‘Padayon Kamo nga Mamunga hin Damu’

“Padayon kamo nga namumunga hin damu ngan pinamamatud-an niyo nga kamo an akon mga disipulo.”—JUAN 15:8, NW.

 1. (a) Ano nga kinahanglanon han pagin disipulo an gin-unabi ni Jesus ha iya mga apostol? (b) Ano nga pakiana an sadang igpakiana naton ha aton kalugaringon?

 GAB-I adto antes hiya mamatay. Ginamit na ni Jesus an igo nga panahon ha pagdasig ha iya mga apostol pinaagi han duok ngan sinsero nga pakiistorya ha ira. Hini nga takna, naglabay na an katutnga han kagab-ihon, kondi hi Jesus, nga napagios han gugma ha iya duok nga mga sangkay, nagpadayon ha pakiistorya. Katapos, durante han iya pakiistorya, iya ginpahinumdom hira han usa pa nga kinahanglanon nga sadang tumanon nira basi magpabilin hira nga iya mga disipulo. Hiya nagsiring: “An akon Amay ginhihimaya hini, nga padayon kamo nga namumunga hin damu ngan pinamamatud-an niyo nga kamo an akon mga disipulo.” (Juan 15:8, NW) Natutuman ba naton yana ini nga kinahanglanon han pagin disipulo? Ano an kahulogan han ‘pamunga hin damu’? Basi hibaroan, aton balikon an pakiistorya hiton nga gab-i.

 2. Ano nga ilustrasyon mahitungod han bunga an iginsumat ni Jesus ha gab-i antes hiya mamatay?

² An sagdon nga mamunga, bahin han usa nga ilustrasyon nga iginsaysay ni Jesus ha iya mga apostol. Hiya nagsiring: “Ako an matuod nga puno han ubas, ngan an akon Amay amo an parauma. An ngatanan nga akon mga sanga nga diri nabunga iya kinukuha, ngan an ngatanan nga nagbubunga iya ginhahawanan, basi ito mamunga hin darodamu. Malimpyo na kamo tungod han pulong nga akon  iginyakan ha iyo. Magpabilin kamo nga kahiusa ko, ngan ako nga kahiusa niyo. Sugad la nga an sanga diri makakapamunga ha iya la ngahaw kon diri magpabilin ha puno, ha sugad nga paagi diri liwat kamo makakapamunga, kon diri kamo magpabilin ha akon. Ako amo an puno han ubas, kamo an mga sanga. . . . An akon Amay ginhihimaya hini, nga padayon kamo nga namumunga hin damu ngan pinamamatud-an niyo nga kamo an akon mga disipulo. Sugad nga an Amay nahigugma gud ha akon ngan nahigugma man ako ha iyo, magpabilin kamo ha akon gugma. Kon iyo sundon an akon mga sugo, kamo magpapabilin ha akon gugma.”—Juan 15:1-10, NW.

 3. Ano an kinahanglan buhaton han mga sumurunod ni Jesus basi mamunga?

³ Hini nga ilustrasyon, hi Jehova an Parauma, hi Jesus an puno han ubas, ngan an mga apostol nga kaistorya ni Jesus amo an mga sanga. Tubtob nga nangangalimbasog an mga apostol nga “magpabilin” kan Jesus, mamumunga hira. Katapos, iginsaysay ni Jesus kon paonan-o maglalampos an mga apostol ha pagtipig hinin importante nga pagkaurosa: “Kon iyo sundon an akon mga sugo, kamo magpapabilin ha akon gugma.” Ha urhi, iginsurat ni apostol Juan an pariho nga mga pulong ha mga igkasi-Kristiano: “An nagtutuman ha . . . mga sugo [ni Kristo] nagpapabilin ha iya.” a (1 Juan 2:24; 3:24) Salit, pinaagi han pagsunod ha mga sugo ni Kristo, an iya mga sumurunod nagpapabilin nga kahiusa niya, ngan sugad nga resulta, ito nga pagkaurosa nakakabulig ha ira nga mamunga. Ano nga kalidad hin mga bunga an kinahanglan magin bunga naton?

Higayon ha Pagtubo

 4. Ano an mahibabaroan naton tikang ha kamatuoran nga “kinukuha” ni Jehova an tagsa nga sanga nga diri nagbubunga?

⁴ Ha ilustrasyon han puno han ubas, “kinukuha,” o gin-uutod ni Jehova an sanga kon diri ito nagbubunga. Ano an iginpapasabot hini ha aton? Iginpapasabot hito ha aton nga an ngatanan nga mga disipulo diri la kay kinahanglan mamunga kondi liwat nga an ngatanan may-kapas ha pagbuhat hito, anoman an ira mga kahimtang o mga limitasyon. Oo, magigin kontra han mahigugmaon nga mga paagi ni Jehova an ‘pagkuha,’ o pagdiskuwalipikar ha usa nga disipulo ni Kristo tungod ha kapakyas ha pagbuhat han lahos han iya mahihimo.—Salmo 103:14; Kolosas 3:23; 1 Juan 5:3.

 5. (a) Paonan-o iginpapasabot han ilustrasyon ni Jesus nga mahimo kita mag-uswag ha pagin mabungahon? (b) Ano nga duha nga klase hin mga bunga an aton paghihisgotan?

⁵ Ipinapakita liwat han ilustrasyon ni Jesus han puno han ubas nga ha sulod han mga limitasyon han aton mga kahimtang, kinahanglan mamiling kita hin higayon nga mag-uswag ha aton mga buruhaton sugad nga disipulo. Tigamni an pagkasaysay hito ni Jesus: “An ngatanan nga akon mga sanga nga diri nabunga iya kinukuha, ngan an ngatanan nga nagbubunga iya ginhahawanan, basi ito mamunga hin darodamu.” (Juan 15:2, NW) Ha kataposan han ilustrasyon, ginsagda ni Jesus an iya mga sumurunod nga ‘mamunga hin damu.’ (Bersikulo 8) Ano an iginpapasabot hini? Sugad nga mga disipulo, diri gud kita sadang magin kontento na ha kalugaringon. (Pahayag 3:14, 15, 19) Lugod, sadang kita mamiling hin mga paagi nga mag-uswag kita ha pamunga. Ano nga klase hin mga bunga an sadang pangalimbasogan naton ha pamunga hin damu gud? May-ada duha nga klase, (1) “an [mga] bunga han espiritu” ngan (2) an mga bunga han Ginhadian.—Galasia 5:22, 23; Mateo 24:14.

An mga Bunga nga Kristiano nga mga Kalidad

 6. Paonan-o pinabug-atan ni Jesu-Kristo an bili han siyahan nga gin-unabi nga bunga han espiritu?

⁶ An siyahan nga iginlista nga kaupod ha “mga bunga han espiritu” amo an gugma. An baraan nga espiritu han Dios nagbubunga hin gugma ha mga Kristiano, tungod kay nasugot hira ha sugo nga iginhatag ni Jesus antes niya isaysay an ilustrasyon han nagbubunga nga puno han ubas. Hiya nagsiring ha iya mga apostol: “Ako nahatag ha iyo hin usa nga bag-o nga sugo, nga maghigugmaay kamo ha usa kag usa.” (Juan 13:34, NW) Ha pagkamatuod, ha bug-os nga pakiistorya niya hiton nga kataposan nga gab-i han iya tunan-on nga kinabuhi, pauroutro nga ginpahinumdom ni Jesus an mga apostol han panginahanglan nga ipakita an kalidad nga gugma.—Juan 14:15, 21, 23, 24; 15:12, 13, 17.

 7. Paonan-o ipinakita ni apostol Pedro nga an pamunga may-ada kalabotan ha pagpakita han sugad-Kristo nga mga kalidad?

⁷ Hi Pedro, nga presente hiton nga gab-i, nakasabot  nga an sugad-Kristo nga gugma ngan an may kalabotan hito nga mga kalidad kinahanglan ipakita han totoo nga mga disipulo ni Kristo. Paglabay hin mga tuig, gindasig ni Pedro an mga Kristiano nga patuboon an mga kalidad sugad han pagpugong-ha-kalugaringon, minagburugto nga pagtagad, ngan gugma. Hiya nagdugang nga an pagbuhat hito nagpupugong ha aton ha ‘pagin mga hubya o waray bunga.’ (2 Pedro 1:5-8) Anoman an aton mga kahimtang, mahihimo naton an pagpakita han mga bunga han espiritu. Salit, hinaot mangalimbasog kita ha pagpakita hin gugma, pagkabuotan, kaaghop, ngan iba pa nga sugad-Kristo nga mga kalidad ha bug-os nga sukol, kay “kontra hini nga mga bagay waray balaud,” o tubtoban. (Galasia 5:23) Oo, sadang kita “mamunga hin darodamu.”

Pamunga han Bunga han Ginhadian

 8. (a) Ano an kaw-ing han mga bunga han espiritu ngan han mga bunga han Ginhadian? (b) Ano nga pakiana an angay tagdon naton?

⁸ An damu-an-kolor ngan magrasa nga mga bunga nagpapatahom ha usa nga tanom. Kondi, an bili han sugad nga mga bunga nalahos pa hito nga adorno. Importante liwat an mga bunga ha pagpadamu han tanom pinaagi han mga liso hito. Sugad man, an mga bunga han espiritu nakakahimo hin labaw pa gud kay ha pagpatahom han aton Kristiano nga personalidad. An mga kalidad sugad han gugma ngan pagtoo nagpapagios liwat ha aton ha pagpasarang han sugad-liso nga mensahe han Ginhadian nga aada ha Pulong han Dios. Tigamni kon paonan-o pinabug-atan ni apostol Pablo inin importante nga kaw-ing. Hiya nasiring: “Nagbubuhat liwat kami hin pagtoo [usa nga bahin han mga bunga han espiritu] ngan salit nagyayakan kami.” (2 Korinto 4:13, NW) Hini nga paagi, dugang nga nagsasaysay hi Pablo, “halaran ta gihapon an Dios hin halad han pagdayeg, nga amo, an bunga han mga im-im”—an ikaduha nga klase han mga bunga nga kinahanglan ipakita naton. (Hebreo 13:15) May-ada ba angayan nga mga higayon ha aton kinabuhi nga mahimo kita magin mas mabungahon, oo “mamunga hin darodamu,” sugad nga mga parasamwak han Ginhadian han Dios?

 9. An pamunga ba nangangahulogan hin paghimo hin mga disipulo? Isaysay.

⁹ Basi makabaton hin husto, kinahanglan hisabtan naton siyahan kon ano an nahiuupod han mga bunga han Ginhadian. Husto ba an pagsiring nga an pamunga nangangahulogan hin paghimo hin mga disipulo? (Mateo 28:19) An bunga ba nagtutudlok siyahan ha mga indibiduwal nga aton binubuligan nga magin bawtismado nga mga magsiringba ni Jehova? Diri. Kon sugad hito an kahimtang, makapaluya gud ito para ha ngatanan nga presyoso nga mga Saksi nga matinumanon nga nagpapasamwak han mensahe han Ginhadian hin mga tuig na ha diri-makinarawaton nga mga teritoryo. Oo, kon an bunga han Ginhadian nga aton gindadara ginrirepresentaran han bag-ohan nga mga disipulo la, an sugad nga maduruto nga mga Saksi magigin pariho han diri-namumunga nga mga sanga ha ilustrasyon ni Jesus! Siyempre, diri ito an kahimtang. Niyan, ano an siyahan nga mga bunga han aton ministeryo?

Mabungahon Pinaagi han Pagpasarang han Liso han Ginhadian

10. Paonan-o ipinapakita han ilustrasyon ni Jesus han parasabwag ngan han magkalainlain nga klase han tuna kon ano an bunga han Ginhadian ngan kon ano an diri?

¹⁰ An ilustrasyon ni Jesus han parasabwag ngan han magkalainlain nga klase han tuna nagpapatin-aw  han baton—an makapadasig nga baton para hadton nagsasangyaw ha mga teritoryo nga diri gud mabungahon. Hi Jesus nagsiring nga an liso amo an mensahe han Ginhadian nga aada ha Pulong han Dios, ngan nga an tuna nagrirepresentar han simboliko nga kasingkasing han tawo. An iba nga liso ‘nahulog ha maopay nga tuna, ngan han manaringsing, nagbunga.’ (Lukas 8:8) Ano nga bunga? Bueno, katapos manaringsing ngan magin hamtong an trigo, nagbubunga ito, diri hin gudtiay nga mga puno hin trigo, kondi hin bag-o nga liso. Ha sugad man nga paagi, an usa nga Kristiano nagbubunga, diri pirme pinaagi hin bag-o nga mga disipulo, kondi hin bag-o nga liso han Ginhadian.

11. Ano an mahimo ihatag nga kahulogan han mga bunga han Ginhadian?

¹¹ Salit, hini nga kahimtang an bunga diri amo an bag-o nga mga disipulo, diri liwat ito an maopay nga Kristiano nga mga kalidad. Tungod kay an liso nga iginsasabwag amo an pulong han Ginhadian, an bunga amo an damu nga mga kapahayagan mahitungod han Ginhadian. Hini nga kahimtang an pamunga nagtutudlok ha paghimo hin mga kapahayagan mahitungod han Ginhadian. (Mateo 24:14) Posible ba nga mamunga kita han sugad nga bunga han Ginhadian—pagpasamwak han maopay nga sumat han Ginhadian—anoman an aton mga kahimtang? Oo, posible! Hito nga ilustrasyon, iginsasaysay ni Jesus kon kay ano.

Paghatag han Aton Gimaopayi Para ha Himaya han Dios

12. Posible ba mamunga hin mga bunga han Ginhadian an ngatanan nga mga Kristiano? Isaysay.

¹² “An nahisabwag ha maopay nga tuna,” siring ni Jesus, ‘namumunga, an usa hin usa ka gatos, an usa  kaunman, an usa katloan.’ (Mateo 13:23) An lugas nga iginsabwag ha tuna mahimo nga ibaiba an bunga sumala ha mga kahimtang. Ha sugad man nga paagi, an aton nahihimo ha pagpasamwak han maopay nga sumat mahimo nga ibaiba sumala ha aton mga kahimtang, ngan ipinakita ni Jesus nga maaram hiya hini. An iba bangin may-ada dugang nga mga higayon; an iba bangin mas maopay an kahimsog ngan mas makusog. Tungod hito, an nahihimo naton bangin mas daku o mas gutiay kay ha nahihimo han iba, kondi tubtob nga ito an aton gimaopayi, nalilipay hi Jehova. (Galasia 6:4) Bisan kon an kalagas o nagpapaluya nga sakit nakakaiban han aton pakigbahin ha pagsangyaw nga buruhaton, an aton mapinairon nga Amay, hi Jehova, sigurado nga nagtatagad ha aton sugad nga usa hadton ‘padayon nga namumunga hin damu.’ Kay ano? Tungod kay aton iginhahatag ha iya ‘an ngatanan nga aton gintatag-iya’—an aton bug-os-kalag nga pag-alagad. b—Markos 12:43, 44; Lukas 10:27.

13. (a) Ano an nangunguna nga hinungdan nga sadang kita ‘magpadayon’ nga namumunga han mga bunga han Ginhadian? (b) Ano an mabulig ha aton basi padayon nga mamunga ha diri-makinarawaton nga mga teritoryo?(Kitaa an kahon ha pahina 21.)

¹³ Ha anoman nga paagi nga mahimo kita mamunga hin mga bunga han Ginhadian, mapapagios kita nga ‘magpadayon ngan mamunga’ kon nahinunumdoman naton kon kay ano nga ginbubuhat naton ito. (Juan 15:16, NW) Gin-unabi ni Jesus an nangunguna nga hinungdan: “An akon Amay ginhihimaya hini, nga padayon kamo nga namumunga hin damu.” (Juan 15:8, NW) Oo, an aton pagsangyaw nga buruhaton nagbabaraan han ngaran ni Jehova ha atubangan han ngatanan nga katawohan. (Salmo 109:30) Hi Honor, usa ka matinumanon nga Saksi nga mga 75 anyos na an edad, nasiring: “Bisan ha diri-makinarawaton nga mga teritoryo, usa ka pribilehiyo nga magrepresentar han Gihitaasi.” Han ginpakianhan hi Claudio, usa ka madasigon nga Saksi tikang han 1974, kon kay ano nga nagpapadayon hiya ha pagsangyaw bisan kon gutiay la ha iya teritoryo an nakarawat, iya ginkotar an Juan 4:34, diin aton mababasa an mga pulong ni Jesus: “An akon karan-on amo an pagbuhat han kaburut-on han nagpakanhi ha akon, ngan paghuman han iya buhat.” Hi Claudio nagdugang: “Pariho kan Jesus, karuyag ko nga diri la magtikang kondi liwat tapuson an akon buruhaton sugad nga parasamwak han Ginhadian.” (Juan 17:4) Nauyon hini an mga Saksi ni Jehova ha bug-os nga kalibotan.—Kitaa an kahon nga “Kon Paonan-o ‘Mamumunga nga May Pagpailob,’ ” ha pahina 21.

Pagsangyaw Ngan Pagtutdo

14. (a) Ano an duha nga katuyoan han buruhaton ni Juan nga Parabaptis ngan ni Jesus? (b) Paonan-o mo ihuhulagway an Kristiano nga buruhaton yana nga panahon?

¹⁴ An siyahan nga parasamwak han Ginhadian nga gin-unabi ha mga Ebanghelyo amo hi Juan nga Parabaptis. (Mateo 3:1, 2; Lukas 3:18) An iya siyahan nga katuyoan amo an ‘pag-asoy han kamatuoran,’ ngan iya ginbuhat ito nga may kinasingkasing nga pagtoo ngan paglaom “basi nga an ngatanan tumoo.” (Juan 1:6, 7) Oo, an iba hadton ginsangyawan ni Juan nagin mga disipulo ni Kristo. (Juan 1:35-37) Salit, hi Juan usa nga parasangyaw ngan parahimo hin disipulo. Hi Jesus usa liwat nga parasangyaw ngan magturutdo. (Mateo 4:23; 11:1) Diri urusahon kon sugad, nga ginsugo ni Jesus an iya mga sumurunod diri la ha pagsangyaw han mensahe han Ginhadian kondi ha pagbulig liwat ha mga indibiduwal nga nakarawat hito nga magin iya mga disipulo. (Mateo 28:19, 20) Salit an aton buruhaton yana nga panahon amo an pagsangyaw ngan pagtutdo.

15. Ano an pagkapariho ha baton ha pagsangyaw nga buruhaton nga ginbuhat ha siyahan nga siglo K.P. ngan ha ginbubuhat yana nga panahon?

¹⁵ Mahitungod hadton ha siyahan nga siglo K.P. nga nakabati han pagsangyaw ngan pagtutdo ni Pablo, “an iba nagtoo hini nga mga bagay nga iginyakan; ngan an iba waray pagtoo.” (Buhat 28:24) Yana nga panahon, pariho gud an baton. Makasurubo, an kadam-an han liso han Ginhadian nahuhulog  ha diri-makinarawaton nga tuna. Bisan pa hito, an iba nga mga liso nahuhulog pa gihapon ha maopay nga tuna, nanggagamot, ngan nananaringsing, sugad la han igintagna ni Jesus. Ha pagkamatuod, ha bug-os nga kalibotan, 5,000 ka tawo an aberids han nagigin totoo nga mga disipulo ni Kristo kada semana han tuig! Inin bag-o nga mga disipulo “nagtoo hini nga mga bagay nga iginyakan,” bisan kon an kadam-an han iba nga mga tawo diri natoo. Ano an nakabulig basi an ira kasingkasing magin makinarawaton ha mensahe han Ginhadian? Agsob nga an personal nga interes nga ipinapakita han mga Saksi—an pagbaribi ha bag-o la nga iginsabwag nga liso, siring pa—an importante. (1 Korinto 3:6) Tagda an duha la han damu nga susbaranan.

Importante an Personal nga Interes

16, 17. Kay ano nga importante an pagpakita hin personal nga interes ha mga tawo nga aton iginkikita ha aton ministeryo?

¹⁶ Hi Karolien, usa ka batan-on nga Saksi ha Belgium, binisita ha usa ka lagas nga babaye nga diri interesado ha mensahe han Ginhadian. Tungod kay an kamot han babaye nakabendahe, hi Karolien ngan an iya kaupod nagtanyag hin bulig, kondi nagdumiri an babaye. Paglabay hin duha ka adlaw binalik iton mismo nga duha nga Saksi ha balay han babaye ngan ginkumusta hiya. “Ini an nakagbag-o han kahimtang,” siring ni Karolien. “Nahipausa hiya nga interesado gud kami ha iya. Ginpauswag kami ha iya balay, ngan natikangan an pag-aram ha Biblia.”

¹⁷ Hi Sandi, usa nga Saksi ha Estados Unidos, nagpapakita liwat hin personal nga interes ha iya ginsasangyawan. Ginkikita niya an mga pahibaro han mga natawo ha lokal nga pahayagan ngan katapos nabisita ha bag-o nga mga ginikanan nga dara an My Book of Bible Stories. c Tungod kay kasagaran nga an iroy aada ha balay ngan nalilipay nga ipakita ha mga bisita an iya anak, agsob nga natitikangan an pakiistorya. “Akon igin-iistorya ha mga ginikanan an mahitungod han bili han duok nga relasyon ha natatawo pa la nga minasus-an pinaagi han pagbasa,” siring ni Sandi. “Ha urhi akon gin-uunabi an mga problema han pagpatubo ha anak dida ha sosiedad yana nga panahon.” Diri pa la maiha, sugad nga resulta hito nga pagbisita, usa nga iroy ngan unom nga anak an nagtikang mag-alagad kan Jehova. An pag-una ha pagpakita hin aktibo ngan personal nga interes mahimo magtugway ha pariho hito nga makalilipay nga mga resulta ha aton ministeryo.

18. (a) Kay ano nga kita ngatanan posible nga ‘mamunga hin damu’? (b) Ano nga tulo nga kinahanglanon ha pagin disipulo nga gin-unabi ha Ebanghelyo ni Juan an determinado ka nga tumanon?

¹⁸ Makapadasig gud an paghibaro nga posible tumanon an kinahanglanon nga ‘mamunga hin damu’! Batan-on man kita o lagas, maopay man an aton kahimsog o maluya, nagsasangyaw man kita ha makinarawaton o diri-makinarawaton nga mga teritoryo, kita ngatanan makakapamunga hin damu. Paonan-o? Pinaagi han pagpakita han mga bunga han espiritu ha mas bug-os nga sukol ngan pinaagi han pagpasarang han mensahe han Ginhadian han Dios ha gimaopayi nga aton mahihimo. Ha pariho nga panahon, nangangalimbasog kita nga ‘magpabilin ha pulong ni Jesus’ ngan ‘maghigugmaay ha usa kag usa.’ Oo, pinaagi han pagtuman hinin tulo nga importante nga mga kinahanglanon han pagin disipulo nga gin-unabi ha Ebanghelyo ni Juan, pinamamatud-an naton nga kita ‘totoo nga mga disipulo ni Kristo.’—Juan 8:31; 13:35.

[Mga footnote]

Mga Pakiana Para ha Repaso

• Kinahanglan mamunga kita hin mas damu han ano nga klase hin mga bunga?

• Kay ano nga mahihimo naton an tumong nga ‘mamunga hin damu’?

• Ano an tulo nga importante nga kinahanglanon ha pagin disipulo nga gin-unabi ha Ebanghelyo ni Juan nga aton ginhisgotan?

[Mga Pakiana]

[Kahon/Retrato ha pahina 21]

KON PAONAN-O ‘MAMUMUNGA NGA MAY PAGPAILOB’

ANO an nabulig ha imo nga magpadayon nga matinumanon ha pagsangyaw han mensahe han Ginhadian ha diri-makinarawaton nga mga teritoryo? Iini an pipira han makakabulig nga mga baton hini nga pakiana.

“An paghibaro nga may-ada kita han bug-os nga suporta ni Jesus nagdadasig ha aton nga magin positibo ngan magin mapinadayunon, anoman an reaksyon ha teritoryo.”—Harry, 72 anyos; nabawtismohan han 1946.

“An teksto ha 2 Korinto 2:17 pirme nagdadasig ha akon. Nasiring ito nga nakikigbahin kita ha ministeryo ‘ilarom han pagtagad han Dios, upod ni Kristo.’ Kon aada ako ha ministeryo, nalilipay ako ha pakig-upod ha akon duok nga mga sangkay.”—Claudio, 43 anyos; nabawtismohan han 1974.

“Ha totoo la, makuri para ha akon an pagsangyaw. Kondi, naieksperyensyahan ko an kamatuoran han mga pulong han Salmo 18:29: “Tungod ha akon Dios lalakbayon ko an kuta.”—Gerard, 79 anyos; nabawtismohan han 1955.

“Kon nakakabasa ako hin bisan usa la nga teksto ha ministeryo, nakakatagbaw ito ha akon nga may-ada usa nga nagtugot han iya kasingkasing nga usisahon han Biblia.”—Eleanor, 26 anyos; nabawtismohan han 1989.

“Padayon nga nagsasari ako han magkalainlain nga mga paagi. Damu hinduro ito salit diri ko magagamit ito ngatanan ha nahibibilin pa nga mga tuig han akon kinabuhi.”—Paul, 79 anyos; nabawtismohan han 1940.

“Diri ako naaapektohan han negatibo nga mga baton. Nangangalimbasog ako nga magin makisangkayon, nakikiistorya ha mga tawo ngan namamati ha ira mga punto-de-bista.”—Daniel, 75 anyos; nabawtismohan han 1946.

“Iginkita ko an bag-o la nga mga nabawtismohan nga nagsiring ha akon nga an akon pagsangyaw nakabulig ha ira nga magin mga Saksi. Diri ako maaram nga ha urhi may-ada iba nga nagtutdo ha ira ha pag-aram ha Biblia ngan nakabulig ha ira nga mag-uswag. Nalilipay ako ha paghibaro nga an aton ministeryo usa nga burubligay nga buruhaton.”—Joan, 66 anyos; nabawtismohan han 1954.

Ano an nabulig ha imo nga ‘mamunga nga may pagpailob’?—Lukas 8:15, NW.

[Mga Retrato ha pahina 20]

Pinaagi han pagpakita han mga bunga han espiritu ngan pinaagi han pagpasamwak han mensahe han Ginhadian, namumunga kita hin damu

[Retrato ha pahina 23]

Ano an karuyag ipasabot ni Jesus han hiya nagsiring ha iya mga apostol: ‘Padayon kamo nga mamunga hin damu’?