‘Magin Maisugon Ngan Marig-on!’

“Magin maisugon! Akon gindaog an kalibotan.”—JUAN 16:33, NW.

 1. Tungod han magkusog nga mga kaaway nga naghuhulat ha mga Israelita ha Kanaan, ano nga pagdasig an ira nakarawat?

 HAN hirani na tumabok an mga Israelita ha Salog Jordan ngadto ha Tuna nga Iginsaad, hi Moises nagsiring ha ira: “Magin maisugon ngan marig-on. Ayaw kahadlok o patarhog ha ira, kay hi Jehova nga imo Dios an kaupod mo.” Katapos, gintawag ni Moises hi Josue, nga ginpili basi manguna ha mga Israelita ngadto ha Kanaan, ngan gin-utro ha iya an sagdon nga magin maisugon. (Deuteronomio 31:6, 7, NW) Ha urhi, gindasig ni Jehova mismo hi Josue, nasiring: “Magin maisugon ngan marig-on . . . Magin maisugon ka la ngan marig-on hinduro.” (Josue 1:6, 7, 9, NW) Angayan ito nga mga pulong. An mga Israelita magkikinahanglan hin kaisog ha pag-atubang ha magkusog nga mga kaaway nga naghuhulat ha ira ha tabok han Jordan.

 2. Aada kita ha ano nga kahimtang yana nga panahon, ngan ano an ginkikinahanglan naton?

² Yana nga panahon, an totoo nga mga Kristiano hirani na tumabok ngadto ha iginsaad nga bag-o nga kalibotan, ngan pariho kan Josue, hira kinahanglan magin maisugon. (2 Pedro 3:13; Pahayag 7:14) Kondi, naiiba an aton kahimtang kay ha kahimtang ni Josue. Hi Josue nakig-away pinaagi han mga espada ngan mga bangkaw. Nakikig-away kita hin espirituwal nga pakig-away ngan diri gud nagamit hin literal nga mga armas. (Isaias 2:2-4; Efeso 6:11-17) Dugang pa, hi Josue kinahanglan makig-away hin damu nga mabangis nga mga away bisan katapos sumulod ha Tuna nga Iginsaad. Kondi naieksperyensyahan naton an aton pinakamakuri nga mga pangalimbasog yana—antes kita tumabok ngadto ha bag-o nga kalibotan. Aton paghisgotan an pipira nga mga kahimtang nga nagkikinahanglan hin kaisog.

Kay Ano nga Kinahanglan Mangalimbasog Kita?

 3. Ano an iginpapahayag han Biblia mahitungod han punoan nga parakontra ha aton?

³ Hi apostol Juan nagsurat: “Maaram kita nga nagtitikang kita ha Dios, kondi an bug-os nga kalibotan aada ha gahum han usa nga maraot.” (1 Juan 5:19, NW) Ipinapakita hito nga mga pulong an usa ka importante nga hinungdan kon kay ano nga an mga Kristiano kinahanglan mangalimbasog nga tipigan an ira pagtoo. Kon tinitipigan han usa nga Kristiano an iya integridad, kapirdihan ito ni Satanas nga Yawa. Salit, hi Satanas nagios sugad hin “maaringasa nga leon” nga nangangalimbasog ha pagtarhog ngan paglamoy ha matinumanon nga mga Kristiano. (1 Pedro 5:8) Oo, nakikig-away hiya ha dinihogan nga mga Kristiano ngan ha ira mga kaupod. (Pahayag 12:17) Hini nga pakig-away, ginagamit niya an mga tawo nga nagbubuhat han iya mga katuyoan, maaram man hira hito o diri. Nagkikinahanglan hin kaisog an pagin marig-on kontra kan Satanas ngan han ngatanan nga iya mga ahente.

 4. Ano nga pahamangno an iginhatag ni Jesus, kondi ano nga kalidad an ipinapakita han totoo nga mga Kristiano?

⁴ Tungod kay maaram hi Jesus nga hi Satanas ngan an iya mga ahente makontra gud ha maopay nga sumat, Hiya nagpahamangno ha iya mga sumurunod: “Ira kamo igtutubyan ha kagol-anan,  ngan pamamatayon kamo, ngan pagdudumtan kamo han ngatanan nga nasud tungod han akon ngaran.” (Mateo 24:9) Natuman ito nga mga pulong ha siyahan nga siglo, ngan natutuman liwat ito yana nga panahon. Oo, an pagtimaraot nga gin-iilob han iba han mga Saksi ni Jehova yana nga panahon mapintas gud sugad la han pagtimaraot ha bug-os nga kasaysayan. Kondi, maisugon an totoo nga mga Kristiano ha pag-atubang ha sugad nga pag-ipit. Maaram hira nga “an kahadlok ha tawo nagdadara hin usa nga bitik,” ngan diri nira karuyag nga mabitik o mahilit-ag.—Proberbios 29:25.

5, 6. (a) Ano nga mga kahimtang an nagkikinahanglan han aton kaisog? (b) Paonan-o nagios an matinumanon nga mga Kristiano kon ginsasarihan an ira kaisog?

⁵ Damu an iba pa nga mga ayat gawas pa han pagtimaraot nga nagkikinahanglan han aton kaisog. Para ha iba nga mga magwarali, makuri an pakiistorya ha mga diri-kakilala mahitungod han maopay nga sumat. Nasasarihan an kaisog han mga estudyante ha eskwelahan kon tinatawag hira basi igpahayag an panumpa han pagkamaunungon ha nasud o ha bandera. Tungod kay an sugad nga panumpa usa ka relihiyoso nga kapahayagan, an Kristiano nga kabataan maisugon nga nagios ha paagi nga nakakalipay ha Dios, ngan nakakadasig an ira maopay nga buhat.

⁶ Ginkikinahanglan liwat naton an kaisog kon iniimpluwensyahan han mga parakontra an media ha pagpasarang hin maraot nga mga sumat mahitungod han mga surugoon han Dios o kon nangangalimbasog hira nga pugngan an totoo nga pagsingba pinaagi han pagplano hin “magraot pinaagi han kasugoanan.” (Salmo 94:20) Pananglitan, ano an sadang abaton naton kon an pahayagan, radyo, o telebisyon nagsusumat hin sayop nga impormasyon o mga buwa mahitungod han mga Saksi ni Jehova? Sadang ba kita mahipausa? Diri. Ginlalaoman naton an sugad nga mga butang. (Salmo 109:2) Ngan diri kita nahipapausa kon an iba natoo ha iginpublikar nga mga buwa ngan sayop nga mga impormasyon, tungod kay “an tapang natuod ha tagsatagsa nga pulong.” (Proberbios 14:15) Kondi, an maunungon nga mga Kristiano diri natoo ha tagsa nga iginpapahayag mahitungod han ira kabugtoan, ngan diri gud nira tinutugotan an maraot nga mga sumat nga magin hinungdan nga pumalya hira ha Kristiano nga mga katirok, o diri na makiangbit ha ministeryo ha kanataran, o manluya ha ira pagtoo. Ha kabaliktaran, ira “iginrirekomenda an [ira] kalugaringon sugad nga mga ministro han Dios . . . pinaagi han himaya ngan kaarawdan, pinaagi han maopay nga sumat ngan maraot nga sumat; sugad hin mga maglimbong [sumala han mga kaaway] kondi [ha pagkamatuod] maminatud-on.”—2 Korinto 6:4, 8, NW.

 7. Ano nga nag-uusisa nga mga pakiana an mahimo naton igpakiana ha aton kalugaringon?

⁷ Han nagsurat kan Timoteo, hi Pablo nagsiring: “An Dios waray paghatag ha aton han espiritu han kahadlok; kondi han gahum . . . Busa, diri mo ikaawod an pagtestigo han aton Ginoo.” (2 Timoteo 1:7, 8; Markos 8:38) Tungod kay nabasa na ito nga mga pulong, mahimo kita magpakiana ha aton kalugaringon: ‘Ikinaaawod ko ba an akon pagtoo, o maisugon ako? Ha lugar han akon trabaho (o ha eskwelahan), iginsusumat ko ba ha iba nga usa ako nga Saksi ni Jehova, o igintatago ko an kamatuoran? Naaawod ba ako nga magin naiiba kay ha iba, o nalilipay ako nga makilala tungod han akon relasyon kan Jehova?’ Kon nahahadlok an usa ha pagsangyaw han maopay nga sumat o naabat nga  may-ada hiya diri-kinakarawat nga mga tinotoohan, sadang niya hinumdoman an sagdon ni Jehova kan Josue: “Magin maisugon ngan marig-on.” Ayaw gud hingalimti, diri an opinyon han aton mga katrabaho o han aton mga kaeskwela an importante kondi an punto-de-bista ni Jehova ngan ni Jesu-Kristo.—Galasia 1:10.

Kon Paonan-o Mapapatubo an Kaisog

8, 9. (a) Ha usa nga okasyon, paonan-o ginsarihan an kaisog han siyahan nga mga Kristiano? (b) Paonan-o ginios hi Pedro ngan Juan katapos tarhugon, ngan ano an naeksperyensyahan nira ngan han ira kabugtoan?

⁸ Paonan-o naton mapapatubo an klase hin kaisog nga mabulig ha aton nga matipigan an aton integridad durante hinin makuri nga mga panahon? Bueno, paonan-o ginpatubo han siyahan nga mga Kristiano an kaisog? Tagda an nahitabo han an punoan nga mga saserdote ngan an katigurangan ha Jerusalem nagsiring kan Pedro ngan Juan nga umundang ha pagsangyaw ha ngaran ni Jesus. An mga disipulo waray umundang ha pagsangyaw ngan gintarhog ngan katapos, ginpalakat. Katapos gud hito, inupod hira ha kabugtoan, ngan hira ngatanan urosa nga nag-ampo, nasiring: “Ginoo, kitaa, an ira mga tarhog: ngan hatagi an imo mga uripon, nga igyakan nira an imo pulong ha waray kahadlok.” (Buhat 4:13-29) Ha pagbaton, ginparig-on hira ni Jehova pinaagi han baraan nga espiritu, ngan sugad han ginsiring ha urhi han Judio nga mga lider, ira “ginpuno an Jerusalem” han ira ipinanutdo.—Buhat 5:28.

⁹ Aton usisahon an nahitabo hiton nga okasyon. Han an mga disipulo gintarhog han Judio nga mga lider, waray hira umundang ha pagsangyaw tungod han pag-ipit. Lugod, an mga disipulo nag-ampo para han kaisog basi magpadayon ha pagsangyaw. Katapos, nangalimbasog hira nga buhaton an ira igin-ampo, ngan ginparig-on hira ni Jehova pinaagi han iya espiritu. Ipinapakita han ira eksperyensya nga an iginsurat ni Pablo paglabay hin pipira ka tuig ha naiiba nga konteksto naaplikar ha mga Kristiano kon hira gintitimaraot. Hi Pablo nagsiring: “Ngatanan mahihimo ko ha gahum han nagpaparig-on ha akon.”—Filipos 4:13.

10. Paonan-o an eksperyensya ni Jeremias nabulig hadton kinaiya na nga awdanon?

¹⁰ Kondi, ano man kon pananglitan, kinaiya na nga awdanon an usa ka tawo? Makakag-alagad ba hiya kan Jehova hin maisugon bisan pa han pagkontra? Sigurado! Hinumdumi an reaksyon ni Jeremias han ginpili hiya ni Jehova sugad nga propeta. An batan-on nga olitawo nagsiring: “Ako usa nga bata.” Matin-aw, inabat hiya hin kawaray-kapas. Kondi, gindasig hiya ni Jehova pinaagi hini nga mga pulong: “Ayaw siring: Ako usa nga bata. Kay ha bisan kan kanay ko ikaw pakadtoa ikaw makadto, ngan ha bisan ano an isugo ko ha imo ikaw magyakan. Ayaw kahadlok tungod ha ira; kay ako upod ha imo ha pagluwas ha imo.” (Jeremias 1:6-10) Sinarig hi Jeremias kan Jehova, ngan sugad nga resulta, pinaagi han kusog ni Jehova nalamposan niya an iya pag-alang ngan nagin maisugon hinduro nga saksi ha Israel.

11. Ano an nabulig ha mga Kristiano yana nga panahon nga magin maisugon pariho kan Jeremias?

 ¹¹ An dinihogan nga mga Kristiano yana nga panahon may-ada toka nga pariho han toka ni Jeremias, ngan sinusuportahan han “daku nga panon” han ‘iba nga mga karnero,’ nagpapadayon hira ha pagpasamwak han mga katuyoan ni Jehova, bisan pa han kawaray-interes, pagtamay, ngan pagtimaraot han mga tawo. (Pahayag 7:9, NW; Juan 10:16) Nadadasig hira han mga pulong ni Jehova kan Jeremias: “Ayaw kahadlok.” Diri gud nira hinngangalimtan nga ginsugo hira han Dios ngan nagsasangyaw han iya mensahe.—2 Korinto 2:17.

Mga Susbaranan han Kaisog nga Takos Subaron

12. Ano nga maopay gud nga susbaranan han kaisog an ipinakita ni Jesus, ngan paonan-o niya gindasig an iya mga sumurunod?

¹² Mabubuligan kita ha aton mga pangalimbasog nga mapatubo an kaisog kon aton pamalandungon an mga susbaranan han iba nga, pariho kan Jeremias, ginios hin maisugon. (Salmo 77:12) Pananglitan, samtang aton gin-uusisa an ministeryo ni Jesus, nadadasig kita han iya kaisog han ginsulay hiya ni Satanas ngan han inatubang hiya ha pagkontra han Judio nga mga lider. (Lukas 4:1-13; 20:19-47) Pinaagi han kusog ni Jehova, nagmarig-on hi Jesus, ngan antes gud han iya kamatayon, hiya nagsiring ha iya mga disipulo: “Ha kalibotan may-ada kamo kagol-anan, kondi magin maisugon! Akon gindaog an kalibotan.” (Juan 16:33, NW; 17:16) Kon susundon han mga disipulo ni Jesus an iya susbaranan, hira liwat magigin mga magdaraog. (1 Juan 2:6; Pahayag 2:7, 11, 17, 26) Kondi kinahanglan “magin maisugon” hira.

13. Ano nga pagdasig an iginhatag ni Pablo ha mga taga-Filipos?

¹³ Mga pipira ka tuig katapos mamatay hi Jesus, ginpriso hi Pablo ngan hi Silas ha Filipos. Ha urhi, gindasig ni Pablo an kongregasyon ha Filipos “nga magrig-on . . . ha usa nga espiritu, nga magkaurosa pagtinguha tungod ha pagtoo han maopay nga sumat; ngan ha waray kahadlok ha bisan ano nga bagay tungod ha [ira] mga kaaway.” Ha pagparig-on ha ira hini nga kahimtang, hi Pablo nagsiring: “Ha ira [an gintitimaraot nga mga Kristiano] amo an tigaman nga dayag han pagkawara [an mga nagtitimaraot], kondi ha iyo, tigaman nga dayag han kaluwasan; ngan ini tikang ha Dios: kay ha iyo igintugot tungod kan Kristo, diri la an pagtoo ha iya, kondi an pag-antos man tungod ha iya.”—Filipos 1:27-29.

14. Ano an resulta han kaisog ni Pablo ha Roma?

¹⁴ Han nagsurat hi Pablo ha kongregasyon ha Filipos, priso na liwat hiya, hini nga panahon ha Roma. Kondi, nagpadayon hiya ha pagsangyaw hin maisugon ha iba. Ano an resulta? Hiya nagsurat: “An akon mga gapos nasayoran nga kan Kristo, ha bug-os nga hukmanan nga Romanhon, ngan ha iba pa man; ngan an kaurog [“kadam-an,” NW] han mga kabugtoan ha Ginoo nga mga magsarigon tungod ha akon mga gapos, nangahas hin labi pagwali ha pulong han Dios hin waray kahadlok.”—Filipos 1:13, 14.

15. Diin kita makakaagi hin mag-opay nga mga susbaranan han pagtoo nga magpaparig-on han aton determinasyon nga magin maisugon?

¹⁵ An susbaranan ni Pablo makapadasig ha aton. Sugad man an mag-opay nga mga susbaranan han mga Kristiano yana nga panahon nga nag-iilob han pagtimaraot ha mga nasud nga ginmamandoan han mga diktador o mga klero. An mga istorya mahitungod han damu ha ira mababasa ha Barantayan ngan Awake! nga mga magasin ngan ha Yearbooks of Jehovah’s Witnesses. Samtang binabasa mo iton nga mga istorya, hinumdumi nga an mga indibiduwal nga iginsusumat ordinaryo nga mga tawo pariho ha aton; kondi han nakada hira ha makuri hinduro nga mga kahimtang, hi Jehova naghatag ha ira hin labaw nga gahum ngan nakailob hira. Makakasiguro kita nga maghahatag liwat hiya ha  aton hin pariho nga gahum kon an mga kahimtang nagkikinahanglan hito.

An Aton Pagin Maisugon Nakakalipay Ngan Nagpapasidungog kan Jehova

16, 17. Paonan-o naton mapapatubo an pagin maisugon yana nga panahon?

¹⁶ Kon an usa marig-on para han kamatuoran ngan katadongan, maisugon hiya. Kon marig-on hiya bisan kon nahahadlok, mas maisugon pa gud hiya. Oo, bisan hin-o nga Kristiano mahimo magin maisugon kon karuyag gud niya nga buhaton an kaburut-on ni Jehova, kon determinado hiya nga magpabilin nga matinumanon, kon pirme hiya nasarig ha Dios, ngan kon pirme hiya nahinunumdom nga ha naglabay hi Jehova nagparig-on han damu nga mga indibiduwal nga pariho ha iya. Dugang pa, kon nasasabtan naton nga an aton pagin maisugon nakakalipay ngan nagpapasidungog kan Jehova, mas determinado pa gud kita nga diri manluya. Andam kita ha pag-ilob han pagtamay o maraot nga pagtrato tungod kay nahigugma gud kita ha iya.—1 Juan 2:5; 4:18.

¹⁷ Ayaw gud hingalimti nga kon kita nag-aantos tungod han aton pagtoo, diri ito nangangahulogan nga may-ada kita nabuhat nga sala. (1 Pedro 3:17) Nag-aantos kita tungod ha pagsuporta ha pagkasoberano ni Jehova, tungod ha pagbuhat han maopay, ngan tungod kay diri kita bahin han kalibotan. May kalabotan hini, hi apostol Pedro nagsiring: “Kon kamo magbubuhat hin maopay, ngan mag-aantos hito, ngan mag-iilob, kinaruruyag ini han Dios.” Hi Pedro nagsiring liwat: “An mga nag-antos man sumala ha kaburut-on han Dios igtubyan unta nira an ira mga kalag nga may mag-opay nga mga binuhatan ngadto ha matinumanon nga Magburuhat.” (1 Pedro 2:20; 4:19) Oo, an aton pagtoo nakakalipay ha aton mahigugmaon nga Dios, hi Jehova, ngan nagpapasidungog ha iya. Marig-on gud ito nga hinungdan nga magin maisugon!

Kon Kinahanglan Magpahayag Kita ha mga Awtoridad han Gobyerno

18, 19. Kon maisugon nga natindog kita ha atubangan han usa nga hukom, ano nga mensahe an aton iginpapahayag?

¹⁸ Han nagsiring ni Jesus ha iya mga sumurunod nga hira pagtitimarauton, hiya nagsiring liwat: “Igtutubyan kamo [han mga tawo] ha mga hukmanan, ngan didto ha ira mga sinagoga paghahampakon kamo nira. Oo, ngan ha atubangan han mga gobernador ngan han mga hadi pagdadad-on kamo tungod ha akon, ha pagpamatuod ha ira, ngan ha mga Hentil.” (Mateo 10:17, 18) An pag-atubang ha usa nga hukom o magmarando tungod han palso nga mga akusasyon nagkikinahanglan hin kaisog. Kondi, kon maisugon nga ginagamit naton ito nga mga okasyon ha pagpamatuod hito nga mga indibiduwal, aton ginsasalingabot an makuri nga kahimtang nga magin higayon ha pagbuhat han importante nga butang. Sugad hin iginpapahayag naton ha mga naghuhukom ha aton an mga pulong ni Jehova, nga nahisurat ha ikaduha nga Salmo: “Yana, O mga hadi: magmakinaadmananon kamo papagtutdo [“magpasaway,” NW] kamo, mga hukom ha tuna. Mag-alagad kamo kan Jehova ha kahadlok.” (Salmo 2:10, 11) Kon an mga Saksi ni Jehova sayop nga inaakusahan ha hukmanan, an mga hukom agsob nga nasuporta ha kagawasan han pagsingba, ngan inaapresyar naton ito. Kondi, an iba nga mga hukom natugot nga maimpluwensyahan hira han mga parakontra. Ha sugad nga mga hukom, an Kasuratan nasiring: “Magpasaway kamo.”

 ¹⁹ An mga hukom sadang mahibaro nga an gihitaasi nga balaud amo an balaud ni Jehova nga Dios. Sadang hinumdoman nira nga an ngatanan nga mga tawo, upod na an mga hukom, may baratunon kan Jehova nga Dios ngan kan Jesu-Kristo. (Roma 14:10) Para ha aton, makarawat man naton an hustisya tikang ha tawhanon nga hukom o diri, may-ada kita han ngatanan nga hinungdan nga magin maisugon tungod kay hi Jehova nasuporta ha aton. An Biblia nasiring: “Malipayon an ngatanan nga naayop ha iya.”—Salmo 2:12, NW.

20. Kay ano nga magigin malipayon kita kon kinahanglan mag-ilob kita han pagtimaraot ngan pakaraot?

²⁰ Ha Sermon ha Bukid, hi Jesus nagsiring: “Bulahan kamo, kon kamo pagdurugasan, ngan pagtitimarat-an ngan kon pagyayaknan ha ngatanan nga magraot hin buwa kontra ha iyo tungod ha akon. Magkalipay ngan maghimaya kamo, kay daku an iyo balos ha langit, kay amo ini an ira pagtimarat-i han mga manaragna nga una ha iyo.” (Mateo 5:11, 12) Siyempre, an pagtimaraot mismo diri makalilipay, kondi an aton karig-on bisan pa han pagtimaraot, upod na an nagpapakaraot nga mga sumat ha media, usa nga hinungdan han paglipay. Nangangahulogan ito nga napapalipay naton hi Jehova ngan makarawat kita hin balos. An aton pagin maisugon nagpapakita nga may-ada kita putli nga pagtoo ngan nagpapasarig ha aton nga may-ada kita han pag-uyon han Dios. Oo, ipinapakita hito nga may-ada kita bug-os nga pagsarig kan Jehova. Importante ito nga pagsarig para ha usa nga Kristiano, sugad han ipapakita han masunod nga artikulo.

Ano an Imo Hinbaroan?

• Ano nga mga kahimtang yana nga panahon an nagkikinahanglan han aton kaisog?

• Paonan-o naton mapapatubo an kalidad nga kaisog?

• Hin-o an pipira han mag-opay nga mga susbaranan han kaisog?

• Kay ano nga karuyag naton gumios nga may kaisog?

[Mga Pakiana]

[Mga Retrato ha pahina 9]

Hi Simone Arnold (Liebster na yana) ha Alemanya, Widdas Madona ha Malawi, ngan hi Lydia ngan hi Oleksii Kurdas ha Ukraine nagpakita hin kaisog ngan inato ha usa nga maraot

[Mga Retrato ha pahina 10]

Diri naton ikinaaawod an maopay nga sumat

[Retrato ha pahina 11]

An kaisog ni Pablo ha prisohan nakabulig ha pagpasarang han maopay nga sumat

[Retrato ha pahina 12]

Kon maisugon nga isaysay naton ha usa nga hukom an aton Kasuratanhon nga gintotoohan, iginpapahayag naton an importante nga mensahe