Kay Ano nga Sadang Isaurog an Panihapon han Ginoo?

“An akon iginhatag ha iyo akon man ini kinarawat ha Ginoo.”—1 KORINTO 11:23.

1, 2. Ano an ginbuhat ni Jesus ha gab-i han Paskua han 33 K.P.?

 PRESENTE didto an bugtong nga Anak ni Jehova. Sugad man an 11 nga kalalakin-an nga ‘nagpabilin upod niya ha mga pagsari ha iya.’ (Lukas 22:28, NW) Gab-i adto han Huwebes, Marso 31, 33 K.P., ngan an kadayaw nagpatahom gud han kalangitan ha igbaw han Jerusalem. Ginsaurog pa la ni Jesu-Kristo ngan han iya mga apostol an Paskua. An traydor nga hi Judas Iskariote ginpabaya na, kondi diri ito panahon han pagbaya han iba. Kay ano? Tungod kay bubuhaton na ni Jesus an pinakaimportante nga butang. Ano ito?

² Tungod kay nakadto didto an parasurat han Ebanghelyo nga hi Mateo, hiya an magsusumat ha aton. Hiya nagsurat: “Hi Jesus kinuha hin usa nga tinapay, ngan ginbendisyonan, ngan iya ginpinitpinit, ngan ipanhatag ha mga tinon-an, ngan siniring: Kuha kamo; kaon kamo; ini amo an [“nangangahulogan han,” NW] akon lawas. Ngan han pagkuha han tagayan hiya nagpasalamat, ngan hinatag ha ira, nga nasiring: Inuma niyo ngatanan ito; kay ini amo an [“nangangahulogan han,” NW] akon dugo han Bag-o nga Testamento nga igtatakbo tungod han kadam-an ha pagpasaylo han mga sala.” (Mateo 26:26-28) Usa ka beses la ba ini nga hitabo? Ano an kahulogan hito? May kahulogan ba ito ha aton yana nga panahon?

“Padayon nga Buhata Niyo Ini”

 3. Kay ano nga makatirigamnan an ginbuhat ni Jesus ha gab-i han Nisan 14, 33 K.P.?

³ An ginbuhat ni Jesu-Kristo ha gab-i han Nisan 14, 33 K.P., diri ordinaryo la nga hitabo ha iya kinabuhi. Ginhisgotan ito ni apostol Pablo han hiya nagsurat ha mga Kristiano ha Korinto, diin ginsusunod pa gihapon ito nga pagsaurog paglabay hin sobra 20 ka tuig. Bisan kon hi Pablo diri kaupod ni Jesus ngan han 11 nga apostol han 33 K.P., sigurado nga hinbaroan niya tikang ha iba nga mga apostol an nahitabo hito nga okasyon. Dugang pa, matin-aw nga nakakarawat hi Pablo hin pamatuod mahitungod han mga bahin hito nga hitabo pinaagi han inspirado nga pahayag. Hi Pablo  nagsiring: “Akon man ini kinarawat ha Ginoo, nga an Ginoo nga hi Jesus, ha gab-i nga pagtubyanan ha iya, kinuha hiya hin usa nga tinapay; ngan katapos niya magpasalamat, iya iton gintipiktipik ngan siniring: Ini amo an [“nangangahulogan han, ”NW] an akon lawas, nga gintipiktipik tungod ha iyo: buhata niyo ini nga hinumdoman niyo ha akon. Ha sugad man nga kaagi an tagayan, ha katapos panihapon, hi Jesus siniring; ini nga tagayan amo an bag-o nga tugon ha akon dugo: buhaton ini niyo, nga ha ngatanan nga iyo pag-inom hini, nga hinumdoman niyo ha akon.”—1 Korinto 11:23-25.

 4. Kay ano nga sadang isaurog han mga Kristiano an Panihapon han Ginoo?

⁴ An parasurat han Ebanghelyo nga hi Lukas nagpapamatuod nga hi Jesus nagsugo: “Padayon nga buhata niyo ini nga hinumdoman ha akon.” (Lukas 22:19, NW) Ini nga mga pulong iginhuhubad liwat nga: “Buhata niyo ini ha paghinumdom ha akon” (Today’s English Version) ngan “Buhata niyo ini sugad nga hinumdoman ha akon.” (The Jerusalem Bible) Ha pagkamatuod, ini nga pagsaurog agsob nga tinatawag nga Memoryal han kamatayon ni Kristo. Tinatawag liwat ito ni Pablo nga an Panihapon han Ginoo—an angayan nga pagtawag, tungod kay gintikangan ini ha gab-i. (1 Korinto 11:20) Ginsusugo an mga Kristiano nga isaurog an Panihapon han Ginoo. Kondi kay ano nga gintikangan ini nga pagsaurog?

Kon Kay Ano nga Gintikangan Ito

5, 6. (a) Ano an usa nga hinungdan kon kay ano nga gintikangan ni Jesus an Memoryal? (b) Paghatag hin usa pa nga hinungdan kon kay ano nga gintikangan an Panihapon han Ginoo.

⁵ An usa nga hinungdan kon kay ano nga gintikangan an Memoryal may-ada kalabotan ha usa nga katuyoan nga natuman han kamatayon ni Jesus. Namatay hiya sugad nga usa nga nagbindikar han pagkasoberano han iya langitnon nga Amay. Hito nga paagi pinamatud-an ni Kristo nga buwaon hi Satanas nga Yawa, nga sayop nga nag-akusa nga an mga tawo nag-aalagad la ha Dios tungod han hakugnon nga mga motibo. (Job 2:1-5) Pinamatud-an han pagkamatinumanon ni Jesus tubtob ha kamatayon nga sayop ini nga akusasyon ngan nakapalipay ito han kasingkasing ni Jehova.—Proberbios 27:11.

⁶ Usa pa nga hinungdan kon kay ano nga gintikangan an Panihapon han Ginoo amo an pagpahinumdom ha aton nga pinaagi han iya kamatayon sugad nga hingpit, waray sala nga tawo, ‘iginhatag ni Jesus an iya kalag nga lukat han kadam-an.’ (Mateo 20:28) Han an siyahan nga tawo nakasala ha Dios, nawara niya an hingpit, tawhanon nga kinabuhi ngan an ngatanan nga mga paglaom hito. Kondi, hi Jesus nagsiring: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.” (Juan 3:16) Oo, “an suhol han sala amo an kamatayon; kondi an hatag nga waray bayad han Dios amo an kinabuhi nga waray kataposan, nga aada kan Kristo Jesus nga aton Ginoo.” (Roma 6:23) An pagsaurog ha Panihapon han Ginoo nagpapahinumdom ha aton han daku nga gugma nga ipinakita ni Jehova ngan han iya Anak may kalabotan ha halad nga kamatayon ni Jesus. Sadang kita magin mapasalamaton gud hito nga gugma!

San-o Sadang Isaurog Ito?

 7. Kay ano nga an dinihogan nga mga Kristiano nakikiangbit “ha kada pangangaon” ha mga emblema han Memoryal?

⁷ Mahitungod han Panihapon han Ginoo, hi Pablo nagsiring: “Kada pangangaon niyo hini nga tinapay, ngan mainom hini nga tagayan, iyo iginwawali an kamatayon han Ginoo ngada ha iya pagkanhi.” (1 Korinto 11:26) An tagsa nga dinihogan nga mga Kristiano makikiangbit ha mga emblema han Memoryal tubtob ha ira kamatayon. Hito nga paagi, pauroutro nga ira igpapasamwak ha atubangan ni Jehova nga Dios ngan ha kalibotan an ira pagtoo ha tagana han Dios nga halad lukat ni Jesus.

 8. Tubtob san-o magsasaurog an grupo han mga dinihogan han Panihapon han Ginoo?

⁸ Tubtob san-o an grupo han dinihogan nga mga Kristiano magsasaurog han Memoryal han kamatayon ni Kristo? “Ngada ha iya pagkanhi,” siring ni Pablo, matin-aw nga nangangahulogan nga ini nga mga pagsaurog magpapadayon tubtob ha pag-abot ni Jesus basi karawaton an iya dinihogan nga mga sumurunod ngadto ha langit pinaagi han pagkabanhaw durante han iya “presensya.” (1 Tesalonika 4:14-17, NW) Nauyon ini ha mga pulong ni Jesus ha 11 nga maunungon nga mga apostol: “Kon ako kumadto, ngan  mag-andam hin lugar ha iyo, ako makanhi liwat, ngan kakarawaton ko kamo ha akon ngahaw, basi kon diin ako, aadto man kamo.”—Juan 14:3.

 9. Ano an kahulogan han mga pulong ni Jesus nga nakarekord ha Markos 14:25?

⁹ Han gintikangan ni Jesus an Memoryal, hiya kinuha hin kopa han alaksiw ngan nagsiring ha iya matinumanon nga mga apostol: “Diri na ako mainom han bunga han ubas, tubtob hadto nga adlaw nga akon pag-inom hin bag-o ha ginhadian han Dios.” (Markos 14:25) Tungod kay hi Jesus diri mainom hin literal nga alaksiw ha langit, matin-aw nga nahunahuna niya an kalipay nga usahay ginsisimbolohan han alaksiw. (Salmo 104:15; Eklesiastes 10:19) An pagin magkaupod ha Ginhadian usa nga makalilipay nga higayon nga ginhandom gud niya ngan han iya mga sumurunod.—Roma 8:23; 2 Korinto 5:2.

10. Mationan-o kaagsob sadang isaurog an Memoryal?

¹⁰ Sadang ba isaurog an kamatayon ni Jesus kada bulan, kada semana, o kada adlaw pa ngani? Diri. Gintikangan ni Jesus an Panihapon han Ginoo ngan ginpatay hiya ha adlaw han Paskua, nga ginsaurog ‘sugad nga hinumdoman’ han kaluwasan han Israel tikang ha pagkauripon ha Ehipto han 1513 A.K.P. (Eksodo 12:14) An Paskua ginsaurog hin makausa la ha usa ka tuig, ha ika-14 nga adlaw han Judio nga bulan nga Nisan. (Eksodo 12:1-6; Lebitiko 23:5) Iginpapasabot hini nga an kamatayon ni Jesus sadang isaurog ha kada Paskua la—kada tuig—diri kada bulan, kada semana, o kada adlaw.

11, 12. Ano an iginpapahayag han kasaysayan mahitungod han siyahan nga mga pagsaurog han Memoryal?

¹¹ Salit, angayan an pagsaurog han Memoryal kada tuig ha Nisan 14. Sumala ha usa nga barasahon: “An mga Kristiano ha Asia Minor tinawag nga Quartodecimans [Fourteenthers] tungod han ira kustomre nga pagsaurog han pascha [Panihapon han Ginoo] ha ika-14 han Nisan . . . An petsa bangin mahituman ha Biernes o ha bisan ano nga mga adlaw han semana.”—The New Schaff-Herzog Encyclopedia of Religious Knowledge, Tomo IV, pahina 44.

¹² Ha pagkomento mahitungod han kustomre han ikaduha ka siglo K.P., an historyador nga hi J. L. von Mosheim nasiring nga an Quartodecimans nagsaurog han Memoryal ha Nisan 14 tungod kay “ira gintagad an ehemplo ni Kristo sugad nga may-ada awtoridad han balaud.” Usa pa nga historyador an nasiring: “An paggamit han Quartodeciman nga mga iglesia ha Asia pariho han paggamit han iglesia ha Jerusalem. Han ika-2 nga siglo ginsaurog hini nga mga iglesia ha ira Pascha ha ika-14 han Nisan an pagtubos pinaagi han kamatayon ni Kristo.”—Studia Patristica, Tomo V, 1962, pahina 8.

Kahulogan han Tinapay

13. Ano nga klase hin tinapay an ginamit ni Jesus han gintikangan niya an Panihapon han Ginoo?

¹³ Han gintikangan ni Jesus an Memoryal, “hiya kinuha hin usa nga tinapay, ngan bendisyonan ngan pagpinitpiniton, ngan ipanhatag ha [mga apostol].” (Markos 14:22) An tinapay hito nga okasyon amo an tinapay nga ginamit pa la ha Paskua. (Eksodo 13:6-10) Tungod kay ginluto ito nga waray ipaturubo, manipis ito ngan maragumok ngan kinahanglan pagtipiktipikon basi maihatag. Han milagroso nga ginpadamu ni Jesus an tinapay para ha yinukot ka tawo, maragumok liwat ito, kay iya gintipiktipik ito basi maipanhatag. (Mateo 14:19; 15:36) Matin-aw, kon sugad, nga an pagtipiktipik ha tinapay han Memoryal waray espirituwal nga kahulogan.

14. (a) Kay ano nga angayan nga waray libadura an tinapay han Memoryal? (b) Ano nga klase hin tinapay an mahimo gamiton o lutoon para ha Panihapon han Ginoo?

¹⁴ Mahitungod han tinapay nga ginamit han gintikangan an Memoryal, hi Jesus nagsiring: “Ini nangangahulogan han akon lawas nga para ha iyo.” (1 Korinto 11:24, NW; Markos 14:22) Angayan nga waray libadura an tinapay. Kay ano? Tungod kay an libadura nagpapasabot hin karaotan, o sala. (1 Korinto 5:6-8) An tinapay nagsimbolo han hingpit, waray-sala nga tawhanon nga lawas ni Jesus, nga angayan nga iginhalad sugad nga halad lukat. (Hebreo 7:26; 10:5-10) Gintitipigan ha hunahuna ngan ginsusunod han mga Saksi ni Jehova ini nga susbaranan nga ipinakita ni Jesus pinaagi han paggamit hin waray libadura nga tinapay ha mga pagsaurog han Memoryal. Ha pipira nga mga kahimtang, ginagamit nira an waray salakot nga biskwit han mga Judio kay waray ito dugang nga mga salakot, sugad han sibuyas o bonay. Kon waray iba, an waray libadura nga tinapay mahimo himoon nga ginagamit an gutiay nga harina  (kon posible, han trigo) nga ginsalaktan hin gutiay nga tubig. An minasa nga harina sadang ligison hin manipis ngan lutoon ha karaha nga may-ada gutiay nga asyete tubtob nga magmara ngan maragumok na an tinapay.

Kahulogan han Alaksiw

15. Ano an sulod han kopa nga ginamit han gintikangan ni Kristo an Memoryal han iya kamatayon?

¹⁵ Katapos ipasa an waray libadura nga tinapay, kinuha hi Jesus hin usa nga kopa, “nagpasalamat, ngan ihinatag ha [mga apostol], ngan hira ngatanan nanginom hito.” Hi Jesus nagsiring: “Ini an [“nangangahulogan han,” NW] akon dugo han bag-o nga testamento, nga iginbisibis tungod han kadam-an.” (Markos 14:23, 24) Ano an sulod han kopa? Pinaaslom nga alaksiw, diri bag-o nga duga han ubas. Kon gin-uunabi han Kasuratan an alaksiw, diri iginpapasabot an bag-o nga duga han ubas. Pananglitan, pinaaslom nga alaksiw, diri duga han ubas, an makakapabuto han ‘daan nga mga surudlan han alaksiw,’ sugad han ginsiring ni Jesus. Ngan an mga kaaway ni Kristo nag-akusa nga hiya “parainom hin alaksiw.” Waray pulos ito nga akusasyon kon an alaksiw bag-o la nga duga han ubas. (Mateo 9:17; 11:19) An alaksiw gin-inom durante han pagsaurog han Paskua, ngan ginamit ni Kristo ito han gintikangan niya an Memoryal han iya kamatayon.

16, 17. Ano nga klase hin alaksiw an angayan para ha mga pagsaurog han Memoryal, ngan kay ano?

¹⁶ Pula nga alaksiw la an angayan nga simbolo han ginrepresentaran han sulod han kopa, nga amo an iginbubo nga dugo ni Jesus. Hiya mismo nagsiring: “Ini an [“nangangahulogan han,” NW] akon dugo han testamento, nga iginbisibis tungod han kadam-an.” Ngan hi apostol Pedro nagsurat: “Hinbaroan na niyo [dinihogan nga mga Kristiano] nga mga tinubos na kamo, tikang ha iyo mga panginabuhi nga waray kapulsanan nga iyo pinanunod ha iyo mga ginikanan, diri ha mga bagay nga may pagkadunot, ha salapi o bulawan; kondi ha hamili nga dugo, sugad hin karnero nga waray buring ngan waray hugaw, nga amo an dugo ni Kristo.”—1 Pedro 1:18, 19.

¹⁷ An pula nga alaksiw han ubas sigurado nga amo an ginamit ni Jesus han gintikangan niya an Memoryal. Kondi, an iba han pula nga mga alaksiw yana nga panahon diri angayan tungod kay gindugangan ito hin iba nga alkohol o hin brandy o hin mga herba ngan mga panakot. Igo na an dugo ni Jesus sugad nga lukat, ngan diri na ito nagkikinahanglan hin bisan ano nga idudugang hito. Salit, diri angayan an mga alaksiw nga may-ada mga pamparasa. An kopa han Memoryal sadang sudlan hin pula nga alaksiw nga diri-pinatam-is ngan waray dugang nga alkohol. An hinimo-ha-balay, diri-pinatam-is nga pula nga alaksiw han ubas mahimo gamiton, ngan sugad man an mga alaksiw sugad han pula nga burgundy ngan claret.

18. Kay ano nga hi Jesus waray magbuhat hin milagro may kalabotan ha tinapay ngan alaksiw han Memoryal?

¹⁸ Han gintikangan ini nga panihapon, hi Jesus waray magbuhat hin milagro, nga ginbag-o an mga emblema ngadto ha iya literal nga unod ngan dugo. Kanibalismo an pagkaon hin unod han tawo ngan pag-inom hin dugo, usa nga pagtalapas ha balaud han Dios. (Genesis 9:3, 4; Lebitiko 17:10) Hi Jesus may-ada pa han iya bug-os nga unudnon nga lawas ngan han ngatanan nga iya dugo hiton nga gab-i. Iginhalad an iya lawas sugad nga hingpit nga halad, ngan an iya dugo iginbubo kinabuwasan han kulop hito gihapon nga adlaw han mga Judio, Nisan 14. Salit, an tinapay ngan alaksiw han Memoryal mga simboliko la, nga nagsisimbolo han unod ngan dugo ni Kristo. a

 An Memoryal—Usa nga Gin-aarangbitan nga Panihapon

19. Kay ano nga mahimo gamiton an sobra usa nga plato ngan sobra usa nga kopa ha pagsaurog han Panihapon han Ginoo?

¹⁹ Han gintikangan ni Jesus an Memoryal, iya gin-aghat an iya matinumanon nga mga apostol nga uminom ha usa la nga kopa. An ebanghelyo ni Mateo nasiring: ‘Hi Jesus kinuha hin usa nga kopa ngan, han magpasalamat, iya ihinatag ito ha ira, nga nasiring: “Inom kamo tikang hito, kamo ngatanan.” ’ (Mateo 26:27, NW) An paggamit hin ‘usa la nga kopa,’ ngan diri damu nga kopa, waray magin problema, tungod kay hito nga okasyon 11 la an makikiangbit ha usa la nga lamesa ngan masayon maipasa an kopa ha usa kag usa. Hini nga tuig, minilyon an magkakatirok para ha Panihapon han Ginoo ha sobra 94,000 nga kongregasyon han mga Saksi ni Jehova ha bug-os nga kalibotan. Tungod kay damu hinduro an magkakatirok para hini nga pagsaurog hiton nga gab-i, an usa la nga kopa diri posible nga magagamit para han ngatanan. Kondi gintitipigan an prinsipyo ha dagku nga mga kongregasyon pinaagi han paggamit hin damu nga kopa basi maipasa ito ha ngatanan nga mamarati ha angayan nga panahon. Ha pariho nga paagi, sobra usa nga plato an mahimo gamiton para ha tinapay. Waray ginsisiring an Kasuratan nga an kopa o baso mismo may-ada espisipiko nga disenyo. Kondi, an kopa ngan an plato sadang magpakita han dignidad han okasyon. Maaramon nga diri pun-on hinduro an kopa hin alaksiw nga bangin matakbo an alaksiw kon iginpapasa ito.

20, 21. Kay ano nga makakasiring kita nga an Memoryal usa nga gin-aarangbitan nga panihapon?

²⁰ Bisan kon sobra usa nga plato han tinapay ngan sobra usa nga kopa han alaksiw an mahimo gamiton, an Memoryal usa nga gin-aarangbitan nga panihapon. Ha kadaan nga Israel, an usa nga lalaki mahimo magtagana hin gin-aarangbitan nga panihapon pinaagi han pagdara hin hayop ngadto ha santuaryo han Dios, diin ginpapatay ito. May-ada bahin han hayop nga ginsusunog ha altar, an usa nga bahin iginhahatag ha nagdudumara nga saserdote ngan an usa pa nga bahin iginhahatag ha saserdote nga mga anak nga kalalakin-an ni Aaron, nga an naghatag han panihapon ngan an iya panimalay nakikiangbit ha panihapon. (Lebitiko 3:1-16; 7:28-36) An Memoryal liwat usa nga gin-aarangbitan nga panihapon tungod kay nag-uupod ito han tarampo nga pag-arangbitay.

²¹ Sugad nga Awtor han kahikayan, kaupod hi Jehova hini nga gin-aarangbitan nga panihapon. Hi Jesus an halad, ngan an dinihogan nga mga Kristiano nakikiangbit ha mga emblema sugad nga mga igkasi-nakikiangbit. An pagkaon ha lamesa ni Jehova nagpapasabot nga an mga nakikiangbit may kamurayawan ha iya. Uyon hito, hi Pablo nagsurat: “An tagayan ha pagbendisyon nga amon binibendisyonan diri ba tungod ha paghiangbit ha dugo ni Kristo? An tinapay nga amon gintitipiktipik, diri ba tungod ha paghiangbit ha lawas ni Kristo? Kay kita nga damu, uusa la nga tinapay, ngan uusa la nga lawas: kay kita ngatanan nakipag-arangbit ha usa nga tinapay.”—1 Korinto 10:16, 17.

22. Ano nga mga pakiana mahitungod han Memoryal an aton paghihisgotan pa?

²² An Panihapon han Ginoo amo la an relihiyoso nga ginsasaurog han mga Saksi ni Jehova kada tuig. Angayan ini tungod kay hi Jesus nagsugo ha iya mga sumurunod: “Padayon nga buhata niyo ini nga hinumdoman ha akon.” Ha Memoryal, aton ginsasaurog an kamatayon ni Jesus, an kamatayon nga nagbindikar han pagkasoberano ni Jehova. Sugad han natigamnan naton, hini nga gin-aarangbitan nga panihapon, an tinapay nagsisimbolo han kan Kristo iginhalad nga tawhanon nga lawas ngan an alaksiw nagsisimbolo han iya iginbubo nga dugo. Kondi, gutiay gud la an nakikiangbit ha mga emblema nga tinapay ngan alaksiw. Kay ano? An Memoryal ba may-ada totoo nga kahulogan para ha minilyon nga diri nakikiangbit hito? Ano gud an sadang magin kahulogan han Panihapon han Ginoo ha imo?

[Footnote]

Ano an Imo mga Baton?

• Kay ano nga gintikangan ni Jesus an Panihapon han Ginoo?

• Mationan-o kaagsob sadang isaurog an Memoryal?

• Ano an kahulogan han waray libadura nga tinapay han Memoryal?

• Ano an ginsisimbolohan han alaksiw han Memoryal?

[Mga Pakiana]

[Retrato ha pahina 15]

Gintikangan ni Jesus an Panihapon han Ginoo