“Magin Duok Kamo ha Dios, Ngan Hiya Magigin Duok ha Iyo”

Antes Ngan Katapos—Nagbag-o an Iya Kinabuhi

NAGIN diri-makaruruyag ngan waray kahulogan an kinabuhi para kan Matsepang! Usa hiya nga batan-on nga babaye ha Lesotho, usa nga nasud ha sentro nga bahin han Aprika del Sur. Nagdaku hi Matsepang nga Katoliko. Kondi, imbes nga mabuligan nga magin duok ha Dios, ha sulod hin mga tuig gin-abuso hiya han mga madre nga nag-aghat ha iya ha imoral nga mga buhat pinaagi han paghugay ha iya hin kwarta.

Sugad nga resulta, naiba an panhunahuna ni Matsepang ha relihiyon ngan diri hiya makatoo ha usa nga mahigugmaon nga Maglalarang nga napaid gud ha iya tawhanon nga mga linarang. Tungod han pagpasibaya ngan pag-abuso nga iya gin-antos, nagkaada hi Matsepang hilarom nga mga samad ha emosyon ngan mga pagbati han duro nga pagkawaray-pulos. Nagdaku hiya nga duro kamadarahog ngan agresibo. Nagresulta ini ha pagkaada niya mabangis nga pamatasan.

Ha kamaihaan hi Matsepang nagin bahin han usa nga gang nga nanunulis hin mga tawo nga sakay ha mga tren. Gindakop hiya ngan ginsentensyahan hin kaprisohan ha Aprika del Sur. Ha urhi, gindistyero hiya ngadto ha iya natawohan nga nasud, ha Lesotho, diin nagpadayon hiya ha pagkinabuhi sugad nga kriminal, parahubog, madarahog, ngan imoral.

Ha pinakamakasurubo nga bahin han iya kinabuhi, hi Matsepang desperado nga nag-ampo ha Dios para hin bulig. Hiya nagsaad, “Dios ko, kon makatalwas ako, bubuhaton ko an akon mahihimo ha pag-alagad ha imo.”

Waray pag-iha, gindaop hi Matsepang hin mga misyonero nga mga Saksi ni Jehova. Hira nagtanyag ha iya hin pag-aram ha Biblia. Pinaagi han iya pag-aram, nasantop niya nga an Dios may hustisya ngan mapinairon. Ha pagkamatuod, hinsabtan niya nga hi Satanas, an ‘amay han buwa,’ nagamit hin tuso ngan malimbungon nga mga taktika ha pagpasilsil ha iba han pagbati nga waray pulos hira ngan ha pagpatoo ha ira nga diri gud hira mahimo higugmaon ni Jehova.—Juan 8:44; Efeso 6:11.

Ha kabaliktaran, naliaw gud hi Matsepang han hinbaroan niya nga mahimo kita magkaada husto nga pagtahod ha kalugaringon kon magbasol kita han aton makasasala nga naglabay, maghangyo hin kapasayloan han Dios, ngan mangalimbasog nga lipayon hiya! Nabuligan hiya nga makasabot nga “an Dios daku pa ha aton kasingkasing” ngan nagtatagad ha aton ha paagi nga bangin naiiba gud ha aton pagtagad ha aton kalugaringon.—1 Juan 3:19, 20.

Nalipay hi Matsepang nga mabasa ini nga mga pulong ni salmista David: “Hi Jehova hirani hadton may masinakitnon nga kasingkasing, ngan nagluluwas hiya hadton mga mabinasulon [“nadaot,” NW] an espiritu.” (Salmo 34:18) Sugad nga usa hadton “nadaot an espiritu,” nasantop niya nga diri iginsasalikway ni Jehova an iya mga surugoon, bisan kon an iba ha ira nanluluya o naabat  nga diri hira importante. Nalipay an iya kasingkasing ha paghibaro nga napaid hi Jehova ha ngatanan niya nga kakarnerohan ngan nabulig ha ira durante han makuri nga mga panahon. (Salmo 55:22; 1 Pedro 5:6, 7) Labi nga nadasig hiya han mga pulong: “Magin duok kamo ha Dios, ngan hiya magigin duok ha iyo.”—Jakobo 4:8, NW.

Waray pag-iha an gahum han Pulong han Dios, an Biblia, nakita ha pagkinabuhi ni Matsepang. Nagtikang hiya tumambong hin regular ha Kristiano nga mga katirok ngan ginbayaan an iya diri-kasuratanhon nga mga binuhatan. Ano an resulta? Diri na hiya naabat nga diri takos ha gugma ngan pag-uyon han Dios. Tikang han mabawtismohan hiya sugad nga usa han mga Saksi ni Jehova, ginasto na hiya hin yinukot ka mga oras ha Kristiano nga ministeryo sugad nga magwarali han maopay nga sumat han Ginhadian. Bisan pa han mga samad ha emosyon tungod han naglabay, hi Matsepang may-ada na yana malipayon ngan mapulsanon nga kinabuhi. Maopay gud ito nga kapahayagan han gahum han Biblia ha pagpauswag han mga kinabuhi!—Hebreo 4:12.

[Blurb ha pahina 9]

“Dios ko, kon makatalwas ako, bubuhaton ko an akon mahihimo ha pag-alagad ha imo”

[Kahon ha pahina 9]

Mga Prinsipyo ha Biblia nga Nagios

An mga prinsipyo han Biblia nga nagliliaw ha mga biktima han pagmaltrato nag-uupod han masunod:

“Ha kadam-an ha akon pamurubuot ha sulod ko, an imo [kanan Dios] mga pagliaw nakalipay ha akon kalag.” (Salmo 94:19) An “mga pagliaw” ni Jehova nga aada ha iya Pulong surok han daku nga kahimyang. An paghunahuna hito durante han pagpamalandong ngan pag-ampo nakakabulig ha pagpakalma han nakakapabaraka nga mga ginhuhunahuna ngan nagpaparig-on han pagsarig ha Dios sugad nga masinabuton nga Sangkay.

“Gintatambal niya [Jehova] an may mga ruba nga kasingkasing, ngan ginpuputos niya an ira mga samad.” (Salmo 147:3) Kon aton inaapresyar an kalooy ni Jehova ngan an iya tagana ha pagtabon han aton mga sala pinaagi han halad lukat ni Jesus, may pagsarig nga makakadaop kita ha Dios nga diri inaabat an dugang nga pagin salaan ha kasingkasing. Magriresulta ini hin diri-matupngan nga kahimyang ngan kamurayawan ha hunahuna.

“Waray usa nga sadang makakanhi ha akon [Jesu-Kristo], kon diri pagdad-on han Amay nga nagpakanhi ha akon ngan akon pagbabanhawon hiya ha kataposan nga adlaw.” (Juan 6:44) Pinaagi han iya baraan nga espiritu ngan pinaagi han pagsangyaw-han-Ginhadian nga buruhaton, hi Jehova mismo an nagpapaduok ha aton ngadto ha iya Anak ngan naghahatag ha aton hin paglaom nga kinabuhi nga waray kataposan.