakita nga an katawohan han Dios amo an espesyal nga puntirya ni Satanas. Kondi, bisan pa han pagkontra nga aton inaatubang, an aton pagtagad ha damu nga mga susbaranan han pagtoo ha Biblia ngan ha moderno nga panahon naghahatag ha aton hin kaisog nga atubangon nga waray kahadlok an mga pagsari ngan mga pagsulay.—Isaias 41:10.

An sunod ha programa amo an tulo-ka-bahin nga simposyum mahitungod ha tema nga “An Tagna ni Mika Nagpaparig-on ha Aton nga Maglakat ha Ngaran ni Jehova.” Igintanding han siyahan nga mamumulong an kabungkag ha moral, relihiyoso nga apostasya, ngan materyalismo ha panahon ni Mika  ha aton mismo panahon. Hiya nagsiring: “An aton paglaom para ha tidaraon magigin sigurado kon aton ginpapatubo an masinugtanon nga kasingkasing ngan ginsisiguro nga baraan an aton paggawi ngan an aton kinabuhi puno hin mga buhat han diosnon nga debosyon—ngan kon diri gud naton hingalimtan nga an adlaw ni Jehova sigurado nga maabot.”—2 Pedro 3:11, 12.

An ikaduha nga mamumulong ha simposyum nagsaysay han pagkondenar ni Mika ha mga lider han Juda. Gin-abuso nira an mga kablas, waray-mahihimo nga mga tawo. Kondi igintagna liwat ni Mika an kadaogan han totoo nga pagsingba. (Mika 4:1-5) Tungod kay ginpapakusog han baraan nga espiritu ni Jehova, determinado kita ha pagpasamwak hinin nakakarepresko nga mensahe han paglaom. Kondi ano an aton magigin paggios kon naabat kita nga napupugngan kita tungod han sakit o naabat nga nalilimitahan ha iba nga mga paagi? An ikatulo nga mamumulong nagsiring: “An mga ginkikinahanglan ni Jehova makatadunganon ngan mahihimo naton.” Nagpadayon hiya ha paghisgot han magkalainlain nga mga bahin han Mika 6:8, diin aton mababasa: “Ano an kan Jehova ginkikinahanglan ha imo, kondi an pagbuhat ha subay, ngan paghigugma han pagpaid, ngan ha paglakat ha mapainubsanon kaupod han imo Dios?”

Tungod kay an pag-ubos ha moral han kalibotan mahimo makaapekto ha mga Kristiano, kita ngatanan nakapahimulos ha pahayag nga “Magpabilin nga Limpyo ha Moral Pinaagi han Pagpanalipod ha Imo Kasingkasing.” Pananglitan, an aton pagpabilin nga limpyo mabulig ha aton nga magkaada malipayon nga pag-asawa. Sugad nga mga Kristiano, kinahanglan diri gud naton hunahunaon bisan an ideya han pagbuhat hin seksuwal nga imoralidad.—1 Korinto 6:18.

An pahayag nga “Magbantay Kontra han Panlimbong” nagpakita nga maaramon nga gintatagad naton nga makamaratay an mga buwa, diri bug-os nga totoo, ngan direkta nga mga buwa nga iginpapasarang han mga apostata. (Kolosas 2:8) Ha pariho nga paagi, kinahanglan diri naton limbongan an aton kalugaringon ha paghunahuna nga mapapatagbaw naton an aton makasasala nga mga hingyap nga waray nakakadaot nga mga resulta.

 “Magsingba ha Amo La Matuod nga Dios” an ulohan han pangataposan nga pahayag han siyahan nga adlaw. Samtang an mga kahimtang ha kalibotan nagigin mas maraot pa gud, makapadasig gud an paghibaro nga diri na maiha pagdadad-on ni Jehova an iya matadong, bag-o nga kalibotan! Hin-o an mag-uukoy dida hito? Adto la nga nagsisingba kan Jehova. Basi mabuligan kita, an aton mga anak, ngan an aton mga estudyante ha Biblia nga madangat ini nga tumong, iginpagowa han mamumulong an bag-o nga aradman nga libro nga Worship the Only True God. Nalipay gud kita ha pagkarawat hito.

An Ikaduha ka Adlaw Nagpabug-at han Kadasig Para han Maopay

“Magin Madasigon Para ha Kaopayan” an tema han ikaduha ka adlaw han kombensyon. (1 Pedro 3:13) An siyahan nga mamumulong naghisgot han teksto ha Biblia para hito nga adlaw. Iya ginpabug-atan nga an regular, seryoso nga pagtagad han inadlaw nga teksto nagpapauswag han aton kadasig.

Katapos sumunod an simposyum nga “An mga Parasamwak han Ginhadian nga Naghihimaya han Ira Ministeryo.” Pinabug-atan han siyahan nga bahin an panginahanglan nga gamiton an Pulong han Dios ha husto nga paagi. (2 Timoteo 2:15) An aton epektibo nga paggamit han Biblia nakakabulig nga ‘magkaada gahum’ ito ha kinabuhi han mga tawo. (Hebreo 4:12, NW) Sadang naton idirekta an aton atensyon ha Biblia ngan mangatadongan pinaagi hito ha makakombinse nga paagi. An ikaduha nga bahin han simposyum nag-aghat ha aton nga balikon hin pauroutro an mga interesado. (1 Korinto 3:6) Ginkikinahanglan an pangandam ngan kaisog basi balikon dayon an mga interesado. An ikatulo nga bahin nagsagdon nga sadang naton hunahunaon an tagsa nga aton nakakaistorya sugad nga posible magin disipulo ngan nagpakita nga an pagtanyag hin pag-aram ha Biblia ha siyahan nga pagbisita mahimo  magresulta ha kalipay ha pagbulig ha mga indibiduwal nga magin mga disipulo.

“Kon kay Ano nga Sadang ‘Mag-ampo nga Waray Udong-Udong’” an tema han sunod nga pahayag. An Biblia nagsasagdon ha mga Kristiano nga maglaom ha Dios para han giya ha ngatanan nga kahimtang ha kinabuhi. Kinahanglan mag-eskedyol kita hin panahon para ha personal nga pag-ampo. Dugang pa, kinahanglan magpadayon kita ha pag-ampo, tungod kay bangin tugotan kita ni Jehova nga mag-inampo anay antes magin matin-aw an iya baton.—Jakobo 4:8.

An pahayag nga “Nagpaparig-on an Pakiistorya Mahitungod ha Espirituwal” nag-aghat ha aton nga gamiton an aton abilidad ha pagyakan basi makapahimulos kita ngan an iba. (Filipos 4:8) An mga mag-asawa ngan mga anak kinahanglan mag-iruistorya mahitungod han espirituwal nga mga butang kada adlaw. Basi matuman ito, sadang mangalimbasog an mga pamilya nga durungan nga mangaon bisan la makausa kada adlaw, ngan hito nga paagi nagkakaada makapadasig nga pag-iruistorya.

An programa ha aga nagtapos pinaagi han makalilipay nga pahayag nga “Kon Paonan-o an Dedikasyon Ngan Bawtismo Nagtutugway Ngadto ha Kaluwasan.” An mga kandidato ha bawtismo nakakuha na hin kahibaro, nagpakita hin pagtoo, nagbasol, ngan binaya ha sayop nga buhat, ngan nagdedikar han ira kalugaringon ngadto ha Dios. Katapos mabawtismohan, siring han mamumulong, kinahanglan magpadayon hira ha pagtubo ha espirituwal ngan ha pagtipig han ira kadasig ngan maopay nga panggawi.—Filipos 2:15, 16.

Hito nga kulop, duha nga importante nga punto an ginpabug-atan ha pahayag nga “Magin Mapainubsanon, Ngan Tipigi nga Simple an Imo Mata.” An pagin mapainubsanon nangangahulogan hin pagin reyalistiko ha aton mga limitasyon ngan ha aton kahimtang ha atubangan han Dios. An pagin mapainubsanon nabulig ha aton nga tipigan an aton mata nga “simple”—nakasentro ha Ginhadian han Dios, diri ha materyal nga mga butang. Kon bubuhaton naton ini, diri kita kinahanglan mabaraka, kay magtatagana hi Jehova han aton mga panginahanglan.—Mateo 6:22-24, 33, 34.

“Sarig hin Bug-os kan Jehova ha mga Panahon han Kakurian” an iginpatin-aw ha aton han sunod nga mamumulong. Paonan-o naton malalamposan an mga butang sugad han personal nga mga kaluyahan ngan mga problema ha pinansyal o ha pisikal? Mangaro kita kan Jehova hin praktikal nga kinaadman ngan maghangyo hin bulig tikang ha iba. Imbes nga mabaraka o manluya, sadang naton parig-unon an aton pagsarig ha Dios pinaagi ha pagbasa han iya Pulong.—Roma 8:35-39.

An ultimo nga simposyum han kombensyon may-ada tema nga “An Kalidad han Aton Pagtoo Nasasarihan Pinaagi han Magkalainlain nga mga Kakurian.” An siyahan nga bahin nagpahinumdom ha aton nga an ngatanan totoo nga mga Kristiano naatubang hin pagtimaraot. Nagigin pamatuod ito ha iba, nagpaparig-on han aton pagtoo, ngan naghahatag ha aton hin higayon nga maipakita an aton  pagkamaunungon ha Dios. Bisan kon diri naton iginbubutang ha peligro an aton mga kinabuhi, diri gud kita nagamit hin diri-kasuratanhon nga mga paagi basi malikyan an pagtimaraot.—1 Pedro 3:16.

An ikaduha nga mamumulong hini nga simposyum nagbangon hin mga pakiana may kalabotan ha pagin neutral. An siyahan nga mga Kristiano diri mga pasipista, kondi maaram hira nga an ira siyahan nga pagkamaunungon para ha Dios. Pariho man yana, an mga Saksi ni Jehova marig-on nga nasunod ha prinsipyo: “Diri kamo kanan kalibotan.” (Juan 15:19) Tungod kay madagmit bumangon an mga pagsari ha aton pagin neutral, kinahanglan mag-eskedyol hin panahon an mga pamilya ha pagrepaso han mga giya ha Biblia may kalabotan hini. Sugad han iginpakita han ikatulo nga bahin hini nga simposyum, an tumong ni Satanas diri gud amo an pagpatay ha aton, kondi an pag-ipit ha aton nga magin diri matinumanon. Pinaagi han matinumanon nga pag-antos han pagtamay, imoral nga mga pag-ipit, kasakit ha emosyon, ngan sakit, nagdadara kita hin pagdayaw kan Jehova.

An mahigugmaon nga pagdapit nga “Magin Duok kan Jehova” an ulohan han ultimo nga pahayag hito nga adlaw. An pagsabot ha importante nga mga kalidad ni Jehova nagdadani ha aton ngadto ha iya. Iya ginagamit an iya waray-tubtoban nga gahum ha pagpanalipod ha iya katawohan, labi na ha espirituwal. An iya hustisya diri mabangis kondi nagpapagios ha iya nga ihatag ha ngatanan nga nagbubuhat hin katadongan an waray kataposan nga kinabuhi. An kinaadman han Dios makikita ha paagi nga iya ginamit an diri hingpit nga mga tawo ha pagsurat han Biblia. An pinakamakaruruyag amo an iya gugma, nga nag-aghat ha iya nga maghimo hin kahikayan para ha katalwasan han katawohan pinaagi kan Jesu-Kristo. (Juan 3:16) Nagtapos an mamumulong pinaagi han pagpagowa han makabantad ha kasingkasing nga bag-o nga libro nga Magin Duok kan Jehova.

An Ikatulo ka Adlaw Nakasentro ha Kadasig Para han Maopay nga mga Buhat

An tema han ikatulo ka adlaw han kombensyon amo “An Katawohan nga Madasigon Para ha Maopay nga mga Buhat.” (Tito 2:14) An programa ha aga nagtikang pinaagi han paghisgot han usa nga  pamilya mahitungod ha teksto han adlaw. Sumunod an pahayag nga “An Imo Ba Sinasarigan hi Jehova?” Sayop an sinasarigan han mga nasud tungod kay nasarig hira ha ira kalugaringon nga kinaadman ngan kusog. Kondi, ha kabaliktaran, an mga surugoon ni Jehova maisugon ngan malipayon nga nasarig ha iya bisan pa han mga kalamidad.—Salmo 46:1-3, 7-11.

An bahin nga may ulohan nga “Mga Batan-on—Pagplano Para ha Tidaraon Kaupod han Organisasyon ni Jehova” naghisgot hini nga pakiana: Paonan-o gud makukuha han usa ka batan-on an gimaopayi ha kinabuhi? Diri ini posible pinaagi han pangalimbasog ha pagkaada hin kwarta, mga panag-iya, ngan dungog. An aton Maglalarang mahigugmaon nga nagsasagdon ha mga batan-on nga hinumdoman hiya samtang batan-on pa hira. Gin-interbyu han mamumulong an pipira nga nangalimbasog para ha dugang nga Kristiano nga pag-alagad durante han pagkabatan-on, ngan inaabat naton an ira kalipay. Ngan mapulsanon gud nga nakarawat naton an bag-o nga tract, Mga Batan-on—Ano an Iyo Bubuhaton ha Iyo Kinabuhi?, nga gindisenyo ha pagbulig ha batan-on nga mga Saksi nga ipahamutang an pundasyon para han waray kataposan nga tidaraon ha organisasyon ni Jehova!

Sumunod an makapainteres nga drama nga basado ha panhitabo ha Biblia nga “Magpabilin nga Marig-on ha Masamok nga mga Panahon.” Naghatag ito hin halipot nga paghulagway han hilawig nga karera ni Jeremias tikang ha iya pagkabatan-on tubtob ha kabungkagan han Jerusalem, nga madasigon nga iya igintagna. Inabat ni Jeremias an pagin diri kuwalipikado ha iya toka, kondi iya gintuman ito bisan pa han pagkontra, ngan ginluwas hiya ni Jehova.—Jeremias 1:8, 18, 19.

An drama ginsundan han pahayag nga “Magin Pariho kan Jeremias—Waray Kahadlok nga Ipasamwak an Pulong han Dios.” An moderno nga mga parasamwak han Ginhadian agsob nga amo an ginpupuntirya han sayop nga mga impormasyon ngan maraot nga propaganda. (Salmo 109:1-3) Kondi, pariho kan Jeremias, malalamposan naton an kahulop pinaagi han pagkaada kalipay ha Pulong ni Jehova. Ngan nasarig kita nga adton nakikig-away kontra ha aton diri maglalampos.

Oo, napapanahon an pahayag publiko nga may ulohan, “An Taran-awon Hini nga Kalibotan Nagbabag-o.” An aton panahon gintigamnan han dagku nga pagbag-o. An Biblia nagtagna nga an sugad nga mga kahimtang, upod na an singgit nga “kamurayawan ngan kasigurohan,” magriresulta ha makaharadlok nga adlaw han paghukom han Dios. (1 Tesalonika 5:3) Magriresulta ito hin maopay nga mga pagbag-o—an kataposan han ngatanan nga mga girra, krimen, kamadarahog, ngan sakit pa ngani. Salit, imbes nga sumarig hini nga sistema han mga butang, ini an panahon ha pagpadayon ha pagkinabuhi nga may diosnon nga debosyon ngan padayon nga manggawi ha putli nga paagi.

An sumaryo han leksyon han Barantayan ginsundan han ultimo nga pahayag ha kombensyon nga may ulohan nga “Magin Hura ha Maopay nga mga Buhat Sugad nga Madasigon nga mga Parasamwak han Ginhadian.” Iginpatin-aw han mamumulong kon paonan-o an programa nakaaghat ha aton ha espirituwal ngan nakadasig ha aton nga sumarig kan Jehova. Ha pagtapos, gindasig kita nga magin limpyo, mahigugmaon, ngan madasigon nga mga parasamwak han Ginhadian han Dios.—1 Pedro 2:12.

Nga may-ada disposisyon nga pariho han mga surugoon ni Jehova ha panahon ni Nehemia, sigurado nga inuli kita nga nagrarayhak ha espirituwal nga mga bendisyon nga nakarawat ha “Madasigon nga mga Parasamwak han Ginhadian” Distrito nga mga Kombensyon. (Nehemia 8:12) Tungod hinin nakakadasig nga kombensyon, waray ka ba mapuno hin kalipay ngan determinasyon nga magpadayon sugad nga madasigon nga parasamwak han Ginhadian?

 [Kahon/Retrato ha pahina 23]

Usa nga Bag-o nga Bulig ha Pag-aram!

Han ikatarapos na an siyahan nga adlaw han kombensyon, adton tinambong nalipay ha pagpagowa han bag-o nga libro nga Worship the Only True God. Gindisenyo ito basi pag-adman kaupod hadton tapos na ha pag-aram han libro nga Kahibaro nga Nagtutugway Ngadto ha Kinabuhi nga Waray Kataposan ngan sigurado nga magpaparig-on ito han pagtoo hadton “husto nga nasubay para ha kinabuhi nga waray kataposan.”—Buhat 13:48, NW.

[Ginkuhaan han Retrato]

Hulagway ha kobre han libro: Retrato han Nabal han E.U.

 [Kahon/Mga Retrato ha pahina 24]

An Bulig Basi Magin Mas Duok ha Dios

An ultimo nga mamumulong ha ikaduha ka adlaw han kombensyon nagpahibaro ha pagpagowa han bag-o nga libro nga Magin Duok kan Jehova. Nag-uupod ito hin upat nga nangunguna nga bahin, usa ha kada importante nga kalidad ni Jehova—gahum, hustisya, kinaadman, ngan gugma. An tagsa nga bahin han libro may-ada usa nga kapitulo nga nagpapakita kon paonan-o matin-aw nga iginpakita ni Jesu-Kristo an mga kalidad han Dios. An siyahan nga katuyoan hinin bag-o nga libro amo an pagbulig ha aton ngan ha aton mga estudyante ha Biblia nga magkaada mas duok ngan mas marig-on nga relasyon kan Jehova nga Dios.

[Kahon/Mga Retrato ha pahina 26]

Espirituwal nga Giya Para ha mga Batan-on

An ikatulo ka adlaw han kombensyon nagin makatirigamnan tungod ha pagpagowa han usa ka espesyal nga tract nga may ulohan nga Mga Batan-on—Ano an Iyo Bubuhaton ha Iyo Kinabuhi? Gindisenyo basi mabuligan an batan-on nga mga Saksi ha paghimo hin husto nga mga desisyon mahitungod han ira tidaraon, inin bag-o nga tract naghahatag hin Kasuratanhon nga sagdon ha paghimo hin nagpapadayon nga karera ha pag-alagad kan Jehova.