Kapitulo Trese

“Durungan nga Magsinggit ha Kalipay”!

Isaias 52:1-12

 1. Kay ano nga an matagnaon nga mga pulong ha Isaias kapitulo 52 nakakahatag hin kalipay, ngan ano an duha nga katumanan hito?

 KAGAWASAN! May-ada pa ba mas makalilipay nga paglaom para ha bihag nga katawohan? Tungod kay kagawasan ngan pagpahiuli an nangunguna nga tema ha libro ni Isaias, diri urusahon nga gawas pa han Mga Salmos, hini nga libro han Biblia mas damu an mga kapahayagan han kalipay kay ha iba nga mga libro. An Isaias kapitulo 52 labi na, nagsasaysay han hinungdan nga sadang magrayhak an katawohan han Dios. An matagnaon nga mga pulong hito natuman ha Jerusalem han 537 A.K.P. Ngan may-ada ito mas daku nga katumanan nga nagdadabi han “Jerusalem ha igbaw,” an langitnon nga organisasyon han espirituhanon nga mga linarang ni Jehova, nga usahay iginhuhulagway sugad nga iroy ngan asawa.—Galasia 4:26, NW; Pahayag 12:1.

“Pangusog, O Sion!”

 2. San-o magmamata an Sion, ngan paonan-o ini mahitatabo?

² Pinaagi kan Isaias, nanawagan hi Jehova ha Iya hinigugma nga siyudad, an Sion: “Pagmata, pagmata, pangusog, O Sion; pagsul-ot han imo maanyag nga mga panapton. O Jerusalem, an bungto nga baraan: kay tikang niyan waray na makada ha imo nga diri sinirkumsisyonan ngan diri malinis. Mamaspas ka han tapotapo; bangon, lingkod dida ha imo trono, O Jerusalem: hubaron mo an mga gapos han imo liog, O bihag nga anak nga babaye han Sion.” (Isaias 52:1, 2) Tungod kay gin-aghat han mga umurukoy han Jerusalem an kasina ni Jehova, nagin binayaan ito sulod hin 70 ka tuig. (2 Hadi 24:4; 2 Kronikas 36:15-21; Jeremias 25:8-11; Daniel 9:2) Yana, panahon na nga magmata ito tikang ha hilawig nga panahon han kawaray buruhaton hito ngan magsul-ot han mag-opay nga mga panapton han kagawasan. Ginpagios ni Jehova an kasingkasing ni Ciro nga pagawson an “bihag nga anak nga babaye han Sion” basi an mga umurukoy hadto han Jerusalem ngan an ira mga anak makabaya ha Babilonya, makabalik ha Jerusalem, ngan maipahiuli an totoo nga pagsingba. Kinahanglan nga waray mga tawo nga diri-sinirkumsisyonan ngan mahugaw nga makikita ha Jerusalem.—Esra 1:1-4.

 3. Kay ano nga an kongregasyon han dinihogan nga mga Kristiano matatawag nga an “anak nga babaye han Sion,” ngan ha ano nga kahulogan hira ginpagawas?

³ Ini nga mga pulong ni Isaias may katumanan liwat ha Kristiano nga kongregasyon. An kongregasyon han dinihogan nga mga Kristiano mahimo ihulagway sugad nga an “anak nga babaye han Sion” ha moderno nga panahon, tungod kay an “Jerusalem ha igbaw” amo an ira iroy. a Tungod kay nakagawas na ha pagano nga mga katutdoan ngan apostata nga mga doktrina, kinahanglan tipigan han mga dinihogan an limpyo nga pagtindog ha atubangan ni Jehova, diri pinaagi ha pagin sinirkumsisyonan ha unod, kondi pinaagi ha pagin sinirkumsisyonan ha ira mga kasingkasing. (Jeremias 31:33; Roma 2:25-29) Nag-uupod ini han pagtipig hin espirituwal, mental, ngan moral nga kalimpyo ha atubangan ni Jehova.—1 Korinto 7:19; Efeso 2:3.

 4. Bisan kon an “Jerusalem ha igbaw” waray pa gud magtalapas kan Jehova, ano nga mga eksperyensya han mga representante hito ha tuna an nagpapakita han gin-agian hadton kadaan nga mga umurukoy han Jerusalem?

⁴ Totoo, an “Jerusalem ha igbaw” waray pa gud magtalapas kan Jehova. Kondi, durante han siyahan nga girra ha kalibotan, an mga representante hito dinhi ha tuna—an dinihogan nga mga Kristiano—diri tinuyo nga nagtalapas ha balaud ni Jehova  tungod kay waray nira hisabti hin husto an totoo nga Kristiano nga neutralidad. Tungod kay nawad-an han pag-uyon han Dios, nahingada hira ha espirituwal nga pagkabihag ha “Daku nga Babilonya,” an imperyo han palso nga relihiyon ha kalibotan. (Pahayag 17:5) An ira pagin uripon inabot ha pungkay han Hunyo 1918 han ginpriso an walo nga nangunguna nga membro han Watch Tower Society tungod ha sayop nga mga akusasyon, upod na an tahap nga maraot-an-tumong nga pagsarabot. Hito nga panahon haros inundang an organisado nga pagsangyaw han maopay nga sumat. Kondi, han 1919, iginpasamwak an seryoso nga panawagan nga magmata ha espirituwal. Nagtikang bumulag hin bug-os an dinihogan nga mga Kristiano ha moral ngan espirituwal nga kahugaw han Babilonya nga Daku. Binangon hira tikang ha tapotapo han pagkabihag, ngan an “Jerusalem ha igbaw” nagkaada han kaanyag han “bungto nga baraan” diin diri gintutugotan an espirituwal nga kahugaw.

 5. Kay ano nga hi Jehova may-ada bug-os nga katungod ha paglukat ha iya katawohan nga diri magbabayad ha mga nagbihag ha ira?

⁵ Han 537 A.K.P. ngan han 1919 K.P., hi Jehova may-ada bug-os nga katungod ha paghatag hin kagawasan ha iya katawohan. Hi Isaias nagsasaysay: “Ha sugad hini nasiring hi Jehova: Kamo iginbaligya ha waray bali; ngan kamo lulukaton hin waray kwarta.” (Isaias 52:3) An kadaan nga Babilonya, bisan an Babilonya nga Daku, waray iginbayad nga bisan ano han ira gintag-iya sugad nga mga uripon an may-kauyonan nga katawohan han Dios. Tungod kay waray bisan ano nga ginkasabotan nga nagdadabi hin kwarta, hi Jehova la gihapon an legal nga Tag-iya han iya katawohan. Sadang ba hiya umabat hin pagin utangan ha bisan hin-o? Siyempre diri. Hiton duha nga kahimtang, hi Jehova may-ada katungod nga lukaton an iya mga magsiringba nga diri magbabayad hin bisan ano ha mga nagbihag ha ira.—Isaias 45:13.

 6. Ano nga mga leksyon tikang ha kasaysayan an ginbalewaray han mga kaaway ni Jehova?

⁶ An mga kaaway ni Jehova waray mahibaro hin mga leksyon tikang ha kasaysayan. Aton mababasa: “Ha sugad hini nasiring an Ginoo hi Jehova: An akon katawohan nakadto ha siyahan ha Ehipto ha pagkahumarapit didto; ngan an Asiryahanon nagtalumpigos ha ira hin waray pinatitikangan.” (Isaias 52:4) Gin-uripon ni Paraon han Ehipto an mga Israelita, nga gin-imbitar ngadto ha iya nasud basi mag-ukoy sugad nga mga bisita. Kondi ginlumos ni Jehova hi Paraon ngan an iya kasundalohan ha Dagat nga Pula. (Eksodo 1:11-14; 14:27, 28) Han an Jerusalem gintarhog ni Hadi Senakerib han Asirya, ginpatay han anghel ni Jehova an 185,000 nga kasundalohan han hadi. (Isaias 37:33-37) Sugad man, an kadaan nga Babilonya ngan an Babilonya nga Daku diri makakapalagiw ha mga resulta han pagtalumpigos ha katawohan han Dios.

“An Akon Katawohan Mahibabaro han Akon Ngaran”

 7. Ano an epekto ha ngaran ni Jehova han pagkabihag han iya katawohan?

⁷ An kabihag han katawohan ni Jehova nakaapekto ha iya ngaran, sugad han ipinapakita han tagna: “Yana, ano [an] akon bubuhaton dinhi, nasiring hi Jehova, salit nga an akon katawohan kinuha ha waray la? Hira nga naglalarang ha ira nangunguwang, nasiring hi Jehova, ngan an akon ngaran ha dayoday ha bug-os nga adlaw ginpapasiparahan. Busa an akon katawohan mahibabaro han akon ngaran: busa hira mahibabaro hadto nga adlaw nga ako amo hiya nga nagyayakan; kitaa, amo ako.” (Isaias 52:5, 6) Kay ano nga interesado hi Jehova hito nga kahimtang? Kay ano nga nababaraka hiya nga an Israel gin-uuripon ha Babilonya? Kinahanglan gumios hi Jehova tungod kay an iya katawohan ginbihag han Babilonya ngan nagsisinggit ito ha ira tungod ha kadaogan. Ito nga paghambog nagresulta ha waray pagtahod nga pagtagad han Babilonya ha ngaran ni Jehova. (Esekiel 36:20, 21) Waray ito makasabot nga an binayaan nga kahimtang han Jerusalem resulta han kasina ni Jehova ha iya katawohan. Lugod, an kauripon han mga Judio ginhunahuna han Babilonya sugad nga ebidensya han pagkamaluya han ira Dios. An kabulig nga magmarando han Babilonya nga hi Belsasar nagtamay pa ngani kan Jehova pinaagi han paggamit han mga garamiton tikang ha Iya templo durante han piyesta ha pagpasidungog ha mga dios han Babilonya.—Daniel 5:1-4.

 8. Paonan-o gintagad an ngaran ni Jehova tikang han mamatay an mga apostol?

⁸ Paonan-o ini ngatanan naaplikar ha “Jerusalem ha igbaw”? Tikang han pakagamot han apostasya ha nag-aangkon nga mga Kristiano, masisiring nga “an ngaran han Dios ginpapasiparahan tungod [hadton] mga tawo ha mga nasud.” (Roma 2:24, NW; Buhat 20:29, 30) Pananglitan, inabot an panahon nga waray na gamita han mga Judio an ngaran  han Dios tungod han patootoo. Waray pag-iha katapos mamatay an mga apostol, an apostata nga mga Kristiano nagsubad ha ira ngan waray na nira gamita an personal nga ngaran han Dios. An apostasya nagresulta ha katukod han Kakristianohan, nga daku nga bahin han Babilonya nga Daku. (2 Tesalonika 2:3, 7; Pahayag 17:5) An waray-pagpugong nga imoralidad ngan duro nga pagin salaan-ha-dugo han Kakristianohan nakadaot gud ha ngaran ni Jehova.—2 Pedro 2:1, 2.

9, 10. Ano an mas nasabtan han may-kauyonan nga katawohan han Dios ha moderno nga mga panahon mahitungod ha mga suruklan ni Jehova ngan han iya ngaran?

⁹ Han ginpagawas han Mas Bantogan nga Ciro, hi Jesu-Kristo, an may-kauyonan nga katawohan han Dios tikang ha pagkabihag ha Babilonya nga Daku han 1919, mas nasabtan nira hin maopay an mga ginkikinahanglan ni Jehova. Ginlimpyohan na nira an ira kalugaringon tikang ha damu nga katutdoan han Kakristianohan nga nagtikang ha antes-han-Kristiano nga paganismo, sugad han Trinidad, diri-namamatay nga kalag, ngan waray kataposan nga pagsakit ha naglalaga nga impyerno. Yana nagtikang hira pagsalikway han ngatanan nga mga impluwensya han Babilonya. Nasabtan liwat nira an pagkaimportante han pagtipig hin marig-on nga neutralidad may kalabotan hinin naggigidapig-dapig nga mga buruhaton han kalibotan. Karuyag pa ngani nira pagputlion an ira kalugaringon tikang ha anoman nga pagkasalaan ha dugo nga bangin nabuhat han iba.

¹⁰ Mas nasabtan liwat han mga surugoon han Dios ha moderno nga panahon an pagkaimportante han ngaran ni Jehova. Han 1931 ira ginkarawat an ngaran nga mga Saksi ni Jehova, salit iginpapahayag nira ha publiko nga nasuporta hira kan Jehova ngan ha iya ngaran. Dugang pa, pinaagi han pagpublikar han New World Translation tikang han 1950, iginbalik han mga Saksi ni Jehova an ngaran han Dios ha husto nga hinmumutangan hito ha Biblia. Oo, ira inaapresyar an ngaran ni Jehova ngan iginsusumat ito ngadto ha mga sidsid han tuna.

An Usa nga “Nagdadara han Mag-opay nga mga Sumat”

11. Kay ano nga an singgit nga ‘An imo Dios nagin hadi!’ angayan may kalabotan ha mga hitabo han 537 A.K.P.?

¹¹ Niyan an aton atensyon iginbabalik ngadto ha Sion han nakada pa ito ha binayaan nga kahimtang. Usa nga mensahero an inabot nga may maopay nga sumat: “Pagkamaanyag dida ha kabukiran an mga tiil niya nga nagdadara han mag-opay nga mga sumat, nga nagpapasangyaw han pagdait, nga nagdadara han mag-opay nga mga sumat han kaopayan, nga nagpapasangyaw han kaluwasan, nga nasiring ngadto kan Sion: An imo Dios naghahadi [“nagin hadi,” “NW”]!” (Isaias 52:7) Han 537 A.K.P., kay ano nga masisiring nga an Dios han Sion nagin Hadi? Diri ba hadto pa Hadi na hi Jehova? Oo, hiya an “Hadi nga waray kataposan”! (Pahayag 15:3, NW) Kondi angayan an singgit nga ‘An imo Dios nagin hadi!’ tungod kay an kapukan han Babilonya ngan an proklamasyon han hadi nga tukuron utro an templo ha Jerusalem ngan igpahiuli an putli nga pagsingba didto nagresulta hin bag-o nga kapahayagan han pagkahadi ni Jehova.—Salmo 97:1.

12. Hin-o an nanguna ha ‘pagdara han mag-opay nga mga sumat,’ ngan paonan-o?

¹² Ha panahon ni Isaias, waray tawo o grupo hin mga tawo nga nakilala sugad nga “nagdadara han mag-opay nga mga sumat.” Kondi yana, hinbabaroan na an pangirilal-an han paradara han maopay nga sumat. Hi Jesu-Kristo an kan Jehova gimaopayi nga mensahero han kamurayawan. Samtang nakanhi ha tuna, iya iginsangyaw an maopay nga sumat nga magkakaada kagawasan tikang ha ngatanan nga epekto han sala nga napanunod tikang kan Adan, upod na an sakit ngan kamatayon. (Mateo 9:35) Nagpakita hi Jesus hin madasigon nga susbaranan han pagpasamwak hini nga maopay nga sumat mahitungod han mas maopay nga butang, ginsasalingabot an ngatanan nga higayon ha pagtutdo ha mga tawo mahitungod han Ginhadian han Dios. (Mateo 5:1, 2; Markos 6:34; Lukas 19:1-10; Juan 4:5-26) Ngan ginsunod han iya mga disipulo an iya susbaranan.

13. (a) Paonan-o ginpahaluag ni apostol Pablo an kahulogan han mga pulong nga “Pagkamaanyag dida ha kabukiran an mga tiil niya nga nagdadara han mag-opay nga mga sumat”? (b) Kay ano nga masisiring nga ‘maanyag’ an mga tiil han mga mensahero?

¹³ Ha iya surat ha mga taga-Roma, ginkotar ni apostol Pablo an Isaias 52:7 basi ipatin-aw an pagkaimportante han pagsangyaw han maopay nga sumat. Nagbangon hiya hin sunod-sunod nga makapagios-ha-hunahuna nga mga pakiana, upod na an ‘Paonan-o makakabati an mga tawo kon waray usa nga magsasangyaw?’ Pagkatapos hiya nagsiring:  “Sugad la han nahisurat: ‘Pagkamaanyag han mga tiil hadton mga nagpapahayag han maopay nga sumat han mag-opay nga mga butang!’ ” (Roma 10:14, 15, NW) Hini nga paagi, ginpahaluag ni Pablo an aplikasyon han Isaias 52:7, ginagamit an termino nga para ha damu nga “hadton” imbes han termino nga para ha usa nga “niya,” ha orihinal nga teksto ha Isaias. Ha pagsubad kan Jesu-Kristo, an ngatanan nga Kristiano mga mensahero han maopay nga sumat han kamurayawan. Paonan-o nagigin ‘maanyag’ an ira mga tiil? Hi Isaias nagyakan nga baga hin an mensahero nagtitikahirani ha Jerusalem tikang ha kahirani nga kabukiran han Juda. Ha hirayo, imposible nga makita an mga tiil han mensahero. Lugod, an nakasentro dinhi amo an mensahero, ngan an mga tiil nagrirepresentar la ha mensahero mismo. Sugad la nga hi Jesus ngan an iya mga disipulo maopay pagkit-on para ha mga maaghop han siyahan nga siglo, an mga Saksi yana makaruruyag liwat pagkit-on para ha mga maaghop nga namamati han nagluluwas-kinabuhi nga mensahe han maopay nga sumat.

14. Paonan-o hi Jehova nagin Hadi ha moderno nga mga panahon, ngan kakan-o pa ini nagtikang ipahayag ha katawohan?

¹⁴ Ha moderno nga mga panahon, kakan-o nagtikang mahibatian an singgit nga ‘An imo Dios nagin hadi’? Tikang pa han 1919. Hito nga tuig durante han kombensyon ha Cedar Point, Ohio, hi J. F. Rutherford, an presidente hadto han Watch Tower Society, nagdasig ha iya mga mamarati pinaagi han pahayag nga may ulohan, “Pahayag Para ha mga Igkasi-magburuhat.” An pahayag, nga iginbasar ha Isaias 52:7 ngan Pahayag 15:2, nagdasig ha ngatanan nga tinambong nga magbuhat han pagsangyaw. Hito nga paagi, an ‘maanyag nga mga tiil’ nagtikang makita ha “kabukiran.” Ha siyahan an dinihogan nga mga Kristiano ngan ha urhi an ira mga kaupod nga “iba man nga mga karnero” madasigon nga nagsangyaw han maopay nga sumat nga hi Jehova nagin Hadi na. (Juan 10:16) Paonan-o hi Jehova nagin Hadi na? Iginpahayag utro niya an iya pagkahadi han 1914 han iya iginbutang an iya Anak, hi Jesu-Kristo, sugad nga Hadi ha bag-o la nga natukod nga langitnon nga Ginhadian. Ngan hi Jehova nagpahayag na liwat han iya pagkahadi han 1919 han iya ginpagawas ‘an Israel han Dios” tikang ha Babilonya nga Daku.—Galasia 6:16; Salmo 47:8; Pahayag 11:15, 17; 19:6.

“An Tingog han Imo mga Magbarantay Ira Inaalsa”

15. Hin-o an “mga magbarantay” nga nag-alsa han ira tingog han 537 A.K.P.?

¹⁵ May-ada ba binaton ha singgit nga ‘An imo Dios nagin hadi’? Oo. Hi Isaias nagsumat: “An tingog han imo mga magbarantay ira inaalsa . . . hira ngatanan nagkakanta; kay hira makita ha binuslongay, kon hi Jehova bumalik ha Sion.” (Isaias 52:8) Waray literal nga magbarantay nga nakada ha ira mga puwesto ha Jerusalem han 537 A.K.P. ha pagtapo ha siyahan nga mga bihag nga binalik. An siyudad binayaan ha sulod hin 70 ka tuig. (Jeremias 25:11, 12) Salit an “mga magbarantay” nga nag-alsa han ira tingog posible nga amo adton mga Israelita nga nahibaro hin abanse han sumat mahitungod han pagpahiuli han Sion ngan nagin responsable ha pagsumat ha iba nga mga anak han Sion. Han ira makita nga an Babilonya igintubyan ni Jehova ha mga kamot ni Ciro han 539 A.K.P., waray magruhaduha an mga magbarantay nga pagagawson na ni Jehova an iya katawohan. Kaupod adton binaton ha ira panawagan, an mga magbarantay nagpadayon ha malipayon nga durungan nga pagsinggit, iginpapabati ha iba an maopay nga sumat.

16. Hin-o an ginkikita han mga magbarantay hin “mata ha mata,” ngan ha ano nga kahulogan?

¹⁶ An alerto nga mga magbarantay may-ada duok, personal nga relasyon kan Jehova, ginkikita hiya hin “mata ha mata,” o nawong-ha-nawong, siring pa. (Numeros 14:14, NW) An ira duok nga pakig-upod kan Jehova ngan ha usa kag usa nagpapatin-aw han ira pagkaurosa ngan ha makalilipay nga klase han ira mensahe.—1 Korinto 1:10.

17, 18. (a) Paonan-o gin-aalsa han magbarantay nga klase ha moderno nga panahon an tingog hito? (b) Ha ano nga kahulogan urosa nga nananawagan an magbarantay nga klase?

¹⁷ Ha moderno nga katumanan, an magbarantay nga klase, “an matinumanon ngan maaramon nga uripon,” nag-aalsa han tingog hito diri la ngada ha mga aada na ha nakikita nga organisasyon han Dios kondi ngadto liwat ha mga tagagawas. (Mateo 24:45-47, NW) Nagkaada usa nga panawagan ha pagtirok ha mga nanhibilin pa han mga dinihogan han 1919, ngan han 1922 ginpakusog pa an panawagan durante han kombensyon ha Cedar Point, Ohio, upod an hangyo nga “ipasamwak, ipasamwak, ipasamwak, an Hadi ngan an iya ginhadian.” Tikang han 1935, ginhatagan atensyon  an pagtirok han daku nga panon han sugad-karnero nga mga tawo. (Pahayag 7:9, 10) Hinin bag-o la nga mga tuig nagtikakusog pa gud an pagpasamwak han pagkahadi ni Jehova. Paonan-o? Han tuig 2000, mga unom ka milyon an nakikigbahin ha pagsumat mahitungod han pagkahadi ni Jehova ha sobra 230 nga katunaan ngan teritoryo. Dugang pa, An Barantayan, an nangunguna nga instrumento han magbarantay nga klase, nagpapahayag han makalilipay nga mensahe ha sobra 130 nga yinaknan.

¹⁸ Ginkikinahanglan an pagpaubos ngan minagburugto nga gugma ha pakigbahin ha sugad nga naghihiusa nga buruhaton. Basi magin epektibo an panawagan, kinahanglan parapriho nga mensahe an isangyaw han ngatanan nga nahidadabi, iginpapahibaro an ngaran ni Jehova, an iya tagana nga lukat, an iya kinaadman, an iya gugma, ngan an iya Ginhadian. Samtang urosa nga nagbubuhat an mga Kristiano ha bug-os nga kalibotan, an ira personal nga relasyon kan Jehova napaparig-on basi urosa nga ipasamwak an makalilipay nga mga sumat.

19. (a) Paonan-o nagin malipayon an “mga lugar nga binayaan ha Jerusalem”? (b) Ano an iginpapasabot han ‘paghugkasi ni Jehova han iya baraan nga butkon’?

¹⁹ Tungod han malipayon nga pagsinggit han katawohan han Dios, bisan an mga lugar diin hira nag-uukoy malipayon pagkit-on. An tagna nagpapadayon: “Rayhak ha kalipay, pagkanta ngatanan [“durungan nga magsinggit ha kalipay,” “NW”], kamo mga lugar nga binayaan ha Jerusalem; kay ginlipay ni Jehova an iya katawohan, iya ginlukat an Jerusalem. Ginhugkasan ni Jehova an iya baraan nga butkon ha mga mata han ngatanan nga nasud; ngan an ngatanan nga kataposan han tuna nakakita han kaluwasan han aton Dios.” (Isaias 52:9, 10) Ha pag-abot han mga binalik tikang ha Babilonya, an masurub-on pagkit-on nga mga lugar han binayaan nga Jerusalem nagin malipayon tungod kay an putli nga pagsingba kan Jehova igpapahiuli na yana. (Isaias 35:1, 2) Matin-aw nga hi Jehova an nagpapahinabo hini. Iya ‘ginhugkasan an iya baraan nga butkon,’ nga sugad hin ginpipilo tipaigbaw an iya mga pako basi iandam an iya kalugaringon ha pagluwas ha iya katawohan.—Esra 1:2, 3.

20. Ano an nagin resulta ngan magigin resulta han paghukas ni Jehova han iya baraan nga butkon ha moderno ha mga panahon?

²⁰ Durante hinin “kataposan nga mga adlaw,” ginhuhukasan ni Jehova an iya baraan nga butkon basi buhion utro an dinihogan nga nanhibilin, an “duha nga testigo” ha libro nga Pahayag. (2 Timoteo 3:1; Pahayag 11:3, 7-13) Tikang han 1919, gindara hira ngada ha espirituwal nga paraiso, an espirituwal nga kahimtang nga ira yana ginpapahimulsan kaupod an minilyon nga ira mga kaupod, an iba nga mga karnero. Maabot an panahon nga huhukasan ni Jehova an iya butkon basi luwason an iya katawohan ha “Har-Magedon.” (Pahayag 16:14, 16) Pagkatapos, ‘an ngatanan nga kataposan han tuna makakakita han pagluwas han aton Dios.’

Usa nga Apurado nga Kinahanglanon

21. (a) Ano an ginkikinahanglan ha mga “magdadara han mga garamiton ni Jehova”? (b) Kay ano nga waray hinungdan nga malisang an mga Judio nga nabaya ha Babilonya?

²¹ May-ada kinahanglan tumanon adton ginawas ha Babilonya basi bumalik ha Jerusalem. Hi Isaias nagsurat: “Iway kamo, iway kamo, lakat kamo tikang didto, ayaw kawkaw hin mahugaw nga butang; gawas tikang ha butnga niya; maglinis kamo, kamo nga magdadara han mga garamiton ni Jehova. Kay diri kamo magawas ha hinanali, diri man kamo malakat nga malupad; kay hi Jehova mag-uuna ha iyo, ngan an Dios ha Israel maaamo an mapaurhi ha iyo.” (Isaias 52:11, 12) Kinahanglan ibilin ha Babilonya han nabaya nga mga Israelita an bisan ano nga butang nga may-ada mantsa han palso nga pagsingba han Babilonya. Tungod kay dara nira an mga garamiton ni Jehova nga nagtikang ha templo ha Jerusalem, kinahanglan magin limpyo hira, diri la ha panggawas ngan ha seremonyal nga paagi, kondi labi na ha ira mga kasingkasing. (2 Hadi 24:11-13; Esra 1:7) Dugang pa, mangunguna ha ira hi Jehova, salit diri hira angay malisang, o dumalagan tungod ha kahadlok, nga baga hin hirani na hira hiabotan han uhaw-ha-dugo nga mga nagbubukod. An Dios han Israel amo an ira guwardya ha urhi.—Esra 8:21-23.

22. Paonan-o pinabug-atan ni Pablo nga kinahanglan magin limpyo an dinihogan nga mga Kristiano?

²² An mga pulong ni Isaias mahitungod han pagpabilin nga limpyo may-ada daku nga katumanan ha mga anak han “Jerusalem ha igbaw.” Han ginsagdonan ni Pablo an mga Kristiano ha Korinto nga diri magpas-an hin yugo kaupod han mga diri-tumuroo, iya ginkotar an mga pulong ha Isaias 52:11: “Busa gumowa ngan bumulag kamo tikang ha ira, siring han Ginoo, ngan diri kamo dumuot hin  mahugaw nga bagay.” (2 Korinto 6:14-17) Sugad la ha mga Israelita nga tipauli tikang ha Babilonya, kinahanglan bug-os nga bayaan han mga Kristiano an Babilonyahanon nga palso nga pagsingba.

23. Ha ano nga mga paagi nangangalimbasog an mga surugoon ni Jehova yana nga magpabilin nga limpyo?

²³ Nahitabo ini labi na ha dinihogan nga mga sumurunod ni Jesu-Kristo nga pinalagiw ha Babilonya nga Daku han 1919. Padayon nga ginlimpyohan nira an ira kalugaringon tikang ha ngatanan nga mantsa han palso nga pagsingba. (Isaias 8:19, 20; Roma 15:4) Mas hinbaroan liwat nira an pagkaimportante han pagin limpyo ha moral. Bisan kon pirme ginsusunod han mga Saksi ni Jehova an hitaas nga mga suruklan ha moral, may-ada mga artikulo An Barantayan han 1952 nga nagpapabug-at han panginahanglan nga disiplinahon adton mga imoral basi matipigan nga limpyo an kongregasyon. An sugad nga disiplina nabulig liwat ha nakasayop mismo nga hisabtan an panginahanglan hin sinsero nga pagbasol.—1 Korinto 5:6, 7, 9-13; 2 Korinto 7:8-10; 2 Juan 10, 11.

24. (a) Ha moderno nga mga panahon, ano an “mga garamiton ni Jehova”? (b) Kay ano nga an mga Kristiano yana makakasarig nga hi Jehova magpapadayon ha pagpanguna ha ira sugad man ha pagin guwardya nira ha urhi?

²⁴ Determinado an dinihogan nga mga Kristiano ngan an daku nga panon han iba nga mga karnero nga diri kumapot hin bisan ano nga butang nga mahugaw ha espirituwal. Tungod han ira naputli ngan nalimpyo nga kahimtang, kuwalipikado hira nga magin mga paradara han “mga garamiton ni Jehova”—an presyoso nga mga tagana nga ginhihimo han Dios para ha sagrado nga pag-alagad ha ministeryo ha balay-balay ngan ha mga pag-aram ha Biblia ngan ha iba pa nga mga bahin han Kristiano nga buruhaton. Pinaagi han pagtipig han kalimpyo, an katawohan han Dios yana makakasarig nga hi Jehova magpapadayon ha pagpanguna ha ira sugad man ha pagin guwardya nira ha urhi. Sugad nga limpyo nga katawohan han Dios, damu hinduro an ira mga hinungdan nga “durungan nga magsinggit ha kalipay”!

[Footnote]

[Mga Pakiana]