An Adlaw nga Sadang Hinumdoman

ITO an adlaw nga bug-os nga nakagbag-o ha tidaraon han katawohan para han ira dayon nga kalipayan. Waray iba nga adlaw ha kasaysayan an may-ada han sugad nga epekto ha tidaraon han katawohan. Ito an adlaw nga natapos ni Jesus an ngatanan niya nga buruhaton ha iya pagkanhi ha tuna. Samtang nakaraysang ha pasakitan nga kahoy, nagginhawa hiya han iya kataposan nga gininhawa ngan nagsinggit: “Natuman na”! (Juan 19:30) Ano an katuyoan han pagkanhi ni Jesus?

“An Anak han Tawo waray kumanhi,” siring han Biblia, “basi pag-alagdon kondi ha pagmangno, ngan paghatag han iya kinabuhi nga lukat han kadam-an.” (Mateo 20:28) Iginhatag ni Jesus an iya kalag, o kinabuhi, basi matalwas an katawohan tikang ha napanunod nga sala ngan kamatayon. Oo, “an Dios naghigugma gud han kalibotan, nga iya iginhatag an iya Bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.” (Juan 3:16) Birilhon gud nga tagana an halad ni Jesus!

An adlaw han kamatayon ni Jesus amo an pinakaimportante nga adlaw tungod han usa pa nga hinungdan. Hito nga adlaw, gintutdoan han Anak han Dios an iya mga apostol hin importante nga mga leksyon nga mabulig ha ira nga magpabilin nga matinumanon. Sigurado nga an iya kataposan nga mga pulong nakabantad gud ha mga kasingkasing hiton nga mga disipulo! Ano an iya mga katutdoan? Paonan-o kita makakapahimulos tikang ha igintutdo ni Jesus ha ira? Ini nga mga pakiana paghihisgotan ha sunod nga artikulo.