Sinseridad—Hiringyapon, Kondi Igo Na ba Ito?

HIRINGYAPON gud ba an sinseridad ha aton adlaw-adlaw nga kinabuhi? Usa nga diksyonaryo an naghahatag han kahulogan han “sinseridad” sugad nga “kagawasan tikang ha pagkasalingkapaw; pagkatangkod; pagkaprangka; pagkatotoo.” Matin-aw, mapulsanon ini nga kalidad ha pagparig-on han maopay nga mga relasyon ha iba. Hi apostol Pablo nagsagdon: “Magmatinumanon kamo ha ngatanan nga mga bagay ha iyo mga agaron tungod ha unod; diri mag-alagad ha mga mata la, sugad ha pagpakaruyag ha mga tawo, kondi ha uray nga [“sinseridad han,” NW] kasingkasing, nga mahadlukon ha Ginoo.” (Kolosas 3:22) Hin-o an diri malilipay kon an sugad hito nga sinsero nga tawo magtatrabaho para ha iya? Yana nga panahon, an sinsero nga mga tawo bangin may-ada mas daku nga higayon nga makaagi hin trabaho ngan magpabilin hito.

Kondi, an labaw gud nga hinungdan nga hiringyapon an sinseridad amo an epekto hito ha aton relasyon ha Dios. An kadaan nga mga Israelita nagpahimulos han bendisyon han Dios han gintuman nira hin maopay an mga balaud ngan an mga piyesta. Samtang ginhihisgotan an kalimpyo ha kongregasyon, ginsagda ni Pablo an mga Kristiano: “Pagtumanon ta an pesach, diri ha daan nga ipaturubo, bisan ha ipaturubo nga kasal-anan ngan karaotan, kondi ha diri pinatubo nga tinapay han minatuod [“sinseridad,” NW] ngan han kamatuoran.” (1 Korinto 5:8) Basi karawaton han Dios an aton pagsingba, diri la hiringyapon an sinseridad kondi kinahanglanon liwat ito. Kondi, tigamni nga diri igo na an sinseridad la. Kinahanglan updan ito han kamatuoran.

An mga naghimo ngan an mga pasahero han Titanic bangin sinsero nga tinoo nga diri malulunod an daku nga pamasahero nga barko. Kondi, ha siyahan nga biyahe hito han 1912, binunggo ito ha daku hinduro nga yelo ngan 1,517 ka tawo an namatay. An pipira nga mga Judio ha siyahan nga siglo bangin sinsero nga tinoo ha ira paagi han pagsingba ha Dios, kondi an ira kadasig “diri sumala ha husto nga kahibaro.” (Roma 10:2, NW) Basi karawaton kita han Dios, an aton sinsero nga mga tinotoohan kinahanglan igbasar ha husto nga impormasyon. Malilipay an mga Saksi ni Jehova ha iyo komunidad nga buligan ka ha pag-usisa kon ano an nahiuupod ha pag-alagad ha Dios nga may sinseridad ngan kamatuoran.